AXR.txt

rîchiu saelde, hôher sin
daz ist von gote ein grôz gewin
den got alsô besinnet
daz er saelde gewinnet.
ûf hôhe kunst ist ahte niht,
ist si sunder saelden phliht,
sô wirt si gar vernihtet,
ob saelde ir niht zuo phlihtet.
orthabunge rehter kunst
ist saelden heil, gelückes gunst,
der sî nâch saelden werben kan
daz im got gelückes gan.
der kunst geleite saelde treit.
swer iht tihtet oder seit,
der muoz kunst bî saelden tragn
odr sîn kunst der saelde entsagn
ofte ergât ouch diu geschiht
daz man den künste rîchen siht
dem selten ist daz heil geschehn
daz sîn kunst saelec sî gesehn.
lobelich guot getihte
daz vindet ie die rihte,
als ez diu saelde tihtet
und ez gelücke rihtet.
florieret saeldekunst ir kraft,
sô edelt sich diu meisterschaft
und wirt diu kunst gekreftet,
der sin gemeisterscheftet.
nû was ich, als ich eht noch bin,
als gemuot daz ich den sin
ie dar ûf arbeite
daz got zuo geleite
geruochte vüegen mîner kunst
saelde und edeler herzen gunst.
sol des gelücke walten
und mir den prîs behalten
ûf den ich sus garbeitet hân,
sô wil ich ûf den süezen wân
und ûf des lônes gewin
arbeiten aber mînen sin
und wil iu bescheiden hie
an dirr âventiure wie
ein der tugentrîchste man
der ritters namen ie gewan
dirre welte prîs erwarp,
wie er warp, wier verdarp,
wier zer welte wart geborn,
wie im besunder wart erkorn
der welte hoehstiu werdekeit,
wier die werdekeit erstreit
daz sîn lop, sîn name, sîn lebn
an lobe ze mâz ist gegebn
den tumben und den wîsen:
swer werdekeit wil prîsen,
der muoz den stolzen degen wîs
prîsen und sînen prîs.
er was geborn von hôher art
daz vor den zîten niemen wart
geborn ûf die erde
der mit sô hôhem werde
sô manger zungen wart erkant.
in hât manec man genant
und von im âventiure geseit
mit lügen und ouch mit wârheit,
der doch niht rehte hât geseit
von im die rehten wârheit.
durch daz hân ich gevlizzen mich
al mîne tage sît daz ich
tihtens ie begunde,
wiech diu maere vunde
wie der tugentrîche
alexander wunderlîche
wunders ûf der erde hie
mit wunderlîcher kraft begie.
dar an hât diu wârheit mir
ervüllet mînes herzen gir:
ich bin es nû wol zende komn
und hân von wârheit vernomn
wie sîn ellenthaftiu hant
betwanc vil liute und manec lant,
als uns hât bewîset des
der wîs aristôtiles,
der den stolzen degen zôch
den valschiu missewende ie vlôch,
und dem er zaller zît enbôt
sîn gelück und sîn nôt
und swaz im wunders ie geschach
als er im und er uns verjach:
alsô prüeve ich die geschiht
als uns ir beider wârheit giht.
kan ich nû vollebringen
mit sinneclîchen dingen
des noch daz maere wîset, -
prîsen, dâ ez prîset,
vehten, dâ ez vihtet,
slihten, dâ ez slihtet,
wundern, dâ ez wundert,
sundern, dâ ez sundert
die boesen von den besten,
kan ich die wol gegesten
die mir diu schrift vor bestet
und zuo den besten gestet, -
sô wil ich gegen den maeren stegn
und wil iu sagen wer der degn
von art und von gebürte was,
als ich die âventiure las.
diu hât mich bewîset sô
daz hie vor in egiptô
was ein edel künec rîch,
dem dô niemen was gelîch
an listen und an manheit.
swaz man von zouberlisten seit
dar an was sîn kunst sô grôz
das niender lebte sîn genôz
bî der zît übr allez lant,
der was nektânabus genant.
gewaltec und hêre
nâch küneclîcher lêre
was sîn geburt gehêret,
vil kunst was er gelêret.
tet er iender valschen wanc
sunder sînes herzen danc,
des seit von im des maere niht,
wan ez im von wârheit giht
er waer al der liste vol
die man von wîsheit wissen sol.
von nigromanzîe
und von astronomîe
kunde er waz er wolde.
swaz man bevinden solde,
dar nâch kund er wol liezen.
ouch kunde er wol entsliezen
der tunklen raeterschen wort,
er hâte an witzen solhen hort
daz er die troume rehte riet,
ir komenden wârheit gar beschiet.
ouch kunde er wol von listen daz
wie man der dinge lenge maz
von gêometrîe:
diu kunst was sîn âmîe
und er ir rehter âmîs.
er was vil wîser danne wîs,
sîn kunst ir zil sô hôhe ûf stiez
übr al die man dô kündec hiez,
daz ez ir deheiner nie
gevâhen mohte noch gevie
mit künsterîchen sinnen.
swes er wold ie beginnen,
dar an was sîn hôher sin
ein künsterîcher übrgewin.
alsus was er, daz ist wâr,
von grôzen vorhten manec jâr
bewart mit sînen listen,
sîn list kund in wol vristen
daz in in mangen zîten
nie man kund an gerîten
noch mohte in sînem lande,
wan er vor hin bekande
sîner vîende getât:
swenne ir vîentlîcher rât
iht arges hâte ûf in gedâht,
sô hâte er schiere an ende brâht
wie im gelingen solde.
swaz im geschehen wolde,
dar an warnet in sîn list.
in dirre selben jâres vrist
was egipte daz lant
in solher wîsheit bekant
daz dise liste groezer dâ
wâren vil dan anderswâ.
swaz irdischiu wîsheit
von astronomîe geseit
unde von der sternen kraft,
daz kunden sie nâch meisterschaft
von abrahâmes lêre gar,
als er sî lêrte und brâhte dar.
sus tâten sie der welte kunt
dirre selben liste vunt
mit wârheit, als sie kunden
und sie die liste vunden.
nû seit uns diu schrift alsô
daz in den selben zîten dô
was der groeste gewalt
der ûf der erde was gezalt,
in dem lande in persîâ.
gewalteclîche truoc dô dâ
des künecrîches krône
mit hôher wirde schône
ein vollekomen wîgant
der artâxerses was genant.
von dem seit uns anderswâ
scolasticâ histôrîâ,
er waer geheizen ochus.
dem hâte nektânabus
ein lant genomen mangen tac
daz nâhen sînem lande lac.
daz zurnde er sêre und was im leit,
mit grôzer kraft was er bereit,
als er in wolde rîten an.
dô kam gevarn ein sîn man
und warnet in gein wer alsus
< rîcher künc nektânabus,
dû solt bereiten dich ze wer!
artâxerses ist mit her
geriten an dîn rîche,
er lît gewalteclîche
in dînem lande: er wil dich hern,
dû muost dich manlîche wern
oder dû wirst gar verhert
von sîner kraft der sich niht wert.
alle sîne ritterschaft
wil ich dir nennen und ir kraft,
diu im ist mit helfe bî.
partî und mêdî
sint mit grôzen kreften dâ.
die von mesopotâmîâ
hânt sich groezlîch ûz genomn
und sint im ze helfe komn.
dâ lît gewalteclîche
sîrîâ daz rîche
mit einem wünneclîchen her.
die von caldêâ sint mit wer
durch in komen in daz lant.
mangen stolzen wîgant
hânt die von ircânje dâ,
sô hânt die von arâbîâ
grôz her mit hôher rîchheit.
sich hânt mit kreften dar bereit
serîtes ouch mit grôzer schar.
bos porî sint komen dar
mit mangem degen ûz erkorn.
in sîne helfe hânt gesworn
argînî und agriôpagî.
die ellenthaften hastriî
sint dâ mit werlîcher hant.
die besten hân ich dir genant,
noch hât er mangen werden man
des ich niht wol genennen kan.
ich sach diz kreftige her
unser lant âne wer
brennen rouben und hern
ir menige kan sich niht erwern.> -
< benamen, sprach der künec dô,
mich dunket des daz mir dîn drô
mê vorhtlîcher vreise jehe
dan übels mir von in geschehe:
hâst dû wer, sô wer dû dich!
ouch kan ich wol bedenken mich
wie ich mich behüeten sol.
phlic dû dîner veste wol
mit gar wîslîcher huote!
mit sô vorhtlîchem muote
hâst dû diz maere ein teil gesagt:
dû weist doch wol, ein leu verjagt
âne wer vil mangen hirz,
dû solt wol gelouben mirz
daz an des mannes herzen stât
swaz er vrümekeit begât.
ir menige vürhte ich kleine:
ouch bin ich niht als eine,
sô arm noch sô ungemuot,
ich hân hêrschaft und guot,
ich bin mit solher wer gewesn
daz ich mit êren bin genesn
unz her in allen mînen tagn.
dû solt den lantherren sagn
daz sie manlîcher wer
phlegen gein der vînde her
und ellenthafter huote,
mit lîb und mit guote
süln sie mit witzen hân behuot
ir lant, ir lîp, ir êre, ir guot.>
von dem künge huop sich dan
dirre vürst und sîn man.
swie zorn im diz maere
an disem herren waere,
er vorhte iedoch der vînde kraft
und ir werlîche ritterschaft.
nû was bî den zîten
in al der welte wîten
gewurzet sêr des tiuvels spot.
an diu touben apgot
betet allez daz dô was,
niemen gotes lêre las
wann wâ die juden wâren
dô in den selben jâren,
die lebten in der alten ê
nâch gots gebote und niemen mê.
diz was lange vor der vrist
daz unser herre jêsus krist
genaeme an sich die menschheit,
als uns der wâre gloube seit.
der tiuvel het die heidenschaft
gebunden mit solher kraft
daz er den liuten antwurt bôt
nâch ir bete in aller nôt
ûz der ápgote munde
mit worten alle stunde.
nû gie der künec drâte
in eine kemenâte
und wolde kunnen und sehn,
bevinden reht unde spehn
wie im solde gelingen.
er hiez im balde bringen
ein becke regenwazzers vol.
ob ich iu rehte sagen sol
wie er bevant die geschiht
als uns diu âventiure giht,
waz im solde dô geschehn,
als ich diz maere hoere jehn,
sô sage ich iu wie erz bevant.
ein holz ist ebênus genant,
daz niemêr verbrinnet
swie heiz ez gewinnet,
des nam er in die hant ein rîs,
er begunde in mange wîs
sîne kunst erzeigen dâ,
mit kunst twanc er den tiuvel sâ
daz er kam und lêrte
sîn lôz daz ez sich kêrte.
dar nâch als im solde ergân,
er sach als ich vernomen hân,
sîn lôz an allen enden
nâch vluste sich wenden:
sîn liezen allenthalp verlôs,
der vînde lôz den sic erkôs.
zehant als in daz lôz betrouc
und im des siges wân erlouc,
er begunde machen
mit wîslîchen sachen
von wahse kleiniu schiffelîn,
diu sîn vorbilde solden sîn
und sînes ungelückes lôz,
diu sazter vür sich ûf den vlôz:
diu er im nam besunder,
diu giengen elliu under.
sîn lôz gelückes nie verjach,
swie dick er mit kunst gesach,
sô kund er im niht verjehn,
wan im sold unheil geschehn.
< o wê, dâhte der künec dô,
wie wenket mir gelücke sô?
waz ist der gote râche ûf mich?>
mit dem gedanke huop er sich
vür sînen got an sîn gebet.
swaz ebenmâze er ie getet
gegn der künftigen geschiht,
sô bevant er anders niht
wan lîp verlorn, êre und guot.
dô geriet im sîn muot,
möht er den lîp gesunt bewarn,
daz er sîn rîche lieze varn.
von vorhte entweich im al sîn maht.
dar nâch an der andern naht
nam er als ich hoere sagn,
swaz er ie möhte getragn
von golde und von gesteine,
sus vuor er dan aleine
alsô verborgen er entran
daz ez nie dehein sîn man
in sînem lande dô bevant.
er leit an sich wîz gewant
als er alle sîne tage
waer gesîn ein wîssage.
sîn hâr hiez er snîden abe.
swaz er nôtdürftiger habe
ze sînen listen solde hân
des wolde er hinder im niht lân,
dâ mite er dicke vil gewan
dô er der rîcheit entran,
dâ muoste er mite gewinnen,
wan er muoste entrinnen.
liute guot hêrschaft lant
und swaz im rîcheit was benant
sîn ouge niemer mê gesach.
er vuor dô sîn vluht geschach,
in pelûsium daz lant,
dar in was er vil unbekant
wer er von gebürte was.
sîniu zouberbuoch er las
und was der liute wîssage
nâch sîner dürfte bejage.
als er urloup dô genam
in der môre lant er kam
und was ein wîssage ouch dâ.
gein mâzedônje kêrter sâ.
nû lât iu rehte wîsen hie
wie ez dort hinder im ergie!
dô er von sînem lande entran,
sîne mâge und sîne man
giengen für ir grôzen got
und bâten in durch sîn gebot
mit ir gebete mange stunt
daz er in rehte taete kunt
diu endehaften maere
war in komen waere
nektânabus, ir herre wîs.
dô sprach der got sêrapîs
< ir geseht in niemer mêr.
von persîâ der künec hêr
der sol gewalteclîche
betwingen iuwer rîche.
daz kan niemen understân,
ez muoz im werden undertân.
nektânabus hât ez verlorn,
doch wirt von im ein sun geborn
der sol her nâch her wider komn.
der iu daz lant hât genomn,
den sol er twingen und diz lant.>
dô macheten sie sâ zehant
einen stein vil wol erhabn
und hiezen dran mit buochstabn
schrîben wie ez komen was,
dar an man die gehügede las
des künges und ouch solde lesn
wie ez dar nâch solde wesn.
in disen selben zîten sâ
was der künc von persîâ
mit kreften in egipten komn
und hâte an sich daz lant genomn.
nektânabus al dort beleip
in mâzedônje er lange treip
sînen zouberlîchen list
mit kunst durch sîne genist.
ein künc philippe was genant
der was dô künec übr daz lant,
der hâte ein minneclîchez wîp
diu im liep alsam der lîp
von minnen und von liebe was
diu was genant olimpias,
edel schoene und hôchgemuot
in wîplîcher kiusche guot
wîte erkant von hövschen sitn.
ir man der künc was ûz geritn
mit her in vremdiu lant mit kraft,
er hâte grôze ritterschaft
brâht in vremdiu rîche,
er twanc vil krefteclîche
mit sîner ellenthafter hant
liute vil und manec lant,
daz sie im wurden undertân.
diu küneginne was gelân
dâ heim, als ez billich was,
ûf des künges palas
was si nâch ir willen wol
und lebet als ein vrouwe sol
diu schône zuht bî kiusche phligt,
gen der man huote sich bewigt.
wil diu wîbes kiusche phlegn,
man sol sich huote an sî bewegn.
mit wîplicher huote
was diu vil werde guote
gelobt in hôhem prîse.
nektânabus der wîse
was dâ lange daz er nie
der vrouwen kunde gevie.
vil dicke man ir des gewuoc
wie hôhe wîsheit er truoc
und wie meisterlîchen sin,
des wolde sie gerne sehen in.
nû dûhte in gar ein zageheit
daz er sî sô lange meit
und er ir künde nie gewan.
alsus gienc der wîse man
sunder ûf den palas,
dâ si mit vrouwen ûffe was
mit rîcheit wol gezieret.
dô wart gesâlûieret
der meister wîs, dô si in sach.
< genâde> er zühteclîche sprach.
si hiez in sitzen, er saz nidr.
verre er saz. si hiez in widr
sitzen nâher baz zuo zir,
daz was wol sînes herzen gir.
sîn hôchgeburt mit witzen
hiez in dô nâher sitzen.
sîn arbeit, sîn verlornez guot,
sîn habelôsiu armuot,
sîn krankez lebn nâch hêrschaft
want in des niht: der minne kraft
wolde sîne sinne
sô twingen nâch ir minne
daz er von allen sinnen
die vrouwen wolde minnen.
pînd ich nû mîne sinne
dar ûf daz ich die minne
wolde prüeven und sagn
die man sach sîn herze tragn
gegen der vrouwen liebe kraft,
sô müeste ich hôhe meisterschaft
hân, der ich erlâzen bin.
wold ich der minne kraft an in
prüeven, daz würd al ze lanc:
ir minne sîn gemüete twanc,
diu minne zim geslichen kam,
sîn gemüete si im nam
sô gar daz der wîse man
gedâhte kleine dar an
wie manec kumberlîchez leit
er müeste hân mit arbeit.
sîner nôt vergaz er gar,
von minnen nam er nihtes war
wan der lieben vrouwen sîn
der minneclîchen künegîn,
diu was sîn liep, sîn leit, sîn nôt,
sîn vröude, sîner sinne tôt.
sîn herze ruorte ir minne schoz,
des herzen und der zungen sloz
was ir strengen minne bant,
ir minne sich sîn underwant
sô herzeclîche daz er gie
daz si in bî witzen kûme lie,
als ez noch mangem man ergât
den minne kraft niht ledec lât.
ir rôter munt zem meister sprach
< meister, sît man mir verjach
daz dû her kaem in diz lant,
sît haete ich gerne dich erkant.
mir ist sô mangiu wîsheit
von dîner hôhen kunst geseit
daz ich dich gerne hân gesehn.
dû solt mir rehte verjehn,
bist dû von egiptô?
von den hoere ich sagen sô
daz sie künsterîche sîn.> -
< jâ, liebiu vrouwe mîn.
von egiptenlande ich bin.
ich hân sô vollebrâht den sin
daz ich ich die troume kan verstân.
und weiz wol wie sie süln ergân.
mir ist der sternen louf erkant,
wie ir iegelich ist genant
daz ist mir kunt und ouch der list
wie er genatûret ist.
der vogele sanc erkenne ich wol
und waz ir meine diuten sol,
daz vernime ich ûf daz zil.
ich hân hôher kunst sô vil
daz ich ze rehte wol kan spehn
waz einem kinde sol geschehn
daz niuwelîche wirt geborn.
die selben liste hânt gesworn
mir und den von egiptenlant
sint die liste wol erkant.>
alsus sprach der wîse man.
die vrouwen sach er aber an
mit lachendes herzens sinne.
dô sprach diu küneginne
< meister guot, dû solt mir jehn
waz dîn oug an mir hât ersehn,
daz dû dir sô vil vröuden gihst,
swenne dû mich ane sihst.>
als er der rede gevrâget wart,
in dûhte daz er ûf die vart
gewîset waer der minne,
in lêrten sîne sinne
daz er nû sprechen solde,
sît im diu state wolde
vüegen sô gevüege stunt
daz er mit vuoge taete kunt
der vrouwen sînen hôhen pîn.
er sprach< vil liebiu vrouwe mîn,
dîn hôhiu schoene wîset mich
daz ich mit triuwen meine dich.> -
< durch waz?> -< ûf den lieben wân
den ich ze dîner liebe hân.> -
< tuo hin die rede! sist gar ein wiht,
si mac vervâhen niemer niht.> -
< waz doch! sô leiste ich dîn gebot.
sich möhte ouch niht erwern kein got,
er müeste güetlîche dich
schouwen, ob er waere als ich
dir untertân gar, als ich bin.>
si sprach< hastû sô wîsen sin
alsô dû mir hâst geseit,
sô lâ mich dîner wîsheit
an dir bevinden etewaz.> -
< gerne, vrouwe, tuon ich daz.>
dô zôch er ûz dem buosem sîn
ein wol gemachet tevellîn
ze guoter mâze kleine
von wîzem helfenbeine
gar schône gezieret,
daz wol gemûsieret
von silber und von golde was,
dar an er kunstlîche las
wie die sternen umbe gânt
und waz sie natûre hânt
und wie der himel umbe gât
und umbe gândiu zeichen hât.
sus was diu himelspêre
mit wîslîcher lêre
von meisterlîchen buochstabn
an daz tevellîn ergrabn.
drîe kreize stuonden dran,
dar an vant der wîse man
hôher meisterschaft genuoc.
der êrste zwelf zeichen truoc,
diu die zwelfvalten vernunst
truogen an der selben kunst.
ouch truoc die figûre
der rehten natûre
der lûne und ouch der sunnen gar
der ander kreiz. ouch zeicte dar
der dritte siben sternen
an den man solde lernen
menschlîcher saelde spehe.
die vant man an der sternen jehe
mit wârheit al gemeine,
dâ bî vier edle steine
die der siben sternen kraft
erzeicten und der meisterschaft,
die menschlîcher wîsheit
sint ze huot ûf geleit
und wie ir leben sol ergân
und der lîp ein ende hân.
diu zeichen stuonden dran geschribn,
diu den louf umbe tribn
in den got elliu leben schreip
und natûrende umbe treip.
an dirre tavel nam dô war
diu vrouwe daz er alsô gar
was an listen vollekomn.
si sprach< ich hân wol vernomn,
lieber meister, daz dîn list
an witzen vollekomen ist.
wiltû daz ich geloube dir
waz dû mir seist, sô sage mir
die stunt, die zît und ouch den tac
an dem diu geburt gelac
daz dirre welte wart geborn
philipp der künec ûz erkorn
an werdekeit vür alle man.
swie daz dîn munt gesagen kan,
sô wil ich gelouben dir
waz dû dar nâch gesagest mir.>
diz wesse si ouch, wiez geschach.
sîn kunst gewaerlîch verjach
allez wie ez was geschehn,
des si mit wârheit muoste jehn.
der meister sprach zer künegîn
< nû sag mir, liebiu vrouwe mîn,
sol ich dir iht mêre sagn?> -
< jâ, meister mîn, ich muoz dir klagn
mîne groesten swaere,
ein verholnez maere
daz mich hât beswaeret,
daz von mir ist gemaeret.
mir ist von rehter wârheit
von mînem lieben man geseit
er habe des vermezzen sich
daz er verstôzen welle mich,
kaeme er iemer wider hein,
niuwan durch ein kleinez mein:
daz ich noch unberhaft bin.
nû lâ mich dînen hôhen sin
beschouwen und die wîsheit
diu dir von witzen ist bereit,
und hilf mir daz des niht geschehe
daz man mich iht dâ vür ersehe
daz ich sül versmâhet sîn
daz kein ander künegîn
des landes krône bî mir trage.> -
< vrouwe, sprach er, lâ die klage!
ez ist ein lügen, dû bist betrogn,
swer dirs jach, hât gelogn.
doch wirt ein teil der rede wâr
über eteslîchiu jâr
daz man in dich verstôzen siht,
daz doch kurzlîch geschiht,
wan er well odr enwelle,
sô muoz er dîn geselle
nâch dîn selbes willen wesn:
er mac niht âne dich genesn,
er wirt dir holt, als er ie was,
wan er swâr âne dich genas.>
< owê, sprach diu vrouwe dô,
meister mîn, waer eht alsô
daz der vil liebe herre mîn
müeste alsô betwungen sîn
swenne er zornec waere,
daz er zehant verbaere
gegen mir sînen gâhen haz,
vür grôze saelde wolde ich daz
mir selber prüeven, ist es niht.> -
< nû sage ich dir wiez geschiht>
sprach der meister hôchgemuot
< sich! got der vil genâden tuot,
der wil dir noch bî gelign,
von des gewalt soltû gesign
an dînem man zaller zît.
swenne er dir nû bî gelît
sô muostû siges sin gewert
dar nâch als es dîn herze gert,
der wil dich berhaft machen,
mit gotlîchen sachen
wil er dar zuo diemüeten sich
daz er wil berhaft machen dich,> -
< meister mîn, wie heizet er?> -
< daz wil ich sagen dir>, sprach der
< der rîche amôn, der alle zît
den liuten guotes rîcheit gît.> -
< sag mir, wie ist er gestalt?> -
< erst niht ze junc noch zuo alt,
noch ze grôz noch ze kranc,
noch ze kurz noch ze lanc,
in rehter mâze ist er erkorn.
er hât zwei krumbiu rindes horn
vor an sîner stirne dâ,
sîn bart ist wol gemischet grâ.
sus ist sîn bilde getân
swâ man im sol z opher gân:
der hebet dir dîn krône.
dû solt dich hînaht schône
gein sîner kunft wol kroenen
und dich nâch wirde schoenen.
nim an dich dîn bestiu kleit
und wis im alsô bereit
als dînem gote wol gezeme
und er für guot von dir neme.>
si sprach< sol ich den got gesehn,
also dû mir hâst verjehn,
sô wil ich dich beten an
vür got und niht für einen man.>
urloup nam der meister dâ,
von der vrouwen gienc er sâ,
er huop sich dar er wolde dan.
vil manec krût er gewan
und wurze manger slahte.
nâch zouberlîcher ahte
krût und wurze er allez stiez,
daz saf er ûz drücken hiez,
mit zouberlîcher liste kraft
twanc er durch sîne meisterschaft
den tiuvel daz der schouwen
sich liez der werden vrouwen
in dem bild als er seite,
und er sich zir geleite
und ir ze wîbe phlaege
und sô ir bî gelaege
daz er denne spraeche alsô
< vrouwe, dû solt wesen vrô,
lâz alle dîne swaere!
dû hâst den schirmaere
enphangen der dich schirmet wol
und dich von müeje beschirmen sol.>
diz sold allez sô geschehn,
si sold in ir troume sehn
diz selbe bilde, als ez geschach:
dez nahtes siz allez sach.
philippe ir man der degen wîs,
swie er trüege hôhen prîs,
sîn liebe tiure gekoufet wart,
dô er was an der hervart.
geminnet wart der got durch in
ûf der miete gewin
und ûf des lônes hôhen solt
daz er ir solde wesen holt:
si haete es anders niht getân.
dâ vür süllen wir ez hân.
ir got diu vrou des nahtes sach
als ir gewaerer troum verjach.
dô der morgen ane vie,
der meister zuo der vrouwen gie,
dô seite si im ze maere
waz ir getroumet waere.
er sprach< diz wesse ich ê vil wol,
noch baz ez sich bewaeren sol,
dû hâst niuwan den troum gesehn:
diu wârheit sol dir noch geschehn.
den selben got erzeige ich dir,
vüegest dû die state mir
dâ ich mac heimlîche sîn,
sô tuon ich dir die wârheit schîn.
der got wil hînaht zuo dir komn
und hat des bilde an sich genomn
daz er als ein trache gât.
die selbe forme er gâhes lât
und ouct sich dir in mîne wîs:
er wil werden dîn amîs,
dar nâch iemer mêre
wil er dir guot und êre
hoehen und mêren
mit küneclîchen êren.> -
< hilfet des dîn helfe mir,
sô wil ich gerne vüegen dir
ein heimlich wesn an dirre vrist
dâ dû vil heimlîche bist.>
si hiez in lân vil drâte
in eine kemenâte
diu im genuoc heimlîche was,
dar inne er sînen zouber las.
sus was verendet der tac.
diu vrouwe wachende lac
daz si besehen wolde
wenn ir got komen solde.
dar nâch schiere was unlanc,
der meister den tiuvel twanc
daz er in rehte lêrte
wie er sich verkêrte
und er sich kunde gemachen
mit zouberlîchen sachen
zeinem trachen und er kam.
diz geschach. diz bilde er nam
an sich. dô wart ein michel sûs.
alsus sleich er durch daz hûs
hin dâ diu schoene olimpias,
des wunsches rîs an schoene, was
zehant als er hin zuo zir kam,
sîn bilde er aber wider nam
und wart der selbe der er was.
dô kam er ûf den palas,
diu vrouwe tugentrîche
enphienc in minnelîche,
er kuste sî, daz galt si sâ,
den got den er hâte dâ,
den gap er ir, daz was sîn lîp.
alsus leit in daz schoene wîp
an ir arm der was vil wîs,
an ir was gar des wunsches vlîz.
sus lac der bote bî dem gote,
dô wart der got und der bote
getriutet vil vor allen gotn,
ez wart im minneclîche enbotn.
ich waene, ez waere ir beider gunst
daz diu alte und niuwe kunst
nâch rehter lieplîcher art
guobet von in beiden wart,
des sûmde er sich niht langer
ê daz si wart swanger
kindes von sînem lîbe.
er sprach ze dem werden wîbe
< herzliebiu vrouwe, dû
hâst enphangen von mir nu
den rehten schirmaere dîn.
disiu vruht sol saelic sîn
und werden alsô sigehaft
daz sî niemer mannes kraft
mit sig überwinden mac>.
alsus nâhete der tac.
der meister balde von ir gie,
die künegîn er tragende lie.
sus hâte sî der list betrogn,
ir hâte ir gote wân erlogn.
ouch lebte nâch dem willen sîn
der meister mit der künegîn.
swenne er wolde komen zir,
sô sprach er< liebiu vrouwe, dir
kumt dîn got sus oder sô>,
si zierte sich und was sîn vrô,
sô huop er sich zuo zir dar. -
dô diu vrouwe wart gewar
daz sîn witze sî betrouc
und er sô spaehlîche louc,
si begunde in ouch betriegen
und an trûtschaft liegen.
liep liuget liebe niht,
swâ mit triuwen liep geschiht:
durch dirre vrouwen herzeliep
betrouc sî helnder minne diep,
nâch liebes staetem liebe
wart si von liebes diebe
betrogn, ein teil beliebet.
daz si wart bediebet
von helnder minne diebe,
daz kam von dem liebe
daz in der helnder minne diep
gehieze staete in ir liebez liep.
dem selben minne diebe
wart des küneges liebe
nâch sînem staeten liebe ein liep,
des vröute sich der minne diep,
nektânabus der wîse man. -
diu vrou dô grozen began.
den meister si besante zir.
< meister, sprach si, nû rât mir
ze mînen sorgen die ich hân!
dû weist wol was ich hân getân.
nû rât, wie sol ich hie von komn,
wie wirt diu swaere mir benomn?
wan sô der künec wider kumt,
unschuldigen mich kleine vrumt,
wan ich leider schuldec bin.
nû ist mîn groester ungewin
daz sich an mir diu geschiht
leider mac verbergen niht,
daz ist mîn hoehstez herzesêr.
owê, waz sol ich klagen mêr
wan daz ich bin versêret
und sich mîn swaere mêret!> -
< ist daz dîn hoehstiu arbeit
und dîn groestez herzeleit,
des mahtû vil wol genesn.
liep, dû solt niht trûrec wesn,
wis ûf mîne triuwe vrô!>
sprach der wîse meister dô,
< der got amôn der hilfet mir
swes ich in bite, und vüeget dir
daz dû durch dise schulde
dînes mannes hulde
niemer maht verliesen.
dû solt dîn leit verkiesen
und ân alle sorge sîn.
ich schaffe, liebiu vrouwe mîn,
daz elliu swaere dich verbirt
und dir dîn leit benomen wirt.
des habe ûf mîne triuwe dich!>
alsus huop er ze velde sich
und suochte manger hande krût
dâ mite er sînes herzen trût
von sorgen wolde bringen.
mit zouberlîchen dingen
sînen list er schouwen liez,
daz saf er ûz dem krûte stiez
und twanc den tiuvel dâ mite
nâch sînem alten zoubersite
daz er philippen dort betrüge
und mit dem selben liste im lüge
dâ mite sîn wîp was betrogn
unz ir ir minne was erlogn.
philippe lac mit grôzer kraft
und mit werlîcher ritterschaft
groezlîch in bitînîâ.
des landes künec was ouch dâ
pâusânîâ mit her,
den twanc er sider, swie sî her,
grôzes widersatzes phlac.
des nahtes dô philippe lac
an sînem bette und er entslief,
sînem herze lûte rief
ein vremder troum vil spaehe.
in dûhte wie er saehe
daz amôn der grôze got
mit dem der meister tet den spot,
bî sînem wîbe laege
und ir ze wîbe phlaege
und dar nâch zir spraeche alsô
< vrouwe, dû solt wesen vrô.
dîn man ist bî dir gelegn,
philippe der vil werde degn,
bî dem dû swanger worden bist.
diu vruht diu von im komen ist,
daz ist ein kint des werdekeit
wirt her nâch in den landen breit,
ez wirt rîch und hêre.>
dâ bî dûhte in mêre
der got trüege ein vingerlîn
dâ mit er der künegîn
besluzze ir klâre wîpheit
daz ir müeste sîn verseit
trûtschaft unz an sînen lîp.
in dûhte des wie er sîn wîp
alsô besigelt haete
daz si belîben staete
müeste unz an in eine
mit einem edelen steine,
dâ was des liehten sunnen wagn
ergraben an. ich wil iu sagn
ob ir mirz geloubet,
ein swert, ein löuwen houbet
was ouch an den stein ergrabn.
dirre list wart erhabn
daz sie philippen alsô trügn
und im ûf die rede lügn
daz sie in wol möhten triegen
und an den schulden liegen.
philippe der wîse degn
began den troum vil hôhe wegn.
er was erwachet. sâ zehant
was sîn rât vür in besant
der troume diutaere,
den seit er ze maere
waz er in dem troume sach.
der wîsest under in dô sprach
< philippe, herre mîn, dû solt
dînem gote wesen holt.
benamn, ez ist ein wârheit
daz dîn wîp von gote treit,
niht von menschen lîbe.
dir wirt von dînem wîbe
geborn ein sun des name wert
belîben sol, des herze gert
iemer wernder êren.
ich wil ze diute kêren
daz swert und ouch den sunnen wagn,
die rehte bîschaft von im sagn:
er sol gewalteclîche
betwingen elliu rîche.
des löuwen houbet, dêst diu tugent
der phlegen sol sîn miltiu jugent.
er wirt sô werde lebende,
in solhen êren swebende
daz waetlich ist daz iemen lebe
der zît des lop sô hôhe swebe>.
ê daz des troumes underscheit
dem künge wurde aldâ geseit,
dô kam mit vîentlîchen sitn
geschart und ûf in geritn
der künec mit den sînen.
die liezen an im schînen
mit kreften vîentlîche kraft.
die ellenthaften ritterschaft
riten des landes vürsten an.
philippe und sîne man
bereiten sich ze strîte sâ.
sich huop ein herter strît aldâ,
grôz ungemach, leit und nôt,
dô lac vil manec degen tôt
den man dar nâch muoste klagn.
man sach den vliehen, disen jagn,
dâ was der slac, hie der stich,
die lantherren sô werten sich
daz philipp ellens rîch
mit den sînen tet entwîch
und nâch den vînden siges jach.
dô im vil bî sîn kraft zerbrach,
dô kam ein trache in sîne schar
gevlogen im ze helfe dar
den im der meister sande
von sîn selbes lande.
der trache in sêre vröute,
die vînde er sô zerströute
daz er mit kreften sâ zehant
gesiget und sie überwant.
die vînde vluhn. der strît zergie.
der sluoc den, der disen vie.
sus was der strît zergangen,
der vînde vil gevangen.
mit ritterschaft gesigete dâ
philipp in bitînîâ.
daz lant wart im dô zinshaft.
dô kêrte er mit ritterschaft
wider heim ze lande dô.
sîns gelückes wâren vrô
die sîne, als ez in wol gezam
daz er den sic mit êren nam.
als er hin heim komen was,
und er gie ûf den palas,
diu künegîn im wider gie,
vil minneclîche si in enphie.
er kuste sî, si kuste ouch in,
ze handen giengen sie dâ hin
zuo ein ander sitzen.
er sprach mit schoenen witzen
< ach herzetrût, nû wîse mich,
wie ist ez komen umbe dich,
wem hastû, herzeliebez wîp,
vür mich gegeben dînen lîp?>
si sweic und sach mit schame dar
und nam sîn blûclîche war.
er sach sî zartlîchen an.
< vrouwe, sprach der werde man,
die gote hânt gewaltes vil,
dâ von ich nû niht zürnen wil.
mîn ouge in einem troume sach
daz dir gewalt von obm beschach,
durch daz sol man dir die geschiht
verwîzen noch verkêren niht,
wan swes der gote wille gert
des wirt ir hôher name gewert.
dû bist unschuldec. nû wis vrô,
kêre dich an niemens drô,
swaz man dir müge von mir gedröun:
dû solt dîn gemüete vröun!>
âne haz gelac der zorn
den diu vrouwe wol geborn
hât umb ir lieben man verscholt.
hât si zorn von im gedolt,
daz wizzen nû vil liute niht,
swer aber weiz die geschiht
wie daz unschuldige wîp
truoc den schuldehaften lîp,
der wîzet im niht daz der zorn
sô schiere was von im verkorn.
vil mangen lantman ich hân,
waer im ein solich dinc getân,
er zurnde lîhte und haet es haz.
nû wer solde im wîzen daz
ob er sêle, lîp und lebn
ze wâge ungerne wolde gebn
umb einen solhen erbeknabn?
dâ würd ê ein zorn erhabn,
daz niht dort heimlîche ergie.
nû lât iu vürbaz sagen hie,
dâ daz maere wart gelân!
man sach den künc ze tische gân
mit sînen lantherren dâ.
dô kam der zouberaere ie sâ
gegangen durch den palas,
in eines trachen bilde er was
und vuor sô vorhtlîche
daz arm und dar zuo rîche
erschrâken sêre dô er hie
die rihte gegen dem tische gie
dâ diu küneginne saz,
sînen slich er gegen ir maz
und leit irz houbet ûf ir schôz.
diz hâten vür ein wunder grôz
alle, die ez sâhen.
mit staete sie des jâhen
diz enwaer vor in geschehn,
sie müestens vür ein wunder jehn.
ze sînen lantherren sprach
der künec, dô diz sus geschach
< ir herren, dô ich inme sturm
was, dô kam mir dirre wurm
ze helfe mit vil grôzer wer,
er half mir gegen der vînde her
unz ich den sic an in gewan
und ich geschiet mit êren dan>.
diz muost ouch der künegîn
an vuoge ein unschulde sîn:
daz alsô besunder
treip sô manegiu wunder,
daz gap gelouphaften muot
dem herren gegen der vrouwen guot.
dar nâch dô diz alsus was,
dô saz ûf sînem palas
der künc philippe al eine.
dô kam ein vogelîn kleine
und saz ûf die schôz sîn.
nû sach er waz diz vogelîn
hie mite wunders meinde
und waz ez mite bescheinde.
ez leget in die schôz ein ei.
daz stiez er hin, ez brach enzwei.
des begunde in wunder hân:
er sach dar ûz ein würmel gân,
daz gar daz ei al umbegie.
die widervart ez dô gevie
gegen dem selben bruche hin
dâz ûze gie, dâ woldez in.
als ez daz houbet drin gebôt,
vor in dem eie lac ez tôt.
den künec muoste wunder hân
durch waz daz wunder waer getân,
als ez noch wunder haete
swem got daz wunder taete.
ez was ouch gar bezeichenlich.
der künec kêrte dannen sich
und rief sînen meistern dar
daz sie des wunders naemen war.
er hiez bezeichenlîche sie
nâch der bezeichenunge hie
liezen. balde daz geschach.
der wîsest under in dô sprach
< herre, ich weiz von listen wol
waz diz wunder diuten sol:
ein sun wirt von dir geborn
der dir ze erben wirt erkorn
nâch dir in dem lande dîn,
den diutet sus diz würmelîn.
daz ei ist sinewel erkant,
daz diutet aller welte lant
diu sîn hant sol betwingen.
zinslîche müezen dingen
mit im elliu rîche,
mit kraft gewalteclîche
sol elliu lant umbevarn
des wunsches und der saelden barn.
aller welte unmüezekeit
wirt er an prîze vür geleit
er sol mit kraft und ouch mit tugent
in sîner loberîcher jugent
bejagn ein lop daz iemer wert,
sîn hôher name niht endes gert
an dem werden prîse.
sô dan der degen wîse
ze lande wendet sîne kunft
nâch vil hôher sigenunft,
sîn junger lîp verdirbet,
sîn blüendiu jugent erstirbet.
alsus muoz er verderben
und in dem wunsche ersterben.>
dô ich des ebenmâze las,
ich jach und gihe daz si was
rehte gebenmâzet dar,
swer ez nimt ze rehte war,
der muoz mir des volge jehn,
wil er die wârheit ane sehn:
daz ei und ouch daz komende kint
gelîch dem künge sippe sint:
daz kint er im ze kinde nam
daz von dem zouberaere kam.
daz ei braht im daz vogelîn:
der vogel muoz gelîchet sîn
dem wîsen zouberaere,
des zouberlîchiu maere
im einen erben hânt ertrogn.
der vogel der im kam gevlogn,
brâht im bezeichenlîche
daz kint an saelden rîche.
die verre erborne sippe
nam im der künec philippe
ze nâher sippe durch den wân
daz er von gote wânde hân
die verre erborne komende vruht.
daz würmel was des vogels zuht
daz im bezeichenlîche gap
der groesten saelden urhap
diu im ie dâ vor geschach
als er in sînen vröuden jach.
diu wolde im schiere nû geschehn
des er von wârheit muoste jehn.
ouch muoste nâhen der tac
daz diu künegîn gelac
nâch wîplîcher arbeit,
si muoste nâch gewonheit
diu dâ vor was und iemer sidr,
ze kemenâten ligen nidr:
die vrouwen diu ir solde phlegn -
nâch wîplîcher lêre wegn
vil sêre wêwen ir began -
si sante nâch dem wîsen man.
si sprach< owê, meister mîn,
wie wê mir ist! den hoehsten pîn
hân ich den wîp ie gewan>. -
< vrouwe, sprach der wîse man,
heiz dich balde in kurzer vrist
von dirre stat an der dû bist,
tragen oder dû bist tôt!
wan von der sunnen loufe nôt
hânt diu vier elementâ.>
die vrouwen truoc man dannen sâ
an eine bezzer bettestat.
der meister ir dô phlegen bat
nâch wîplîcher lêre wol
der man dar zuo bedürfen sol.
als er von ir gegangen was,
dar nâch vil schiere si genas,
von ir wart ein sun geborn
dem sît nâch wunsche wart erkorn
der welte lobelîcher prîs.
er wart an manheit alsô wîs
daz man muoz iemer prîsen
an werdekeit den wîsen.
nû vil balde daz geschach
des der meister ê verjach.
der luft begunde truoben,
ertbibe sich dô huoben,
ez wart ein ungewiter grôz,
ein grôzer dunre lûte erdôz
der mange dunrestrâle
liez an dem selben mâle.
dick âne mâze dicke
wurden grôze blicke.
hagel, starker winde vil,
regen sunder mâze zil,
vinster nebel ungemach
man ûf der erde herten sach
ein alsô lange wîle grôz
des vil nâch al die welt verdrôz:
die liute wânden sîn verlorn.
alsus wart diz kint geborn
von dem diu maere erhaben sint.
vil sêre erschrâken umb daz kint
der künc und alle sîne man.
zehant gienc er zer vrouwen dan,
dô disiu nôt was vollebrâht,
er sprach< vrouwe, ich hân gedâht
daz man verliese daz kint,
wan mir diu maere gewizzen sint
daz ez vil kleine mich bestât.
doch swaz mîn got gevüeget hât
daz muoz ich gerne staete lân
und daz kint zeinem kinde hân,
des sîn gebot mich niht erlât:
dêst got, der mirz gegeben hât.
ich vürhte sêre die nôt
die sîn geburt der welte erbôt:
ich waene wol, sîn leben wil
den liuten vüegen kumbers vil,
durch daz wolt ich verliesen in.
an sîner geburt ich bin
ermant eins kindes hâte ich ê,
des tôt tuot mir iemer wê
swenn ich sol werden sîn ermant:
als jenez kint waer genant,
als heiz ouch diz ander!>
daz kint wart alexander
von dem vürsten dô genant.
die vrouwen nâmen sâ zehant
daz kint an saelden rîche
und zugn ez minneclîche,
sie bûten im enwiderstrît
zartlich êre zaller zît.
swelher ie geschach daz heil
daz siz gevie, diu was geil
und bôt im trûtlich êre,
und minten ez vil sêre
diu eine vür die andern.
sus zugen alexandern
die edelen juncvrouwen,
daz man in möhte schouwen
wie wunderlich er was getân.
des muoste grôz wunder hân
alle die ez sâhen:
von wârheit sie des jâhen
daz alsô wunderlîchen lîp
gebaere ie mê der welte ein wîp,
mit sôgestaltem lîbe
kam nie man von wîbe.
ez was in vremder wîsheit
diu gotes kunst an in geleit
vür alle man al eine:
der volle wuohs, vil kleine
was im der lîp und niht ze lanc,
vil wol gestalt und harte kranc
was er mit schoenem lîbe klâr.
zoteht rôt was im sîn hâr
als einem löuwen und vil dic.
er hâte vremden aneblic
under sînen ougen:
im was gar âne lougen
ein ouge swarz, das ander gel.
wîz, spiz, sinewel
wâren im die zene sîn.
diu hiufel gâben rôten schîn
bî minneclîcher varwe blanc.
sîn munt was rôt, sîn kel lanc,
mit wol gestaltem lîbe klein
wuohsen im arme und bein.
ein sô grôz herze nie gewan
vor sîner zît sô kleine ein man,
als ez wuohs an dem helde sît
von sîner kintlîcher zît. -
wie er nâch wunderlîcher art
geborn dirre welte wart
und wie sîn muoter sîn genas,
wie wunderlich sîn forme was
und wie ez gar von wunder kam
dâ von er den urhap nam,
des hân ich iu ein teil geseit
mit endehafter wârheit.
sît ez mit wunder wart getân
swaz wir von im gelesen hân,
sô mac ouch des niht wundern mich,
was er selbe wunderlich,
und ob er sînen gerinc
kêrte an wunderlîchiu dinc
und ob er sich an wunder lie,
ob ez im wunderlîche ergie,
daz muoz ich âne wunder lân:
ez muoste im wunderlîche ergân.
als diu saeldebernde tugent,
der wunsch der wünnebernden jugent
begunde sîn gesinde
dem wunsches süezen kinde,
und alle valscheit dan vertreip
von ime und staete an im beleip
gar nâch wunschlîcher art,
als er siben jâr alt wart,
man tet in ze schuole sâ.
der wîse calestenâ,
naximeneâ von atêne,
die wîsen meister zwêne
sich sîn underwunden.
swaz sie von wîsheit kunden,
das het sîn wunschlîcher sin
gelernet schiere wol von in.
sîn amm alacrînis was.
der buochstabn im vor las,
ein meister hiez polinîcus,
von mûsicâ was alzippus
sîn meister der in lêrte
wie er die stimme kêrte
und wie im solde sîn erkant
der list wie man die doene vant.
gêometrîe lêrte in dô
menecles der wîse alsô
wie man daz mez der erde
erkennende werde.
der redewîsheit wîsiu wort
und den rîchesten hort
an widerrede, an worten sin
wol erkennen, daz lêrt in
der wîs anaximenes.
sîn magezog was lêônides.
der künste bluome an wîsheit
von dem elliu phafheit seit,
wart im an den stunden
zem hoehsten meister vunden,
aristôtiles der wîse,
der nâch wunschlîchem prîse
der hoehsten kunst in wîste
die man ze kunst ie prîste.
rehte kunst, hêrlîchen sin,
wol gebâren lêrte er in,
mit witzen zuht bî milte phlegn.
nû sach er daz der junge degn
alsô rîches sinnes was,
swaz er im ie vor gelas,
daz er daz schiere kunde gar.
ouch sach er daz er nihtes war
sô gerne nam sô ritterschaft
und daz er sîner sinne kraft
an niht sô gerne kêrte
sô swenn er in lêrte
ritters leben unde strît,
der lêre gerte er zaller zît.
dô sprach der wîse meister guot
< herre, sît daz dû den muot
an ritterschaft wilt kêren,
sô wil ich dich lêren
wie dû solt ein herre sîn.
ich sich wol, al die sinne dîn
hânt aller buoche kunst vergebn
unz an ritterlîchez lebn.
sît daz des dîn herze ger,
sô kêr dîn ôre und herze her
und lerne in kintlîcher jugent
vollekomene mannes tugent
und wie dû solt wâfen tragn.
in dînen kintlîchen tagn
hâst dû sô wol gevangen an
daz dû ein tugentrîcher man
wirdest in dem alter din,
den willen tuo mit werken schîn
und merke wes mîn lêre jehe!
sich daz man dich gevolgec sehe
des ich dir nû wil verjehn,
des lâ dîn herze willec sehn!
in witzen sol dîn wîses lebn
die herren hân ze râtgebn,
dû solt sô wîslîche lebn
daz dîn sin in rât künne gebn.
die dû sihst mit witzen lebn,
der leben sol dir lêre gebn.
sô dû werdest ein herre,
sô sich daz vil verre
die zweizungen knehte sîn
dem heimlîchen râte dîn:
swelch râtgebe zwô zungen trage,
der vor dir daz beste sage,
daz boeste hinder dir von dir,
des tuo dich abe und volge mir!
die ungengen âne zuht
den ir angeborniu vruht
den trôst mit rehte habe genomn
daz sie niht hôher süllen komn,
die gehoehe niemer!
wan geschiht ez iemer
daz der unedel hôher gât
denn als ez im ze mâze stât,
sô tuot er als ein gieze tuot
der ûz der rehten wazzers vluot
und ûz dem tîche diuset
swenn ez von regen ervliuzet.
der tuot den schadn als er geschiht:
der rehte runs tuot schaden niht,
wan der nimet slehten strich
sîne rihte vür sich,
sô siht man ie die giezen
schedlîch ûz vliezen.
die giezen gerne ergiezent,
sô sie mit schaden vliezent.
sus tuot gemachet êre,
diu schadet michels mêre
von ungeslaht dan von der vart
diu niht edel ist bewart:
der von unadel ist geborn,
wirt er an gewalt erkorn,
sô tumbet er und lôset gar
und nimet nie mannes war.
er ist gar tugent âne,
in üppeclîchem wâne
wirt er alsô lôs gemuot
daz er sich setzet durch sîn guot
wider sîne hêrschaft gar
diu in gehoehet hât bis dar:
dem er arm was heimlich,
von dem kêrter rîcher sich
und tuot im toubez ôre.
ein sinnelôser tôre
vernaeme baz des armen klage
dan der gehoehte unedel zage
dem elliu diemuot ist ein wiht.
er kan ouch milte werden niht,
wan gaehez überigez guot
machet selten diemuot,
ez niemet diemuot al ir art
und gît sô grôze hôchvart
daz die liut al besunder
sint als ein merwunder
unwert in smaeher ougen sehe,
nâch toerscher antwürte jehe
dem gâhiu hêrschaft wirt erkorn,
der von unadel ist geborn.
wizzest ouch daz valscher rât
mangen man verderbet hât
der selten missetaete,
enwaeren valsche raete.
die lâ dir gar unheimlich sîn!
nû waenstû lîhte, herre mîn,
und gedenkest des an mir
daz ich widerrâte dir:
al die unedele mein ich niht.
die man sich selben edeln siht,
die solt dû hoehen, dêst mîn rât,
als ez daz reht geboten hât.
swer habe tugentrîchen muot,
habe er lant, geburt noch guot,
den soltû hoehen und im gebn
durch sîn tugentrîchez lebn.
ein man der ganzer tugent phligt
und alles valsches sich bewigt,
des tugent schirmet sînen lîp
umb werde man und werdiu wîp,
daz er scheltens wirt erlân.
swie übel sîn rîch ist getân,
geslehte lîp heimuot lant,
in swelher vuore deist erkant,
daz schirmet sô des mannes zuht
daz man swîget sîner vruht
und sînes landes untât.
swes herze ganze tugent hât,
des lîp ist alsô vollekomn
daz im schelten ist benomn.
tugent ist ein edelkeit
diu alles lobes krône treit,
swer die mit staeten triuwen habe,
des getuo dich niemer abe!
alsolhes râtes soltû phlegn,
jenes râtes dich bewegn
der valscher hêrschefte phligt
und ganzer tugent sich bewigt.
tuo dîn gerihte rehte
dem ritter als dem knehte,
dem lieben als dem leiden!
werde ein kriec durch scheiden
brâht an daz gerichte dîn,
sô tuo reht gerihte schîn
dem armen als dem rîchen!
dû solt rehte gelîchen
dem lantman als dem mâge
des gerihtes wâge.
woldestû der site phlegn
daz dîn gerihte wolde wegn
dem lieben liep, dem leiden leit,
sô müeste ez wol von wârheit
ungerihte sîn genant:
ez sol gelîch sîn reht erkant.
sich daz nie mannes guot
dînen staeten künges muot
mit sîner miete erweiche dir!
wis durch hôher miete gir
nie man an dem gerihte holt
durch silber zunreht und durch golt!
ze rihter dû niht wol gezimst,
gewonstû daz dû miete nimst.
swer miete sich gesindet,
reht und ê si entwindet
und macht den rihtaere
valsch und ungewaere.
der schanden wurz diu gîtekeit
der tugent al ir êre entreit
und leit sî in ir valschen bant
und tuot unreht vür reht erkant.
swâ lantherre miete gert
und unrehtes durch miete wert,
des hof wirt schiere ân alles reht,
dâ wirt daz unreht selten sleht,
wan swaz ieglîcher tuot
daz wirt wol reht und hât er guot,
und solde ein diemüete
phlegen rehter güete.
vernim mit senfteclîchem site
des dich der nôthafte bite!
dû solt hôchvart neigen,
dem starken sterke erzeigen.
vüer dîne vîentlîche kraft
ûf den vînt mit vîentschaft!
phlic vröuden mit gelimphe
z ernest und ze schimphe,
sô mahtû grôzes etewaz
wol bejagen deste baz,
ob es alsus dîn herze gert,
dû wirdest es dest ê gewert.
alsus sol dîn gerihte ergân,
sô mahtû guot und êre hân:
dem manne saeleclîche ergât
der sîn reht mit rehte hât.
ob sich gein dînem heile
ein spil an strîte teile,
daz guot lîp saelde und êre
gelte, sô sol dîn lêre
wîslîche spiln mit sinnen,
wiltû daz spil gewinnen.
ez ist geschehen harte vil
daz ein gar gewunnen spil
dannoch lîhte wart verlorn,
dâz gewunnen was erkorn,
als ist ez umbe ritterschaft:
hânt dîne vînde groezer kraft
dan bî dir dîn helfe habe,
dan solt dû niht erschrecken abe,
dû solt z allen zîten
mit geilem muote rîten
und in dînen jungen tagn
gen strîte dîne wâfen tragn.
sô dich dîn her mit vröuden siht,
sô wirret im unvröude niht.
sô dû die vîend ane sehest,
swie grôzer krefte dû in jehest,
sô soltû mit vroelîchen sitn
gebieten, dröun, manen, bitn
den dînen daz sie niht verzagn.
ich wil dir waerlîche sagn
daz niht vür vorhte ist alsô guot
sô herren unverzagter muot.
sô daz her mit sorgen lebt
und in grôzen noeten strebt,
ob dann der herre rîtet
und vrevellîche strîtet
und die sîne ûf strîten mant,
sô müeste er iemer sîn geschant
der im denne entrünne
ê er die vluht gewünne.
sus lât diu unervorhte schar
die vorht ûz dem muote gar
und strîtent vrevellîche
ist ir her ellens rîche.
dû solt die vîende niht sparn,
ze vorderst iemer ûf sie varn.
vliehent sie, sô jage dû nâch,
sô wirt den dînen mit dir gâch.
geschehe ez, als ez lîhte ergât,
daz dich diu überkraft bestât
sô daz du muost entrinnen,
sô vliuch mit solhen sinnen
daz man waene daz dû jagest
und niht durch überkraft verzagest:
dû solt der witze walten
daz dû solt enthalten
in der vluht ie gegen dem her
und solt setzen dich ze wer.
dû solt ein schilt sîn dîner schar,
daz dû vor den andern dar
der êrste sîst, der jungste dan
daz alsus haben dîne man
an dir ie gewizzen schilt,
des dîne vîende bevilt.
ê daz dû kumest an die schar,
sô solt dû rehte nemen war
waz ir sarjande sî
und waz in ritter halte bî
und in welher manheit
sie ze strîte sîn bereit
und wie sie sîn gezieret
und geziemieret.
sô dû daz rehte habest ervarn,
sô soltû sie niht lenger sparn,
gâhe ûf sie mit vrecher vart
und sich daz sie sîn ungespart!
twinget dich dar zuo dîn muot
als ez die herren dicke tuot,
daz dû besitzest eine stat
diu sich hât wider dich gesat,
sô wâge lîp guot mâge man,
du varst mit dînen êren dan.
sô si danne ergebe sich
ûf die genâde dîn an dich,
so nim dîn silber und dîn golt
und gip den dînen solhen solt
daz sie mit geilem herzen
der vrischen wunden smerzen
mügen deste baz vertragn.
dû solt in mit dem guote entsagn
mit gebender hant in süezen sitn
ob sie hânt nôt durch dich erlitn.
den siechen ungesunden
soltû mit guote ir wunden
salben binden heilen,
mit gâbe ir kumber veilen,
daz dû ieglîchem koufest abe
daz er durch dich erliten habe
und daz er dar nâch niemer mêr
gedenke an sîner wunden sêr.
den armen soltû rîche sîn
und teil mit in die habe dîn.
die ouch bî dir gesunt bestân,
durch dich gegen dem tôde gân,
den soltû als den wunden gebn,
wan durch dich stât enwâge ir lebn.
habestû des guotes niht,
daz vîl dicke geschîht,
sô geheiz in doch mit guote,
mit trôstlîchem muote
geheiz in wol, biz dir daz guot
volenden helfe dînen muot.
diu gebende hant mit guote
sî dir in dem muote:
sô danne werde dir daz guot,
sô zeige dînen gebenden muot!
hilf den armen ûz ir nôt,
wan armuot ist der sinne tôt
und ist des mannes saelde ein schûr.
ir geselleschaft ist sûr,
si nimt dem man vröude und muot,
diu armuot mangem leide tuot
und vüeget michel herzeleit.
sô bejagt des herren miltekeit
saelde heil êre und guot,
der welte gunstlîchen muot.
diu gebende hant, der milte name
deckent lasterlîche schame
und hoehent des geslehtes vruht,
sie blüement wol des herren zuht.
sô den herren nôt bestât
und er gunst mit helfe hât,
sô hilfet sîner miltekeit
des dienest im ê waer verseit.
er endarf ze wer eht habn
deheine veste mûre grabn
dem gemeiniu gunst gestât
und ritterschaft mit willen hât.
hie bî solt dû bezzern dich:
wis hôchgemuot und heimlich
und hab ieglîchen man
als ez sîn vuoge erwerben kan!
dû solt unstaete gar begebn
und in solher staete lebn
daz man dich in der mâze
vinde als man dich lâze.
habe helflîchen muot!
der vride sî boes oder guot,
sô diu welt mit vride stê,
sô wirp daz, ob der vride ûz gê
daz man danne dir gestê,
ob ein nôt dich ane gê.
ûf dienest dienen und gebn
soltû, sô liebestû dîn lebn:
die kargen herren schirmet niht
swie man sie sich vesten siht,
ir vest âne gebende hant.
hie bî soltû sîn gemant
daz valscher wîbe minne
iht triegen dîne sinne.
lâ valsche geselleschaft
niht brechen dîner tugende kraft:
valschlich wîbes minne
krenket werde sinne
und ist des herzen siechtuom.
der gedenke ân allen ruom!
sô tiurent dem man kiuschiu wîp
herze muot sinne und lîp
und sterket tugent ir lobes kraft
der minne und ir geselleschaft.
die nidern soltû êren,
dich doch niht an sie kêren.
wis vor trunkenheit behuot
diu tugent und êren schaden tuot!
si ist der schanden urhap
und ein lasterlîchez grap
weltlîcher êren.
woldestû dich kêren
an valsche minn und an wîn
und von in betwungen sîn,
twungestû denn elliu lant,
dû waerest doch ein kneht genant
und möhtest vrî geheizen niht:
gîstû disen beiden phliht,
sie künnen dich vernihten
und dîne tugent entrihten.
ich wil dir sagen wiez ergât:
sô dich diu trunkenheit bestât,
sô enweistû waz dû werben solt,
sô wirstû dem dû waere holt,
vil lîhte gram und gehaz.
disiu beide râtent daz
dû niht bescheidenlîche verst,
lîp und guot ân êre zerst.
sie lêrent dich unrehten zorn
der vil bezzer waer verborn
und der dich dar nâch sêre
muoz riuwen iemer mêre.
urliugen, übersprechen,
leit ân êre rechen
lêret allez trunkenheit:
diu sî dir smaeh unde leit.
mit zühten vlîz dich rehter schame,
dâ von wirdet sich dîn name.
der lant und liute phlegen sol,
der sol dich behüeten wol
daz sîn muotwille gar
nâch sîner gir iht vollevar.
swacher muotwille tuot
den herren selten hôchgemuot.
lâ dich lêren, dêst mîn rât,
dîner vordern getât,
rehtez lebn, und daz diu reht
in dînem lebene werden sleht
sô daz dû rehte richtest,
unreht ze rehte slihtest.
dû solt in solhen siten sîn,
swâ den hêrscheften dîn
reht und ê sîn hin genomn,
daz sie mit dir wider komn.
dû solt ouch gotlich gebot
von herzen minnen und den got
der elliu dinc geschaffen hât,
in des gewalt ez allez stât,
den soltû minnen, swer der sî,
des name sî dir staete bî
und minne den vür alle gote
nâch der rehten ê gebote.
rich der schuldigen getât
als altez reht geboten hât!
dû solt mit schoenen listen
dîn leitrechen vristen,
biz daz dîn zorn verende sich.
raechestû in zorne dich,
sô müeste der und dirre jehn,
ez waere in zorne geschehn.
zorn ist ein hagel rehter zuht
und von bescheidenheit ein vluht,
durch daz soltû diu rechen sparn
biz daz der zorn sî vervarn.
dû solt ouch dar nâch niemer mêr
gerechen dînes leides sêr.
sô dir dîn leit benomen sî,
wont dor solhiu vuore bî
sô wirt an lobe ein iemerleben
dînem namn und dir gegeben.
tuostû sus der lêre mîn
in guoten werken volge schîn,
sô volget iemer mêre
dir solch prîs und êre
diu dînen namen êrent
und dîne saelde mêrent.>
lieplîche in sînem muote enphie
diz kint die süezen lêre hie,
mit herz ôre und sinne gar
kêrte ez gegen der lêre dar.
der wîse meister sâte
mit lêre und ouch mit râte
sîne süezen lêre dar.
diu hundertvalte vruht gebar
an dem saeldenrîchen knabn
von dem diu mêre sint erhabn.
dô diz allez alsus was,
aristôtiles der las
ein buoch heizet ethicâ,
daz begunde er tihten sâ,
dô sîner meisterlîcher art
der juncher bevolhen wart.
daz buoch lêret solhen site
daz sich dirre welte mite
saeleclîche ein saelec man
gehulden und gelieben kan.
des lerneter in kurzem zil
gâhes alsô rehte vil
daz sîn kunst wart alsô grôz
daz dehein sîn schuolgenôz
im wol gantwurten kunde.
sîn lîp vil vruo begunde,
dar an des wunsches saeldenbarn
sider kunde vollevarn:
an rede, an witze, an snelheit
er die gelêrten überstreit.
sîn hohiu kunst was manecvalt.
als er wart zwelf jâr alt,
man lêrte in ritterlîchen schimph
dar zuo manlîchen glimph,
schirmen und striten
behendeclîche rîten,
von zabel kurzwîle vil
und dâ bî mit vederspil
gebâren hovelîche.
der knabe muotes rîche
lernt allez daz man wolde,
swaz iemen kunnen solde
des was er gâhes vollekomn
und hâte ez schiere an sich genomn
nâch der âventiure sage.
nû saz der künc an einem tage
bî der vrouwen und sach
vil snelheit, diu von im geschach,
er sprach< sun, mich vröut an dir
daz diu saelde zeiget mir
den wunsch an den gebaerden dîn,
daz hât ervröut die sinne mîn.
lieber sun, waer ez alsô,
daz dû waerest mir gelîch.
sît daz dû bist sô saeldenrich,
sô gerte ich mêre vröuden niht
wan dîner lieben angesiht
daz waer mîns heiles hoehster trôst,
ez taete mich von sorge erlôst:
sît des nû niht mac ergân,
ich wil dich doch ze kinde hân.>
nû der künec dannen schiet,
der vrouwen vorhte ir dô geriet
daz si zwîfeln began,
si sante nâch dem wîsen man
ir sundervriunt nectanabô,
der kam zir gegangen dô.
si sprach< meister, nû nim war
nâch dînen witzen und ervar
wes der künc philippe dô
gedaehte dô er sprach alsô
« sun dû bist sô saeldenrîch,
soldestû mîn sîn gelîch,
des waere mîn gemüete vrô »>
des antwurt ir der meister dô
< saeldenrîchiu vrouwe mîn,
dû solt âne vorhte sîn.
vil guoten willen er dir treit
als mir daz ein sterne seit
den ich lange nû her abe
in sînem loufe erkennet habe,
der seit niuwan daz beste mir
von dem herren und von dir.
nû zwîfel niht und habe ûf mich:
ez ergât wol umbe dich!>
er trôste sî an vröuden sô.
disen trôst erhôrte dô
alexander der saz dâ,
zuo dem meister sprach er sâ
< ich wolde wizzen gerne,
meister, ob der sterne
an dem dû vindest dise kraft,
an dem himmel sî behaft?> -
< jâ, herre mîn> -< und lêrt er dich?> -
< jâ!> -< dise kunst die wold ich
wizzen und lernen.
kanstû an dem sternen
rehte vinden und ersehn
waz dir her nâch sol geschehn?> -
< jâ, liebez kint, ich kan ouch daz.> -
< meister, sag mir vürbaz,
seit er dir vröud oder nôt
ze jungest umbe dînen tôt,
wie dû solt verderben?
jâ sage, wie soltû sterben?
weistû daz?> -< jâ, herre, wol.
ich weiz daz mich toeten sol
mîn kint des ich reht vater bin.> -
< daz ist ein kunsterîcher sin!
maht dû mich gelêren daz?> -
< jâ, herre mîn, ich kan ez baz
dan iemen des ich künde hân.
dû solt nû schiere mit mir gân,
dô man den tac verendet sehe,
sô wîs ich dich ûf die spehe
wie man den louf erkennet wol,
dâ man den list an vinden sol.
den lêre ich dich erkennen
und ze rehte nennen
wie dir der louf sol sîn erkannt
und wie die sternen sîn genannt.>
sus hâte ein zil der tac genomn.
man sach den âbent balde komn,
des tages lieht vil gar verswein,
diu vinster naht vil truobe schein:
sich oucte gar der sternen brehn.
dô diz began der meister sehn,
er und alexander
giengen mit ein ander
vür die stat ûf einen stein
der in unmâzen hôhe schein.
sie stuonden bî ein ander dâ
vil vürder ûf des steines brâ.
der meister an die sternen sach,
zuo dem knaben er dô sprach
< alexander, liebez kint
sich ûf wie die sternen sint
gestalt und wie sie gordent stânt
und nâch ihr orden umbegânt!
ich sich einen sternen brehn,
in dem hân ich wol gesehn
daz er trûrecliche stât -
daz diutet grôze missetât -
der heizet stellâ erculis.
dû solt benamen sîn gewis
daz sîn trûreclîcher schîn
niht âne schulde mac gesîn:
der ist sô genatûret
daz er vil sêre trûret
von unrehter missetât.
dâ wider die natûre hât
stellâ mercûriî
daz er stât dem meine bî:
man siht in vroelîche brehn,
swenn iht unrehtes sol geschehn,
den sîhe ich nû mit vröuden stân.
zühteclîche wol getân
stât im stellâ jôvis bî.
dise sternen alle drî
verzeichent grôze missetât
diu benamen schiere ergât,
wan an der stat wirt missetân,
dô ez niemer solde ergân.> -
< benamen, sprach der knabe dô,
dîn kunst hât sich mir gouget sô
daz ich muoz jehen daz dîn list
ein gruntveste aller wîsheit ist,
ob dû diz weist von wârheit
daz dû seist und hâst geseit.
mac daz niemen undervarn
oder dich davon bewarn
daz dîn ende werde erkant
von dînes liebes kindes hant?> -
< nein ez, niht! ez muoz ergân
als ich dir gesaget hân.> -
< niht anders?> -< nein, ez muoz sus wesn,
ich kan hie vor niht genesn.>
der knabe denken dô began
ob er den künsterîchen man
mit deheinen dingen
ze lügen möhte bringen,
er dâhte< ich weiz von wârheit wol
daz dich dîn kint niht toeten sol:
dîn tôt von mîner hant geschiht,
wan dû bist mîn vater niht
noch ich dîn kint. daz weiz ich wol
daz ich des niht zwîveln sol:
mîn muoter mich dir nie gebar.>
alsus lief mit zorne dar
der edel wol geborne knabe
und stiez den meister abe
daz er viel daz sîn herze brach.
der knabe schimphlîche sprach
< nû lic dâ, sinnelôser gouch!
ein lügn ûz dînem herzen rouch,
diu hât dich ertoete nû.
unsinnec tôre, woldestû
wizzen daz ze himel was,
durch daz dîn kunst mit zouber las
ûf der erde mangen list!
daz dû nû sus verdorben bist,
dar an ist rehte dir geschehn:
wie hâstû dich sus umbe sehn!
von rehte gouche sus geschiht,
der sich niht wol umbe siht.>
ûf rihte er sich dô diz geschach,
er lebte dannoch und sprach
< ez hat erzeiget sich an mir
daz ich von mînem tôde dir
seite, daz ist mir geschehn.
nû mahtû die wârheit sehn
daz ich dir niht gelogn hân:
dû bist mîn kint ân allen wân.
ich bin von dir tôt gelegn.>
dô lief hin abe der stolze degn,
sînen vater vant er tôt.
sîne triuwe im dô gebôt
daz ez mit jâmers triuwen
begunde in sêre riuwen.
den tôten er dô ligen lie,
ze sîner muoter er dô gie
und hiez im sagen maere
wer sîn vater waere.
si sprach< daz ist philippe.> -
< der ist mir verre sippe!
sage mir nû, wer was mîn vater>,
er gebôt, wênec bater,
er twanc sî daz si seite alsus
< dîn vater ist nectânabus,
bî dem wart ich swanger dîn.
dû muost sîn kint von rehte sîn,
wan dû niht anders vater hâst.
ob dû in des niht geniezen lâst,
des muost dû missewende hân.
dû solt es in geniezen lân.> -
< zewâre, liebiu muoter mîn,
daz möhte wol dîn tumpheit sîn
diu dich von rehten witzen schiet
und dînem herzen daz geriet
daz dû in ze vriunde erkür:
daz dû niht al dîn êre vlür,
des mahtû wol wesen vrô.> -
< sun, ez vüeget sich alsô,
swaz dran geschach, daz tet sîn list.> -
< muoter mîn, sîn zouber ist
gelegen und verdorben,
sîn lebn daz ist erstorben,
von mînen handen lît er tôt:
swaz dir dîn tumber sin gebôt
daz ist nû rehte vollekomn.
sîn ende hât von mir genomn
den dû mir ze vater gîst.
nû heiz, ob dû getriuwe sîst,
dîne triuwe erzeigen
dem argen tôten veigen!>
diz geschach als er dô hiez.
diu vrouwe in dâ niht lenger liez,
si hiez den tôten bringen
mit heimlîchen dingen
und hiez in heimlîche dâ
begraben. daz geschach dô sâ.
von sîner kunst leit er die nôt,
von sînem kinde lac er tôt:
sîn unwitz in des nôte
daz er den vater tôte.
ez was dô bî den selben tagn
als ich daz maere hoere sagn,
ein vürste in capadôzîâ,
der kam ze mâzedônje sâ
und brâht an dem selben zil
dem künge grôzer gâben vil
und ein ors, daz ê nie man
schoeners künne nie gewan
noch daz sterker waere erkant,
daz was bûzevâl genant.
genuoge sagent ze maere,
daz selb ors daz waere
von orse und ouch von grîfen komn
daz hân ich von im vernomn.
ein vremdez zeichen ez truoc.
im was gebrant an einen buoc
eins ûrohsen houbet.
im was ob irz geloubet,
gewahsen ûz der stirne sîn
ein gevüegez hornelîn.
ez âz die liute alsam ein höu,
ez was vil sterker als ein löu
oder dehein helfant.
ez was in îserîniu bant
versmidet und gebunden.
dô hiez ez an den stunden
der künec lân in einen stal,
der was von îsen über al
begatert und beslagen wol.
dirre wünneclîche vol
wart durch daz behalten sô,
swer in den selben zîten dô
alsô verworhte sîn lebn
daz man zem tôde im solde gebn,
daz ez in ezzen solde,
ob man in toeten wolde.
vür sînen got der künec gie
durch gebetes willen hie.
dô sprach an der selben stunt
der tiuvel durch des gotes munt
< künc philippe, ich wil dir sagn
wer nâch dir sol die krône tragn.> -
< jâ, herre mîn got, des ger ich.> -
< sô wil ich bewîsen dich:
swen dîn ors sich rîten lât
daz mangen man verderbet hât
der sol des landes krône
nâch dir tragen schône.>
darumbe wart ez aber baz
behuot daz man bevinde daz,
wer daz rîche solde hân
swenn ez der künec müeste lân.
über vünfzehen jâr
was alexander, daz ist wâr,
gewahsen daz er wolde
vil nâch und wahsen solde.
er was komn an grôze kraft,
vil wîse und harte manhaft
was er nach wunsche worden.
mit kunstlîchem orden
hâte in aristôtiles
liberâles septem artes
gelêret daz er kunde
mit wisheit ûf von grunde
der siben liste meisterschaft
an den aller witze kraft
mit den diu welt noch umbe gât,
gruntveste und urhap hât.
er was alles wandels gast,
nihtes niht an im gebrast
daz an vollebrâhter tugent
ein kint sol hân in sîner jugent.
er was an saelden ûz genomn,
an allen tugenden vollekomn
die mannes tugent ie ûz genam
des zuht an saelden vollekam.
an einem tage dô diz was
und er ze schuole gelas
und bi den juncherren gie
sîn wunder in des niht erlie,
als ie die wunderlîchen tuont,
er gienc dâ daz ors dort stuont
und wolde ervarn unde sehn
waz im halt solde geschehn,
waz diz ors taete dâ.
durch den gatern bôt er sâ
die hant gegen dem orse dar.
des nam ez guotlîche war:
dem helde muotes rîche
kerte ez vriuntlîche
mit ligenden ôren sîne hant.
dô zersluoc er sîniu bant
und gie zuo zim in den stal.
er begreif im über al
den rücke. ez lie sich an diu knie.
vor im sach er ligen hie
vüeze vil und mange hant,
wan im ze spîse was benant
unvertiger liute lebn
die im wurden vür gegebn,
der ez in drîer jâre zil
dâ vor hâte gezzen vil.
er saz dar ûf, dô ez sich lie
sô vlêhlîche ûf sîniu knie.
ûf den hof kam er geritn
mit sô hovelîchen sitn
daz ich wol von wârheit weiz
daz ritterlîcher puneiz
nâch rehter manlîcher art
von rittern nie geriten wart,
als im von wârheit jâhen
alle die ez sâhen
und als im noch diz maere giht,
swer ez noch geschriben siht.
< losâ! merke!> diesen schal
begunde ruofen über al
der eine und ouch der ander,
< der juncherr alexander
hât mit ritterlîchen sitn
daz ors gezoumet und geritn!
seht, herre, was wil werden dran
benamen ein ellenthafter man,
des landes wunschlîcher trôst
der noch die sîne tuot erlôst
von aller zinslîcher schame!
sîn iemer wernder hôher name
sol noch mit hôher werdekeit
in den landen werden breit.
er kan sô wol gebâren>
sô sprâchen die dâ wâren.
als er hin von dem orse trat,
ez stuont stille an sîner stat
daz ez von stete niender gie,
wan daz erz vant als erz ê lie:
ez getet nie vür die stunt
deheinem man unsite kunt,
sît daz er sich sîn an genam.
von sîner vorhte wart ez zam:
swaz der wol geborne
ie an gesach mit zorne,
daz muoste sâ zehant verzagn
und von im solhe vorhte tragn
daz ez den strît mit vorhten lie
und von im vorhtlîche gie.
nû der künec diz ersach,
von grôzen vröuden er sprach
< alexander liebez kint,
an dir gar bewaeret sint
diu wunder diu die gote mir
ie getâten kunt von dir.
ich siche waerlîche
daz dû mîn künecrîche
solt nâch mînem lîbe hân,
daz sol dir werden undertân.
hie wirt dehein ander
künc dan alexander,
der sol nâch mir der krône phlegn.>
dô sprach der tugentrîche degn
< vater mîn, ob dû daz wilt
und ob ez dich niht bevilt,
sô hilf in disen zîten
mir daz ich ûz gerîten
müge in vremdiu rîche
mit kraft gewalteclîche.> -
< vil gerne, sun, daz tuon ich.
dû solt wol bereiten dich
gar nâch dem muotwillen dîn.
nim sô vil der habe mîn
daz dû nâch dînem muote
mit lîbe und ouch mit guote
mügest milteclîche varn
und dîne miltekeit bewarn.
ich wil machen dir bereit
mit vil grôzer rîcheit
zorse vierzec tûsent man
der iegelîcher strîten kan,
dir einem ûz gesundert.
der besten orse hundert
diu iemen über elliu lant
vinden mac, diu sol dîn hant
ze lobe halten und gebn
dû solt sô rîlîche lebn
daz dich niemen übergebe
nâch rehtem lobe, der nû lebe.>
in disen selben zîten
besante sich vil wîten
nâch mangem wîgande
philippe in sînem lande.
swelch knabe was als alt gesehn
daz man ime muoste jehn,
er haete vier und zweinzec jâr,
der muoste komen, daz ist wâr,
in alexanders helfe dar.
die hiez der künc bereiten gar.
swer sich mohte niht bewarn
von armuot und niender varn,
dem wart bereit sâ zehant
guot bereitschaft, îsengwant
ieglîchem nâch sîner art.
dô swuoren sie die hervart,
daz sie mit alexander ritn
und mit dienstlîchen sitn
niemer von im kaemen
und niemer in genaemen
deheinen herren andern
wan den jungen alexandern.
vil guote war der künec nam
swaz im ze rîcheit wol gezam.
er ahte wênec ûf den schadn,
er hiez im mangen soumer ladn
mit silber und mit golde wol.
swes man dar zuo bedürfen sol
daz iemen var mit rîcheit,
des wart dô vil und mê bereit
denn ich iu welle sagen hie.
dô diz allez sus ergie
und daz her zesamene kam,
alexander urloup nam
und die dar wâren durch in komn,
die er hâte an sich genomn.
künge vürsten herren grôz,
grâven herzogn genôz
hâten im ir kint gelân,
durch rehte zuht zuo zim getân,
der nie deheiner von im kam
sît daz er sich sîn an genam.
die wîle daz er lebte
sô rîlîch er in gebte
daz sie al gelîche
bî im wurden rîche.
heimlich minne er nie gewan
deheines zagehaften man.
swer im was ellenthaft erkant,
den begunde er sâ zehant
von herzen und von sinnen
vil vriuntlîche minnen,
wan elliu zageheit in vlôch.
dâ von muosten die er zôch
alle durch den stolzen degn
ellenthaftes muotes phlegn.
von mâzedônje vuor daz her
mit sô ritterlîcher wer
daz sie mit krefteclîchen sitn
durch mange wîte gegene ritn.
sie kâmen an der selben zît
gevarn an der ponensen strît.
mit den streit ein werder man
und hât in gesiget an
der künec nikolâus,
ein künec was geheizen sus.
aridêâ was sîn lant.
dô der mit wârheit bevant
daz alexanders ritterschaft
vuor mit alsolher kraft,
er bereite sich ze wer,
in sînem lande er lac mit her
und wolde sich mit kreften wern,
ob in die mâzen hern.
ob sich unser stolzer degn
ûf den strît iht het bewegn?
jâ, daz ist wâr, er was bereit
mit alsô grôzer rîcheit
daz im nihtes gebrast.
des landes wirt und ouch sîn gast
begunden sêre gâhen,
sô vaste ein ander nâhen
daz beidenthalp diu ritterschaft
sach und kôs der andern kraft.
von den herren wart dô sâ
ein hantvride genomen dâ
biz nikolâus saehe
wes alexander jaehe
ûf in daz er in wuoste sâ.
mit ir sunderrote dâ
riten sie zein ander
nikolâus und alexander.
dô des landes wirt ersach
den gast, er duhte in al ze swach,
dô er zuo zim nâhte,
vil harte er in versmâhte.
er sprach< herre sage mir nû,
wer sint die dîne, wer bist dû?> -
< die ritter gar mit mir hie sint,
ich bin philippen kint,
ich heiz alexander>.
smaehlîche sprach der ander
< vür wen hâst dû mich ersehn?
des soltû rehte mir verjehn>.
dô antwurt alexander sus
< dû bist nikolâus
der künc von aridêâ>. -
< der bin ich> sprach der künec sâ.
< nû was hâst dû hie verlorn?
sol dir iht schaden sîn erkorn
von dem dû solt verliesen,
den mahtû hie wol kiesen.> -
< lâ dîne smaehlîche drô!>
sprach alexander mâzedô,
< wer weiz vor wiez ergât?
übersprechen niht wol stât.
sus habe niht sô hôhen muot!
der sich verspricht, deist niht guot.
swer über sich ze hôhe gât,
ob den diu hoehe slîfen lât,
er nimt vil lîhte alsolhen val
von der hoehe ze tal
daz er wider niemer mê
sô hôhe kumt als er was ê.
alsus mac geschehen dir,
wiltû versprechen dich gein mir:
gelückes rat muoz scheiden
den kriec undr uns beiden.>
der red antwurt im alsus
der künec nikolâus,
er sprach< dû hâst wâr geseit.
mîn küneclîchiu edelkeit
ist sô hôch, sô grôz vernomn
daz ich ze hôhe niht mac komn,
swie ich kome: des bin ich wert
dâ von mîn muot der hoehe gert.
wie möht ich nâch mîner gir
ze hôhe komn an prîse an dir?
durch waz bist dû komen her?
daz sage mir, daz ist mîn ger.
waenestû betwingen mich?
phî, tumbez wiht! des schame dich,
daz dû gestrîten waenest mir!
jâ weiz ich rehte, swenne ich dir
den lîp wolde spîwen an
oder dehein vremder man,
daz dû von vorhten stürbest
und âne wer verdürbest.>
sîn zorn sûmde daz niht mê,
gen sînem antlütze er spê
< diz nim, vil toerschez wiht, ze dir!
des bistû kûme wert von mir,
tumber gouch, nû schame dich
daz dû vertrîben waenest mich!>
alexander sich enthielt,
wan er grôzer tugende wielt,
sîn zuht enthielt im sînen zorn.
dô sprach der herre wol geborn
< dêst wâr, herre, dû hâst dich
geswachet sêre und niender mich.
dû hâst von mir und ich von dir
vride, den soltû von mir
baz hân denn ich in von dir hân:
dû hâst vil swachlîche getân,
des gib ich dir wol iezuo lôn.
sam mir mîn hoehster got amôn!
dû muost mir es ze buoze stân,
sol ich gesunt mîn leben hân,
ich wil dir lîp êre und guot
darumbe nemen, daz ist mîn muot.
doch wil ich dir wahsen lân
( swie übel dû mir hâst getân)
ob dû ze lützel hâst dîn her>.
er sprach< ich hân wol solhe wer
daz dû mir ruomen muost mîn lant.>
dô schieden sie sich sâ zehant
in ir reise zuo zir scharn
und hiezen sich vil wol bewarn
ûf den künftigen strît.
die naht unz ûf des tages zît
enslief dô wênec iemen.
sie hiezen vaste riemen
ir halsberg und ir îsengwant.
der ellenthafte wîgant
der ie nâch lobes êren vaht,
die sîne scharte gar die naht
wâ die solden rîten
und wie sie solden strîten,
daz wart gesetzet allez dô.
mit süezer bet und mit drô
mant alexander sîne man
daz sie gedaehten dar an
daz sie durch prîs dar in daz lant
haete ritters name gesant,
dô lobten sie dem künge sâ
ir helfe helflîche dâ
ûf gie der tac. der künge her
bereite schiere sich ze wer,
von beidenthalben kam aldar
manec wol geziertiu schar
ûf die andern in den strît.
sich huop an der selben zît
ein strît des manec degen balt
an sînem lîbe sêre engalt.
dô nâhte manges ungewin.
die mâzen tâten wider in
die von aridêâ.
dô brâht alexander sâ
starke niuwe ritterschaft
diu mit vîentlîcher kraft
kam gehurtet in den strît.
dô wart an der selben zît
uf sie gesprenget buzevâl,
daz machte manec bluotec mâl
und vrumte mangen degen tôt.
dô wuohs der lantliute nôt:
der viel hie, der ander dort,
dirre wunt, der ander mort.
mit vrevel alexander streit.
bûzevâln sîn ors er reit
hin ûf den künec dâ er hielt,
vil grôzer unmuoze wielt.
er stach ûf im enzwei sîn sper,
in vrevellîcher ritters ger
kêrte sich der wîgant
gen alexander zehant.
die hôchgemuoten jungen
sô sêre ein ander drungen
daz den stolzen helden balt
ir strît niuwan daz leben galt.
sô vîentlîche sie dô stritn,
mit sô zornlîchen sitn
daz sie beidenthalp mit schadn
von wunden wurden dô verladn.
unser werder degen guot
hâte vrevellîchen muot,
er dâhte< sît mîn êrster strît
den in mîner kindes zît
mîn hant ie dâ her erstreit,
durch ritterlîche werdekeit
alhie geschiht und sol geschehn,
sô sol ich hie lâzen sehn
mînen manlîchen muot.>
sus dranc der stolze degen guot
ûf den künc und sluoc in nidr.
swaz er ie gesluoc dâ widr,
daz was bûzevâle ein wint:
des wunsches und der saelden kint
ez ûf den man mit zorne truoc.
durch den helm er in sluoc
daz ez in sterben lêrte.
tobend er dô kêrte,
im was ze vliehenne vil gâch.
alexander dranc im nâch
und sluoc in daz er tôt lac.
daz er in ê sô lîhte wac,
daz galt er mit dem tôde dâ.
daz her von aridêâ
vlôch und wart sigelôs,
der junge degen den sic erkôs
als daz gelücke wolde
daz in gelingen solde.
diz was des heldes êrste kraft
die er begie mit ritterschaft,
und diu êrste getât
diu dem helde erworben hât
daz sîn lop iemer staete wert
biz daz diu welt niht endes gert.
lât iu von im noch sagn ein teil!
dô im beschach daz grôze heil,
die tôten liez er al ûf habn
und mit dem künege begrabn.
die veste ergaben sich zehant
und dar nâch vil gar daz lant.
die lanthern dô kâmen,
von sîner hant sie nâmen
ir lêhen und daz rîche
nâch zinse dienstlîche.
sîn her was rîche worden dâ.
gen mâzedônje kêrte sâ
der herre mit den sînen dô.
die lantliute wâren vrô
des jungen heldes sigenunft
und ir vil lieber vriunde kunft.
vil wênec iemen êre vlôs,
dô er aldort den sic erkôs.
nû wart an der selben zît
daz maer in dem lande wît
daz alexander waere komn
und haete hôhen sic genomn.
des vröuten sich gelîche
arm und dar zuo rîche,
in began sîn heil wol lîchen,
sie begunden vröude rîchen.
in den zîten dô diz was,
diu künegîn olimpias
verstôzen was und hin geleit
von der krône werdekeit.
ein vrouwe hiez kaljôpatrâ,
diu was ze künegîn aldâ
gekroenet und solde sîn
des künges wîp ein künegîn.
dô kam alexander
dei lantherren vander
mit vröuden ûf dem palas
dâ diu brûtlouft ûffe was.
mit vroelîchem schalle
die lantherren alle
sâzen gar ze tische hie.
dô er in den palas gie
wart er enphangen schône.
eine guldîn krône
truoc der herre an sîner hant,
zem künge sprach der wîgant
< herre und lieber vater mîn,
disiu krône diu sî dîn,
die ich dir hân brâht alhie.
ez ist diu êrste die ich ie
mit mîn selbes hant erstreit.
dâ bî sî dir vür wâr geseit
daz ich die hôchgezît durch dich
bî dir wil sîn. swenn aber ich
gegan der lieben muoter mîn
einen man, daz dû solt sîn
ungeladet von mir dar.>
dise rede marcten gar
alle die dâ sâzen,
die rede sie dô mâzen,
dem künge waere widerseit
mit sus verdâhter wîsheit.
< sol daz iemen dunken guot,
daz ich waene niemen tuot,
daz dû, vil lieber herre mîn,
den dir gelîchen sun dîn
verstôzest dîner rîcheit,
der dir gelîch antlütze treit
den kaljôpatrâ gebar,
und sol ein ander sitzen dar
an dînen hêrlîchen gwalt
der dir ist ungelîch gestalt -
sô wil ez mich ouch dunken guot>
sprach ein rise dô hôchgemuot
der was geheizen lisias.
alexander zornec was
daz er im sîn rîche
sô rehte vrevellîche
verteilte ân allez lougen
undr sîn selbes ougen.
einen stecken er gevie,
gein dem risn er dar gie
und gap im einen solhen slac
daz er zehant tôt gelac
und vürbaz nie mê wort gesprach.
dô daz der künc philippe ersach,
er spranc ûf und zuhte swert
und zurnde gegen dem helde wert
und lief im zornlîche nâch.
dem helde was ze vluht niht gâch,
gegen dem slage er stille stuont,
als ie die wol geherzten tuont,
und wolde unvorhtlîche sehn
waz im solde dô geschehn.
vil spotlîch er des endes sach
dô des künges zorn geschach.
innen des der künec wac
gen alexander sînen slac,
er viel daz im daz swert enbrast
und daz sîn grôzer zornes last
gen alexander gar zergie,
wan er lac unversunnen hie.
der edel tugentrîche
sprach vil schimphlîche
ze sînem wânvater dô
< wie vellest dû, her künec, sô?
dû bist doch, herre, gesunt noch
und stüende ûf dînen vüezen doch
biz daz dîn ellenthaftiu hant
betwanc vil manec rîchez lant
mit kraft in eurôpâ!>
des wart ein teil gelachet dâ,
doch muosten sumelîche klagn
den vürsten der dô was erslagn
den alexander dô ersluoc.
den künec man ze bette truoc.
ir beider vîentlîcher nît
schiet alsus die hôchgezît:
diu künegîn kaljôpatrâ
mit leide wart gekroenet dâ.
swie vater glîch ir sun was,
daz lant behabte olimpias.
ir sun der ungelîche
behabte ir wol daz rîche
und dar zuo guot êre und lant,
ir name wart vil wîte erkant
in mangen vremden landen,
diu sî von im erkanden.
an dem andern morgen
gienc mit vil kleinen sorgen
alexander drâte
hin gegen der kemenâte
dâ der künec inne lac
des noch an einem teile phlac
diu zornlîche siechheit
von der ich iu ê hân geseit,
diu von dem valle komen was
den er viel ûf dem palas.
der junge degen saz vür in,
er sprach< vater mîn, ich bin
her zuo dir komn, ich wil dich bitn
daz dû nâch vaterlîchen sitn
güetlîche vernemest mir
daz ich reden wil mit dir.> -
< daz tuon ich gerne. nû sprich an!> -
< herre, sprach der wîse man,
dâ tuo mîner muoter wol,
dînem wîbe, wan diu sol
mit triuwen minne hân von dir
und dû getriulîche von ir
triuwe zallen zîten hân.
der hâstû nû niht wol getân.
nû tuo ir baz und wis ir holt,
alsô dû von dem rehte solt!
lisias der ist erslagn,
den soltû ze mâze klagn:
swaz dem geschach daz gie im nôt.
daz unreht aber dir gebôt
daz dû mich slahen woldest,
wan dû bedenken soldest
daz er versprach mîn rîche
daz ich vil zimelîche
nâch dir sol erben und wil:
swie der liute rede vil
verteile mir daz rîche dîn,
sô wil ich doch dîn erbe sîn
und dîn sun, swaz sie alle sagnt
die mir nît mit hazze tragnt,
swaz die mügen von mir sagn
daz sagn! ich wil hie krône tragn.> -
< sun, sprach der edel künec dô,
ich weiz wol, ez muoz sîn alsô.
dû solt der bete sîn gewert,
als dû hâst an mich gegert.>
den künec er dô ligen lie,
ze sîner muoter er dô gie,
er sprach< liebiu muoter, ich
hân mit dem künge dich
versüenet. er hât sînen zorn
vriuntlîche gen dir verkorn.
nû ist reht daz ieglich wîp
trage den vlêhenden lîp
und ir man sî undertân.
nû soltû zuo dem künge gân
und süene mit im selben dich!>
dô began diu vrouwe sich
zieren schône. si gie dan
zuo dem künge ir lieben man.
niemen mêre was dô dâ,
sie suonten vriuntlîche sâ.
der vrouwen suonte ir swaere
ir kint und ir schirmaere,
als ir von im geheizen was.
dem künge wart olimpias
lieber danne dâ vor ie,
sô grôze minne er ir gevie
daz er nie nihtes übersach
dar an ir willekür geschach:
swaz sie gerne wolde sehn,
daz muoste schiere sîn geschehn.
philippe wart in kurzer stunt
geil und wol als ê gesunt,
des wurden al die sîne vrô.
nû was in den zîten dô
der erde groestiu rîcheit
als ich iu hân hie vor geseit,
mit gewalte in persîâ.
der dô truoc die krône dâ,
der was dârîus genant,
dem zinseten sich hundert lant
und dar zuo vünfzec krône,
die muosten leisten schône
swaz in der herr ie gebôt,
artâxerses der was tôt,
dem ê nectânabus entran.
dârîus der rîche man
twanc vîl gewalteclîche
elliu krieschiu rîche
und mâzedônje daz lant.
der hâte boten dar gesant
die dô nemen wolden
den zins als sie solden,
als sie gewon ê wâren
dâ vor in mangen jâren,
wan er dem degen unverzagt
nie dâ vor wart versagt
von philippen lande.
dârîus sie sande
nach zins in philippen lant
daz im der würde nû gesant.
als alexander sie gesach
mit schimphe er zuo den boten sprach
< ir herren, saget rehte mir,
waz tuot ir hie? wes muotet ir?> -
< wir sîn nâch zinse gesant
in mâzedônj iuwer lant:
daz tet der künec dârîus.>
dô antwurt in der herre alsus
< nû seht daz ir niht lenger spart
von hinnen heim die widervart!
und saget iuwerm herren sô:
dô philippus mâzedô
was âne sun, dô was alhie
ein henne die geleite nie
kein ei wan daz guldîn was:
swaz man zesamen ie gelas
goldes über al diz lant,
daz wart ime dô gesant.
nû ist daz huon unberhaft,
daz ist geschehen von der kraft
daz der künec hât ein kint:
des billîcher diu eier sint
denn ie mans von persîâ.>
die boten schieden dannen sâ
und sageten nâch zîten dô
ir herren disiu maere alsô,
von dem herren unverzagt
müest im sîn der zins versagt,
wie der unverzagte
mit witzen in versagte.
under diu dô diz ergie
als ich iu hân gesaget hie,
dô wart von rehter wârheit
dem künc philippe geseit
und vil gewaerlîche erkant
daz armênje daz lant
in ze herren wolde lân,
daz was im biz dar undertân.
diz begunde müejen in,
dô sante er alexandern hin
mit sîner werden ritterschaft.
er hoehete im sîne kraft
mit mangem wîgande,
in allem sînem lande
er im die besten gar ûz las:
swaz dar werder ritter was,
die muosten mit dem jungen man
alle gegen armênje dan.
sus schiet der wîse wîgant
von mâzedônje sâ zehant
gegen armênje mit dem her.
er vuor mit sô grôzer wer
daz er gewalteclîche
kam in daz selbe rîche
und lac ouch mit gewalte dâ.
daz lant erloubet er dô sâ,
swaz der men vunde, daz er daz
naem âne manneglîches haz.
dô wârn die vest ungespart,
dô daz rîche erloubet wart,
dô huop sich ein roup unde brant
übr armênje daz lant,
die veste man gar brande
in allem dem lande.
schiere wart daz rîche
betwungen al gelîche.
die veste sie zerbrâchen gar.
dô kâmn die lantherren dar
und buozten al ir schulde.
an alexanders hulde
ergap sich allez daz lant
und swuor im hulde sâ zehant.
ouch wart der herren vil vertribn.
die veste die dô ganz belibn,
die hiez der ellenthafte man
besetzen gar. er kêrte dan
gen mâzedônje mit dem her.
nu was mit ritterlîcher wer
von bitînje pâusânîâ
komn in mâzedônje sâ.
den muote sêr diu sicherheit
die philippe an ime erstreit,
als ich iu hân hie vor gesagt.
dô der degen unverzagt
vernam unde wol bevant
daz die besten übr daz lant
mit alexander wâren gar,
er kam gevarn mit grôzer schar.
philippen er unhôhe wac
der dô in êgêâ lac.
er reit in krefteclîchen an,
dem ellenthaften werden man
truoc er vîentlîchen haz.
sîner veste er vil besaz.
swie kleine waer philippes her,
er was doch mit rîcher wer
dô man sîn rîche herte,
vil manlich er daz werte.
an einem tage dô daz geschach,
philippen man ûz rîten sach.
( als ie ze vrevellîcher muot
dem man vil dicke schaden tuot,
etswenne ouch prîs und êre
nâch des gelückes lêre:
vil ofte wâget der man
dâ er muoz verliesen an
und eteswenne gewinnen.
mit wîslichen sinnen
soll man üeben manheit,
dô überkraft ze hôhe treit.)
der künc philippe sêre engalt
daz er mit tumpheit was sô balt.
er reit mit sîner kleinen wer
an daz krefterîche her
und tet schaden vil aldâ.
dô kam pâusânîâ
gehurt mit grôzer ritterschaft.
dô der vîent überkraft
philippe ersach, der werde man
gen sîner letze wolde er dan.
dô kam der künec selbe her
und stach durch sînen lîp ein sper.
die sîne entrunnen alle dô,
ir schaden wârens unvrô
den sie sô schedelîche kurn
und ir herren dô verlurn
der in ze künge was erkorn,
sie dûhte ir saelde an im verlorn.
nâch disem selben strîte sâ
kêrte pâusânîâ
gen jônâ der houbetstat.
die sîne er sich dar wenden bat,
wan dâ diu schoene olimpias
alexanders muoter was.
durch daz vil minneclîche wîp
hâte er allen sînen lîp
kumber arbeit und nôt
als im ir minne gebôt.
er was in sînem muote
mit lîbe und ouch mit guote
gesîn der vrouwen ritter ie,
daz in vil kleine doch vervie,
dâ von er ungemüete truoc.
dô er ir lieben man ersluoc,
er wolde mit gewalte hân
die vrouwen rîch und wol getân.
die stat ergreif er âne wer.
dô kêrter mit sînem her
gegen des künges palas
dâ diu vrouw ûffe was
und des künges liute vil.
dô vant er an dem selben zil
grôze wer. sie werten sich
mit wer diu was sô werlich
daz er in an der stunde
niht vil geschaden kunde.
er streit sie vîentlîchen an,
dar an er doch niht vil gewan:
sie werten sich sô sêre
daz ir guot und ir êre
an wer niht wart versêret,
des wart ir kraft wol gêret.
innen des was under wegn
alexander der degn,
der helfe in solde bringen
mit helflîchen dingen.
er gâhte balde mit der kunft.
nâch der rîchen sigenunft
die der ellenthafte man
in armênje dort gewan,
was er ze mâzedônje komn.
ûf der vart hât er vernomn
wie ez allez was geschehn,
als ich iu nû hân verjehn.
dô streich er durch daz rîche
mit wer vil krefteclîche.
dô sie begunden nâhen,
sie îlten balde gâhen
und wâfenten sich ûf die vart.
ritterlîche und wol geschart
kâmen sie mit zornes sitn
zuo den vîenden geritn,
der vundens ungewarnet vil.
dô wart ein angestlîchez spil
erhaben an den gesten.
die boesten und die besten
muosten alle ligen tôt,
als alexander gebôt.
dô die ûf dem palas
vernâmen daz in komen was
ir herr alexander,
der eine und ouch der ander
liefen zuo zin vür die tür.
dô kam alexander vür
ûf sînem bûzevâle gerant.
er sluoc mit sîn selbes hant
den künec daz er tôt gelac.
daz was ein herzelieber tac
den sînen al gelîche,
sie wurden vröuden rîche.
die geste wurden alle erslagn,
in wart diu unzuht niht vertragn
daz ir herre ir herren sluoc
des lop vil hôhe wirde truoc.
alexander vrâgte hie
dô der strît alsô zergie,
wâ sîn vater waere.
dô saget im ze maere
ein ritter sus, er lebte noch,
mit dem tôde runge er doch
nôtlîch an der walstat.
der herre sich dar wîsen bat.
philippe dennoch lebte,
mit dem tôde er strebte.
als in alexander vant,
sînen helm er abe bant,
den harnasch er abe zôch.
den elliu zageheit ie vlôch
erbeizte und gie zem künge dô.
des tôt macht in als unvrô
daz der saeldenrîche man
vil sêre weinen began.
der künec z alexander sprach
< sun, nû sich diz ungemach
daz ich nû lîde und lîden sol.
ich weiz von rehter wârheit wol
daz ich niemer mac genesn.
nû soltû gemant wesen
daz dû behaltest wol den rât
des dich underwîset hât
der vil wîse meister dîn.
lâ dir den grôzen kumber mîn
herzeclîche sîn geklagt!>
dô sprach der degen unverzagt
< ich wil dir namelîche sagn
daz ich den künec hân erslagn
der dînes tôdes schuldec ist,
von dem dû sus gelegen bist.> -
< ist daz wâr?> -< jâ, sunder wân
an im ich dich gerochen hân.> -
< sô nime ich vroelîchen tôt>
sprach der künec in sîner nôt,
< nû klage ich kleine mîne vlust>.
er leinde an alexanders brust,
daz wort er kûme vollesprach
ê daz der tôt sîn herze brach,
ez was niht vollesprochen,
sîn herze was gebrochen.
ze dirre klagelîchen nôt
dô der künec nam den tôt,
kâmen die dâ wâren gar
mit vil trûreclîcher schar.
dô was an dem selben tage
niuwan jâmer und klage.
die tôten wurden ûf erhabn.
dô wurden rîlîche begrabn
die edlen künge beide.
mit klagendem herzeleide
manec hôchgemuoter lîp
beidiu man und dar zuo wîp
muosten pâusânjen klagn
den alexander hâte erslagn.
an im was manlîchiu zuht.
er was geborn von hôher vruht:
sîn vater hiez zêrastes
der ie der minne lastes
von werden wîben truoc genuoc,
als in sîn reht von rehte an truoc
von sînem vatr oraste
den man prîset vaste
die wîle daz er lebende was.
diu künegîn olimpias
klagte stille und überlût
den künc ir herzeliebez trût
und alle die dâ wâren,
vil jaemerlich gebâren
was an den lantherren dô,
sie sprâchen al gelîche alsô
< wê dir wê, vervluochter tôt,
der verlusteclîchen nôt
die dû dem lande hâst getân,
sît wir von dir verlorn hân
philippen, des hêrlich getât
mangen prîs erworben hât!> - ii
aller mîner meister kür
wil ich diz maere legen vür
und wil sie vlêhen und bitn
daz sie nâch meisterlîchen sitn
ir hôhe kunst mir zeigen
und diemuotlîche niegen
ir ôre ir künstec herze her
und merken wes mîn herze ger.
ich wil den werden guoten
vlêhlîche muoten
daz sie vriuntlîche war
nemn ob ich hie missevar,
daz vil lîhte muoz ergân,
wan ich mich an genomen hân
mit tumbes herzen stiure
sô rîcher âventiure,
waer gezwîvalt der sin
des ich erlâzen eines bin,
si gaeb mir arbeit ze vil.
dâ von ich lêre suochen wil,
wan ich mich niht gelîchen
mac den künsterrîchen.
ich ger ir aller lêre:
mîn kunst hât meister mêre
dan ir ie würde her an mich:
an kunst verstânt sie alle sich.
sinnen singen tihten,
mit rîmen sinne slihten,
des ist nû vil, es was nie mê
vor uns in allen zîten ê.
doch stât diu kunst al eine,
swie si sî gemeine,
al eine als ich iu sagen wil:
künsterîcher liute ist vil,
die doch niht koment an daz spor
daz uns ist getreten vor
an meisterlîcher sprüche kraft
und an hôher meisterschaft.
uns ist diu kunst al eine,
swie si sî gemeine,
ir hort ist gar vereinet,
uns allen doch gemeinet.
kunst ist uns allen wol erkant,
doch sint ir wege vil ungebant,
des uns gemeiniu volge giht,
wan niemen nû sô guotes niht
gesprechen kan, sô man dô sprach
dô man uns kunst vor belzen sach
ûf den künsterîchen stam
von dem getiht urhap nam.
von veldeke der wîse man
der rehter rîme alêrst began
der künsterîche heinrich,
des stam hât wol gebreitet sich,
den uns sîn hôhiu wîsheit
z anevange hât geleit.
driu künsterîchiu bluomenrîs
hânt sich dar ûf in mange wîs
vil spaehlîche zerleitet
und bluomen ûz gespreitet.
daz eine ist sleht, süeze und guot,
des vruht den herzen sanfte tuot,
dâ ist niht wurmaeziges an:
daz stiez der wîse hartman
der künsterîche ouwaere
mit mangem süezen maere.
daz ander rîs ist drûf gezogn,
starc, in mange wîs gebogn,
wilde, guot und spaehe,
mit vremden sprüchen waehe:
daz hât gebelzet ûf den stam
von eschenbach her wolfram.
mit wilden âventiuren
kund er diu kunst wol stiuren,
des gap sîn âventiure
der kurzwîle stiure.
ob ich nû prîsen wolde
als ich von rehte solde
daz dritte vollekomen rîs,
sô müeste ich sîn an künsten wîs:
dêst spaehe guot wilde reht,
sîn süeziu bluot ebensleht
waehe reine vollekomn,
daz rîs ist eine und ûz genomn
von künsterîchen sinnen.
wie suoze ez seit von minnen!
wie süezet ez den herzen
der süezen minne smerzen!
wie güetet ez der guoten guot
der hôchgemuoten hôhen muot!
daz stiez der wîse gotfrit
von strâzburc der nie valschen trit
mit valsche in sîner rede getrat.
wie ist sô ebensleht gesat
sîn vunt, sô rîch, sô sinneclich!
wie ist sô gar meisterlich
sîn tristan! swer den ie gelas,
der mac wol hoeren daz er was
ein schrôter süezer worte
und wîser sinne ein porte.
wie kunde er sô wol tihten,
getihte krümbe slihten,
prîsen beider hande lîp,
beidiu man und werdiu wîp!
wie truoc im sô hôhe gunst
in tiutscher zungen rehtiu kunst!
got im der kunst wol gunde,
daz er sî sô wol kunde.
rîcher sinne ist vil geleit
an unser kunst mit wîsheit.
wir tihten und rîmen,
wir waenen daz wir lîmen
niuwan mit der rîme
der hôhen sinnen lîme:
dar an sîn wir ein teil betrogn,
uns hât der wân dran gelogn:
wir gern daz wir ir steinen
den edlen und den reinen
gelîchen unser kunterfeit:
elliu unser arbeit
ist nû an wildiu wort gedign
diu vor uns wâren ie verswign
und selten iemer sint vernomn,
an diu wellen wir nû komn.
noch ist der meister mêre
an den ich suoche lêre.
von heimesvurt her kuonrât
von gote wol getihtet hât,
den darf riuwen niht sîn werc.
her wirent von grâvenberc
ist an einem maere
worden lobebaere,
an dem hât sîn meisterschaft
erzeiget hôher sinne kraft.
des lâzen wîse liute jehn
die reht getihte künnen spehn!
von zazichovn her uolrich
sol ouch an witzen bezzern mich,
der uns daz maere und die getât
künstlîche getihtet hât
wie lanzelet mit werdekeit
mangen hôhen prîs erstreit.
eines vundes hât gedâht
der wirt niemer vollebrâht,
von steinach her blickêr.
der ist lôs und alsô hêr
daz aller tihtaere sin
kan niemer vollebringen in,
daz ist der lôs umbehanc.
waer er vünf tûsent ellen lanc,
man kunde in vollemâlen niht:
unz getihtes iht geschiht
sô mac man mâlen die geschiht
als ieglich âventiure giht, -
dâ von mac des niht geschehn
daz er iht endes müge jehn.
allr âventiure krône
treit ouch ir namen schône.
sî diu alsô meisterlich
sô sî ir meister heinrich
von dem türlîne hiez
der dirre âventiure ûf stiez
ein zil übr elliu maere,
sî disiu rede gewaere,
sô lâzen wir der krône
den namen stân vil schône.
tumpheit strâfen und spot,
die welt erkennen, minnen got,
des lîbes und der sêle heil,
weltlîchen êren teil
in dirre welte kurzen tagn
lêrte kunstlîche bejagn
der sinnerîche vrîdanc
dem âne valschlichen wanc
elliu rede volge jach,
swaz er in tiutscher zungen sprach.
ein zwî der kunst gestôzen hât
her vlec der guote kuonrât,
daz ist ouch lobebaere,
dô er beschiet diu maere
wie flôren und blanscheflûr
was süeze und underwîlen sûr
ir lieplich geselleschaft
und wie der strengen minne kraft
clîesen twanc. des rat suoch ich
swâ mîn unkunst sûmet mich.
sin uopte mîn vriunt absolôn
an gevüeger sprüche dôn,
die sint genuoc guot und reht.
von kemenât her albreht
des kunst gert wîter schouwe.
her heinrich von lînouwe
hât ouch vil süez arbeit
an den wallaere geleit.
swenn er wil der strickaere
sô macht er guotiu maere.
sante margarêten lebn
hât uns gevuoge vür gegebn
mîn vriunt her wetzel, des gihe ich.
von türheim her uolrich
hât als ein bescheiden man
gevuoge und wol gevangen an
ouch sô wol gendet dâz er hât
ein lop daz bî den wîsen stât,
des ich gihe und jehen sol:
sie hânt gesprochen alle wol.
kunde mîn kunstlôser sin
komen an ein teil nâch in,
daz leider noch niht mac ergân,
wan ich niht hôher künste hân!
dâ von hân ich ir lêre
gevlêhet alsô sêre.
sie sîn lebent oder tôt, -
got helfe in! - mir'st ir lêre nôt
daz sie mîn zwî niht werfen abe
daz ich ûf gestozen habe
dô ich daz maere beschiet
wie vil nôtiger diet
der guote gêrhart lôste
von grôzem untrôste,
und wie der guote jôsaphât
sich durch barlââmes rât
der gotes gnâde koufte
dô er sich gote toufte,
und wie sich von der heidenschaft
bekêrte nâch der gotes kraft
der guote sant eustachîus.
mac mîn zwî belîben sus,
sô wil ich vürbaz sprechen hie
dâ ich hie vor diz maere lie,
und wil ûz senden einen man,
ob ich in wol geprîsen kan,
des prîs sô hôhen prîs bejagt
daz vor im niemen was betagt
der solhen prîs bejagte
der hôher ie betagte.
sus komen an daz maere!
dô der unwandelbaere
künc philippe wart geleit
nâch küneclîcher werdekeit,
die lantherren wâren dâ
und krônten ir juncherren sâ
den edeln alexandern.
die einen und die andern
swie ir name waere genant,
swuoren im sâ zehant
mit schulden staete sicherheit.
dô sprach der degen vil gemeit
< vernemet al gelîche
arm und dar zuo rîche
vriunde mâg unde man
den ich wol aller êren gan!
swer hie von mâzadônje sî,
kriechen und tessâliî
oder ir von trâzîâ,
sie sîn hie odr anderswâ,
die mich ze herren wellen hân,
die süllen alle vorhte lân
und vürhten niht die heidenschaft.
ich rüeme des wol mîne kraft
daz mich niemen an gesiht
daz er dürfe vürhten iht,
wil er mir rehter vriuntschaft jehn.
sô getar mich iemen an gesehn
der mich ze vînde welle hân.
daz wizzet wâr ân allen wân!
durch daz bite ich iuch daz ir
dienet und helfet mir
daz wir sie twingen ich und ir.
daz sie iu dienent unde mir
daz weiz ich wol, ez muoz geschehn,
welt ir mir staeter helfe jehn.> -
ein sinnerîcher vürste sprach
dô disiu rede alsus geschach
< alexander, lieber herre mîn,
wir hân mit dem vater dîn
dâ her mit arbeitlîchen sitn
dicke mange nôt erlitn
und sîn ein teil von kreften komn.
uns hât krefte vil benomn
daz alter und diu arbeit
diu uns ê muosten sîn bereit,
dô wir in jungen jâren
in urliugen wâren
durch unsers lieben herren nôt,
dînes vater, derst nû tôt.
daz ist iemer unser klage.
nû nim ob ez dir wol behage,
zuo dir junge ritterschaft,
der jugent wahsende kraft
habe! die süln mit dir varn.
diu lant süln wir hie bewarn,
sô helfent sie dir strîten dort.>
diu rede was ir aller wort. -
< ir herren, iuwer rât ist guot,
doch spriche ich: swaz der alte tuot,
daz tuot er gar mit wîsheit.
den jungen man ze hôhe treit
sîn vrecheit ûz der mâze dan:
der tumbe und ouch der wîse man
die süln mit ein ander varn.
des jungen vrevel sol bewarn
des alten mannes wîser rât
der sich ez wol genietet hât
und dannen hât sich selben brâht
dar der junge hât gedâht
ze komenn, ob er dar mac komn,
wirt im daz leben niht benomn>
sus sprach der degen hôchgemuot
< mit iu süln wir sîn behuot,
dâ von ich iu nû muote
mit lêr iuwer huote.
richer lêre muoz phlegn,
wan ich mangen stolzen degn
mit mînen kreften wil bestân,
geschiht ez als ich willen hân.
nû helfet witzelîche
besetzen mir daz rîche!>
nâch ir râte daz ergie.
sînen meister er dô lie
den wîsen aristôtilem.
sînen rât bevalch er dem
nâch der lantherren ger.
ein vürste hiez antipater
der was rîch und wîse erkant,
dem bevalch er daz lant,
den lantherren er gebôt
daz sie naemen zaller nôt
des meisters rât. des lobte ir munt.
urloup nam er sâ zestunt
von sînen vürsten wert erkant.
muoter mâge man noch lant
sîn ouge niemer mê gesach
sît daz sîn scheiden dan geschach.
den vürsten er die künigîn
bevalch die lieben muoter sîn,
diu weinde dô si sach ir barn
den edeln herren von ir varn,
daz weinde ouch aristôtiles.
nu was trâgakantes
ein insel nâhe dâ gelegn,
dar kêrte sâ der stolze degn -
dâ hât in den zîten dô
der heiden got apollô
ein betehûs - dâ vuor er hin
und wolde beten do an in
und beidiu lîp êre und lebn
sînen goten dô ergebn,
do liez er sîn grôz opher dâ.
sînen marschalc sante er sâ
gen sizîlje mit her -
er twanc vil lande bî dem mer
mit gewalteclîcher hant -
der was eumîlio genant.
alexander vuor mit kraft
mit sîner grôzen ritterschaft
hin ze kriechen in daz lant.
gen têbê sante er sâ zehant
daz im diu stat mit werdekeit
vier hundert ritter wol bereit
sante in sîne hervart
bereit nâch ritterlîcher art.
diz versprach diu selbe stat,
swaz er gebôt oder bat
dâ wart er entwert an.
sie hâten vier tûsent man
die bî in z îser wâren wol,
dar zuo was diu stat gar vol
grôzer werlîcher schar.
dô kam alexander dar
gezogt mit sînem grôzen her,
er vant sî mit vil grôzer wer.
sie sluzzen zuo diu bürgetor
und vuorn ûf ir gewer enbor
und retten spotlîche dort
her abe niuwan scheltwort
und buten her ûz an der zît
mit worten werlîchen strît.
dô sprach er smierlîche
< ir sît sô ellens rîche
daz ir an disen zîten
mit mir wol müget strîten.
ir hât iuch sô wol bewart
und iuwer stat alsô verspart
daz niemen iu geschaden kan.
doch ist niht manlich, swâ der man
in vluhte biutet sînen strît
odr, als ir verborgen sît,
sich birget und schiltet:
dô schelten niemen giltet.
tuot einz von zweien dingen!
ich wil mit strîte iuch twingen
oder ergebet iuch an mich.>
des werten sie mit schalle sich:
< nû vrid - ûz! waz doch? dô gestrît!> -
dô hiez der künec an der zît
tûsent ritter gâhen
die porten umbevâhen
mit werlîchen schützen sâ
daz die strît erhüeben dâ.
der besten zweinzec hundert
an manheit ûz gesundert
schihter vor den schützen dar
gewâfent werlîche gar
daz sie gaeben guot geberc,
vier tûsent an diu antwerc.
dô man sie treip an den grabn,
dô wart der strît mit zorne erhaben:
sie wurfen und schuzzen hin,
sie her ûz, sie her in.
katzen, igel sie dar tribn,
dâ bî die mangen niht belibn
und pheteraer der man bedarf,
der manger in die stat hin warf.
der wolden sie bedurfen.
vil türne sie zerwurfen.
stesichêr ein vürste hêr
begunde sûmen sich niht mêr,
er schihte vîentlîchen strît
an die stat: vil lange zît
was er ir dâ vor gehaz.
dô sûmet er niht lenger daz
er würfe krieschiu viur dar in.
den inren nâhet ungewin,
sie vielen von den zinnen hie.
daz ûzer her ze mûre gie
mit bickeln und mit brenden.
dô hiez an allen enden
der ellenthafte werde man
die mûrbrechen zünden an.
dô verzagten an der wer
die inren von dem ûzer her.
diu stat was gewunnen,
dar nâch schier verbrunnen.
manec ellenthafter degn
was an der wer dô tôt gelegn,
die dannoch lebende wâren dâ
die ergâben sich dem künge sâ.
die stat er gar zerbrechen hiez
sô gar daz dô niemen liez
in der gruntvest einen stein
an dem diu stat gebûwen schein.
sus vuor der künec dannen
mit allen sînen mannen
gegen der stat ze korintîn.
diu wolde wider in niht sîn:
vil vriuntlîche saz er dâ.
die burger bâten in dô sâ
daz er mit schimphlîcher kraft
ir wahsende ritterschaft
mit ritters schimphe zierte
und mit in batalierte,
daz sie mit schimphlîcher wer
lêrten wol ir jungez her
vehten und sich künnen wern
z ernste vîentlîche hern.
vil güetlîch er die bete enphie.
von den burgaeren hie
diu batalje huop sich an
von mangem wol geherzten man.
von stolzen werden vrouwen
huop sich dô michel schouwen.
vast in den rinc dô drungen
die ellenthaften jungen.
dô wart aldâ ein michel schal.
sie begunden über al
strîten schirmen ringen
mit kraft ein ander dringen,
slahen unde stechen,
mit swerten schilte brechen.
der warf hie den andern nidr,
der treip jenen schiere widr,
der ûf den mit zorne dranc,
disiu rotte jene twanc
daz si muoste entwîchen.
dô muoste an lobe rîchen
klîtemach ein wîse man
der ê von têbê dar entran.
ez wart von im sô guot getân
daz der vil werde têbân
bejagt ir aller prîs vil gar.
dô nam sîn alexander war,
er saget im vil grôzen danc
daz im sô manlîch gelanc.
er vrâgt in wie er waer genant.
< âne heimuot, âne lant
ist mîn name, herre mîn!> -
< lieber helt, wie mac daz sîn?>
dô sprach der werde wîgant
< ich hâte heimuot und lant
von dem ich geborn hiez,
biz dîn gewalt es mich verstiez.>
der herre dô erkande
daz er têbê nande,
er hiez in kroenen sâ zehant
und lêch im stat und daz lant.
dô sach der ellenthafte man
den künec kumberlîchen an,
von vröuden er vil sêre erschrac
daz er in sô hôhe wac,
er sprach:< lieber herre mîn,
soldich lantherre sîn,
dar zuo waer ich ein teil ze kranc.
dîn hôher küneges gedanc
noch vürbaz lônes kan gewern
denne ich zuo dir künne gern.>
der künec smierlîche sprach
< waz ruochich, dunkstû dich ze swach!
versmaehest dû dîn krankez lebn?
ich weiz vil wol wâ ich sol gebn
unde halten und lân,
ich weiz wol waz ich mac gehân.>
alsus gap er dem helde balt
übr die stat den gewalt
daz er sî bûte und solde hân.
diz geschach, ez wart getân:
têbê wider mehtec wart.
von korintîn ûf sîne vart
huop sich alexander sâ.
in eine stat hiez platêâ
kam er dô dâ gewaltec was
ein vürste hiez strâsagoras.
der gerte sîn ze herren niht.
durch die selben geschiht
vertreip er den werden man.
von sîner stat er im entran
und vuor gen atêne sâ
und klagte sînen kumber dâ
und sîne grôzen swaere
wie er vertriben waere.
dô enphiengen in güetlîche
die burger muotes rîche
und buten im gehalten dô
gein alexander alsô
daz er im durch die geschiht
dorfte entsitzen niemer niht.
daz was alexander zorn
daz er von in was erkorn
sô balde und sie ir sinne
sô gâhes und ir minne
an disen vürsten brâhten
und des gein im gedâhten
daz er dâ würd innen brâht
in vriuntschaft als es was gedâht.
in vîentlîchem zorne
was dô der wol geborne
gegen atênê der stat,
daz si hâte sich gesat
wider in in solher wer
und sîne kraft und sîn her
als gar unhôhe wac.
swie nâhen im ze herzen lac
der zorn, er enthielt sich dran.
der edel tugentrîche man
wold an in ê besuochen
ob sie wolden geruochen
gen im geheiner buoze dô.
er schreip in sîne brieve alsô
< hulde und gunstlîchen muot
und dar zuo liep und allez guot
enbiut ich alexander hie
iu von atêne, ich sage iu wie:
in vriuntschaft als ez nû stât
und iuwer rât gedienet hât.
ich wil muoten iu daz ir
mit küneclîchen êren mir
sendet zehen meister wîs
die an kunst den hoehsten prîs
habent und an râzes kraft
von retorica an meisterschaft,
daz sie mînes râtes phlegn
und mir an wîser lêre wegn.
welt ir der bete mich gewern
sô wil ich iu niht vürbaz gern
dan daz ir herre heizet mich.
tuot ir des niht, sô wil ich
iu swern des ûf mînen eit
und ûf der gote heilikeit,
daz ich alsô zuo ziu var
daz ich iuwer veste gar
atêne alsô zerbriche
daz ich mich an iu riche,
daz gegen iu wirt gesprochen,
mîn zorn sî wol gerochen!>
atênaere enphiengen dô
die selben botschaft alsô,
sie huoben sich vil drâte
ze mangem sunderrâte,
wie sie des herren botschaft
antwurten nâch wîslîcher kraft.
nû was ein meister under in
der truoc von kunst vil hôhen sin,
dêmostenes was er genant,
wîs an filosofîe erkant -
dem hât ê der persen guot
gar verleitet sînen muot -
der riet atênaeren
daz sie ungehôrsam waeren
alexander und den sînen.
dô liez an wîsheit schînen
ein meister hiez eskilus
sîne lêre, er sprach alsus
< vil lieben vriunt wert und guot,
ich wil iu sagen mînen muot
waz mir aller best behagt.
sît ir in solher kraft betagt
daz iuch mac iuwer kraft genern
vor alexander und erwern,
sô râte ich iu daz ir iuch nert
von im und iuwer êre wert.
kaeme abr iu sîn vriuntschaft baz,
sô volgen mir werben daz
alhie von iu sîn wille ergê!
ir hât wol vernomen ê
daz der gewaltigeste man
der künges namen ie gewan,
xerses der rîche
was gewalteclîche
der hoehste künc in persîâ,
wart sigelôs in elladâ.
nû vert mit alsô grôzer wer
des rîchen alexander her
daz er twinget elliu lant.
uns ist allen wol erkant
daz manlîchen ist behuot
mit mangem helde hôchgemuot
der künec alexander.
mit kraft überwander
têbê diu ze rehter nôt
vor im nie sicherheit gebôt.
er hât mit ritterlîchen sitn
vil gewaltes überstritn.
der ûf aller sîner vart
nie sigelôs gesehen wart,
wie welt ir dem gesigen an?
welt ir in durch einen man
verwesen und verkiesen
und ze vriunde vliesen,
den er her vertriben hât?
daz ist gar âne mînen rât.
alexander hât den sin,
er haete niht vertriben in
âne rehte schulde
von sîner werden hulde.
welt ir in durch den bestân,
daz muoz âne mich ergân:
swer alexandern hie bestât,
mit mînem râte es niht ergât.>
swaz der wîse meister sprach
und swelher kraft er in verjach,
daz was in allez gar ein wiht,
sie enwolden sich dran kêren niht.
daz zurnd alexander dâ.
den von atêne enbôt er sâ
daz er vriuntlîche dar
wolde sîn mit sîner schar
und niht anders dan durch rât.
nû waer im sô grôz missetât
an sîner bete dort enbotn,
er swuor in des bî sînen gotn
er wolde sî zerstoeren
und âne ir willen hoeren
der wîsen meister lêre.
er dröute in alsô sêre
daz sie ze vorhten kâmen.
do sie die drô vernâmen,
sie bereiten sich ze wer.
dô kam mit sînem grôzen her
der künec alexander,
mit wer atêne vander.
nû hâte er einen meister dâ
der was von alter worden grâ,
anaxîmenes hiez der,
des künges meister was er
in sîner kintheit gewesn
und hâte vil von kunst gelesn,
wan er selbe künstec was
und von rîchen künsten las.
der vorht alexanders kunft
und sînes heiles sigenunft
an vriund und an mâgen dâ
und an der stat. er hiez sich sâ
tragen vür daz bürgetor,
dâ wolde er alexanders vor
ûf genâde bîten.
dô kam er an den zîten
geschart nâch ritterlîchen sitn
mit sîner ritterschaft geritn.
ze vorderst alexander reit
daz er vil selten ie vermeit.
als er den meister gesach,
nâch gruoze er zühteclîche sprach
< meister mîn, was schaffest dû
vor disem tor? ich sich dich nû
sô rehte trûreclîche sîn.> -
< nû bite ich ûf die gnâde dîn
durch daz dû mich alten man
die sunne lâzest schînen an.>
dô hôrter wol an sînen sitn
daz er wold umb atêne bitn.
diz wold er verzîhen dâ,
ze sînem meister sprach er sâ
< meister, swes dû bitest mich
des tuon ich niht und wil durch dich
doch tuon waz dâ gegen stât,
des mich dîn bete niht erlât:
swaz man siht gegen der bete stân
daz wil ich tuon, die bete lân.>
dô sprach der herre< sô wil ich
genaedeclîche biten dich
daz dû dîn laster richest
atêne gar zerbrichest,
daz der burger missetât
umb dich vil wol gedienet hât:
dû solt sî niemer lât gestân.
si hât dir sô grôz leit getân
daz dû dich rechen solt an ir
und solt staete lân an mir
daz dû mir geheizen hâst,
als dû dich selben wol verstâst.>
diz muoste sîn, des er in bat
des tet er niht: sus was diu stat
beschirmet und wol behuot.
dô sprach der herre hôchgemuot
< ich sich wol, swaz der junger kan
dâ enist niht solher wîsheit an,
sîn meister künne mêre
witze und hôher lêre.
atêne sî nû vrî gelân!
nû sî als ich gelobet hân!
mîn zorn der sî hin geleit
als ez dîn hôhiu wîsheit
an mir hât erworben:
sîn kunst ist unverdorben
swer sîne kunst sô leiten kan
daz er gêret wirt dar an.>
nâch dirre suone kêrte dan
der künec. er lie sîne man
belîben, in die stat er reit.
mit küneclîcher werdekeit
enphiengen in vroelîche
die burgaere rîche.
den meister er mit gâbe ûz schiet
der in an sîne hulde riet,
und gap im rîche gâbe grôz:
sîner triuwen er genôz.
dô hôrter von den meistern sâ
disputiern sofismatâ.
er hôrte sich dô gesten
an wîsheit gar die besten,
wan dâ der vlîz der künste was
bî der zît den man dô las:
dâ was anaxîmenes
und der wîs dêmostenes,
der künstige dêmêtrîus,
der wîse redaer eskilus.
den nam er dâ ze râtgebn
in welher wîse er solde lebn.
dar an sîn wille niht beleip:
ir iegelîcher im dô schreip
sîne lêre und sînen rât
getriulîch âne missetât.
strâsagoras der wîse man
sîne hulde ouch dô gewan.
swes in die meister bâten
übr al die im iht tâten,
daz liez er allez umb ir bete,
swaz im ir deheiner tete.
dô rîchter atênaere.
sie benâmen im die swaere
der er hât ûf sie gedâht.
dô diz was allez vollebrâht,
er kêrte dan mit sîner diet,
sîn gemüet ime riet
gein lâzedêmônje.
die von mâzedônje
kêrten vroelîche dâ hin
ûf guotes und êren gwin
in des vil werden künges her.
dô satzte sich diu stat ze wer,
si sprach< wir sîn muotes rîch,
den von atêne niht gelîch
die beidiu lîp unde lebn
alexander hânt ergebn.>
vil krefte rîche was ir wer
von dem lande und von dem mer
und ouch von der rîchen stat
allenthalben wol besat.
daz wart dem herren unverzagt
alexander dô gesagt.
er begunde vaste nâhen,
mit sînem her zuo gâhen,
diu tor wârn beslozzen.
die burger unverdrozzen
ûf ir gewer dâ wâren,
sie kunden wol gebâren
gein wer vil manlîche.
dô kam der muotes rîche
der künec alexander dar
mit sîner werlîchen schar
und herberget ûf daz velt.
er kam dar ûf solich gelt
daz er in gülte an hoher kraft
vriuntschaft oder vîentschaft.
ûf die rede er dô beleip,
sîne botschaft er in schreip
in welhem muote sie belibn.
sus was diu botschaft geschribn:
< lâzedêmônjaere,
vil wîsen helde maere!
minne und guonstlîchen muot
ob ir welt, und allez guot
enbiutet iu philippen kint
alexander dem noch sint
al die worden undertân
die in wolden ie bestân.
ir herren, ich bin komen her
alsô daz ich an iuch ger
mit mîner bete des daz ir
mînen zins bereitet mir
und ir ze herren habet mich.
tuot ir des niht, sô tuon ich
iu schaden kumber und leit.
êre vriuntschaft werdekeit
und dar zuo lîp unde guot
habet ir von mir, ob ir daz tuot.
ob iu diu bete niht behagt
sô sî iu vriuntschaft widersagt.>
nû daz die brieve kâmen
und die burgaer vernâmen
waz in der herre wol geborn
enboten hâte, ez was in zorn.
sie versprachen sîn gebot,
sie hâtenz gar vür einen spot.
als alexander vernam
ir rede und im die botschaft kam,
er hiez ruofen in die schar
daz sie wâfenten sich gar.
dô bereite sich daz her
gegen der stat und gegen dem mer
mit vrechen helden jungen
die gegen den porten drungen
und vor den schützen an die grabn.
an sie wart der strît erhabn.
wie man den dô schiezen sach,
wie dô warf, wie dô brach
daz antwerc die mûre nidr,
wie die hin in und sie her widr
wurfen und schuzzen,
engulten und genuzzen,
des waer ze sagene ze lanc.
mit kriescheme viure er twanc
die vrechen held ûf dem mer
daz sie verzagten an ir wer,
wan diu schif sêre brunnen.
dô diu warn gewunnen
dô was ir bestiu wer gelegn.
genâde! rief dô manec degn.
sie wurfen ûf die burgetor,
vür alexandern dâ vor
liefens und ergâben sich.
sîn muot was sô genaedeclich
daz er sie ze hulden nam.
swie zornlîche er dar kam,
zehant wart im sîn zorn benomn
dô sie wâren vür in komn.
zen burgaern der künec sprach
dô er sie sich ergeben sach
< ir herren, waer diz ê getân,
daz waer iu guot, ich wolde iu lân
staete vrîheit âne nôt.
dô ich iu daz vriuntlîche enbôt,
dô smaehtet ir die bete mîn.
nû wil ich abr der bezzer sîn
und wil iuwer sicherheit
nemen gar an iuwer leit,
wan ez ist niht manlich
swer zallen zîten richet sich
an übele mit ungüete.
swer rehte diemüete
bî manlîchen siten treit,
daz ist ein manlich manheit.
ze reht übel unde guot
daz ist ein manlîcher muot.
xerses der rîche
der wart unküneclîche
von iuwern vordern verjagt,
als iuwer vriunt iu hânt gesagt.
ich waene wol, sus wândet ir
gesigen âne wer an mir.
nû hât iuch daz heil betrogn
und an mîner kraft gelogn.>
den goten opherter dô sâ
ze lobe groezlich opher dâ,
daz sie im an dem gelücke sîn
sô grôze helfe tâten schîn.
ein stat ist zîzicus genant,
dar vuor der stolze wîgant
und twanc ouch die mit sîner kraft.
er vuor mit sîner ritterschaft
gein bîzanz an der selben zît
dâ nû konstenôpel lît,
die sît der künec konstantîn
nande nâch dem nâmen sîn,
dâ lac er unz er sî betwanc.
gein ponte sîn gemüete dranc,
dar vuor er unde twanc ouch die.
sîn gedanc in niht erlie,
gein kalzedônje wolder varn.
diu mohte sich des niht bewarn
mit rîcheit noch mit vester wer,
er twunge sî mit sînem her.
als er gewan die selbe stat,
sîn her er balde kêren bat
gein einer stat hiez abdirâ,
die twanc er ouch. er saz aldâ
unz er die stat und daz lant
betwanc mit ellenthafter hant.
als er daz lant an sich genam,
dô kêrt er in hostîam.
daz was ein rîchiu insel wît,
die twanc er an der selben zît.
dar nâch er in olinte vuor,
diu insel im ouch hulde swuor.
dô diz geschach, der werde man
vuor gen kaldêôpel dan,
daz was ein stat veste und guot,
mit rîcher wer wol behuot,
diu wart im ouch undertân.
sîne reise liez er gân
übr ein wazzer daz was grôz,
daz durch die selben insel flôz,
daz ist sênis genant.
daz her dâ grôzen zadel vant.
ors und liute litten nôt
als in der zadel dô gebôt.
nû was des künges wille
daz er dâ laege stille
unz er den goten sîn gebet
getaete als er mit opher tet.
dô niemen aldâ überz lant
deheiner slahte spîse vant,
dô hiez der herre wîse
von der rîlîchen spîse
die er mit im brâhte dar
bereiten wirtschaft sîner schar.
dô klagtens: in was leide
daz sie deheine weide
den orsen vinden kunden
noch in der inseln vunden.
des waeren sie verdorben,
ir orse vil erstorben.
der künec alexander sprach
als er sie dâ von reden sach
< gesellen mîn, gehabt iuch wol!
nie man durch daz verzwîveln sol
ob im ein ors erstirbet:
swem einez hie verdirbet
dem wil ich zwei vür einez gebn
ob ich sol die zît gelebn.
swem got bî mir gesuntheit gebe
der klage niht armuot, unz ich lebe.>
er trôstin ir gemüete alsô.
des trôstes wart daz her vil vrô.
ein wilde ist lokrus genant,
dar kêrten sie dô sâ zehant,
dâ vundens an dem selben zil
weide wildes vische vil
und grôze kurzwîle
umb sich vil mange mîle,
mit vröuden sie dô jagten.
nû sie dâ lange tagten
mit guoter kurzwîle alsô,
dô kam eumîliô
der vürstlîche wîgant
der gegen itâlje was gesant,
der hâte krefteclîche
itâlischiu rîche
betwungen, giht daz maere.
nû hâten rômaere
gesant alexander dar
zwei tûsent helde in sîner schar
den mannes manheit was kunt,
und goldes zehen tûsent phunt
mit einer liehten krône
bî eumîliône
und hâten im mit sicherheit
des gesworn vil mangen eit
dazs im gewancten niemer
und im dienten iemer.
in den selben zîten
samenten sich vil wîten
zesamen alexanders man,
die hâte er hin unde dan
mit grôzer wer in vremdiu lant
durch twingen ê von im gesant.
er hâte küneclîche kraft
doch niht ze grôze ritterschaft,
z orse vünfthalp tûsent man
âne die er sît gewan.
dar zuo vuort er von lande
drîzec tûsent sarjande
und ouch zwei tûsent dâ bî.
nû hoeret waz der schiffe sî
diu daz hôchgemuote her
solde tragen ûf dem mer
swâ sie wolden kêren hin
ûf guotes und êren gwin:
ahtzec und hundert. -
die schrift eins wunders wundert
weder ez wunderlîcher sî
daz diu vrecheit wonte bî
einem alsô wênegen man
daz er ie den muot gewan
daz er elliu rîche
sô rehte vrevellîche
ie getorste bestân. -
weder dirre tumbe wân
sî grôzer oder der gedanc -
odr daz er elliu rîche twanc.
wer kan an disen beiden
des wunders uns bescheiden?
ez was heil und manlich muot
diu beidiu wâren dar zuo guot,
heil volgete dem muote
und gap den muot ze guote.
als alexander sîne man
gar zesamene gewan,
dô kêrt er von dannen sâ
hin über mer gen africâ
und twanc daz selbe rîche
mit kraft gewalteclîche.
als er daz lant an sich gewan,
in eine insel kêrter dan
diu heizet efranitidâ
und ist gelegen africâ
in einem gebirge hôch
daz sich gein grozer hoehe zôch.
dâ wolder nâch lône
sînem gote amône
mit küneclîchen dingen
ein grôz opher bringen
und woldin vrâgen maere
wie sîn gelücke waere.
des nahtes dô der herre entslief,
sîn liebester got im rief
und sprach alsus hin zuo zim
< alexander, nû vernim,
sag an, kanstû mir iht gesagn,
mahtû disen berc getragn?> -
< nein ich, niht! war solde ich in
tragen von der stete hin?> -
< dîn gehüged und dîn name
der grôze und ouch der lobesame
süllen an den kreften dîn
als unverwandelt iemer sîn
als dirre berc niht wandels hât
der iemer staete in staete stât.>
sînen got er aber bat
daz er im an der selben stat
zeigte sîn verderben,
wie er solde ersterben.
dô sprach der got< dir wirt vergebn,
mit gift endestû dîn lebn!
doch waer dem menschen ein heil
und möhte des wol wesen geil
daz er ân arbeit und ân nôt
solde wizzen sînen tôt?
nû hân ich dir die wârheit
umbe dînen tôt geseit:
dû muost arbeit erkennen vil.
sô daz geschicht, sô gît ein zil
dîn leben in der besten tugent
die gewinnen sol dîn jugent.>
der herre dô erwachte.
der troum in trûrec machte.
er sorget umb sînen tôt.
sînem her er dô gebôt
daz es ein teil vüere sâ
gen skâlon und gen lîbîâ
und im diu lant betwunge.
der muotes rîche junge
dem der welte prîs geswuor,
mit her gen itôme vuor
und twanc diu lant mit sîner kraft
dazs im wurden zinshaft.
nû wâren bî den zîten dô
zuo dem künge dârîô
die vürsten entrunnen
den dô was an gewunnen
beidiu liut unde lant
gar von alexanders hant.
die klagten grôze swaere
die in geschehen waere,
was sie mit kumberlîchen sitn
von alexander kumbers litn.
dô vrâgte sie der maere
wie sîn antlütze waere.
sie sagten von dem herren balt
rehte wie er was gestalt
und wie sîn lîp was getân.
dô begunde in wunder hân
daz ein sô kleiner lîp beslôz
ein herze an muote an kraft sô grôz.
iedoch begunde er smaehen in.
durch unwert sant er im hin
einen schimphlîchen bal
von golde rîch und überzal
und eine krumbe ruote
guldîn harte guote
geschaffen als ein leitestap.
durch spot er im dâ bî gap
von golde ein rîchez tevellîn,
dâ mite er bî der muoter sîn
haete kintlîchen schimph,
durch einen schimphlîchen glimph,
und einen brief den solder lesn,
er hiez in gemant des wesn
daz er an den brieven las.
hoert waz dran geschriben was!
< ob al der welte küngen grôz
ein künc ein krône ein übrgenôz,
dârîus der rîche,
der got ebenglîche
an almehtiger werdekeit,
der krône ob allen krônen treit
nach küneclîchem rehte,
enbiutet sînem knehte
alexander solhen muot -
der sî übel odr sî guot -
den sîn kintlich getât
umbe in nû gedienet hât!
vil tumber knabe, von wârheit
ist mir daz von dir geseit
daz dû in disen zîten
wellest mich an rîten
und habest durch dînen toerschen wân
schaden mir ein teil getân.
ouch ist daz gesaget mir
daz dû habest gesellet dir
ze helfe unnütze diebe
die durch des roubes liebe
mit dir roubende varn.
nû soltû dich vil wol bewarn,
und solde dienen dir mit kraft
al dirre welte ritterschaft,
dû haetest dannoch strîtes niht
der helfe diu mir helfe giht.
mîn hôhiu kraft ist âne zal,
der sternen menig über al
und des wilden meres griez,
swaz des ie ze stade gestiez,
daz ungeruowete mer
engelîcht sich niht dem her
daz mir bî mit helfe stât
unde niemer mich verlât.
des soltû rehte dich verstân
und dîn tump gemüete lân.
mîn witze mir gerâten hât
daz ich durch dîne missetât
dir dise ruote sante
daz dîn kintheit erkante
daz man dir sol dîn unzuht wern,
dich als ein kint mit ruoten bern.
der bal bezeichent kindespil:
dâ mite soltû ballen vil
und sô die zît vertrîben.
durch vuoge soltû schrîben
an diz kleine tevellîn.
wis bî der lieben muoter dîn
und leg dich ruowen ûf ir schôz!
dû bist der tumpheit genôz!
vil wol ich dir gerâten kan
sô dû gewahsest zeinem man
daz dû getürrest sehen an
einen wol geherzten man,
sô kum! dû vindest volle hant
darumbe dû bist ûz gesant.
var wider heim und vürbaz niht!
swie man dich verrer strîchen siht,
sô sende ich mîne boten dar
und heize dich und dîne schar
vâhen und bringen.
sô mahtû niht gedingen
anders wan daz dû dîn lebn
muost nâch roubes rehte gebn
als diebe, niht als künges kint.
alle die mit dir dâ sint
die müezen lîden disen tôt.
mir ist vil wol erkant dîn nôt:
dû bist arm des guotes,
diu tôrheit dînes muotes
waenet daz dir werde gelân
daz grôze golt daz ich hân,
des al diu welt mich wol erlât
diu niuwan armuot gegn mir hât.>
alexander lac mit kraft,
er hâte grôze ritterschaft
brâht von terrâ zêtim.
dise botschaft brâhten zim
des künges man von persîâ
und gâben im die brieve sâ
mit den kleinoeten dar gesant.
er nam und las sie sâ zehant
offenlîche vor der schar
daz siez alle hôrten gar.
die sîne sêre erkâmen
dô sie die rede vernâmen,
dîu botschaft machtes unvrô.
dô trôste sie der herre alsô
< gesellen und vriunde mîn,
lât iuwer klagende vorhte sîn!
saget an, ist iu daz iht kunt
daz ein vil bellender hunt
selten grôzen schaden tuot?
sîn manheit ist vil selten guot
der sich ze vil gerüemen wil.
sî des mannes manheit vil,
daz laze er ander liute sagn:
sich rüemet niemen dan die zagn.
der brief hât uns die wârheit
bezeichenlîche ein teil geseit.
er giht er habe goldes vil.
dar nâch ich gerne strîten wil!
wir strîten witzeclîche,
erstrîten wir sîn rîche
und ouch die rîcheit und den solt.
wirt uns sîn hêrschaft und sîn golt,
sô mügn wir rîlîche
betwingen elliu rîche.>
vil kündeclîche trôster dô
die sîne mit dem trôste sô
daz sie ze vröuden kâmen
dô sie den trôst vernâmen.
die boten hiez er vâhen
und hiez sie alle hâhen.
sie sprâchen< ôwê, herre guot,
durch dînen tugentrîchen muot
waz ist unser schulde
gein dîner waegen hulde?>
dô antwurt in der herre alsus
< dô sante iuch iuwer dârîus
ze mir und seite, ich waere
ein diep, ein schâchaere.
swer der gebaerde rehte tuot,
der sleht den man und nimt daz guot.
dâ von müezet ir daz lebn
mir und iuwer habe gebn.>
die boten sprâchen sâ zestunt
< genâde, herre, im was unkunt
din gewalt, dîn hêrschaft
und dîn küneclîchiu kraft.
sît aber wirz gesehen hân,
wiltû ze lande uns lebende lân,
wir machen dich vil wîte erkant
und dînen nâmen in diu lant
dâ man dich nie erkande,
wir loben dich mangem lande.>
nâch ir bete daz ergie:
die boten er dô leben lie.
er haete in ungern iht getân
wan daz er wolde schouwen lân
daz er kund ernest und schimph,
ze schimphe und z ernste glimph.
er bôt in grôze werdekeit.
nû was der imbîz bereit,
er saz über und enbeiz.
grôzer gastung er sich vleiz
gegen den rîchen boten dâ
de küneges von persîâ.
nû sie bî im sâzen,
vroelîche mit im âzen,
sie sprâchen< lieber herre mîn,
wil ez in dînen hulden sîn
daz dû uns deste holder sîst,
ob dû uns tûsent ritter gîst
wir geben dir gevangen sâ
den rîchen künc von persîâ.>
dô sprach er< umb des herren lebn
wirt iu niht ein man gegebn.
sîn hôhiu kraft ist niht sô kranc:
ich twinges âne sînen danc.
ich wolde in niht gevangen hân
daz mit untriuwen waer getân,
er mac sich doch niht genern
noch mit sîner kraft erwern,
er müeze sich an mich ergebn
odr ich nim abr im daz lebn.>
unhôhe wac der degen balt
des künges hêrlîchen gewalt
der im die brieve sande,
swie vil im grôzer lande
an dienstlîcher werdekeit
dienstes muosten sîn bereit.
als nû der morgen tagte,
der werd unverzagte
hiez sîne brieve schrîben sô
< alexander mâzedô
des vater künc philippe was,
sîn muotr vrouwe olimpîas
von mâzedônje künegîn,
enbiutet nâch dem gruoze sîn
von persîâdem künge rîch
der gote an kraft wil sîn gelîch,
den selben dienstlîchen muot,
der sî übel odr sî guot,
der im von im geschriben was,
als er an sînen brieven las.
ez was ein tumplich gedanc
der dich grôzer tumpheit twanc
daz dû gote dem rîchen
wândest dich gelîchen.
got der lebet iemer
und erstirbet niemer,
sô muoz dîn lîp verderben
und mit dem tôde ersterben.
nû nim war unde sich,
swie dû gote gelîchest dich!
dû bist toetec als ich bin.
darumbe râtet mir mîn sin
daz ich dich wil rîten an
als einen toetigen man.
geschiht diu saelde danne dir
daz dû gesigen maht an mir,
dar an bejagstû kleinen prîs,
wan mich dîn muot in diebes wîs
sô schalt und unprîste
als dich dîn unvuoc wîste.
sol aber ich mîn leben hân
und daz ic dich sol bestân,
kroenet dan diu saelde mich
und daz ich überwinde dich,
sô hân ich prîs und êre
und bist dû iemer mêre
an dîner hôhen werdekeit
verdruht unde hin geleit.
waenestû, swie tump ich bin,
daz ich niht habe sô wîsen sin
daz ic bezeichenlîche
verstê die gâbe rîche
diu zeinem kleinoete mir
mit brieven wart gesant von dir?
der bal ist sinewel erkant:
dz bezeichent elliu lant
und al der welt umbekreiz,
an dem ich von wârheit weiz
daz ez wirt noch allez mîn.
waz mir tuo diu ruote schîn,
des wil ich niht verswîgen:
ez tiutet daz mir nîgen
müezen ûf der erde
mit dienstlîchem werde
alle die den prîs bejagnt
daz sie der erde krône tragnt.
daz tevellîn betiutet wol
daz ma mir einem schrîben sol
ze dienste mînen handen
den zins von allen landen.
den êrsten zins hât sus mîn hant
enphangen den mir gît dîn lant.>
philippen wânlîchez kint
dem elliu valscheit was ein wint
hiez die boten alsô lân
daz ers êre muoste hân:
er gap in silber und golt,
des wurden im die persen holt.
vil groezlich er sie sande
mit gâbe heim ze lande,
sie schieden von dem wîsen man
wider heim vroelîche dan.
nû sie ze lande wâren komn
und dârîus het vernomn
unde rehte gelas
waz im dar enboten was,
ez was im leit und harte zorn.
zwein rîchen vürsten wol geborn -
der hiez einer prîmus,
der ander vürste antiochus -
hiez er gebieten an daz lebn
dazs im gevangen solden gebn
den hôchgemuoten wîgant
der mit sô werlîcher hant
waer alsô vrevellîche
geriten in sîn rîche
durch sînen kintlîchen sin.
er hiez, sô sie geviengen in,
sô soldens in im bringen.
mit meisterlîchen dingen
wold er in denne heizen bern,
die kintlîchen tumpheit wern
und senden denn der muoter sîn
der lobes rîchen künegîn.
dizn mohte niht sô lîhte wesn,
hie vor mohter wol genesn
wan er mit solher huote was
daz er von vorhten ie genas.
ruochet irs, ich tuon iu kunt
wie sich die vürsten an der stunt
erwerten dirre botschaft.
sie enbuten alexanders kraft
alsus mit ir brieven sâ
dem künge von persîâ
< ich der vürste prîmus
und ouch dîn man antîochus
enbieten, lieber herre guot,
dir unsern dienstlîchen muot!
herre mîn, dîn hôch gewalt
und dîn hêrschaft manecvalt
sol wizzen und erkennen wol,
swer alexandern vâhen sol
der muoz sîn mit grôzer wer.
mit solhen kreften vert sîn her
daz nieme sich gevristen kan
vor im. herre, dîne man
kâmen durch dich mit uns dar
mit vil wünneclîcher schar
und hânt nihts des vermitn
wir haben sêre ûf in gestritn.
dâ von hâst dû mit uns verlorn
mangen degen wol geborn
die von im sint gelegen tôt.
herr, uns ist dîner helfe nôt
ob wir uns süllen sîn erwern.
wiltû in kintlîche bern
daz wirt sêre errochen:
sîn kraft hât zerbrochen
unser veste und gar verbrant,
si hât verwüestet dîniu lant.
mit roube und ouch mit brande
vert er in unserm lande.>
innen des dô dârîus
enphie die selben brieve alsus
und er reht überlas
waz im dar an enboten was,
dô kam ein bote sâ zestunt
und tet dem küneg aber kunt
daz alexanders ritterschaft
laege mit vil grôzer kraft
an einem wazzer daz ist grôz
daz durch daz selbe rîche vlôz,
daz ist grânikus genant.
über al die naehsten lant
hâten sie besament dar
die lanthern mit grôzer schar.
memnôm ein vürste rîche
phlac dô gewalteclîche
der lande diu von persîâ
der rîche künec hâte aldâ.
er hâte in manlîcher wer
gesament ein vil michel her
und streit an der selben zît
mit alexander einen strît
dâ manec degen wol geborn
bêdenthalben wart verlorn
den man lange muoste klagn.
der herzog wart selbe erslagn
und ander manec werder man
den ich niht wol genennen kan.
ê daz diu selben maere
wiez ergangen waere
dârîus bevunde dô,
er hiez sîne brieve alsô
dem edeln hôch gelobten man
alexander schrîben dan
< dârîus der wîse
der rîche in hôhem prîse
der rîcheste des guotes
der hoehste hôhes muotes
der künges namen ie gewan,
enbiutet sînem zinsman
alexander als ez stât,
den gruoz den er gedienet hât
mit willeclîchem muote
z übel odr ze guote,
und swaz verschuldet hât sîn muot,
ez sî übel odr sî guot!
mich wundert daz dû witze hâst
und wol von witzen dich verstâst
daz dich der witze sô bevilt
daz dû niht rehte wizzen wilt
daz mîn name ist wite erkant
ûf der erde ubr elliu lant
und ouch von den hôhen gotn.
waz tôrheit hât dir daz gebotn
daz dû sô sêre vlîzest dich
wie dû an guote wüestest mich?
daz râtet dir dîn tumber muot.
jâ, möhtestû wol hân vür guot,
möhte mâzedônje dir
belîben âne nôt von mir!
dû soldest wol ze buoze stân
daz dû hâst gegen mir getân,
wan swenne dû mich vliehen muost,
swie ungerne dû daz tuost,
sô muostû die genâde mîn
suochen durch die vorhte dîn,
sô vindestû genâde niht
sît man dich nû niht büezen siht.
nû wil ich dir mîne kraft
und mîne grôzen hêrschaft
mit ebenmâze zeigen hie,
daz soltû rehte merken wie
mîn gewalt unzalhaft ist:
ich sende dir an dirre vrist
einen hantschuoch der ist vol
mâgesâmen, der dir sol
künden waz ich vürsten hân
die mir sîn dienstes undertân.
mahtû des mâgesâmen
mit rehter zal gerâmen
sô mahtû ouch betrahten
die herren unde gahten
der dienest ich ze helfe hân
und die müezen mir gestân,
wan sie alle ir êre hânt
von mir, dâ von sie mir gestânt.
vindestû niht über al
des sâmen endehafte zal,
sô var wider unde sich
daz dû des behüetest dich
daz man daz iemer mê gesehe
daz disiu tumpheit dir geschehe.>
hin z alexander kâmen
die boten mit dem sâmen
des küneges von persîâ.
dô hiez er die brieve sâ
lesen offenlîche.
der herre tugentrîche,
greif in den hantschuoch sâ zestunt
und warf des sâmen in den munt.
smierend âz er in dô.
schimphende sprach er sô
vor allem dem gesinde
< diz liut ist harte linde,
ir ist vil, doch sint sie weich>.
die vorhte von dem schimphe entweich
den sînen al gelîche,
sie wurden vröuden rîche.
dô diz gesprach der wîse man
sie sâhen alle ein ander an.
alsus hiez er dârîô
schrîben ander brieve dô
< minne und dienestlîchen gruoz
dar nâch als ez nû wesen muoz,
enbiute ich alexander hie
dir dârîô. nû merke wie
und waz ich dir enbieten wil!
wir hân brieve harte vil
ein ander gastlîche gesant:
wir sîn ein ander wol erkant,
doch niuwan bêdenthalp nâch jehe.
swie unser beider ougen sehe
uns beiden nie gejaehe
daz si den andern saehe,
ich bin dîn doch ze sehenne vrô,
wan ez vüeget sich alsô
daz dû mir sicherheit muost jehn
und ich dich sol gevangen sehn
oder sô dû dîniu lant
enphâhen muost von mîner hant.
von wârheit mich des wundern mac
daz dich dîn ruom sô hôhe wac
daz dû den mâgesâmen mir
sandest her. nû wil ich dir
senden gegen dem sâmen dîn
ein kleinez phefferkörnelîn.
daz sol dir künden mîne kraft:
sô raeze ist dir mîn ritterschaft
an vrecheit und an ritters wer
wider dînem grôzen her,
swenn uns begrîfet der zorn,
sam daz kleine phefferkorn
des mâgesâmen hôhe zal
mit raeze swendet über al.
dîn her ist grôz, an kraft niht wîs,
mîn kleinez her hât hôhen prîs:
daz sol dich überwinden,
dîn kraft muoz vor mir swinden
wan ich noch ie überwant
dîn her daz vor mir ie verswant.>
sît dirre botschaft wurden sâ
die boten hin gen persîâ
gesant und mit dem korne.
in gap der wol geborne
vil grôzer gâbe rîche
und lie sie küneclîche.
alexander vuor zehant
in arâbîam daz lant,
des selben landes phlac dô dâ
ein herzog hiez amontâ.
dô der gewaerelich vernam
daz alexander dô kam,
er sazte sich gein im ze wer.
mit einem werlîchen her
der berge klûse er im vervie
daz in dâ durch niemen lie
wan mit manger arbeit.
ze jungest dô was er bereit
mit den besten übr daz lant,
swaz er dâ wer bî kreften vant,
die vuorter gegen dem wîsen man.
mit grôzer kraft reit er in an
und sîn werlîchez her,
daz vant er mit grôzer wer.
die geste daz lant herten,
die lantliute sich werten.
nû was der herzog amontâ
bereit an einem morgen sâ
mit einer wünneclîchen schar
kam er vil vruo gedrungen dar,
er vuorte werde rotten grôz.
der welte werdekeit genôz
hâte sich ê wol bewart
und sîne ritterschaft geschart.
ûf bûzewîle was er komn,
des wart dô schaden vil genomn
an mangem ellenthften man
der sîn ende dô gewan.
dô huop sich an der selben zît
von beiden scharn ein michel strît:
die tâten nû die andern hin,
jene dise wider in,
der lac hie tôt, der ander wunt,
der dritte toetlîch ungesunt.
sie mohten niht gescheiden sich,
als diu schrift bewîset mich,
ê daz sie der âbent schiet.
beidenthalp sach man ir diet
alsô nâch sige ringen
mit ritterlîchen dingen
daz dâ wart niemen sigelôs
noch dâ nie man den sic erkôs.
diz triben sie gar drîe tage.
dô was alexanders klage
daz sîn geselleschaft daz her
lie sô lange in hôher wer,
daz arnete vil manec man
der niuwan schaden dran gewan.
der vröudebernde sunnen schîn
möhte dô getrüebet sîn
von der klagelîchen nôt
daz sô manec man lac tôt.
dô begunde vliehen sâ
der rîche herzog amontâ,
mit den sînen er entran.
unser degn den sic gewan.
der sigelôse vlühte phlac,
er vlôch naht unde tac
daz er ruowe nie gewan,
ê az der schadehafte man
kam vür den künc von persîâ.
di boten vant er dannoch dâ
dier alexander het gesant,
er het den brief in der hant
der im brâht hin wider was.
die botschaft er dannoch las
und vragte sie der maere
waz sîn antwürte waere
dô er den mâgesâmen hie
mit sîner botschaft enphie.
dô sagetens im daz er sprach
dô er den sâmen an gesach
< ir ist vil, doch sint sie weich>.
dem künge ein teil sîn vröude entweich,
dô sie gâben im daz korn
daz im der degen wol geborn
hâte z antwurt gesant.
er nam und âz ez sâ zehant,
er sprach< hât sîn ritterschaft
gein mînem her sô grôze kraft,
sô vil diz korn raeze hât
gein mîner kraft, sô wil sîn rât
mîn her überwinden.
er kan die liste vinden
daz er uns überwindet,
sô gaehe antwürte er vindet.>
trûrent antwurt im sâ
der verjaget amontâ
< entriuwen, lieber herre guot,
er hât als ellenthaftn muot
daz sich im niemen kan erwern
noch von sîner kraft genern.
swie lützel doch der sînen sî
manlich ellen wont im bî.
herre, ich hâte dîne man
an mich genomn, ich reit in an,
doch hâte er sich ze wer bereit,
drîe tage er mit mir streit
daz niemen dô den sic gewan.
ze jungest ich im kûme entran.
des twanc mich arbeit und nôt.
die mîne lâgen alle tôt,
er verlôs dô niemen
wan vil wênec iemen:
hôch gelücke mit im vert,
manlich heil ist im beschert
dar zuo bî hôchgemüete
tugentrîchiu güete.
daz schein wol an den mînen.
er gebôt den sînen
di tôten ab dem velde ûf habn
und hiez sie güetlîche begrabn,
die wunden hiez er heilen
und sîn guot mit in teilen
und tet in guot und êren vil.
swer tugent und êre suochen wil,
der vindet die benamen dâ
vil baz an im dan anderswâ>.
dô der künec dârîus
erhôrte disiu maere alsus,
er was leidec und unvrô
von den selben maeren dô.
alexander vuor mit kraft
mit sîner grôzen ritterschaft
durch die minren âsîam.
in frîgîam daz lant er kam,
dô twanc er diu beidiu lant.
sardis ist ein stat genant,
diu sazt sich widr in ze wer.
die besaz des künges her,
ze jungest er sî âne danc
mit kraft gewalteclîche twanc.
die sîne wurden rîche dâ
in dem lande in frîgîâ.
nach heidenischer ê gebote
lobt alexander sîne gote,
wan ez ist billich daz ein man
der weltlich êre erwerben kan,
swaz er gelückes bejage,
daz er des gote gnâde sage:
wan swaz wir heiles mügn hân,
daz sol allez an im stân.
âne in mac geschehen niht
wan swâ unrehtes iht geschiht.
daz reht ie allez von im kam
wan ez den urhap an im nam.
genâde muoz ouch von im komn
diu hât urhap an im genomn.
swer waenet hân gelücke ân in,
daz ist ein toerlîcher sin. -
hier an dâht alexanders tugent:
swaz er bejagte in sîner jugent
gelückes êren werdekeit,
des wart ie gote danc geseit
als sîn orden kunde.
sus brâhte er an der stunde
den goten groezlich opher dâ,
von vröuden ophert er in sâ.
nû hâte er in der phlege sîn
vil edle juncherrelîn,
die zôch er küneclîche.
dô der tugentrîche
daz opher brâhte sînen gotn,
ze dienest het er gebotn
einem vürstlîchen knabn
daz er im dô solde habn
neben im ein rouchvaz,
daz kint stuont stille und huop daz.
nû viel dem juncherren guot
ûf den arm ûz der gluot
ein kol der vil sêre bran.
dâ getorstez sich niht wenden an
daz ez im dannen werte
und sich dâ von generte.
daz kint sich niender wande,
swie sêr der kol brande,
von vorhten tet ez niender wanc:
als ez diu meisterschaft betwanc.
des nam alexander war.
er sach des endes dicke dar,
daz er rehte ersaehe
ob disiu zuht geschaehe
von meisterschaft. daz wart im kunt.
dô begunder sâ zestunt
daz opher lengen deste baz
daz er wol bevunde daz
ob ez von vorhte müeste doln
den sêre glüejenden koln.
alsus lêrt er gebâren
mit zuht die bî im wâren,
er machte sie hêrlîche
zuht und guotes rîche.
die herren alle valscheit vlôch
dô man sie sô hêrlîche zôch
in tugentlîcher meisterschaft.
dô wâren sie sô tugenthaft
daz man noch ze maere seit
von der alten werdekeit,
swer tuot sô wol in disen tagn
daz man müge von im sagn
her nâch als wir in disen tagn
von den alten hoeren sagn.
alexander kêrte dô
übr einen phlûm hiez samandrô,
dâ bî vant er eine schar
diu was von trôje komen dar.
die vuoren alle gegen im hin
und ergâben sich an in.
dô sprach der helt gewaere
< saelec sint trôjaere,
ir lop ir name ist wîte erkant,
sie sint genaeme übr elliu lant.>
dô sprach ein wîser meister sâ,
der was bî trôjaeren dâ,
der hiez klîtomedus
< swaz der wîs ômerus
von trôjaere werdekeit
in den landen hât geseit,
des mac ich sagen mê von dir
als sich dîn saelde zeiget mir>.
der schreip ouch sider lange zil
alexanders wunder vil. -
dô kêretn sie von dannen sâ
in eurôpam von asîâ.
schiere wart daz her gesant
in ellespontum daz lant.
daz betwanc er, im was gâch
ûf sîne vîende dar nâch
und durchvuor vil lande,
mit roube und ouch mit brande
twanc er die herren sicherheit
als uns diu âventiure seit.
dô kam gewaeriu botschaft sâ
dem künege von persîâ,
daz nâhe in sînen landen
mit vrechen wîganden
laeg alexander.
vil schiere besander
von allen sînen landen dar
mâge man und vürsten gar
die sînes râtes solden phlegn.
oxîatres ein rîcher degn
sîn bruoder, wart ouch dar besant.
der kam durch in in daz lant
und ander wîser helde guot,
den er seite sînen muot
und die er nam ze râtgebn
wie er taete und solde lebn
und wie er werben solde,
wan alexander wolde
in âne zwîvel rîten an.
dârîus der rîche man
sprach< dô mir wart geseit
von êrst daz alexander reit
mit gewalt in mîn lant
und vil der mînen überwant,
dô jach ich daz er waere
ein aehter, ein roubaere
und sant im durch spils gelimph
kindes kurzwîle und schimph:
dâ bin ich betrogen an.
ich dröute dem vil wîsen man,
als ein kint wold ich in bern.
ich waene, des wil er sich wern.
er ist wîse und ellenthaft,
heil volget sîner kraft,
er beginnet uns sô nâhen,
ir sült des niht versmâhen
ir geb wîsen rât dar zuo
wie ich lebe und waz ich tuo:
er trîbet uns von persîâ
ê wir in von elladâ!
weln wir uns niht umbe sehn,
uns mac wol schade von im geschehn>.
oxîatres, der bruoder sîn,
sprach< herre und bruoder mîn!
dû hâst sô hôhen gewalt
alexander nû gezalt
daz ich mich verstân niht wol
waz man dir gegen im râten soll.
dû zwîvelst doch daz dû dîn lant
behaben mügest von sîner hant
und er trîb uns von persîâ
ê wir in von elladâ, -
wer mac getroesten den man
der sich niht selbe troesten kan?
dunket dich sîn leben guot,
sô soltû tuon als er tuot.
swenne er urliuge hât
und sîn dinc mit vorhten stât,
sô sendet er niht sîn her
gegen den vîenden ze wer:
alsô ein sinnerîcher man
grîfet erz mit witzen an.
erst sô manlich gemuot
daz er deweder lîp noch guot
spart noch vil geruowen lât
swenne in kumber ane gât,
er lât sîn dinc an niemen
wan, kumbert in iemen,
daz wert er spât unde vruo
und arbeitet sich dar zuo,
ez sî naht odr sî tac,
daz im garbeiten niemen mac,
unz er ez allez überkumt.
daz im an saelden ofte vrumt
und kan doch sîn ein herre wol
dâ er ein herre wesen sol.
alsus bejagt er êre,
des muoz im iemer mêre
an saelden und an êren
guot saelde und êre mêren.>
< sagt an> sprach der künec dô
< ir hât alexandern sô
gelobt, hât er sô wîsen sin
daz er ist wîser dan ich bin?> -
< jâ, herre> sprach ein vürste wîs,
< er hât mit wîsheit ritters prîs>. -
< nû wâ von ist dir daz erkant?> -
< dû hâtest, herre, mich gesant
nâch zins in sîn rîche,
dô tet sô saeleclîche
der herre swaz er wolde
als man ez wünschen solde.
dâ von dunket mich vil guot,
ob ez dich, herr, alsam tuot,
daz dû dich mit dîner wer
besamnest wol gein sînem her.
ez dienet doch dîn eines hant
wol vünfzec und hundert lant,
diu dîner hêrschaft schône
ie zinseten ir krône
âne diu dir sint gelegn.
dir bringent mangen stolzen degn
partî und mêdî
und die sint gesezzen bî
in dînen landen hie und dâ
von persjâ unz in indîâ
und als mesopotâmje stât.
des lantliute ritters tât
hânt dicke werlîche getân,
die soltû helflîche hân
und die von semiramê.
ûz dîner stat von nînivê
kumt ouch weltlîchiu ritterschaft.
apollonîades, der kraft
hât kunst an ritterlîcher wer,
die soltû hân. von über mer
wirt dannoch dîn kraft sô grôz
daz dich dehein dîn genôz
mit sînen kreften mac bestân>.
dô der rât was getân,
die herren wurden des enein
daz sie vuoren alle hein
und wurben umb helfe sâ.
dârîus von persîâ
vil nâch einec beleip,
wan er sîne boten treip
von lande ze lande
die er nâch helfe ûz sande.
vil wîten dô geworben wart
diu krefterîche hervart.
in der zît dô diz ergie
als ich iu hân gesaget hie,
dô sant alexander
einn vürsten hiez klêander
des triuwe er staete erkande,
gegen lîzîâ dem lande
mit silber und mit golde
dâ mit er werben solde
nâch werden soldieren
vrechen unde fieren.
von pêloponense dar
sold er mit solde grôze schar
und von pamfîlje bringen.
mit werlîchen dingen
brâhter sît vil grôze kraft.
alexanders ritterschaft
in eine stat nû komen was
diu was genant zelênas.
ilîkus hiez ein wazzer grôz
daz durch die selben veste vlôz,
diu lac vil werlîche,
liute und guotes rîche
was sie nâch des maeres sage.
diu werte sich im sehzec tage
und ergap sich im dô,
des was der hôchgemuote vrô.
die stat besazter wol mit wer.
er huop sich mit sînem her
gewalteclîche durch daz lant.
ein stat ist gordîum genant
dâ vliuzet bî sangârîus,
ein wazzer ist geheizen sus.
diu ergap sich ouch iesâ.
der erde dritteil âsîâ
ist niender enger noch den hie
dâ durch daz lant diz wasser gie:
ponte und ouch zilîziâ
der zweier mer sich schieden dâ.
als der tugentrîche man
die selben stat an sich gewan
in der betehûs gienc er, -
sîn lieber got jupiter
het daz betehûs aldâ, -
des gap er ouch den goten sâ.
nû bedâhter sich alsus
wâ der künec dârîus
waer unde sîne man,
dâ wold er in rîten an.
der edel tugentrîche
bedâhte ouch witzeclîche
wie er bewarte wol diu lant
diu dâ vor betwanc sîn hant.
ein vürste hiez amfotêr,
in hôchgemüete was er hêr,
der was mit schiffen sâ zehant
in ellespontum gesant
mit liuten und mit guote
daz er des landes huote.
hegelôch und lespus,
zwêne herren hiezen sus
der iegelîcher was ein degn,
die hiez er hêrlîche phlegn
sîner helfaere
swâ es durft waere.
ze stiure gap er in ze stunt
golds vünf hundert phunt.
ze kriechen was antipater -
des selben landes phlac ouch er
vil werlîch als er kunde, -
sehs hundert tûsent phunde
santer dem ze solde
von silber und von golde.
nû was gewalteclîche
alexander der rîche
mit kreften in anzîre komn,
dâ wart guotes vil genomn
daz die geste vunden.
an den selben stunden
huop sich der wandels vrîe
gen paflagonîe.
dem selben lande wonten bî
die werlîchen venetî.
diu schrift uns eteswâ vergiht
( doch weiz ich es von wârheit niht)
daz selbe liut das waere
von dem venediaere
von êrst den namen nâmen,
wan sie von êrst dar kâmen. -
daz liut und ouch daz selbe lant
ergâben sich dô sâ zehant,
als alexander dar kam,
ir gîsel er mit eiden nam.
ein vürste hiez kâlas
der von art ein vürste was
und an wer ein vrecher degn,
den hiez er des landes phlegn.
dem liez er guot und grôze wer.
gen kapadôzje vuor daz her
in daz künecrîche
mit kraft gewalteclîche.
dô diz geschehen was alsus,
dô bevant der künec dârîus
êrst daz memnôn was erslagn,
als ir mich ê hôrtet sagn.
des wart er leidec und unvrô,
al die gedinge liez er dô
diu an deheinem vürsten lac,
wan dirre sülher tugende phlac.
nû besament er sich wîten
in den selben zîten
als diu wârheit wîset mich,
ze babilônje er leite sich
biz daz sich dâ sîn ritterschaft
besamente gar und al sîn kraft.
des nahtes, dô er kam aldar,
er brâht in sînes eines schar
zehen tûsent helde guot
an ritterschaft mit wer behuot,
die in der veste lâgen
und hôhes muotes phlâgen,
diz wârn die lantliute gar
die sie dem künge brâhten dar.
des morgens dô der tac gevie
und diu sunne vaste ûf gie,
dô sach man zuo sîgen dâ
daz grôze her von persîâ.
der was hundert tûsent komn,
von den wâren ûz genomn
drîzec tûsent die dô ritn
ze harnasche und zorse stritn,
sibenzec tûsent sarjande.
von mêdîâ dem lande
kam zehen tûsent ritter dar,
in der sarjande schar
sach man vünfzec tûsent gân.
dâ brâhten die von barkân
zwei tûsent ritter, mêre niht.
diu âventiure von in giht
sie waeren muotes rîche
und vüern doch lîhteclîche:
sie vuorten niuwan schilte -
nihtes sie bevilte -
und phîl in ir handen.
undr ir sarjanden
was zehen tûsent, niht vil mêr
die vrumten manec herze sêr,
swâ sie mit vîentlîchen sitn
solden strîten oder stritn.
die von armênje brâhten dar
eine wünneclîche schar,
siben tûsent helde wert,
der zorse was ûf strît gegert
mit vierzec tûsent sarjanden.
die von irkânje sanden
zorse sehs tûsent man.
waz sie mit in vuorten dan
sarjande, daz ist mir kunt:
zehen tûsent vier stunt,
die wâren werlîche bereit
ûf strîtes wân mit manheit
mit harnasch und mit lanzen,
scharphen und glanzen.
sie wâren werhaft und stolz.
sumelîche truogen holz
daz was sô wunderlîcher art
daz ez mit vüer gehertet wart
und dann als ein stahel sneit
und deheine wâfen meit.
in der werlîchen schar
kam ouch zwei tûsent ritter dar.
dô hâten die von kaspîâ
niuwan vier hundert ritter dâ
und ahte tûsent man ze vuoz
die mangen tâten vröude buoz
und vrumten klagende siechen.
drîzec tûsent kriechen
wâren zuo dem künge komn
und hâten solt von im genomn,
dô alexander sie vertreip
und ir hêrschaft im beleip.
sie wârn ouch werlîche dâ.
der persen hât ouch anderswâ
vil grôzer her, diu kâmen niht.
daz vuocte sich von der geschiht
daz in der ellenthafte man
ze gâhes kam geriten an
und in des niht wart kunt getân:
baktrîân und sogdîân
von indîâ vil grôziu her
und bî dem rôten lebermer
vil manec wildez einlant,
des name ist uns vil unbekant.
saridên ein kriechen hiez
den alexander ê verstiez -
daz maere giht er waere
der persen helfaere -
er was ein ellenthafter helt
ze rehter manheit ûz erwelt,
den nam der künec unde sprach
dô er diu her zuo sîgen sach
< nû sich, nû merke dise kraft!
benamen, dise ritterschaft
und disiu wünneclîchen her
die vüere ich vil wol âne wer
unz an der welt endes zil,
ob ich sie dar vüeren wil.
merke dise rîcheit!
ir ors, ir harnasch und ir kleit
ist allez alsô rîlich
daz ich des wol mac rüemen mich
daz vor mir ê dehein man
sô mangen degen nie gewan
noch lîhte niemer mê getuot.
wâ ist nû alexanders muot,
sîn dröun, sîn vrevellîcher sin?
er solde wizzen daz ich bin
ein keiser aller künge grôz
und niender lebet mîn genôz.
er waenet er sül mich bestân
als er vil liute hât getân,
daz noch ze kinden ist gewant.
sô manec hêrschaft und lant,
sô hôhiu wer, sô rîchez guot
sô manec degen hôchgemuot
mac mich von im beschirmen wol,
des ich wol getrûwen sol.
im ist nôt, wil er sich wern
alsus rîlîchen hern,
daz er guoter sinne phlege
und sîner tumpheit sich bewege:
ze disem kreftigen her
hoert niht kintlîchiu wer.>
dô sprach der kriechen< daz ist wâr,
doch kan ich alexanders jâr
sô wol erkennen, sînen sin
daz ich ez innen worden bin:
er hat gelücke, an witzen kunst,
der gote und ouch der welte gunst.
sîn herze niemer vrô bestât
wan swenne er eine tugent begât.
waz hilfet guot âne muot?
er hât muot unde guot,
sîn dinc ist allez gordent wol
und stât reht eben, als ez sol.
er ist an tugenden ûz genomn
an allen dingen vollekomn,
er kan die sîne lêren
entwîchen und kêren,
hurteclîche rîten,
vrevellîche strîten,
des künnen sie manlîche:
der herre ist ellenrîche.
swie übel er mir habe getân,
benamen, wil er dich bestân,
sô kanst dû dich mit disen hern
niemer sîner kraft erwern.
dâ von wil ich râten dir
ob dû wellest volgen mir,
sô gip rîlîchen solt
und mache dir die liute holt
odr er müejet dîniu her
mit sîner manlîchen wer.>
der künec zornlîche sprach
dô disiu rede alsus geschach
< ich sihe und hoere wol an dir,
dû bist mit triuwen niht bî mir.
dû hâst bescholten mîne kraft,
vernihtet mîne hêrschaft,
daz muoz dir an daz laben gân:
ich sol lêren dich verstân
waz dû mit herren reden solt.
daz dû bist alexander holt
und getriuwer denne mir,
daz hân ich wol gehôrt an dir
als es verjehen hât dîn munt.>
er hiez in vüeren sâ zestunt
und im daz houbet slâhen abe.
des hâte er sît grôz ungehabe
dô er die wârheit bevant
des er im tet ê bekant.
ez wart im iesâ swaere
swiez ze spaete waere:
diu riuwe was dô gar verlorn. -
als ist ez umbe gâhen zorn,
der ist nû niht anders guot
wan daz er ofte schaden tuot. -
der herre wart begraben dô.
der künc was leidec und unvrô
daz der zorn ie geschach
und er niuwan die wârheit sprach.
ein vürste hiez farnâbâzus,
dem het der künec dârîus
bevolhen der soldiere schar
die von vremden landen dar
durch sîne bete wâren komn
und hâten solt von im genomn,
der hâter lange dar gephlegn.
tîmodes ein junger degn,
dem bevalch er sie zehant.
guot hêrschaft und lant
daz memnôn hât ê gelân,
machet er im undertân,
der ir dâ vor mangen tac
mit wer vil ritterlîche pflac.
dô der tac ein ende nam
und diu naht mit trüebe kam
der künc in einem troume sach
künftec ein teil des sît geschach.
in dûhte er saehe brinnen
der mâzen herberg innen.
ir liehter viurîner schîn
dûht in sô schînende sîn
daz man verre saehe ir brehn.
alexandern solder sehn
zuo zim balde vüeren dar
in alsolhen kleiden gar
als e'r truoc in den zîten.
dar nâch sach er in rîten
durch babilônje her und hin.
dar nâch sach er im zücken in,
sô rehte gâhes daz geschach
daz er in niht mêre sach.
als er dô begunde tagn,
er sante nâch den wîssagn
daz sie beschieden die geschiht
waz des troumes gesiht
bediuten solde. daz geschach.
ir iegelîcher im verjach
anders danne er waer gedâht:
alexander würde im brâht
gevangen unwerlîche
und daz im elliu rîche
solden werden undertân.
diz seiten sie gar âne wân.
sîn gemüete trôster dô,
des troumes was sîn herze vrô
den er ze hôhen vröuden wac.
in mesopotâmje lac
daz her und al sîn ritterschaft.
er lac mit wünneclîcher kraft
dannoch in babilônje als ê.
welt ir, ich sage iu vürbaz mê
von des künges rîcheit
wie er solde sîn bereit
swenne er z urliuge wolde
und selbe strîten solde.
sîn gezelt was rîche
gezieret küneclîche
hôch sinewel als ein toph,
mit einem kristallînen knoph
waz ez bedaht, der muoste sîn
lieht alsam der sunnen schîn.
von manger hande varwe rîch
geparrieret ungelîch
was ez mit vremdeclîchen sitn
rîlîche und wol zersniten
gel grüene rôt wîz als ein swan.
durch süez gedoene hiengen dran
guldîne schellen.
sîne kapellen
hât er dâ bî, diu was vil rîch
an rîcheit dem gezelt gelîch.
von silber drinne ein alter was
dar ob man sanc unde las
ze dieneste gar sînen gotn
als ez was sîner ê gebotn,
des phlâgen sîne wîssagn
die bî im wâren in den tagn.
sie truogen die kapellen vor
in dem her vil schône enbor
mit senfter zuht, in was niht gâch.
den giengen zühteclîche nâch
vil werde juncherrelîn
die von art muosten sîn
edel unde rîche
gekleidet wünneclîche.
der was ebene - daz ist wâr -
sô maneger als tage ein jâr,
zem ambet ûz gesundert
vünf und sehzec und driuhundert.
nâch den vuor ein kanzwagn
der ir heiltuom solde tragn.
dar ûf was ir hervan
dâ lac vil grôzer rîcheit an,
den zugen blance kastelân
starc hôch und wol getân.
die diu hâten in ir phlege
und sie wîsten ûf dem wege,
die truogen alle wîs gewant,
guldîne geisel in der hant.
nâch den ûf schîben zehen slitn
die nâch küneclîchen sitn
wâren rîlîche bereit,
rîch in grôzer rîcheit
von silber und von golde,
der iegelîcher solde
vor sîner schar den vanen tragn,
als ich die wârheit hôrte sagn.
bî den vuor zwelf geslehte her
gerottieret mit ir wer
diu wârn zen besten ûz genomn,
diu sach man nâch ir vanen komn.
dô kam der untoetegen schar
die wâren alsô werhaft gar
und an kraft als ûz erkorn
daz des waere wol gesworn
daz sie niemer stürben
noch âne wer verdürben.
der was zehen tûsent man
die truogen vor dem künge an
rîchiu kleider alle zît
phell unde sâmît
mit golde rîlîche beslagn.
sô sie denne solden tragn
harnasch, sô wart ritter nie
baz gemachet danne ouch sie.
nâch den vuor ein ander schar
vünf zehen tûsent helde dar
die hiezen doriforê.
swaz ich hân gesprochen ê
von jener rîlîchen schar,
daz was gezwîvalt vil gar
mit rîcheit an der schar alhie,
des künges mâge hiezen die.
sie truogen - giht diu wârheit -
kleider als des künges kleit.
nâch den gienc der herwagn
der den künec solde tragn -
daz gatr und daz gestelle was
silber wîz lieht als ein glas -
dâ der künec inne reit
mit überwegender rîcheit
ûf plûmîten sîdîn.
zwên apgote gar guldîn,
diu wâren al gemeine
von edelem gesteine
meisterlîche wol durchleit
diu stuonden - als diu schrift uns seit -
enbor ietwederhalben sîn.
diu gâben alsô liehten schîn,
man wânde daz sie lebten.
dar obe schône swebten
zwên arn grôz von golde
der ietweder solde
dem künge schaten machen.
mit rîlîchen sachen
spien ein phelle schône drobe.
gestalt nâch keiserlîchem lobe
was des küneges gewant
in solher rîcheit erkant
daz niemen bezzers mê gewan.
er truoc einen mantel an,
der was ein edel baldekîn,
rîche vogele guldîn
wâren schône drûf genât
und vil dicke zersât.
der roc von phelle was gesnitn
dâ wârn die naet an gemitn:
ez wâren kleiniu heftelîn
diz muosten edele steine sîn.
von berlîn rîlîch undertragn
von golde waehe gar durchslagn
was sîn gürtel den er truoc
und bezzer denne guot genuoc.
er truoc ûf ein hüetelîn
daz was allez gimmîn,
ein blâwe lîste ez umbevie
diu wol gesteinet drumbe gie.
nû gâben alsô liehten schîn
krône vürspan vingerlîn
daz ich sîn niht prüeven wil,
wan rîcheit dar an was sô vil.
des künges wagen was behuot
mit zehen tûsent helden guot
die sach man scharpfe glaevîn tragn,
den wârn die schefte beslagn
mit silber unz anz îsen.
den hôchgemuoten wîsen
solden wol behüeten die
von gebürte wâren ie
die hoehsten die man dâ vant
über al des künges lant.
nâch den man den künge zôch
vier hundert ors schoene und hôch
und des künges wâfenkleit,
dar an lac grôziu rîcheit.
drîsec tûsent sarjande
die besten von dem lande
die schar al umbeviengen,
gewâfent sie giengen,
swar diu schar solde rîten,
umb sî zallen zîten.
sus was der künec ûf der vart
an bêden sîten wol bewart.
ouch was des künges site alsô
bî den selben zîten dô
swenn er ze strîte solde varn
mit alsus gewanten scharn,
daz sîn wîp diu künegîn
in der reise muoste sîn.
diu brâhte mit ir in ir schar
des landes vürstinne dar.
diu vuor mit solher rîcheit
als ich hân von ir man geseit.
durch waz des sites waere erdâht
warumbe sie dar würden brâht,
des kan îch iu gesagen niht
wan daz mîn sin sich wol versiht
ez geschaehe durch daz
sich iegelîcher deste baz
mit wer wol muoste gesten
an der getât zem besten,
swenne er sîne vrouwen
den dienest lieze schouwen
der durch sî geschaehe
sô siez ane saehe.
durch einen site ez ouch geschach:
sô man den künec rîten sach
durch twingen ûz, sô was der degn
alsô lang under wegn
daz es die sîne gar verdrôz.
ouch was sîn rîcheit alsô grôz
daz er was heime, swar er vuor,
als im der erde dritteil swuor.
durch daz vuort er die künegîn
in der geselleschefte sîn
und ander vürstinne vil
der ich nû niht nennen wil,
hôch geborn vil rîche.
die vuorn vil rîlîche
mit küneclîchen dingen,
den was von kamerlingen
ein michel her geschaffet zuo
die phlâgen ir spâte und vruo,
die man dâ ze lande
die spadûne nande.
swâ daz her sich nider lie
sô lac diu ritterschaft alhie
und dort hin dan die vrouwen,
sô riten ie durch schouwen
die ritter zuo zin überz velt,
durch kurzwîle in ir gezelt.
swâ sie ouch vuoren ûf der vart
dâ was daz vil wol bewart
daz mit deheinen dingen
sie niemen solde dringen:
sie vuoren schône, in was niht gâch.
des künges kamer vuor in nâch,
diu was rîlîch genuoc:
sînn hort sehs hundert mûle truoc
und driu hundert kembel grôz.
die soumer vast umbeslôz
mit wer der vrechen schützen kraft.
dâ zogte nâch diu ritterschaft
und der sarjande her
vil wol bereit mit rîcher wer.
sus vuor der künec durch diu lant
swenne er mit sîn selbes hant
solde und wolde strîten
und an die vînde riten:
sîns landes reht des sites jach.
vil selten es im nôt geschach,
wan daz nû êrste kumber hie
von alexander in ane gie
und er daz reht muoste begân,
durch nôt des landes site hân.
nû hân ich iu alhie geseit
von der grôzen rîcheit
die der künc von persîâ
vüeren solde und vuorte dâ.
nû giht diu âventiure
diz waer den kriechen tiure:
sie vuorten niht sô rîchez guot,
sie vuorten aber hôhen muot.
die persen vuorten rîchez guot,
die mâzen wer und hôhen muot:
der vrechen mâzen wer entreit
der persen hôher rîcheit
ir prîs mit hôhem muote
den si het mit guote,
als ez her nâch sol schînen.
nu huop sich mit den sînen
der künec alexander sâ
von kapadôzje. er lie dâ
einen werlîchen degn
der des landes solde phlegn,
der was istâmenes genant.
gegen zilîzje in daz lant
huop sich der tugentrîche man,
eine gegen er gewan
diu lac zilîzje nâhe bî,
dâ twanc er castrâ zîrî.
alsus wâren genant
die veste gar die er vant,
wan sie bûte zîrus
dô im der künec krêsus
in lydiam dâ vor er entran
und er den sic an im gewan.
als alexanders ritterschaft
wart an dem lande sigehaft,
gen zilîzje er gâhte,
dem gebirge er nâhte
dâ ez mit mangem velse grôz
daz selbe lant vil wol beslôz.
ez was ein enge pîle
vil bî wol vünf mîle,
diz wârn der klûs enge wege.
nû hâte dô in sîner phlege
arsâmes der wîgant
zilîzje daz selbe lant.
dô der von wârheit vernam
daz alexander dâ kam
er kôs im ûz den vesten
die rîchsten und die besten
und besazte sie zehant.
dar nâch reit er in daz lant
und lie dâ niender hûs gestân
daz die geste iht möhten hân
dehein gemach belîben dâ.
zuo den persen kêrter sâ.
waer er gesîn sô hôchgemuot
daz er daz lant haete behuot,
er waere alsô vil sanfte erwert
daz ez waer iemer unverhert,
wan daz gebirge und ouch daz mer
gap dem lande solhe wer
daz man strâz in daz lant
niuwan ze drin wegen vant
und der der wîteste was -
als ich die âventiure las -
dâ rîten kûme vier man
bî nander âne dringen an.
pîramus und zidnus
zwei grôziu wazzer heizent sus,
vliezent durch daz selbe lant,
und tuot diu âventiure erkant,
daz lant waer guot und gesunt.
die berge heizent taurimunt
von den daz lant beslozzen lac
daz manger guote veste pflac.
nû wart von rehter wârheit
alexander dô geseit
daz der künec dârîus
hâte sich berâten sus
daz er an der selben stunt
daz gebirge taurimunt
wolde ergrîfen mit dem her.
sô wol mit edelen vesten
daz ez vor allen gesten
was âne wer behalten ie.
vil lantstrâze drüber gie
die wâren veste und enge.
an wîte an breite an lenge
was ez von viuhte veizt und guot
und gar mit vesten wol behuot
und ouch mit helden guoten
die des gebirges huoten.
was alexander taete dô?
dirre maere wart er vrô
dô im ze rehte was geseit
des gebirges edelkeit,
er gedâhte< ergrîfen wir ez vor,
wir sitzen ob in hôhe enbor
und tuon in leit wol âne schadn,
des werdent sie von uns beladn
und wir kûme odr niht von in.>
als im daz kam in sînen sin,
dô hiez der edel wîse man
daz her vil balde zogen dan
des morgens von der plânje.
er vuor gein der muntânje
den tac mit gaeher île
drîe und vierzec mîle
( der vier und mê an eine gânt
die tiutschiu lant ze mîlen hânt).
vor den bergen ûf daz velt
sluogens ûf ir gezelt
des âbendes dô diu schar
den tac gestrichen was aldar.
die naht beliben sie dâ sâ,
sie kunrierten sich dâ
mit gemachlîcher eise
nâch der grôzen tagereise.
des morgens dô der tac ûf dranc,
dô was daz tweln vil unlanc
von dem her an dirre stat.
sie drungen ûf diu engen phat
daz ez in niemen werte dâ,
si ergrifen daz gebirge sâ.
tarsus von guote ein rîchiu stat
ûf die muntânje was gesat,
diu antwurt alexander sich.
diu schrift der wârheit wîset mich,
der tac waer âne mâze heiz:
diu grôz arbeit und der sweiz
tet dem her mit hitze leit.
nû hâte sich diu schar geleit
in die stat und ûf daz velt
sach man hütten und gezelt
ûf slahen allenthalben
ûf den hôhen alben.
ein wazzer durch daz rîche vlôz
daz was ze guoter mâze grôz,
daz was der vrische zidnus
von dem diu schrift seit alsus,
er waer âne mâze kalt.
alexandern den degen balt
geluste, er wolde drinne badn
wan er mit hitze was beladn.
nû zôch er abe sîn gewant,
walheiz spranc er al zehant
in den phlûm, von hitze er bran.
dô gestuont dem wîsen man
von dirre küele alsô daz bluot
daz dem stolzen helde guot
der lîp sô gar erkaltet was
daz wunder was, ob er genas,
ez müeste ouch von gelücke wesn
solde er iemer mê genesn.
in grôzer unmaht er dô lac,
daz her von leide jâmers phlac,
die sîne wurden al unvrô,
sie sprâchen al gelîche alsô
< wê owê! waz sol diz sîn?
sol uns der liebe herre mîn
sô wunderlîche sterben,
sô müezen wir verderben:
an im was gar unser trôst,
sîn trôst tet uns von vorhte erlôst.
owê! vernimt dârîus
daz unser trôst verdirbet sus,
sô twinget in sîn grôzer zorn
daz wir alle sîn verlorn,>
sprach der ein und der ander.
nû wart alexander
sô vil baz daz er sprach
daz doch vil kûme geschach.
sîn bester arzât wart besant,
der was philippe genant.
dem klagt er dô sîn arbeit
und sîne grôzen siecheit.
der arzât sprach< gehabe dich wol,
dîn genesen troesten sol
uns alle, des wirt niht ze lanc,
ich wil geben dir ein tranc
daz dû zehant in kurzer vrist
gesunt und wol genesen bist.
gehabe dich wol und troeste dich
dîner nôt! kum gar ûf mich!
ich büeze dir die swaere dîn
mit den hôhen witzen mîn.>
mit disem süezen trôste
der arzât mangen lôste
von jaemerlîcher herzenôt,
dô er im disen trôst gebôt.
nû was in alexanders schar
von armênje komen dar
ein rîcher vürste wol erkant
der was parmênîus genant.
der truoc mit hazze zaller zît
dem arzâte grôzen nît.
daz hâter nie umb in verscholt,
wan daz im alexander holt
was und heimlich alle tage
daz was sîn nît und ouch sîn klage:
niuwan durch nît was er im gram.
als er den trôst von im vernam
er dâhte wie daz töhte
daz er verliesen möhte
im sînes herren hulde
umb eteslîche schulde.
alexander santer dâ
sîne brieve und mante in sâ
daz er sich huote, wolder lebn,
die gift wold im philippe gebn,
dar zuo waer er gemietet sus
daz im der künec dârîus
wolde sîne tohter gebn,
obe er naem im sîn lebn.
von der rede er niht erschrac,
ân aller slahte vorhte er lac
die naht er âne zwîvel slief.
dem arzât er behielt den brief,
wan er wess in sô staete
daz er im niht taete
wan êren und guotes,
er was alsolhes muotes
daz er mit wernder triuwe
was zallen zîten niuwe.
dô der morgen ane vie
der arzât mit dem trance in gie
und bôt ez im, der werde man
tranc ez und sach in an.
dô sprach der meister< herre mîn,
trinc! lâz allen zwîvel sîn!>
daz geschach, der wîgant
gap im den brief in die hant.
als der arzât dô gelas
daz von im geschriben was,
er sprach< herre lieber man,
hie bin ich unschuldec an.
er ist an triuwen gar verzagt
der diz hât von mir gesagt.
er bat mich des und warp mit mir
daz ich durch in vergaebe dir,
und wil er nû unschuldec sîn>.
der künec sprach< die triuwe dîn
erkante ich gar ân allen wanc
dô ich dîn arzenîe tranc
und dir dar nâch die botschaft bôt
diu ûf dich seite mînen tôt>.
parmênîus der vürste in gie,
den machete der arzât hie
schuldec ân allez lougen
undr des künges ougen.
alexander was gesunt,
den herren hiez er sâ zestunt
houbten vor den vürsten sâ
in allen zeiner vorhte dâ,
wan er in rehte schuldec vant
des in der arzât überwant,
des wart er schuldec vunden,
sus was der überwunden.
do alexander wol genas,
in mesopotâmje was
daz grôze her von persîâ.
durch daz selbe rîche dâ
eufrâtes daz wazzer vlôz.
daz was âne mâze grôz,
von dem paradîse ez gât,
als uns diu schrift bewîset hât.
dar über zogete daz her
und der persen grôziu wer,
nâch der âventiure sage
riten sie wol vünf tage
ê daz sie möhten überkomn.
nû hâte dârîus vernomn
daz alexander was gesunt
und daz er was ûf taurimunt.
der maere was er niht ze vrô,
gen zilîzje wolder dô
und wolde ergrîfen daz lant.
dô hâtez alexanders hant
betwungen und gar besat.
ze sôlôs in der houbetstat
saz alexander dô mit kraft,
er und al sîn ritterschaft
hâten rîcher vröuden vil,
eine hôchgezît mit spil
begiengen sie ir goten dô,
sie wâren ir gelückes vrô.
swaz er ritter überz lant
und rîcher lantherren vant,
die rîchet er, ir sicherheit
nam er, ir helfe im was bereit.
diu hôchgezît ein ende nam.
gewaeriu botschaft im dô kam
unde saget im alsus,
der persen alikarnasus
haete guot lant und lebn
sîner ritterschaft gegebn.
ouch wart im geseit dâ bî
daz kaunî und mindî
im wâren worden undertân,
des muoster mange vröude hân.
pîramus dâ nâhen ran,
der edel tugentrîche man
sîn her dar über zogen bat
gein kastabalô der stat,
dar leiter sich und in mallôn.
dô kam gevarn parmênîôn,
den hâter ê von im gesant
daz er besaehe daz lant.
der hât issôn die stat
gewunnen und wol besat.
dar vuor der künec selbe dô.
parmênîôn riet im alsô
daz er gein den von persîâ
mit urliuge saeze dâ
und sîner helfaer dâ bite,
gewerlîcher er dâ strîte
dann ob ez waere ein wîter lant.
dem râte volget er zehant
und saz mit sîner ritterschaft
aldâ gein werlîcher kraft.
die sîne sach man strîch
wîten in den rîchen.
swâ man komen sach sîn her
dâ wârn diu lant âne wer.
swâ von den sînen ûf der vart
im iemen brâht gevangen wart,
den mahter guotes rîche
und liez in minneclîche.
er gap in silber und golt,
im wart sô vil der liute holt
daz er von mangem werden man
gunst und sicherheit gewan.
nostâdî ein vürste hiez
dem lant und liutes geniez
der künec lêch von persîâ,
der hâte sîne boten sâ
sînem herren gesant
und tet im sus diu maere erkant
< herre, lieber herre mîn!
ich nostâdî der vürste dîn
künde dir diu maere
umb die vil grôzen swaere
die dû mit arbeitlîchen sitn
von alexander hâst erlitn
an liut und an lande,
an mangem wîgande
die von im hânt erliten nôt.
dîner vürsten ligent tôt
zwêne die hie überz lant
warn die rîchesten erkant,
und bin ich toetlîche wunt
von sîner hant und ungesunt.
koxarî dîn lieber man
mit grôzen wunden kûme entran,
dem sint ouch die sîne erslagn.
ich wil dir von wârheit sagn,
die besten al gelîche
die über al dîn rîche
sint in sîne helfe komn,
der hât er sich an genomn
und hât in liut unde lant
gelihen nû mit sîner hant,
der helfe er willeclîche hât.
diu grôze stat ze mitridât
ist und daz betehûs verbrant,
er hât verwüestet gar diu lant,
mit roube und ouch mit brande
lît er in disem lande.>
dô der künec dârîus
vernam die botschaft alsus,
er enbôt hin wider dan
dem selben vürsten sînem man
daz er gein alexanders her
bereite sich mit sîner wer
unz er im ze helfe dar
gesante werlîche schar,
wan er ze buoze muoste stân
des im waer von im getân.
under diu dô daz geschach,
dô kam ein vürst unde sprach
z alexander alsô
< herre mîn, ich bin vil vrô
daz ich dich sol ze herren hân.
ich was dem küneg undertân
von persîâ dem herren wert,
der hâte dicke an mich gegert
grôzer dinge, diu tet ich,
sînes willen vleiz ich mich,
des gedanket er mir nie.
nû bin ich ûf genâde hie
sô daz ich gerne diende dir
mit willen: wiltû volgen mir,
ich vüege dir in dîne hant
vil dîner vîend und ir lant
und slahe durch ich den persân,
wil er dir niht sîn undertân,
odr gibe dir eigenlîche
den künc und al sîn rîche.>
der red antwurt im alsô
alexander mâzedô
< des willen wil ich gerne dir
lônen, doch ist niht mîn gir
daz ich untriuwen ger:
ân untriuwe bin ich her
komen. nû soltû niht sparn,
dû solt ze dînem herren varn
und tuo dem dîne helfe schîn!
swer dem rehten herren sîn
untriuwe tuot, und möhte der
triuwe leisten dem den er
nie gesach noch künde hât?
swer den mit untriuwen lât
dem er triuwe leisten sol,
der tuot dem vremden selten wol.
dâ von wil ich gelouben niht
daz mir dîn munt an helfe giht.
waer dir geleite niht gegebn
dû müestest drumbe lân dîn lebn!>
dem galt er sînen willen wol
mit rede, mit muote als man noch sol
entlîchesen die valscheit
die der ungetriuwe treit.
an den künc von persîâ
kâmen zwêne vürsten sâ
spichêr und saptesî,
die wâren beide wandels vrî
und klagten michel arbeit
und angestlîchiu herzeleit,
wie alexander sie vertreip
und wie ir hêrschaft im beleip.
dem künge wart dô swaere
diu klage und ouch diu maere
diu nû aller tegelich
alexander mêrten sich.
der sîner leit und ir nôt
im vil grôze vorhte bôt.
von übermuote hiez er dô
schrîben sîne brieve alsô
< der künge keiser dârîus
enbiutet alexander sus
sînem zinsknehte
sîn hulde nâch dem rehte
als er umb in gedienet hât
und gegen im sîn vriuntschaft stât!
dîn hôchvart und dîn übermuot
diu dir noch grôzen schaden tuot,
hât des von dir bewîset mich
daz dû niht anders vlîzest dich
wan daz dîn tôrheit râte dir
daz dû dich genôzest mir
und mich an wellest rîten
und waenest mir gestrîten.
ê daz geschehe, sô wirt gesehn
ein wunder daz niht mac geschehn:
daz der ôster ôriens
werde wester okzidens
und beidenthalp sich vüege alsô
daz mêridjes werd aquilô
und allenthalp ir zeichen sich
wandeln in der andern strich,
sô daz ôster westert gê
und wester stat in ôster stê,
der dewederz mac ergân:
ietwederz muoz in state stân.
die ebenmâze merke wol!
niemen daz gelouben sol
noch waenen daz ez iht geschehe
das man die wandelunge sehe.
alsô kûme mac ergân
daz dû mir mügest widerstân.
mir ist ouch mê von dir geseit
daz dû dich grôzer werdekeit
vlîzest gegen den mînen
und in lâzest schînen
dicke milteclîchen muot
und in gebest rîchez guot.
daz tuo swie vil dû wellest.
swie dû dich in gesellest,
des wirt vil wênec iemer dir
danc gesagt durch sie von mir.
ouch bin ich des dîn vîent niht,
swaz leides in von dir geschiht:
tuo in liep oder leit,
dir wirt nie danc von mir geseit.
tuostû in wol, dêst gar ein wiht,
ich wil dirs wênec danken iht
noch jehn ob dû in übel tuost,
wan dû noch enphâhen muost
einen lôn ders lônet:
dîn wirt niht geschônet
umbe dîne guottât
die in dîn guot erboten hât,
und swaz in leides wirt getân,
des soltû lôn gelîche hân.>
als alexander wart erkant
diu botschaft diu im was gesant,
die brieve las der wîse man.
durch spot er smieren began
daz dârîus des ruomes phlac
daz er sich sô hôhe wac
und als nider sîne kraft.
dô hiez er sîne botschaft
mit sus getânen brieven dâ
schrîben dem künge sâ
< minne und gruoz, liep unde guot,
dienest, vriuntlîchen muot
entbiut ich alexander hie
dir dârîô, nû merke wie!
swie an mich dînes herzen rât
minne und gruoz gesuochet hât,
als sî dir von mir bereit
mîn dienestlîchiu staetekeit.
dû hâst mir dîner brieve vil
gesant, den ich antwürten wil
alsô daz dir von mîner hant
wirt nie mêre brief gesant.
waz sol diu schrift nû hin nû her?
ich wil der botschaft sîn ein wer
und wil selbe komen dar,
dir mînen willen künden gar,
wan ich wil benamen dich
rîten an und wil ouch mich
vlîzen des unwillen dîn
mit allen den kreften mîn.
rîcher künc! dû hâst gejehn,
swaz den dînen sî geschehn
von mir guotes, daz es mir
gedanket werde niht von dir.
daz ist reht und billich,
wan ich getet ez nie durch dich.
mîn sit ist alsô getân
daz ich niemen von mir lân
âne guot swers rouchet,
daz erz an mich suochet.
well er der bete behêren sich
daz er bite, sô bit ich
daz er lâze sich gezemn
daz er mîn guot geruoche nemn.
waz sold eines herren lebn
der niht umb êre wolde gebn?
daz ist mîn site, dâ von ich hân
dînen boten liep getân.
dehein dîn bote von mir nie
durch dîne vorhte gâbe enphie
noch durch dîne vriuntschaft:
mir ist der site als an behaft
daz ich des niht gemîden kan,
ich muz iegelîchen man
nâch sînem werde rîchen sô
daz er von mir scheide vrô.>
die boten machter rîche
und gap in küneclîche,
ir herren er sie sande
rîlîche von dem lande.
innen des die boten hin
vuoren, dô was hinder in
alexander der rîche
mit râte vlîzeclîche
wâ er einen boten naeme
der im wol gezaeme
den er sante dârîô,
der von im saget alsô
daz er guot êre unde lebn
an sîne gnade solde ergebn
odr aber mit im strîten.
dô vant er an den zîten
niemen der im töhte
dem er getrûwen möhte.
den helt unwandelbaere
geluste daz er waere
selbe der ez taete
und daz der degen staete
besehen wolde rehte ir kraft,
ir vuore und al ir ritterschaft.
des muotwillen in betwanc
sîn vil wunderlich gedanc.
genuoge lobten im di vart.
dô abr es im ze muote wart,
er lie sie ledec alle ân in,
daz riet sîn wunderlîcher sin
und sîn manlîcher muot
der in von zageheit tet behuot
und an manlîchem muote
den wîsen ie behuote.
ûf huop sich von dem râte sâ
der künec alexander dâ.
hin was gscheiden der tac.
des nahtes dô der herre lac
slâfent an dem bette sîn,
sînes herzen ougenschîn
in troume sînen got ersach
amônen von dem ich ê sprach,
in rîlîcher werdekeit
mit rîchen kleidern wol bekleit.
< sun alexander, sprach er dô,
dû solt sîn von herzen vrô!
ich sol dir helfe tuon erkant.
leg an dich sus getân gewant
und var nâch dînem muote!
des hoehsten gotes huote
wil dir sîn mit helfe bî
und dich sorgen machen vrî
mit sîner gotlîchen kraft.>
dô vröute sich der botschaft
der künec alexander.
den hôhen trôst erkander
daz er von gote waere komn.
sus wart im der slâf benomn
und sîner sorclîchez sorgen.
dô kam der ander morgen,
ûf stuont alexander,
sînen rât besander
und seite waz sîn troum ersach
und waz sîn got hin zuo zim sprach.
dô rietens al gelîche alsô
daz er der botschaft waere vrô
und daz er niender lieze
waz sîn got in hieze.
daz leister gar daz er niht liez,
er leiste daz sîn got in hiez.
sin marschalc eumîlîô,
ein herre was geheizen sô
des triuwe hâte hôhe kraft,
er was milte und wârhaft
küene werhaft und wîs,
er hâte hôhen mannes prîs.
des triuw unde manheit
diu an sînen lîp ie was geleit,
was alexander wol erkant,
durch daz besanter in zehant,
er sprach< marschalc, dû heiz mir
ein ors bereiten, einez dir
und var mit mir, als ich var!
wirt es nie man gewar,
daz ist wol in dem willen mîn>. -
< gerne, herre, daz sol sîn.>
diz was schiere dô bereit.
alexander was bekleit
als er den got sich kleiden sach
in sînem troume als ich ê sprach.
nû diu ors wurden brâht
als es dâ vor was gedâht,
sie riten mit ein ander dan
alexander und sîn man,
dô man solde slâfen gân.
diz wart verholne getân.
dise beide helde wert
vuorten anders niht dan swert
ze wer gein vîentlîchen sitn.
zwei ellenthaftiu ors sie ritn
und einez zôch an sîner hant
eumîlîô der wîgant.
diz was sînes herzen muot,
er wolde mite sîn behuot
obe in iemen muote,
daz ez an vluht sîn huote.
ein wazzer heizet strangâ
daz vliuzet durch daz rîche dâ,
daz ist grôz unde snel,
harte draete und niht ze hel,
tief, in guoter mâze breit.
diu schrift gewaerlîche seit,
im sî diu natûre erkorn
daz ez iemer sî gevrorn,
sô der tac ein ende gît
den winter und die lange zît,
daz man ez gân und rîten mac.
sô denne erschînet der tac,
sô zergât daz îs sô gar
daz es niemen wirt gewar.
daz machet vrost und kalter snê,
des ist in den zîten mê
zuo den selben bergen dâ
denn in den landen anderswâ.
an daz kam alexander,
wol übervrorn vander
daz wazzer und starc daz îs.
dô sprach der rîche degen wîs
< marschalc, alhie soltû sîn,
an disem wazzer beiten mîn!> -
< nein, herre mîn, lâ mich mit dir!> -
< an dem erkumt niht rehte mir>. -
< nein ez, herre! wan mîn hant
sol dir helfe tuon erkant
ob man dich in noeten siht
und ob es dir nôt geschiht>. -
< daz weiz ich wol, wis eht dû hie!
daz kumt uns baz.> den helt er lie
belîben, er reit über hin
als im dâ vor geriet sîn sin.
sîn hôchgemüete in des betwanc.
ze sîner wirde saelde dranc,
diu kunde wol betwingen
unsaelde von im dringen.
innen des dô diz was sus,
der künec rîche dârîus
lac mit küneclîcher kraft
mit sîner grôzen ritterschaft
in des landes houbetstat,
die hâter werlîche besat,
diu was geheizen onchâ.
den künegen von persîâ
was si ze sedele benant
sô sie kâmen in daz lant.
si was veste und rîche.
dar gâhte vlîzeclîche
alexander der reine
er îlte balde al eine
unz an diu vesten bürgetor,
dâ vant er grôze wahte vor.
mit schalclîcher huote
dô der hôchgemuote
zuo zin begunde nâhen.
sie îlten balde gâhen
und vrâgten wer er waere.
< alexanders kameraere
bin ich> sprach der wîse degn
< er hât sich des gen mir verwegn
daz er mir getrûwet wol
darumb ich im werben sol
darumbe er mich hât her gesant.>
als er daz sprach, dô kam zehant
der künec dârîus geritn,
der was mit wîslichen sitn
ûz geriten umbe spehn
sîn her und des kraft besehn
und hât an der selben zît
sich bereit ûf einen strît,
als er in kurzen zîten
schiere wolde strîten.
ruofende der künec sprach,
als er alexander sach
< wis willekomen! wer bistû?
daz soltû mir sagen nû.> -
< alexanders kameraere.> -
< nû waz sint dîniu maere?> -
< dâ wirbich sînes herzens ger>. -
< durch waz bistû gesant alher?
ich bin dârîus genant.
warumbe dû sîst her gesant
daz sage eht dû! ich bin ein man
der im niht grôzer êren gan>. -
< dêswâr, dêst im ein krankez leit,
sîn lîp ouch vil liuten treit
holderz herzen denne dir.
daz soltû wol gelouben mir.> -
< wie redestû sô? nû wie red ich?
dîn rede ist alsô vrevellich
die dû mir z antwürte gîst,
als dû alexander sîst.> -
< owê! daz wolden sô die gote
daz ich er waere! ich bin sîn bote.> -
< durch waz hât er dich her gesant?> -
< dâ soltû krône hêrschaft lant
lîp und guot an in ergebn
und nâch sînen hulden lebn
odr aber mit im strîten.
wie lange sol er rîten
ûf dich dû stille lign?
lâz in mit voller kraft gesign
odr sigelôs belîben!
wie lange sol erz trîben?
waenstû dich vor im ernern
und vor sîner kraft erwern,
sô strît, ez gê hin odr her!
daz ist des ich mit botschaft ger:
eines tages er dir gert
daz er werde des gewert.
daz lâ geschehen als ers ger,
daz in dîn wille des gewer!> -
< rüemet er sich denne sus>
sprach der künec dârîus
< daz er mîn welle bîten,
ob ich in welle an rîten?> -
< jâ> sprach alexander dô,
< er wart nie nihtes alsô vrô.> -
< der bete ich in mit willen wer.
dêswâr, vil balder dan ers ger
wirt sîn übermuot erstaht.
ich bin noch vil unverschraht
an vorhte und unbesezzen.
dû solt hînaht ezzen
mit mir, wan der herre dîn
nimt an sich die boten mîn
und tuot in grôzer êren vil.
dâ von ich niht entwesen wil,
dû müezest zuo der spîse mîn
geladen willeclîche sîn.>
daz geschach, sie riten dan.
swer den zühterîchen man
alexandern dô gesach,
mit rehter wârheit er des jach,
sie solden dâ ze gote hân
den got der waere als er getân.
sie wânden al gelîche alsô,
ez waere ir got apollô,
wan der stolze degen balt
sô wunderlîche was gestalt
und ouch dâ bî sô schoene was -
ir iegelîches sin daz las -
ez möhte ir werder got wol sîn,
wan sô wünneclîcher schîn
an schoene, an zuht, an wîsheit
waere an sînen lîp geleit.
in die stat die helde ritn
mit geselleclîchen sitn.
grôzer liehte genuoc
man gegen den helden schône truoc.
nû sie erbeizet wâren hie,
vil grôzer liehte vor in gie.
alexander hiez dô hân
sîn ors gebunden stille stân,
er wolde dannoch rîten
des tages aldâ niht bîten.
diz ergie. sîn wille ez was.
dô giengens ûf den palas.
als sie kâmen an die stegn,
dârîus der rîche degn
vuort alexandern an der hant.
dô gedâhter sus< mir tuot erkant
mîn sin bezeichenlîche
daz persîâ daz rîche
mîn vil schiere werden sol.
daz hât mir bezeichent wol
dirre degen rîche erkant:
zem êrsten er die zeswen hant
hât gegen mir geboten hie>.
mit dem gedanke er vür sich gie
vroelîch ûf den palas
der hêrlîche gezieret was
von manger grôzer rîcheit.
nû was daz ezzen bereit.
der edel künec rîche
hiez dô küneclîche
die sîne mit hêrlîcher kraft
bereiten grôze wirtschaft
daz ez dem boten sunder spotn
wurd alsô rîlîche erbotn
daz er in rîcheit jaehe
swenn er ir rîcheit saehe.
sus hiez der künec hêre
sich mêre und aber mêre
mit schalle vlîzen rîcheit:
swaz vür die herren wart geleit
trinken odr ezzen,
daz was dar zuo gemezzen
daz man ez trüege vür die schar
niht anders wan in golde gar
geliutert und gereinet,
ergraben, wol gesteinet
muosten al die köphe sîn.
glanz alsam der sunnenschîn
was der wende widerglast.
< hei!> dâhte dô der wîse gast
< sol diz iemer werden mîn?
wan ez ist sô gar guldîn
dâ mit der herumbe gât
der dirre lande krône hât.>
ir iegelîcher dô began
gegen dem ellenthaften man
mit hovereden schallen.
dô antwurt er in allen
sô kündeclîche daz er sie
gesweiget an ir worte nie.
dô wunderte sie sêre
daz sô wîslich êre
bî kraft in hôher werdekeit
sô kleinem lîbe was bereit
und alsô grôzes herzen sin.
sie sprachen al under in,
er waere wol besinnet,
den sie dô hâten ginnet.
alexander dâhte dô
in sînem gemüete alsô
< benamen, dirre grôze vlîz
ist niuwan durch ein itewîz
gein mir mit schall ûf geleit,
daz sie mich mit ir rîcheit
überschallen, dêst mîn muot.
ir rede, ir lôsheit und ir guot
wil mîne kraft gesweigen.
möht ich daz wol geneigen,
mit überschalle tet ich daz>.
alsus gedâhter vürbaz
wie er ir rede neicte
sô daz er sie gesweicte.
nû hâte man halp gezzen dâ,
dô nam alexander sâ
den koph als er getranc den wîn
und stiez in in den buosem sîn
daz sis doch alle nâmen war.
dô brâht im der schenke dar
daz trinken hêrlîche
in einem kophe rîche
dar an vil gesteines lac
daz man in rîcher koste wac.
dô sach man alexandern
den koph als ê den andern
in sînen buosem drengen.
diz wolde dô niht lengen
der schenke, er brâhte im aber dar
den dritten koph von golde gar
geliutert und gereinet
rîlîche und wol gesteinet.
dô dâhte sô der wîse degn,
mit schalle wolder überwegn
die schalleclîchen rîcheit.
als ich iu hân hie vor geseit
wie er behielt die köphe dâ,
alsus stiez er den dritten sâ
in sînen buosem. daz geschach.
daz sach der künec selbe und sprach
< sag an, warumbe ist diz getân
daz dû niht lâst die köphe stân
und daz dû sie birgest sô>?
des antwurt alexander dô
< herre, hân ich missetân
daz ich sie mir behalten hân,
dâ bin ich unschuldec mite.
alexanders hovesite
wolde mich es niht erlân.
des sit ist alsô getân,
swaz man dâ setzet vür den man,
daz man im des mit willen gan.
swie rîche sî der koph, swie guot,
wil daz gezemen sînem muot
daz er in habe, er treit in hin
daz es niemen wendet in
und ez ungerne niemen siht.
ich sihe wol, des ist hie niht,
durch daz wil ich sie wider gebn.
nâch jenem site woldich lebn
des ich gewon von kinde bin.
sît mich hie triuget der gewin,
sô wol ich zuo dem herren mîn,
der kan unkleine an guote sîn.
niht sêre mich des wundern wil,
habt ir grôzer rîcheit vil,
wan ir iuch in dem muote
niht senet wan nâch guote:
mîn herre ist milte, er hât den muot
daz er sich wendet kleine an guot.>
er hâtes überschallet dô
mit dirre kündekeit alsô
daz sie niht mêre kunden.
sus wâren überwunden
die vürsten und des künges man.
sie sâhen alle ein ander an,
sie sprâchen< hei! diz waer ein site
dâ sich ein herre liebte mite!
an den waer dienest wol geleit
der lebte in solher werdekeit
und der waere alsô gemuot,
daz er teilte alsus sîn guot!
ach! solder unser herre wesn,
wir möhten wol bî im genesn,
sold im des landes rîcheit
und unser krône sîn bereit,
wir würden alle herren,
sô kunde uns niht gewerren.>
anêpolis, ein vürste hêr,
begunde sûmen sich niht mêr
er saehe ie kuntlîche dar.
alexanders nam er war,
sîn antlütze im was erkant:
ez was ir einer der gesant
dâ vor in mâzedônje was
nâch zinse, als ich iu hie vor las,
zuo dem er sprach mit bîschaft,
diu henne waer unberhaft,
diu im guldîner ejer vil
leite dâ vor elliu zil.
der gie zuo dem herren hin
dem küneg unde zeiget in,
er sprach< herre dirre bote,
des wil ich swern dir bî gote,
daz ist alexander,
benamen der, kein ander.
wir sehen alexandern,
deheinen boten andern!>
alexander der degn
kunde guoter sinne phlegn,
er sach daz sie sîn nâmen war
und ie kuntlîche sâhen dar.
wan swer iht redet von einem man,
der siht in under stunden an
überwendec durch die brâ.
diz geschach ouch im aldâ:
sie sâhen dar und aber dan.
dô daz gesach der wîse man,
über daz gestüele er spranc
sô daz in dehein gedranc
irte dâ. dô was der degn
zer tür ûz komen an die stegn.
einen kneht er aldâ vant
der ein vackel an der hant
hâte diu vil schône bran.
die zuht im der küene man
und sluoc im überz houbet die,
dô er sim ungerne lie.
ze sînem orse er balde lief,
dâ spranc er ûf. vil lûte rief
bêde dirre der und der
< wâfen, wâfen! kêrâ her!
habe vür hin! kêrâ nâch!>
dô was in ûf den hof vil gâch.
ê sie bevunden maere
waz dirre rede waere,
dô was er vür die porten komn.
dô sie hâten wol vernomn
die geschiht der wârheit,
sie hâten schiere sich bereit,
doch niht sô schier, der herre junc
hât einen langen vorsprunc
genomen übr den wîten plân.
sie liezen balde nâch im gân.
er sach wol und sie niht,
des brâhte in dannen diu geschiht.
der viel dort, der ander hie,
der über den, der über die.
sie sûmten sich. der degen wîs
vant dannoch gevrorn daz îs,
dâ reit er über. von der nôt
daz ors lac ûf dem îse tôt
wan ez ze tôde was geritn.
dô muostez nâch den alten sitn
balde tagen, daz geschach.
den tac man sêre ûf dringen sach.
daz îs was gar zergangen,
dô der tac was gevangen.
nû was der marschalc dannoch hie
und beite sîn als er in lie,
daz ors hât er behalten dâ.
dar ûf saz alexander sâ,
gegen dem her sie wider ritn.
mit vil hêrlîchen sitn
wurden sie enphangen wol,
als noch ein schar ir herren sol
enphâhen âne missetât
an dem ir saelde, ir êre stât.
auch wâren als ich hân vernomn,
von der vluht hin wider komn
die den unverzagten
alexandern jagten,
und seiten von dem wîsen man
wie kündeclîche er in entran.
der künc erschrac der maere dô,
vil leidec was er und unvrô,
verdâht begunde er sitzen
und dâhte von den witzen
und von der hôhen manheit
diu alexander was bereit.
er was in grôze sorge brâht
dô er alsus saz verdâht.
vor im stuont ûf dem palas
ein sû diu gar guldîn was,
die xerses der rîche
hiez machen küneclîche
dô er des landes krône
truoc mit gewalte schône,
diu nâch im als er wolde,
sîn gehügde wesen solde:
diu viel. dô sî der herre an sach,
er weinde, klagelîche er sprach
< wê, owê! waz sol diz sîn?
ich vürhte daz diu êre mîn
welle kurzlîche zergân
und ein leidez ende hân,
sît des gehügde alsô zergât
der mangen prîs erworben hât.>
dô besante sich an einem tage
nâch der âventiure sage
der künec alexander
der eine und ouch der ander,
swer dô ritter was genant,
der wart an den rât besant.
nû sie wâren vür in komn,
als in diu botschaft was vernomn,
alexander hôher trat
enbor an einer hoehe stat
dâ er daz her wol übersach.
vil gezogenlîche er sprach
< vernemet al gelîche hie
und lât iu rehte sagen wie
unde war ich was geritn!
wan ich hân des niht vermitn,
ich habe ervarn der vînde kraft
und wol besehn die ritterschaft.
ich âz mit in, ir vuore ich sach:
dêswâr ir muot ist alsô swach
daz sie an wer verdorben sint
noch herter danne ein bliugez kint.
wir hân wîslîcher lêre,
werlîcher liute mêre
danne die von persîâ.
des hân ich ein teil aldâ
bevunden mit gewaerer jehe
und mit gewisser ougen spehe:
benamn, sie müezen siges jehn
oder ich kan niht rehte spehn!
ir ist lîhte mêr ein teil
dann unser sî. des wesen geil!
dêswâr, uns sol erschrecken niht
ob man mê liute bî in siht
dan mit uns hie, des doch niht ist.
unser werlîcher list
ir menige kleine vürhten sol!
wir überwinden sie vil wol:
sie haben guot und grôzez her
sô hân wir muot bî vrecher wer.
unser muotes rîchez her
sol ir ungemuote wer
gar verdrücken, wan ir her
hât kleine kraft gein unser wer.
sie hânt her gar âne muot,
sô hân wir muot, ir rîchez guot
sol erwerben unser muot:
sô hân wir muot unde guot.
erwirbet unser vrecher muot
der vîende rîchez guot,
so mügn wir mit dem guote
nâch unserm hôhem muote
gewinnen prîs und êre
sus volget mîner lêre!
wan swer guot und êre
mit eines mannes lêre
erwerben sol, des lêre
volge! er hât es êre
ob er den rât in lêret
der in an saelden êret.
sus haltet iuch an mînen rât!
ich râte iu âne missetât.
volget mînem râte!
vruo und dar zuo spâte
wil ich iu volge sîn bereit,
wan iuwer wîsiu wîsheit
mich bezzer lêre lêret
dan ich tuo. daz êret
uns beidenthalp an êren wol.
iuwer rât uns wîsen sol
wie wir unser her gescharn
und uns ûf einen strît bewarn
und wie wir sô gerîten,
guot und êre erstrîten,
daz man iemer mêre
prîs unser werlich êre.
ir wizzet vil wol, ez ist wâr
daz wir nû mêre danne ein jâr
mit den vînden strîten
und mit gewalte rîten
in der persen landen.
mit stolzen wîganden
hân wir gestriten mangen strît
daz wir gesigten alle zît.
nû mügn wir êr unde guot
alêrst bejagn: sît hôchgemuot
und seht daz wir alsô gevarn
daz wir mit witzen uns bewarn.>
des râtes wurdens alle vrô.
sie sprâchen al gelîche alsô
< herre, daz sol stân an dir!
swaz dû wilt des volgen wir:
strît! wir helfen strîten,
rît! wir helfen rîten,
mît! wir helfenz mîden,
lît! wir helfenz lîden.
swaz dû wilt daz wellen wir,
daz dû tuost des volgent dir
die dîne willeclîche.
nie man ist alsô rîche
man dien dir willeclîcher,
an kraft ist niemen rîcher.>
der rede wart der herre vrô,
sie schieden von dem râte dô.
nû diz ergangen was alsus
und der rîche dârîus
wîten in dem lande lac
mit grôzer hêrschaft der er phlac,
dô kam timôdes aldar
der sîner soldenaere schar
phlegen solde als er in hiez,
als ich iuch hie vor wizzen liez,
unde riet im alsô
daz er solde kêren dô
in mesopotâmje widr
und er sich dâ lieze nidr
durch des landes wîte
und er sich dâ ze strîte
bereite mit sîner wer
oder daz er sîniu her
hieze teilen über al,
ob an in geschaehe ein val
daz sie niht alle laegen tôt
in der werlîchen nôt.
ez waer vil bezzer daz der schar
ein teil verdürbe, dann sie gar
müesten dô verderben
ob sie solden sterben
unde sigelôs gelign,
sold alexandr in an gesign:
dêst wîse, swer mit vorhte
vil zwîvels an im worhte.
den künec dûhte dô der rât
ein zageheit und ein missetât.
< ich wil wider kêren niht,
sprach er, swaz halt mir geschiht,
ich hân wol alsô grôziu her
daz sich alexanders wer
gegen mir niht gevristen mac
mit wer einen halben tac.
der mâzen vröude ich mêrte
ob ich im wider kêrte,
wan alexander jaehe
daz ez durch vluht geschaehe>.
timôdes der wîse sprach
< herre mîn! des ich dâ jach,
der rât waer dir waetlich,
daz wândich unde dûhte mich,
sît des kalten winters zît
nâhet schiere und ûf uns lît,
sô haet dîn her hie z enge,
wiltû hie sîn die lenge,
wan dez gebirge ist hie ze kalt.
gebirge wild unde walt
ist âne lant dem her ein slac
dâ ez sic niht enthalten mac.
ez wær ein angestlîchiu nôt,
laegen wir hie von vroste tôt:
strîten! lâzen enden sich
dar ez sül enden! daz rât ich.
daz lengen uns niht anders vrumt
wan daz ez uns ze schaden kumt>.
dô wart gevolget drâte
des wîsen vürsten râte
ein teil sunder widersaz.
des küngs rîcher kamerschaz
wart gein dâmas sâ gesant.
in zilîjze daz lant
vuor er mit al den kreften sîn.
sîn muoter und die künegîn
sîne vrouwen vuorte dan
mit im der tugentrîche man.
sîn her mit im nû komen was
z amanîcas pîlas
dâ man in sûrîen gât
und zilîzj ende hât.
zwischen den zwein landen was
de persen her als ich ê las.
alexander sande
in allem dem lande
wartliute die solden spehn
daz lant diu her vil wol besehn.
die riten her unde dar,
sie sâhen in der persen schar
manec rîch hôchgezelt,
unde schinen gar diu velt
in einem liehten glaste
alsô sie brunnen vaste
von gezelt und von schilden.
ûf allen den gevilden
vil wîten lac der persen her
von dem gebirge unz an daz mer
daz siez nie kunden übersehn,
des sie von wârheit muosten jehn.
dô hiez er im ir ritterschaft
ahten gar und al ir kraft
und wâ im an der selben zît
gewaerlîchest waer der strît.
dô rietens im an der stunt
belîben gar ûf taurimunt.
nû was gegen der vînde kraft
alexandr sorchaft
und gein ir werlîchen maht.
sunder slief er al die naht
in sînen sinnen ahtende
sîn dinc und betrahtende,
sît er gein sô grôzem her
haete sô gar kleine wer.
des begunde er sorgen
die naht unz an den morgen.
wan iegelich degen, ist er wîs,
wil er bejagen ritters prîs,
der muoz dicke vorhte hân
wie daz werde alsô getân
daz er behuot êre und guot.
er ist ein zage er des niht tuot.
er denkt in sînen sinnen
< mac eht ich entrinnen,
sô bin ich wol komen hin>.
ein wîser degen hât den sin
wier sô wîslîche var
daz er mit witzen sich bewar.
sus tet ouch alexander ie:
grôziu dinc begienc er nie
âne wîsen vürgedanc
als in sîn wîsheit betwanc.
der vorhte in sînen sinnen
brâhte er niemen innen:
er was vröuden rîche.
die sîn al gelîche
hiez er bereiten sich dar zuo,
an dem dritten tage vruo
wolde er strîten. des er jach,
daz was sîn wille: diz geschach.
sîne gote er helfe bat
mit opher an der selbe stat.
dô huop sich gein dem strîte sâ
manger hande unmuoze dâ
von den helden wîsen:
sie vesteten diu îsen,
die dienesthaften knehte
nâch dienestlichm rehte
dienten sie den rittern dâ.
hie und dort und anderswâ
man manger hande unmuoze vant.
ûf sînes herren helm der bant
sîn kleinoet als erz solde hân,
und saztez als ez solde stân.
dô was manger hande werc:
der riemte dâ den halsberc,
der den helm, der die hosn.
man moht anderhalben losn
harnasch nâch blanker wîze vegn,
genuoge ir kovertiure phlegn
und drûf ihr wâfen vesten.
von den werden gesten
sach man grôz unmuoze ergân
und ûf strît gebaerde hân,
als ez lîhte noch ergât
dâ man strîtes willen hât.
nû hiez der künec dârîus
scharn sîniu her alsus:
ze sîner zeswen sîten
solde ein degen strîten
der was nâbarzânes genant,
ein ellenthafter wîgant
mit dem die schützen solden zogn
mit armbrustn und mit bogn.
ob ich der zal prüeven sol,
ir was zwênzec tûsent wol.
die vuorte nâbarzânes.
nâch dem zogte timôdes
mit drîzec tûsent kriechen,
die vrumten mangen siechen.
den was der untoetigen her
zuo geschicket mit ir wer.
ein vürste solde strîten
ze sîner winstern sîten,
aristômêdes ein helt
ze rehten tugenden ûz erwelt,
der zwênzec tûsent helde ûz las
der iegelîcher zorse was,
und alsô manec sarjant.
der stolze degen wîte erkant
was von tessâlje geborn.
daz selbe lant hât er verlorn:
ez gewan im alexander an
und vertreip in von dan.
zwischen disen zwein scharn
wolde der künec selbe varn
mit drin tûsent sînen mâgen
die sînes lîbes phlâgen.
nâch disen scharn zogte dan
ze vuoze vierzec tûsent man.
nâch den solde strîtn dâ
diu ritterschaft von mêdîâ,
der solde oxîatres der degn,
des rîchen künges bruoder phlegn,
und wîslîch in vor rîten.
bî den solden strîten
die von irkânje kâmen dar
mit manger ritterlîcher schar.
da nâch rottieret er diu her
gein dem gebirge un gein dem mer,
gein dem lande und gein der habe.
swâ die strâzen giengen abe,
dar sant er ze huote
zwênzec tûsent helde guote,
daz sie der wege phlaegen
und dâ die vluht verlaegen.
niht verre dan übr daz velt
sluoc man der vrouwen gezelt
durch ir gemach vür ungemach
des man von strîte sich versach.
dô wart mit wârheit vernomn,
der künec dârîus waer komn
vür daz gebirge mit dem her.
dô bewarte wol mit wer
alexander gar die wege.
die veste er nam in sîne phlege
und zôch von der muntânje
nider ûf die plânje.
er hiez an der selben zît
machen eine letze wît
dar ûz sie gaeben ritterschaft
und swenne sie von überkraft
würden wider in getân,
daz sie möhten ruowe hân
unz ein geselleschaft gestrite,
diu ander aber ûz gerite.
dô rottieret er aldâ
sîne grôzen rotten sâ:
ze vorderst mit den schützen dar
schihter sîne besten schar
die man in sînem lande
die phalangen nande.
die solden im dô strîten vor.
ein vürste hiez nîkanor
des vater was parmêniôn,
der solde ûf ritterlîchen lôn
ze sîner zeswen strîten.
nâch dem solden rîten
zênôs und perdikkas
meljâger und amintas
ptolômêus der wîse
der ie an ritters prîse
was vollekomn und unbetrogn.
dise vünf herzogn
an der zeswen sîten stritn,
vor ir scharn sie dô ritn.
schilteshalp bewart er sus.
parmênîôn und krâterus
die solden im dô strîten bî.
wer im zuo geschicket sî?
die mâzen und diu rotte grôz
die sîner helfe niht verdrôz,
die hâter dô an sich genomn:
diu was von tessâlje komn.
von pêloponense ein schar
die klêander brâhte dar,
nach disen selben gesten streit.
als uns diu âventiure seit,
ez solden die von trâzîâ
und die von krêtâ wâren dâ,
ze jungest strîten nâch den hern.
der berge strâze hiez er wern
von agrîân ein krieschez her,
die wârn mit her über mer
dem helde muotes rîche
komn dô niuwelîche.
die vertriben schiere dan
jene zwênzec tûsent man
die dârîus der wîgant
ze lâge hâte dar gesant.
dô zoget alexander dan
den berc ze tal und sîne man
hin dâ diu letze was bereit,
als ich iu hân hie vor geseit.
dô wart von den hern ein schal
der wîten in dem lande hal.
der persen ruof vil lûte erdrôz,
ir schal, ir singen wart vil grôz.
daz widerschalleten vil gar
des werden alexanders schar.
ir doenen was vil manecvalt.
gebirge stein unde walt
begunde nâch in klingen
zwîvalt gedoene bringen,
wan swaz sie vor in sungen,
die berge ez nâch in klungen,
als ie der walt antwürte gît
als man drin ruofet alle zît.
nû die persen hôrten dô
daz zwîvalt gedoene alsô,
sie wânden an dem selben zil
ir wer wol zwir alsô vil
sô sie bî den zîten dar
brâhten hers. sus truoc sie gar
alexanders saeldenkraft
an der sîn name was sigehaft.
nû sie begunden nâhen
sô nâhen daz sie sâhen
beidenthalben übr daz velt
ritterschaft hütten zelt
gegen ein ander schînen,
alexander sprach zen sînen
< nû, stolzen helde, sît gemant
durch waz wir sîn ûz gesant,
und werbet hiute umb êre
nâch ritterlîcher lêre!
swer hiute hie bî mir verzagt,
dem sî mîn vriuntschaft widersagt.
swer hie vliuhet, derst doch tôt
swar er vliehen wil die nôt,
er muoz doch sigelôs gelign.
swer aber hilfet mir gesign,
der wizze waerlîche
daz ich in iemer rîche
mit helfe und ouch mit guote.
des ist mir wol ze muote.
ich vüege im êr unde guot,
swer hie hât unverzagten muot.
ûf die gedinge helfet mir
daz wir gewinnen ich und ir!
den roup teil ich, ich sage iu wie:
swaz gewunnen werde hie
daz suln die sarjande hân,
die gevangen wil ich lân
die werden ritter unverzagt
schatzen swie in wol behagt.
nû ellenthaften helde guot,
habet unverzagten muot
und dienet durch den willen mîn
ieglîcher sîner vriundîn,
von der wîplîcher güete
er trage hôchgemüete!
durch der willen und durch mich
vlîze alsolher werke sich
daz si und ich und ir gewin
an hôchgemüete rîchen in.
wirt es hie guot von im getân,
alsolhen lôn sol er hân
von mir die wîle ich mac gelebn.
swer welle lîhen oder gebn,
der lâze hiute sehen an
ob er geheizen sî ein man,
und tuo alsô daz sîn name
an ritters lobe niht erlame.
tuot als ir ie tâtet,
helfet und râtet
den tumben die niht wîse sîn
daz sie tuon ir manheit schîn!
ir sult in allen zwîvel nemn,
zwîvel sol uns niht gezemn,
manlich ellen suln wir hân,
sô mac ez uns wol ergân!>
diz lobtens al gelîche dâ.
dô bereiten sie sich sâ
ieglîcher als er solde
und als er strîten wolde.
witze und manlîchiu kraft
was ander werden ritterschaft.
ir herre hôher wîsheit phlac
zem heile daz an im lac.
daz ander her lie sich gar
an sîn unzalhafte schar,
daz sie hâten sô vil brâht.
niht anders wart von in gedâht
wan ob sie elliu rîche
bestünden vîentlîche,
sie wolden doch an in gesign,
niemer sigelôs gelign.
hie was witze saelde kraft
an alexanders ritterschaft,
dort was menige und hôher muot
mit saelden doch niht sô behuot
daz sie nâch witzen kunden varn
und sich mit wer ze nôt bewarn.
sus was aldâ gescheiden
an disen scharn beiden
saelde und manlich getât,
ir dinc sich dar gezweiet hât:
unglîch getât sie tâten,
unglîchiu her sie hâten.
ritterschaft sol witze phlegn,
wan ieglich ellenthafter degn
muoz al sîne manheit lân
an saelde und an gelücke stân
und muoz mit witzen sich bewarn,
swenn er sol manlîche varn.
als tet alexander ie:
swaz er manheit begie
unde manlîcher getât,
daz tet er selten âne rât.
doch vrumete sîn lêre
und ouch sîn rât vil mêre
danne swaz deheiner riet
den er ze sînem râte ûz schiet.
dâ von was er an ritterschaft
ie saelic und sigehaft.
mit sînem rât aber wart
diu ritterschaft alsô geschart.
mit süezer manunge
der muotes rîche junge
schihte vil sarjande
der besten die er bekande,
einhalp in der letze
den rittern zeinem netze
mit lanzen und mit gêren,
swâ man sie wolde an kêren,
daz sie enthielten dâ mit kraft
der persen grôze ritterschaft
und ûzerhalp niht kaemen
ê daz sie vernaemen
ob in diu maere wolden komn
daz sie haeten sic genomn.
dô diz allez was geschehn
unser herre begunde sehn
die vînde zuo zin ûf daz velt
ir hütten slahn und ir gezelt.
dô begunden die geste
ir letze machen veste
und sich bereiten ûf den strît
die naht unz an des tages zît.
diu naht gie hin dô daz geschach.
als man ez dô tagen sach,
sich wâfente diu ritterschaft.
ir herren trôstlîchiu kraft
mante sie der werdekeit
diu in von art was an geleit
und hiez sie staeteclîche varn,
mit ritters kreften sich bewarn.
nû was den helden muotes fier
vil schiere ein pitît manschier
bereit mit ritterlichem site,
dâ sie ir kreften starcten mite.
nû sie kurzlîch âzen,
vil wênec sie dô sâzen,
ir ors verdahten sie vil wol
als man noch gein strîte sol,
sie bunden helm ûf houbet.
ob ir mirz geloubet,
sô wart mit ritterlîchen sitn
solch gebaerde niht vermitn
diu wol mit ellentrîcher kraft
gezimet werder ritterschaft.
diu êrste schar bereitet wart
als sie dâ vor was geschart,
der der vürste nîkanor
streit und solde strîten vor.
ir banier was gebunden an,
nâch der reit manec werder man
hin mit ûf geworfen spern,
die dô strîtes wolden gern.
ob ich die werden wîsen
dar nâch solde prîsen
als sie alle dô zimierten sich,
sô müestich sêre arbeiten mich
vürbaz lîhte dan ich kan.
mangen hôchgemuoten man
sach man wol gezieret aldâ.
dô kâmen die von persîâ,
nâbarzânes sie vuorte dar
mit manger werlîcher schar
vast ûf die letze und an die grabn.
dô wart der sturm mit zorne erhabn,
dô was der schal mit galmes dôz
von manc busîne harte grôz,
der was dô beidenthalben vil.
tambûre schellen seitspil
aldâ vil lûte erklungen
dô sie zein ander drungen.
man sach die schützen vor hin zogn
mit armbrusten und mit bogn,
die tâten grôzes schaden vil.
dô wâren an dem selben zil
mit wer vil strîteclîche
die helde muotes rîche
gegen der suochunge dâ
bereit und enphiengen sâ
die suchaer mit stichen grôz.
mit herten slegen her ûz schôz
von der mâzen gewer
der schützen werlîchez her,
sie drungen ûf sie vaste hin.
den ûzern nâhet ungewin,
daz warp der vürste nîkanor,
der streit den inren schône vor.
als sie zein ander wâren komn,
von den senewen wart vernomn
grôz schal und michel snurren,
die rotten sich dô wurren.
von dem geschütze dô verlôs
manger der sîn ende kôs,
der des tôdes kumber leit
ê daz er waer ze wer bereit.
die persen hâten schiere vlorn
so mangen degen wol geborn
daz sie den muotes rîchen
muosten balde entwîchen.
werlôs tâten sie sie gar,
wider zôch der persen schar
die mangen stolzen helt verlurn.
die mâzen werden sic erkurn,
biz timôdes zertrante ir kraft
mit der grôzen ritterschaft
diu von kriechen dar was komn,
der er sich het an genomn
durch den künc von persîâ.
der kam dô gedrungen sâ
den persen ze helfe dar
mit der untoetigen schar.
dô wart der strît mit zorne grôz:
dirre sluoc, jener schôz,
der stach, der hurte, dirre warf,
dô geschach swes man bedarf
ze vîentlîchen sachen.
diu sper begunden krachen
reht als ein dunre slüege dâ.
dô tâten die von persîâ
die mâzen ein teil wider dan.
dô zart ûf sich manec man
rîcher banier genuoc.
swaz man dô kleinoete truoc,
die sach man sêre schrôten
und vellen mangen tôten.
zênôs und perdikkas
ptolomêus und amintas
und der werde meljâger
brâhten dô mit vrecher ger
die schar der sie solden phlegn,
mangen ellenthaften degn
brâhten sie dar in den strît.
dô huop sich an der selben zît
angest arbeit und nôt,
dô lac manec degen tôt.
dô phlac der untoetigen her
alsô vîentlîcher wer
mit slegen und mit stichen
daz die vünf vürsten wichen
unz in von tessâlje kam
ein grôziu schar die benam
den untoetigen gar ir namn.
des namen wort muost an in lamn
wan ir dô sô vil erstarp
daz der name an in verdarp:
man sach sie an der selben stunt
vallen tôt erslagen wunt,
sie vielen tôt unzalhaft
von alexanders ritterschaft.
der kriechen dô vil tôt gelac.
der timôdes ein vürste phlac,
des hers vil wênec dô genas,
daz in den zwein rotten was
die der vürste timôdes
brâht und nâbarzânes.
sus was in dem strîte
des künges zesewiu sîte
enbloezet sêre und überritn,
überdrungen, überstritn
biz grôze schar und mangen helt
ze rehte manheit ûz erwelt
brâhte aristômêdes dar
in manger werlîcher schar
mit rîcher baniere vil.
dô wart an dem selben zil
von im sô grôz diu überkraft
daz alexanders ritterschaft
gegen der letze tet entwîch
und wâren doch sô ellentrîch
daz die vîende mit schadn
wurden an ir vluht beladn.
dô spranct alexander -
die rehten zît erkander
daz er nû rîten solde,
ob er den sînen wolde
helfe bringen an der zît -
alsus spranct er in den strît
mit grôzer wer vil manecvalt,
des manec werder man engalt
und ir lützel dô genôz.
mit vil manger rote grôz
dranc er und die sîne nâch,
gegen dem künge was im gâch.
oxiatres der vürste hêr
begunde sûmen sich niht mêr,
er kam gevarn vil schiere
mit maneger baniere
und mit rîchen kovertiuren,
der vrumte an den gehiuren
manec unverklagte klage
nâch der âventiure sage.
vil grôzer rotten brâhte der,
dô wart mit schild und mit sper
gekoufet ritters name alsô
daz manec herze was unvrô
daz dar vröuden rîche
kam vil vroelîche.
mit vil grôzer gezierde
kam der vünf schar diu vierde
die alexander het geschart
gegen den vînden ûf die vart,
dô krâterus und parmênîon
kouften hôhen ritters lôn
mit manger strengen arbeit.
dô was diu vünfte schar bereit
nâch wunsche werlîche gar,
die schar klêander brâhte dar.
dô kam der künec von persîâ.
die grôzen rotten drungen sâ
hin ûf daz wît gevilde,
durchstochen wart vil schilde,
durchslagen manec herter helm,
der hôhe stiebende melm
wart von bluote dô sô nâz, -
ob er stoup iht vürbaz?
daz müeste gar ein wunder sîn.
der liehten wâfenröcke schîn,
der glanzen schilde glesten
wart alsô von den gesten
verhouwen daz sie wurden gar
niht anders wan nâch bluote var.
dô wuohs angestlîchiu nôt,
dô lac manec degen tôt
der durch die dô gap daz lebn
diu hôchgemüete im solde gebn,
und diu im liebet und er ir
biz dar nâch minneclîcher gir.
nû was der degen vil gemeit
alexander bereit
mit geruoweten helden guot,
wol bereit und hôchgemuot
kêrte der muotes herte
hin umbe an daz geverte
dâ sîn her mit zorne vaht.
bûzevâl was wol bedaht
mit liehten decken îserîn,
sîn schilt, sîn helm gap liehten schîn
und ander sîn gereite gar.
ûf die rede kêrter dar
daz er mit niuwen helden sie
wolde verbarren hie
und ûf sie ze rücke komn,
ob aldâ würde ir schal vernomn
daz sie verzugen sô daz her
daz sie wânden daz iz wer
waere groezer und ir kraft
dan sie haeten ritterschaft.
diz geschach, ez wart getân.
sus hurte vast ûf den plân
der künec alexander,
mit wer die sîne vander,
die hâten unverzagte kraft,
sie wâren vrech und ellenthaft
die er mit im brâhte dar.
ze rücke gâhter ûf die schar
und hurte vaste in den gedranc,
sîn hant vil liute vlühte twanc.
dô er dar gedrungen kam,
sigelîchen prîs er nam.
alexander lûte schrei
ûf die schar, er trante enzwei
die rotten hie unde dort.
der orse schelm unde mort
wuohs aldâ, ir lac vil tôt.
niemen dâ vür sterben bôt
gevangen sich durch sicherheit:
der ritter iegelîcher streit
niuwan durch daz sterben,
wold iemen prîs erwerben,
dern warp iht des daz er genas.
der sarjande unmuoze was,
daz sie gein ir genôzen
mit herten slegen grôzen
und ouch mit stichen drungen.
nâch sige sêre rungen
die alexander hâte dâ,
die sarjande von persîâ
begunden vliehen, dise jagn,
dô muoste ir bestiu wer verzagn.
ouch began der ritterschaft
swinden werlîchiu kraft,
sie vielen dâ vür taurimunt
tôt und toetlîch ungesunt.
dô sanc ein vroelich wîcliet
alexander ûf die diet
daz sie vliehen lêrte dâ.
nû was aldâ von persîâ
komn ein stolzer degen wîs,
der bejagte dicke hôhen prîs
der ie mit mannes manheit
an den degen was geleit.
dô der alexandern kraft
sach üeben an der ritterschaft,
der ellenhafte wîse man
banier unde schilt gewan
diu ûz alexanders schar
ein ritter hâte brâht aldar.
dâ mite reit der muotes fier
undr alexanders banier
und streit gegen den sînen:
er lie dô vür sich schînen
daz er der vriunde waere.
der wîse degen maere
dranc hin dâ alexander hielt,
mit strîte vil unmuoze wielt,
und gap im einen solhen slac
daz er gegen dem houbte wac
durch den helm ûfz hersenier.
sunder twâl und harte schier
kêrte sich der künec dan
ûf den ellenthafte man.
der bôt im sîne sicherheit:
die was ze nemenne bereit
der künec alexander,
in eine veste sander
disen vürstlîchen degn
und hiez sîn gevangen phlegn.
sus kêrter wider in den strît,
er sluoc vil mange strâze wît,
er began mit zorne strîten.
diu enge im muoste wîten.
rûm in dem gedrenge,
wîte in grôzer enge
vrumet alexander dâ,
er vrumte an den von persîâ
daz mangen sterben lêrte.
die vîend er dô kêrte
und tet sie wider umbe dan.
von persîâ des künges man
begunden von dem wîsen
vallen und rîsen
sam daz loup in herbestzît,
sô der sumer ende gît.
dô lac von alexanders hant
manec werlich wîgant,
ein rîcher vürste atîzies,
der herzog reômitres,
satâzes von egiptô
dâ lâgen tôt vor im dô
und anders manec werder man
der sîn ende dô gewan.
sundermalîe
âne kumpânîe
und âne niuwen ritters list
der durch gewin nû vunden ist,
wart dô durch lobes prîs gestritn.
dô began mit ritters sitn
ieglich künc die sîne manen.
dô hiewen den wagenvanen
alexanders ritter nidr,
sie kêrten hin unde widr
und vrumten manec ungemach.
dô daz der persen künec sach,
er sazte sich mit sînem her
gegen den vîenden ze wer:
dô vielen von den gesten
die kranken und die besten,
alsô manec vrecher helt
ze rehter manheit ûz erwelt
daz sie wurden sigelôs
und unser her den sic erkôs.
dô wart an der selben stunt
dârîus sô sêre wunt
daz er verzagt an sîner kraft.
daz entsaz die ritterschaft
sô sêre daz sie schiere
druhten ir baniere
und sie begunden kêren,
ir ors daz vliehen lêren.
den persen was ze vliuhte gâch,
dô jaget alexander nâch,
sîn werdiu hant den sic erstreit.
swer dô sîne sicherheit
durch prîs versprach und sî niht bôt,
der muoste lîden sâ den tôt.
in begunde kumber nâhen.
slahen, toeten, vâhen
sach man die werden geste dâ
des künges her von persîâ.
dô alexanders manheit
mit sîner kraft den sic erstreit,
er hiez daz werlôse her
vâhen durch die unwer
diu dô was an in bejagt.
ir kraft was alsô gar verzagt
daz ir iegelîcher hie
entschumphiert unde vie
swie manegen er wolde.
von silber und von golde
geschach dô manec grôz gewin,
gevangen vuorten sie sie hin.
der mâzen her dô vil gewan,
dô der persen her entran
und âne wer dô ûf der vart
erslagen und gevangen wart.
dô unser degen wol geborn
hâte werden sic erkorn,
die sîne gâhten überz velt
in der vrouwen gezelt
dâ sie dannoch lâgen
und manger sorgen phlâgen.
sie viengen sie. der vrouwen her
hâte wîplîche wer:
weinen, wîplich ungehabe,
dâ nâmen sie die ritter abe.
ouch hâten sie vergezzen gar
der schoene die sie brâhten dar,
sie wâren jâmers rîche
und lebten klagelîche,
ir vriunde leit tet sie unvrô.
die ritter trôsten sie dô,
daz troesten was in gar ein wiht,
ez mohte sie getroestn niht:
sie lougenten gevangen wesn
ob der künec waer genesn.
lebt er, sô waere in gar verseit
ir ungemach, ir klage, ir leit.
des kunde in niemen trôst gegebn
daz sie geloubeten sîn lebn,
sô sêre vorhten sie der nôt
daz er waer gelegen tôt.
wer die vrouwen waeren
des wil ich iuch bemaeren:
sigisgambis diu guote
diu mit reinem muote
was gelobet unze dar
diu den rîchen künc gebar
dârîum von persîâ,
dîu hâte zwô ir tohter dâ
die in den selben jâren
vil lande vrouwen wâren,
die truogen minneclîchen lîp.
dâ was ouch des künges wîp
von persîâ diu künegîn
und ir kint daz den bluomenschîn
ob aller wîbe schoene truoc.
swâ man der besten dô gewuoc,
dâ was si diu eine,
diu eine in einer meine
des wortes sich erwerte
daz ez ir lop niht herte,
daz wort ist sus< enwære daz!>
ez machet snellez vil laz
wan ez mit vingerzeige
lebendez lop tuot veige:
diz wort was ir vil gar benomn,
ir lop was ganz und vollekomn.
rôsânen diu guote hiez
diu valschen prîs von ir stiez.
si was in süezer kiusche guot
schoene hövesch hôchgemuot,
des was diu edele guote
gelobt in hôhem muote.
ouch was dâ vrouwen mêre,
drî küneginne hêre,
der vater artâxerses was
von dem ich iu hie vor las.
ouch seit uns daz maere alsô
daz dâ gevangen waere dô
des künges bruoderwîp vür wâr
und eine ir tohter diu was klâr,
und ilîôn ein junger helt.
zeinem vürsten hâte erwelt
der rîche künec dârîus
des vater artâbâzus.
phanâbâzus des wîp was dâ
ein vürstinne von persîâ
gevangen und ein knabe ir kint.
memnônes drî tohter sint
gevangen nâch der wârheit,
von dem ich iu hân ê geseit
daz in dâ vor in kurzen tagn
alexander haete erslagn.
wer dô mê gevangen sî?
ellenthafter vürsten drî.
daz was aristôgitôn
der dicke erwarp vil hôhen lôn
an ritterlîchem prîse,
er was an manheit wîse.
der ellenthafte drôpides
und lechikrâtes.
ûz kriechen von atêne
hâten die vürsten zwêne
und ouch der dritte grôze schar
den persen brâht ze helfe dar.
der rîche pâusippus
und der werde mônîmus
und onômastôrides
und kallikrâtides
warn in babilônje
von lazedêmônje
den persen ze helfe komn
als ich von wârheit hân vernomn,
die wâren ouch gevangen dâ.
dô sant alexander sâ
den vrouwen ze trôste dan
einen vürsten sînen man
der was mitrênes genant,
( ir sprâche was im wol erkant)
und hiez sagen in alsus
daz der künec dârîus
entrunnen lebende waere.
ouch hiez er in ze maere
von wârheit endelîche sagn
wer dô was lebend und erslagn,
wan im die herren und daz lant
und diu sprâche was erkant.
als er den herren sante hin,
im kam ein zwîvel in den sin,
er vorhte daz der vürste wîs
begienge lîht den unprîs
daz er sie niht trôste
und von ir sorgen lôste.
er sante lêônâten dar,
der sold in die wârheit gar
künden und sie troesten wol
an ir klagelîchen dol.
der vürste gâhet überz velt
hin vür der vrouwen gezelt.
er und ander sîne man
truogen dannoch harnasch an.
dô sie erbeizet wâren,
dô wart daz gebâren
von den vrouwen jaemerlich,
sie versâhen alle sich
sie müestn lîp unde lebn
alrêrst verliesen unde gebn,
sie gedâhten daz der wîgant
darumbe waere aldar gesant.
in daz gezelt er dô gie.
dô vielen vür in ûf ir knie
die vrouwen jâmers rîche.
dô sprach vil trûreclîche
des rîchen künges muoter
< saelec herre guoter!
durch dînen saelderîchen lîp
êr an uns elliu werdiu wîp
und lâz uns leides niht geschehn
unz wir den künec sehn,
mîn kint dz wir verloren habn.
unze daz wir in begrabn,
sô tuo denne sâ zehant
darumbe dû sîst her gesant!>
dô vrâget er der maere
mitrênen den diutaere
wes diu küneginne wert
an in haete dô gegert.
dô seite er im daz si sprac,
wes si bat und wes si jach.
dô hiez er der vrouwen sagn
ir sun waere niht erslagn,
er waer lebende komen hin,
und waer er ûf ir ungewin
niht dar gesant noch durch ir leit:
swaz sie haete werdekeit
dar gehabt und êren,
daz wolde ir gerne mêren
der künec alexander dô.
des wart diu küneginne vrô,
gestillet wart ein teil ir klage.
dar nâch an dem andern tage
enbôt der künc den vrouwen,
woldez ir wille schouwen,
er wolde sie vil gerne sehn
möhtez mit ir gunst geschehn.
sie enbuten im sie waerens geil
und haetenz vür in michel heil.
dô reit der werde reine
von den sînen eine
mit ephestiône dan
sînem heimlîchesten man,
in der vrouwen pavelûn.
dô zeiget in ein spadûn
der künegîn sînr vrouwen.
dô sie begunden schouwen,
er geviel in ie baz und ie baz,
vil minneclîch âne haz
jâhens im vil werdekeit.
den edelen vrouwen vil gemeit
er ouch vil hôhes prîses jach.
dô er die juncvrouwen sach,
er minte sî vür elliu wîp,
im nam ir minneclîcher lîp
ûz sînes herzen sinne
allr werder wîbe minne.
swie selten er doch ie gerite
dâ man nâch wîbes lône strite,
ich waene er waere als ernesthaft
als an sîner ritterschaft:
sîn rittertât, sîn arbeit
die er in mangem strîte leit,
geschach niht anders wan durch guot,
durch werndez lop, durch hôhen muot
und vil selten durch diu wîp.
er minte ir minneclîchen lîp
wan si sô gar nâch wunsche was
des wunsches schoene ein spiegelglas.
vil holdez herze truoc er ir
in staeter liebe, in süezer gir.
galt si des niht, des tet ir schame
und ir magtuomlîcher name.
sît daz er was an ritterschaft
sô wert und ouch sô ellenthaft,
an tugenden alsô wîse,
sô hôchgelobt an prîse,
sô reiner zuht und milte vol,
sô sold er geniezen wol
sîner saelde und sîner tugent,
sîner hôchgelobter jugent
umb elliu wîp und umbe die
von der ich hân gesprochen hie,
der er nû saz mit willen bî,
daz würd er ungemüetes vrî:
swâ der tugende rîche man
nâch wîbes lône in minne bran,
prîs und rehter tugende kunst
sol bejagen wîbes gunst,
swer sô nâch saelden werben kan
daz im diu saelde ir namen gan.
dô sprach die alte künegîn
< alexander, herre mîn,
dû heizest uns die vrouwen dîn,
dû maht wol unser herre sîn,
wan dir die gote hânt gegebn
ein alsô saelderîchez lebn
daz dû betwungen hâst den man
dem êre niemen an gewan.
daz hât dîn zuht gedienet wol
diu weltlich êre erwerben sol.
wir solden êre bieten dir,
daz waer wol unsers herzen gir,
wan daz wir gevangen sîn:
wir gern der genâden dîn.
wir wâren wirtîn hie genant
dô wir kâmen in diz lant.
nû heizen wir hie geste.>
dô sprach der muotes veste
< ir sült hie mit vröuden wesn,
ir müget wol bî mir genesn,
wan iu benamen leides niht
von den mînen geschiht.
ir mügt in dem gewalte mîn
noch wirtîn geheizen sîn,
swes ir gebietet über mich.
wan swaz ir welt, daz wil ich
an êren und an guote.
ich wil in mîner huote
hân iuwer guot und iuwern lîp.>
nû hâte aldâ des künges wîp
ein sünelîn was sehs jâr alt,
schoene, zühtec, wol gestalt,
wîs in kindes kintheit.
den juncherren vil gemeit
sazt alexander ûf die schôz.
sîn zarten was mit liebe grôz
daz an dem wol gebornen knabn
zühteclîche wart erhabn.
er sprach ze ephestiône
< umb die rîchsten krône
diu ûf der erd ist erkant,
hân ich genuoc rîchiu phant,
ich gihe des und ist mîn wân,
der künec lieze niht verstân
die edelen vruht, diu süezen kint
diu hie bî mir gevangen sint.>
sus sprach der tugentrîche
mit vröuden heimlîche.
urloup nam der künec dâ,
ûz dem gezelte gienc er sâ
und hiez die werden vrouwen gar
und alle die gevangen schar
in guote vesten vüeren hin.
nâch ir rehte schuof er in
ir belîben, ir gemach.
der vrouwen man wol phlegen sach
und alsô höveschlîche
daz es der tugentrîche
muoste hân gemeinen danc.
sîn zuht in ie des besten twanc.
ouch phlac man der gevangen wol
und baz dan man ir phlegen sol.
wie vil der waer über al,
daz kündet uns des maeres zal:
sehzec tûsent helde guot
die wâren alsô hôchgemuot
daz sie manheit kunden phlegn.
in dem strîte was gelegn,
sô unser her den sic gewan,
z orse zehen tûsent man,
hundert tûsent sarjande,
die hâte ûz mangem lande
dârîus in sîner schar
gesamenet vil wîte dar.
die andern dannen wâren komn
vlühtec als ich hân vernomn.
der was ouch manger worden wunt
dem des tôdes ungesunt
sît diu selbe wunde erwarp
daz er von der wunden starp.
niemen was aldâ genesn
der die wâren dâ gewesn
wan der in der vluht genas
oder dô gevangen was.
nû hôrtet ir mich ê wol sagn
daz gerne wolde hân erslagn
ein ritter alexandern,
dar nâch überwandern
und hiez in wol behalten
und sîn gevangen walten.
den besanter vür sich dô,
vrâgende sprach er alsô
< sag an, des ich vrâge dich,
durch waz dû woldest slahen mich!>
dô antwurt er der rede alsus
< dô gehiez mir dârîus
er gaebe mir die tohter sîn,
naeme ich dir daz lebn dîn.>
dô sprach der degen rîche
vil gezogenlîche
< nû hân ich tohter und sîn wîp
und ein wîp diu sînen lîp
dirre welte gebar,
vil bî die vürstinne gar
die in sînem lande sint,
muoter swester niftel kint.
dar zuo hât bejagt mîn heil
sîner rîcheit grôzen teil
und vil sîner lande.
sît ich nû hân ze phande
daz er aller liebest hât,
sô soltû tuon als ez nû stât:
var enwec und diene im dâ,
heiz in dir lônen anderswâ,
wan dû muost nû sîn entwert
des dû ze lône hâst gegert!>
er lie den ellenthaften man
mit grôzer gâbe von im dan.
der gâhete ze lande widr
und marcte den herren sidr
wie tugentrîch er waere
und gar unwandelbaere.
alexander hiez besehn
waz im schaden waer geschehn,
dô der strît was gewesn,
wer dô waer tôt odr genesn.
die daz aldâ besâhen,
von wârheit sie des jâhen
daz vünfzec und hundert,
ze manheit ûz gesundert,
der helde die dô z orse stritn
werlîche nâch ritters sitn,
wâren dô gelegen tôt
in der vîentlîchen nôt,
sarjande mê dan zwir sô vil.
dô hiez er an dem selben zil
die sîne legen an der stat,
die tôten er begraben bat.
swaz man bî den wunden vant,
die hiez er heilen al zehant
und in die stete vüeren dan,
die vîend und sîne man.
dar nâch begienc er sînen gotn
als ez was sîner ê gebotn,
eine grôze hôchgezît.
mit guotem willen sunder nît
ophert er groezlîche
vil manec opher rîche.
als er gediente sînen gotn,
im wart von wârheit enbotn
daz durch behalten gein dâmas
des künges hort gesendet was
und sîne kleinoete gar.
dô sant er vil balde dar
parmênîônen sînen man.
der huop sich werlîche dan,
bereit in manlîcher wer
und mit im sîn sunderher
daz er hâte in sîner phlege.
dô hôrter sagen ûf dem wege
daz der künc von persîâ
bî den soumern haete dâ
ze wer vil ellenthafter schar,
des wolde er niht genenden dar.
er was sô werlîche
niht komen in daz rîche:
er müeste groezer helfe hân
sold er die geste dô bestân.
nû er in solhem zwîvel was,
der burcgrâve von dâmas
sant alexander einen botn
und swuor im des bî sînen gotn,
wolder ime senden dar
ze wer eht ein gevüege schar,
er wolde im antwürten sâ
des künges hort von persîâ.
mit sîner hantvest er daz swuor.
parmênîône widervuor
der bote der im was gesant.
die brieve las er al zehant
und sach waz dran geschriben was.
dô kêrter balde gein dâmas,
nâch der âventiure sage
kam er an dem vierden tage
vür die veste dar gerant.
dô daz der burcgrave bevant,
des künges kameraere er bat
daz sie vuoren von der stat,
sie möhten niht belîben dâ.
dô ruomten sie die veste sâ.
dô kam parmênîôn geritn
mit sô vîentlîchen sitn
daz sie haeten wol gesworn
sie müesten alle sîn verlorn.
sie liezen ledec ûf dem wege
die soumer stân und ûz ir phlege,
und was in ze vlühte gâch.
parmênîôn in jagte nâch.
sie wurfen al gelîche ir habe
durch lîhterunge von in abe,
daz sie möhten komen hin:
dô wart gewunnen grôz gewin.
dô der ellenthafte man
daz grôze guot an sich gewan,
diu stat ergap sich im ouch dô,
des wart sîn gemüete vrô.
der persen her gevangen wart
vil nâch gar ûf dirre vart,
daz ê von in gein dâmas
besant mit den soumern was.
parmênîôn dem künge enbôt
wie er ân aller slahte nôt
gewan die stat, die schar, daz guot.
der edel künec hôchgemuot
enbôt im hin wider dan
daz er als ein wîser man
solde rîlîche lebn,
beide lîhen und gebn
daz er mit sîner milten hant
gewinnen möhte an sich diu lant.
er gebôt im und bat
daz er behielte wol die stat
und er mit êregernder hant
an sich gewunne wol diu lant,
wan diu êregernde hant
betwinget liut unde lant:
mit gerne gebenden handen
gesigt man an den landen.
swem ze gebenne stât diu hant,
hât er rîcheit und lant,
der mac mit gebenden handen
gesigen an den landen.
sus endet sich der êrste strît
den dô bî der selben zît
der künec alexander streit,
als diu ander âventiure seit,
mit einem dem rîchsten man
der künges namen ie gewan.
daz ander buoch sich endet hie.
nû vernemet vürbaz wie
daz dritte buoch sich hebet an
von dem edelen wîsen man! iii
lanc rede in tumber sinne wîs
maht den tumben selten wîs,
kurz rede in süezer wîse
die prîset ie der wîse,
mit kurzen sinnen wîsen
lânt sich die wîsen wîsen.
die tumben dicke wîsent
dô sie die wîsen wîsent.
swer kan begrîfen langen sin
mit kurzen worten, des gewin
mac wol mit rîchen sinnen
der wîsen lop gewinnen.
kund ich nû mit den wîsen
langes lop geprîsen
mit kurzen worten, daz tet ich
sô daz ez waere lobelich,
an nâhegênder süeze sleht,
an gemeinen worten reht
und an urdruz kleinvüege,
swâ man ez z ôren trüege
den êregernden lîben,
mannen und wîben,
als mîner meister maere gebent
den kurzwîle die sô lebent
daz in âne maere
diu wîle lenger waere, -
sô spraechich baz und waere es vrô.
nû ist den maeren niht alsô
daz man kurzlîche
müg âventiure rîche
mit wîslîchen sachen
kurz und guot gemachen,
wan disiu âventiure
hât alsô mange stiure
von mislîchen buochen,
swer ir nâch wil suochen,
der mac des diu wârheit giht,
dâ von gescheiden gâhes niht.
wan swer daz vollevüeren wil
von anegenge unz an daz zil
wie alexanders miltiu hant
in zwelf jâren elliu lant
betwanc ûf der erde
ze dienstlîchem werde,
der muoz den maeren vollevarn
und die wârheit sô bewarn
daz beide der und der iht jehe,
der die latîne geschriben sehe,
ez sî ein künstelôser man
der des getihtes êrst began.
dâ von mac ich niht komen abe
des ich mich an genomen habe,
daz müeze werden vollebrâht.
geschiht ez als ich hân gedâht,
daz mir got gan sô vil tage
daz ich diz maere vollesage,
swer ez vernemen danne wil,
dem sagich urliuge vil
und ie doch dar under
sô manecvaltiu wunder
daz deweder sît noch ê
nie man gelas von wundern mê.
daz sagen wir ze sîner zît
sô der wunder zît gelît
und uns diu âventiure dar
bringet mit ir maeren gar.
daz lâzen hie! ich wil iu sagn
wie er betwanc in sînen sagn
den rîchen künc von persîâ
und manec rîch anderswâ.
swaz im gelückes wirt beschert,
swar er von dem strîte vert,
daz sagich iu, wil iu gezemn
daz irz geruocht von mir vernemn.
dô dârîus der rîche man
von dem strîte kûme entran,
in eine veste was er komn,
als ich diu maere hân vernomn,
diu was geheizen onchâ.
vier tûsent kriechen wâren dâ
werlîche gesîn durch in.
als er entran zuo zin dâ hin,
sie verbunden sîne wunden.
als er wart dô verbunden,
über eufrâten er reit.
den gedanc er niht vermeit
er gedâhte an mange grôze schar
diu mit im ê was komen dar,
und wie er hâte dô verlorn
mangen degen wol geborn,
und wie er in daz rîche
kam gewalteclîche
und er nû eine ân alle diet
vlühtec von dem lande schiet.
von ungemüete er sêre schrê
< wê mir vervluochten man, owê!
wê daz ich ie wart geborn!
wie hât der himelische zorn
die gote ûf mich gereizet sô
daz sie mich machent sus unvrô!
wê! war ist mîn saelde komn?
wer hât sî mir hin genomn?
wer hât verderbet sus die hant
diu dâ her vil manec lant
in mîn gebot betwungen hât,
daz ir heil alsus zergât?
diu dinc stânt, daz ist mir kunt,
elliu biz an eine stunt:
daz hundert jâr gesament ist
daz zergât in kurzer vrist,
eines tages ende hât
daz manec jâr wol vür sich gât.
ez ist an mir worden schîn.>
dô trôsten im die klage sîn
die sîne und bâten in alsô
daz er niht waere sus unvrô
und er sich selben trôste,
sîn herze ûz sorgen lôste.
niht vil vervienc in dirre trôst,
er was von sorgen unerlôst.
jegelîchiu swaere gît
ungemüete zaller zît,
unreht gewalt leit und nôt
ist manlîcher vröuden tôt.
sô daz mit überkraft den man
beginnet sêre dringen an
und mit im hertet lange,
so gedenkt er im vil ange
wie er sich dâ vor gener
und sich der arbeit erwer
alsus geschach ouch dârîô,
sîn unheil machtin als unvrô
daz er gedâhte in indîâ
suochen des künges helfe sâ,
der was pôrus genant.
über indîam daz lant
sach man in dô bî den tagn
der drîer lande krône tragn,
des mitteln und des êrsten,
des rîchsten und des hêrsten.
daz sint driu diu rîchsten lant,
ieglîchez indîâ genant,
diu wâren pôren undertân.
man sach von im krône hân
mangen künec der sîn lant
muoste zinsen sîner hant.
durch den hêrlîchen gewalt
den ich hân vor im gezalt,
hiez im der künc von persîâ
künden sînen kumber sâ
den er mit arbeitlîchen sitn
von alexander haet erlitn,
und mant in sîner hêrschaft
und sîner küneclîchen kraft
umb die vil grôzen arbeit
die er von alexander leit.
der künc enbôt im al zehant
daz er wolde sîn gemant
sîner arbeit alsô
daz er müeste wesen vrô.
dâ bî hiez er im machen kunt
er waere siech. würd er gesunt,
er kaeme im helflîche dar.
ouch müester beiten vremder schar
diu im entsezzen waere,
er hülfe im sîne swaere
sô rechen daz er niemer mêr
von alexander herzesêr
getrüege mit gewaltes wer
noch von deheines mannes her.
alsô dârîus vernam
die botschaft und si widr kam,
sô sêre vröute in dirre trôst
daz er wânde sîn erlôst
von klagelîchem pîne.
dô rieten im die sîne
daz er mit sînem guote
nâch alexanders muote
lôste die gevangen dan,
die vrouwen und sîne man.
dô enbôt der künec dârîus
dem wîsen alexander sus
daz er gedaeht an sîn heil
und des von gote waere geil
und sich genüegen lieze
des man ze mâze hieze,
und mit gevüegen dingen
im von im lieze bringen
die haften die von sîner kraft
in sînen handen waeren haft.
ze lôsunge bôt er im dâ
vil grôzen hort der in baktrâ
dâ vor mit grôzer rîcheit
im zesamene was geleit,
und daz im waer undertân
sûsîs und terrâ mâdîân
daz rîche künecrîche,
daz solde ledeclîche
der hôchgemuote junge
hân ze lôsunge
umb swester, muoter und sîn wîp
und umb der juncvrouwen lîp
sîner tohter diu dô was
an staete ein staeter adamas,
der wunsch an wîbes klârheit
als ich ê hân von ir geseit,
und swenne er die gevangen schar
erlôste von ir banden gar,
daz ime wesen solde
swie er im wesen wolde:
sîn vriuntschaft waere im unverseit,
sîn vîentschaft waer im bereit
und weders er geruochte
und als ers an in suochte.
nû was ich als ich hân vernomn,
der künec alexander komn
ze sûrîen in daz lant.
der vürste den ich hân genant,
parmênîôn mit dem ê was
der roup gewunnen ze dâmas,
der kam im werlîche.
daz selbe künecrîche
bevalch er dem helde balt,
sô vil es twanc dô sîn gewalt.
ein künec der hiez strâtô
der phlac einer insel dô
diu was genant aradus.
uns seit diu âventiure sus
daz sich daz selbe rîche dâ
ergaeb alexander sâ.
strâtô der rîche man
von dem lande kûme entran,
den vertreip parmênîôn.
in der stat ze mâratôn
der künec alexander lac,
mit triuwe er hôhes muotes phlac
ûf rîcher werdekeit gewin.
dô kâmen im die brieve hin
des küneges von persîâ.
dô die gelesen wurden dâ,
die mâzen wâren alle vrô,
sie rieten al gelîche alsô
der suone solde in wol gezemn,
die lôsunge solder nemn.
der künec alexander sprach
zen boten dô diu rede geschach
< ir herren, saget! wîset mich!
hât des iuwer herre sich
berâten daz er sich ergebe
und nâch mînen hulden lebe,
sô habe ich sîne rîcheit wol
daz ich im des niht danken sol:
ez sî im liep oder leit,
mir ist sîn hêrschaft unverseit
ob er wil betwungen wesn.
wil abr er von mir genesn,
sô wer er sô manlîche sich
daz er mit gewalte mich
twinge gar des willen sîn
und nem ân den willen mîn
mit kreften mir die haften abe
und sîn hêrschaft die ich habe,
die ich den sînen an ertwanc.>
diu rede was âne ir aller danc,
ir ieclîcher ez widerriet.
von den vürsten er dô schiet
an sîn heimlîche.
der edel werde rîche
hiez sîne brieve schrîben dô
von persîâ dem künge alsô
< rîcher künec hêre!
dû solt dich niht mêre
der unvuoge lân gezemn
daz dû dich des sülst ane nemn
dîn kraft an hêrschaft sî sô grôz
daz niender lebe dîn genôz.
dû gîst ie künges namen dir
und vergizzest des an mir:
sô dû künec heizest dich,
sô heiz ouch einen künec mich,
wan mir mîne hêrschaft
niemen wan der gote kraft
genemen kan sô gar als ich
vertrîbe und hân vertriben dich!
dû biutest mir liut und lant
diu betwungen hât mîn hant,
und wilt mir geben daz ich hân.
diz ist ein wunderlîcher wân
daz du gîst daz dich niht bestât.
ich tuon dir den besten rât,
wellest dû die haften dîn
loesen von den banden mîn,
sô rât ich daz dû dich ergebest
und niht sô lange gegn mir strebest.
wiltû herren heizen mich
und an mich ergeben dich
und von mir diniu rîche hân,
sô wil ich dich lân bestân
und wil mit guoten triuwen dir
baz tuon dan dû taete mir
dô dû woldest ûf mîn lebn
dîne tohter hân gegebn.
dês wâr, daz was unritterlich!
wellestû wol rechen dich,
sô soltû rechen dich an mir
als ich ez ane vâhe an dir.
ich tuon dir mit untriuwen niht:
swaz leides dir von mir geschiht,
daz krenket niht die triuwe mîn.
des willen wil ich iemer sîn.>
alsus sant er gen persîâ
die boten mit den brieven sâ
und gap in groezlîche,
si wurden guotes rîche
des sie von im nâmen.
dô sie hin wider kâmen
und ir herre vernam
dise botschaft dô sie kam,
er wart vil trûrec und unvrô.
die sîne rieten im dô
daz er enphenge sîniu lant
gar von alexanders hant.
dô sprach der degen staete,
ê daz er daz taete,
er wolde ê kint vriunde und wîp
verliesen und sînen lîp.
der muot den sînen widerstuont,
sie tâten alse die noch tuont
die gerner wolden sich ergebn
dan mit urliuge lebn.
nû was des wunsches saeldenbarn
gen sîdônje gevarn.
in fênîzen daz lant
wart tersippe gesant,
der betwanc mit kreften dô
die werlîchen biblô.
in sîdônje ouch künec was
strâtô von dem ich ê las,
der parmênîône entran
dô er im daz lant an gewan.
nû ieschens einen andern
künc an alexandern.
dô jach er güetlîch âne haz
daz er gerne taete daz.
er gebôt ephestîône
daz er des landes krône
selbe haben solde
odr geben swem er wolde,
der in dar zuo dûhte guot.
der wîse degen hôchgemuot
hâte vriund in der stat
den er gebôt und sie bat
daz ir einer naeme
die krône ob sie im gezaeme.
die versprâchenz alle
mit gelîchem schalle,
wan es an der stunde
dem andern niemen gunde.
waer es gewesen einer vrô,
sô vüeget ez sich ie alsô
daz ims die andern gunden niht,
als ez vil dicke geschiht
swâ ebenhuizeclîche
vriunt sint gelîche rîche
und en ander ebenhêre:
swâ dô guot und êre
ir einem geschehen sol,
daz tuot dem andern selten wol.
sie brâhten niht inne
ein ander der unminne
wan daz iegelîcher jach
er waer der hêrschaft ze swach.
als er verteilte denne sich,
sô was ez niht unzimelich
ob er den andern ouch versprach
den er ungerne hoehen sach.
nâch der krône den strît
schiet under in gemeiner nît.
ephestîôn der vürste sprach
< nû sihe ich daz ich nie gesach
bî allen mînen zîten,
ie nâch êren strîten
und beide lîp unde lebn
nâch guot an die wâge gebn,
daz sich ich versprechen hie,
ich waene daz geschaehe nie.>
sie sprâchen< lieber herre wert,
dirre krône niemen gert
wan des geslehte ist ûz erkorn
von künges künne geborn.> -
< nû saget obe iu wone bî
iemen der des künnes sî!>
sie sprâchen al gelîche alsus
< jâ herr, abdalôminus
derst von geburte ein herre,
deist sîner vruht niht verre,
der ist an hêrschaft und an habe
so ganzlîche komen abe
daz er in grôzer armuot
ist armeclîchen âne guot.>
dô was im nâch dem armen gâch,
sie zogeten dem herren nâch
dâ er einhalp an der stat
sînen krûtgarten jat.
sie liefen alle nâch im hin
und kuren zeinem herren in.
dô sie hin zim kâmen
die in ze künge nâmen,
grôz was sîn unmuoze.
sie sprâchen nâch dem gruoze
< wasche dich, vil saelec man!
nim dich des künecrîches an
und habe staeten künges muot!
wis vor valscheit behuot
und habe senfte künges site,
dâ êrest dû dîn rîche mite!>
dô versach er sich an in
daz sie waeren âne sin
und durch ir unzuht gebot
an in kêrten disen spot.
er sprach< lât iuwer spoten sîn!
warumbe spotet ir mîn?>
sie sprâchen al gelîche dô
< herre guot! ez ist niht sô
als dû an uns nû waenen wilt.
ob dich der hêrschaft niht bevilt,
sô nim des rîches gewant!>
dô wuosch er sich sâ zehant.
man sazte im ûf die krône,
mit ephestîône
kam er mit küneclîchen sitn
hin ze hove dô geritn.
dô diz maer über al
in dem künecrîche erschal,
sie sprâchen smaehlîche alsus
< ist ablôminus
nâch küneclîchem orden
landes herre worden,
der in solher armuot
was unwert und âne guot,
swer denne grôzer êren sich
vür nimt, daz is unsaeleclich.
ez ist ein grôziu missetât
und ein unwîslîcher rât
daz sîn ze küneg ist gegert
vür mangem grôzen vürsten wert.>
diu rede, der vil grôze nît
wart von nîd alsô wît
daz ez vür alexandern kam.
als er den widerrât vernam
daz er niuwan durch nît geschach,
zuo dem niuwen küng er sprach
< herr! ich wil râten dir
daz dir wol stât. nû volge mir!
wis maezec und staete,
minne getriuwe raete!
wis wol gezogen, senfte, guot
und habe doch werlîchen muot!
phlic übel unde güete,
wis übl und diemüete
dar nâch als man suoche an dich.
der site ist dir vil lobelich.
dû solt im iemer me gestân
der dir êre hât getân,
und wis im gerne niuwe
mit staeteclicher triuwe!
mich wundert wie dû âne guot
dîne grôzen armuot
ie dâ her in dînen tagn
mit solher zuht mohtest vertragn.
ich wil ûf mîne triuwe jehn
daz man niht an daz guot sol sehn,
man sol die tugent sehen an
der mit triuwe phligt ein man.>
dô sprach der künec hêre
< herre, dîner lêre
die dû hâst gerâten mir,
wil ich gerne danken dir
und wil ir volgen zaller zît,
der wille mir nâhe lît.
herr, ich wil antwürten dir
des die gewundert hât an mir,
daz ich grôz armuot
als gar moht âne guot
ie vertragen und vertruoc.
dâ dûhte mîch dô gar genuoc
der vil armen habe mîn
als ich sî habende mohte sîn,
wan er ist niht ein tumber man
der armuot wol verdulden kan
und alsô mit armuot vert
daz er armuot mit êren zert.
ich waene daz mir töhte
daz ich vertragen möhte
mit solher wirde rîchez guot
al ich vertruoc mîn armuot,
und alsô witzeclîche
kunde hân mîn rîche
mit den êren, als ich leit
mîne grôzen armekeit.>
dô dûhtes al gelîche
daz er witzeclîche
sich aldâ haet bedâht
und sîne rede vollebrâht.
im lêch der künec sâ zehant
beidiu stat und daz lant
des strâtô vil mangen tac
dâ vor gewalteclîche phlac.
des wart er herzeclîche vrô.
bî dem êrsten lebter dô
als dem in troume guot geschiht
und es dar nâch enphindet niht,
sus wând abdalôminus
daz im getroumet waer alsus,
unz im diu wârheit waer erkant
und er des guotes rehte enphant.
sît kund er geleben wol
als ein künec leben sol
nâch küneclîchem muote
mit êren und mit guote.
dô diz alsus geschehen was,
der rîche vürste amintas
kam ze trippele gevarn
und wolde selbe daz bewarn
daz im diu stat würd undertân.
er hâte des vil guoten wân,
swaz er betwunge, ez waere sîn.
daz tet er mit gebaerden schîn.
als er trippel gewan,
gen kipper vuor der wîse man
und twanc ouch sî mit sîner hant.
dô vuor er in egiptenlant
und sagete ze maere dâ
wie der künec von persîâ
was krefteclîchen überstritn,
von alexander überritn,
und wie satâzes was erslagn
der dâ solde krône tragn,
und wie der persen hêrschaft
waer gelegen und ir kraft
und wie sie an den stunden
an den persen vunden
deheinen helflîchen trôst,
wolden sie sîn von sorge erlôst,
daz sie im gaeben sicherheit
daz im ir dienest waer bereit.
des râtes antwurten alsô
die herren von egiptô,
sie sprâchen< wie ist der genant
des gewalteclîcher hant
sich zinsent elliu rîche?
dem süln wir dienstlîche
helf unde sicherheit
zallen zîten sîn bereit.>
sie gâben sich dem helde balt
durch alexanders gewalt.
dô vuor er dannen sâ zehant
in pelûsium daz lant.
der des landes solde phlegn,
der was ein ellenthafter degn,
mâzâzes was er genant.
dârîus hâte in dar gesant
mit einem werlîchen her,
der phlac mit manlîcher wer
des landes unz er lebende was.
den ersluoc amintas
und sîne helfaere gar
die mit ime kâmen dar.
dô besamenten sich sâ
des künges man von persîâ
die von dem strîte entrunnen,
sie wolden hân gewunnen
wider in ir herren hant
sîniu verlorn lant,
sie huoben sich mit grôzer kraft
mit vrechen helden werhaft
gen lîdiâ dem lande.
mit mangem wîgande
sold es antigonus der degn
durch alexanders bete phlegn.
der vürste muotes rîche
phlac es vil krefteclîche.
den suochten mit gewalte dar
die vürsten mit vil grôzer schar.
die vienc er all und ersluoc.
alexanders saelde truoc
allenthalben schône
des gelückes krône,
er hât ie daz groeste heil
und der saelden besten teil,
des kunde in an den zîten
niemen überstrîten:
swaz in kumbers ane gie
dâ von schiet er mit saelden ie.
als ich die âventiure las,
ein ellenthafter vürste was
aristômenes genant.
dirre degen wît erkant
vuor mit schiffen über mer,
er vuorte ein krefteclîchez her
gen ellespont des amphotêr
phlac der rîche vürste hêr,
und wolde dem wîsen man
mit kraft daz lant gewinnen an,
daz stuont ze wer in sîner phlege.
dô sie wâren ûf dem wege
des vil wilden hôhen mers,
dô kam vil schiffe eins grôzen hers
ûf die von persîâ dort her,
daz der vürste antipater
alexander sande
von sînem eigenlande,
daz her von mâzedônje kam.
als ir herzog vernam,
daz vor in ûf dem mer aldâ
vüeren die von persîâ,
zuo zin hiez er kêren dar
mit sîner wol bereiten schar
und machete daz grôze her
sô werlôs und âne wer
und sluogen den sie wolden
und swen sie vâhen solden,
daz her gevangen schiere wart.
die kriechen wurden ûf der vart
guotes alsô rîche
daz sie vil rîlîche
ze helfe ir herren kâmen
mit guote dazs im nâmen.
ein vürste hiez farnâbâzus
den der künec dârîus
mit hundert schiffen sande
von lande ze lande
die der degen wol geborn
hât in den zîten wol verlorn,
daz er die wider twunge.
der ellenthafte junge
vuor als in der künec bat
ze kîun in die rîche stat.
siphne und andre dô gewan
farnâbâzus der werde man,
diz wâren rîchiu einlant.
der vürste gap mit sîner hant
vil küneclîches soldes.
silbers und goldes
brâhter mangen soumer dar,
dâ mite warp er grôze schar
und tet sider langiu zil
alexander leides vil
und liez an den sînen
grôze triuwe schînen
durch sînes herren ungemach
daz im ê von im geschach.
hâgis ein rîcher künec hiez
den alexander ê verstiez
von lâzedêmônje,
der vuor gen mâzedônje
und reit gewalteclîche
in dem künecrîche
mit ahte tûsent helde guot
die wâren werlîche behuot,
den künec alexandern an.
daz werte antipater sîn man,
er sluoc den rîchen künec sidr
und vertreip die sîne widr.
nû lac der wandels vrîe
alexander in sûrîe,
daz selbe künecrîche
was im eigenlîche
vil gar worden zinshaft
wan tîre al eine diu mit kraft
was ritterlîche wol besat.
ez was diu rîcheste stat
diu dô in sûrîe lac,
alsô grôzer wer si phlac
daz si niemen vorhte dô.
nû hâte ez sich gevüeget sô
daz sie hâten dô zehant
alexander gesant
eine krône guldîn,
diu sîn prîsante solde sîn
durch minne, niht durch rehten solt:
sie wâren im durch vriuntschaft holt
und niht durch sîne vorhte.
disiu rede entworhte
der stat des herren vriuntschaft.
der degen wîs und ellenthaft
sprach zen boten sâ zestunt
< tuot den von tîre von mir kunt
daz ich in in vil kurzem zil
durch gebet dar komen wil
unz ich gopher mînen gotn!>
dô sprâchen tîraere botn
< herre, wiltû komen dar,
man lât dich noch dîne schar
niender komen in die stat:
vür die vest ist gesat
ein betehûs, dâ soltû
dînen got an beten nû.
man lât dich in die stat niht komn,
alsô hân wir den rât vernomn.>
alexander dô sprach
dô disiu rede alsus geschach
< sint sie danne alsô gemuot
daz sie wern mir mîn guot?
sie müezen mich benamen lân
zuo zin rîten und gân,
ez sî in liep oder leit,
und müezen wesen mir bereit
dienstes nâch dem willen mîn.
ist ez in leit, ez muoz doch sîn!>
die boten sprâchen vürbaz mê
< herre mîn! sie duldent ê
swaz in mac von dir geschehn,
ê daz sie dîn ze herren jehn>.
die boten vuoren wider dô,
sie sagten dort die maere alsô,
wes alexander sich vermaz.
dô twelten sie niht vürbaz,
sie bereiten sich ze wer.
von dem lande und von dem mer
was diu stat sô veste erkant
daz niemen sterker veste vant.
dicke mûre, tiefe grabn,
türne vesteclîche erhabn,
vil liute, hêrschaft und guot
was dâ und ellenthafter muot.
nû was dar gen tîre komn
als ich diu maere hân vernomn,
grôz ritterschaft von kartagô,
dâ diu vrouwe dîdô
lange dâ vor was gesîn
ein gewaltec künegîn.
diu stat von tîre gestiftet was,
ir reht man gar ze tîre las
und wie sie solde gestân.
dâ von was si dar undertân
dienstlîcher helfe gar.
sie kâmen jaergelîche aldar
als in denne was gebotn,
und hulfen dâ begân ir gotn
eine grôze hôchgezît
lobelîche sunder strît.
diu selbe zît was komen dô,
dar hâten die von kartagô
brâht in schiffen ûf dem mer
ein vil wünneclîchez her
in manlîcher manheit
strîtlîche wol bereit.
ouch was alexanders schar
mit grôzen kreften komen dar
und saz vil werlîche dâ.
sîne boten santer sâ
nâch suon in die stat zuo zin.
an den entêrten sie dô in:
sie sluogen sie gar âne wer
und wurfen sie dô in daz mer
daz ez der herr ane sach.
die smâcheit und daz ungemach
klagte dô mit zorne
der edel wol geborne.
ez wâren bî der selben zît
als uns diu schrift urkünde gît,
in jerûsalem die juden dô,
den enbôt der künc alsô,
ob sie gerne wolden lebn,
swaz sie zinses solden gebn
dem künege von persîâ,
daz sie den im bereiten sâ,
zehant und vil schiere
die besten soldiere
die sie haeten under in,
daz sim die balde santen hin
wol bereit ûf sînen strît.
nû phlac ir zuo des selben zît
ein êwart hiez jaddus.
den nennet uns diu schrift alsus,
der was in dem gelouben reht
und ein gewaerer gotes kneht,
undr des lêre wâren
die juden in den jâren
die lebten in der alten ê
nâch gotes gebote, niemen mê.
diz was daz künne des jûdas
ein patrîarche ein urhap was,
von dem künne ouch was dâvît
und von dem lange sît
diu reine maget ûz erkorn
sanctâ - marîâ wart geborn,
diu den keiser aller engel schar
nâch der menscheit gebar.
ze der erwelten gotes diet
die im krist ze künne ûz schiet,
kâmen alexanders botn
als in dâ vor was gebotn,
und ieschen dienstlîche an sie
den zins von ir landen hie,
dar zuo die besten ritterschaft
die gewinnen möhte ir kraft.
dô sprach der wîse jaddus
< biz daz der künec dârîus
lebet, dem hât unser eit
gesworn grôze sicherheit,
biz daz er lebe und wir ouch lebn,
daz wir im iemer mêre gebn
den zins und in ze herren hân,
des mügn wir im niht abe gân:
wir hân gesworn ez bî gote!
in alexanders gebote
wellen wir vil gerne stân.
daz aber wir gesworn hân,
daz brechen wir durch niemen:
twunge abr es uns iemen,
wir laegen tôt, ê unser eit
braeche sîne sicherheit.
wir leisten sînes willen vil
ob er der dinge muoten wil
an den wir den hoehsten got
beswaeren niht noch sîn gebot.
des sol er ouch niht muoten.
den edelen herren guoten
sült ir des biten daz sîn muot
uns sî genaedeclîche guot.>
jaddus der wîse guote man
sante sus die boten dan,
durch sînes eides staetekeit
hâter in den zins verseit.
ze tîre vuoren wider dô
die boten unde seiten sô
daz die juden wolden gebn
gerne lîp unde lebn
ê daz sie wolden ir eit
velschen und ir sicherheit.
diz was dem künge swaere,
dô er bevant diu maere,
er sprach drôlîche< lâzet sîn!
sol ich gesunt daz lebn mîn
noch deheine wîle hân,
ich lêre sie vil wol verstân
wie sie sich witze nieten
und waz sie mir enbieten
und wem ir dienest sül gezemn
und wen sie süln ze herren nemn
und wâ in ir tumber muot
sül sîn übel oder guot.
sammir diz houbet und mîn got!
ich gebüeze in sô den spot
daz es niemer mê geschiht.
doch wil ich von tîre niht
ê daz ich sî betwinge,
in mînen dienest bringe.
sô kan ich sie ouch twingen
und ûz ir spote bringen.>
alexander zornes phlac.
dô er an sînem bette lac
des nahtes dô der tac verswein,
diu vinster naht vil truobe schein,
er slief. im wart ein troum erkant,
in dûhte wie er in der hant
einen triubel haete
und wie der degen staete
den wurfe mit unwerde
vor im ûf die erde
und wie er mit den vüezen sîn
drûf gienc und dar ûz druhte wîn.
dô der ander morgen kam,
der meister er im einen nam
und seite als ich iu hân verjehn,
waz er in troume haet gesehn.
dô sprach der wîse ariolus
< dîn troum bediutet uns alsus.
den triubel den dû würfe hin
und dar nâch zerdruhtest in,
daz mac disiu stat wol sîn.
sô sol bediuten der wîn
daz bluot daz hie vergozzen wirt.
die stat vil kûme verswirt
der schade der in kurzer vrist
von dîner kraft ir künftec ist.
sus wirt bewaeret diu geschiht
und dînes troumes gesiht.>
nû hâten die von der stat
ir türne werlîche besat
mit starkem geschütze guot
wâren ir gewer behuot
und wol bewart ze wer ir tor.
alexander saz dâ vor
und gedâhte wie er kunde
wie er die liste vunde
daz er in schaden taete.
dô vant der degen staete
mit kunst deheiner slahte list
dâ mit er an der selben vrist
in iht geschaden möhte
daz ez ze schaden töhte.
in mohte niemen nâher komn
als ich von wârheit hân vernomn,
wan daz ein starker boge grôz
vil kûme zuo dem her geschôz
von der veste vier stunt
daz es ein vogel würde wunt.
ouch hâten sie mit grôzer wer
vil wol bewart daz wilde mer.
sîniu schif warn gesant
durch twingen ûz in vremediu lant
und was deheinez im dô bî,
des was diu stat von sorgen vrî.
die inren tâten dicke leit
dem ûzern her mit arbeit.
daz klagete der wîse degn.
nû was vor der stat gelegn
lîbanus ein hôher berc,
dâ hiez er manec antwerc
und ebenhoehe machen an,
die der tugentrîche man
hiez ûf starken schîben
gegen dem graben trîben.
als man sie zuo zin getreip
deheinez ir dô ganz beleip,
sie schuzzen kriesch viur aldar
und verbranten sie vil gar
und triben denne grôzen spot
durch ir lôsheit gebot.
den edelen rittern wol geborn
vuocte daz den groesten zorn
und wâren deste raezer ie
mit manger sunderwer an sie.
alexander machen bat
zwêne türne vür die stat,
die wâren starc von holze grôz,
dar ûz man zallen zîten schôz
ûf die inren türne hin,
und tâten dicke ir schützen in.
dô des werkes wart gedâht
ê daz ez würde vollebrâht,
dô geschach in ofte schade
ûz geleiden von dem stade.
daz wart in schiere benomn
dô daz werc was vollekomn.
dô alexanders ritterschaft
vor tîre lac mit grôzer kraft,
daz urliuge was âne vride.
in der veste wâren smide
die man phîle würken sach.
ein michel wunder dô geschach.
dô ein smit dâ wolde
würken als er solde
und daz îsen in der gluot
glüejende was als ez noch tuot,
in der esse huop sich an
ein bluotbach der dar ûz ran.
dô diz maere wart geseit,
sie erkâmen und was in leit
und gâben doch in selben trôst
daz sie würden schiere erlôst
mit phîlen und mit swerten
der sie ze wer dô gerten.
dô diz wunder dort geschach,
ein ritter uzerhalben sach
ein wunderlîchez wunder grôz:
bluot ûz einem brôte vlôz
daz er zersneit mit sîner hant.
ez wart dem künge sâ gesant,
der hiez ez sîner wîssagn
dem wîsesten durch wunder tragn,
der hiez aristander.
er sprach< alexander,
herre mîn! ich weiz vil wol
was diz wunder diuten sol.
waere worden diz brôt
ûzerhalp von bluote rôt,
unser saelden veigte:
daz ez sich inen zeicte,
daz gât den inren an daz lebn
daz sie ze jungest müezen gebn
umb die grôzen missetât
die dir diu stat erboten hât.>
des trôstes was der künec vrô,
in sînem sinne dâhte er sô
wie er verhagte sô die habe
daz im sô vil ze leide drabe
iht geschaehe als ê geschach.
im wart leit und ungemach
getân vil ofte und michel schade
ûz der habe und von dem stade.
diz ungemach im sêre war.
dô hiez er im bringen dar
grôze und lange boume,
mit mangem swaeren soume
hiez er mit steinen sâ zestunt
sie senken an des mers grunt.
er hiez sie binden vaste
mit tolden und mit aste,
senken al gemeine
mit mangem grôzn steine
an des mers grunt alhin.
dâ zwischen hiez er vüllen in
holz und stein über al
unz ez übr daz wazzer swal
und starke vlôzbrücken grôz
enthielt die man dar ûf beslôz.
ûf die selben brücken
starken und niht lücken,
wart manec antwerc gesat
alsô nâhe bî der stat
daz sie zein ander zaller zît
schuzzen sêre enwiderstrît.
alexander schamte sich
und dûhte in missewendelich
daz sîn küneclîcher name
leit von einer stat die schame
und er biz dar mit sîner hant
betwanc sô manec rîchez lant.
er dâhte< ich wil von hinnen varn
und den lantschal bewarn
daz beide der und der iht jehe
wie grôz laster mir geschehe,
daz mit vrevellîcher gir
tuo diu stat ze tîre mir.>
der herzog perdikkas
der von art ein vürste was,
und crâterôn der wîgant,
die besanter sâ zehant
und bevalch ir wîser wer
daz gesez und ouch daz her,
und hiez sie niemer dannen komn
ê sie haeten sic genomn
und die stat betwunge ir hant.
in arâbje daz lant
huop sich alexander dô
und liez besezzen tîre alsô.
als alexander dannen kam
daz her vil grôzen schaden nam:
die ûzern her, die inren hin,
tac und naht was under in
alle stunt und alle zît
nît und vridelôser strît
daz dewederhalp die diet
vriuntschaft noch ruowe schiet.
die inren sich berieten sâ
ob sie deheiner liste dâ
kunden dô gedenken
dâ mite sie verkrenken
möhten wol der ûzern wer.
ein altez schif ûf dem mer
hiezen sie lesten vaste
mit mangem swaeren laste:
sant und steine genuoc
man an daz schif ze laste truoc,
holz swebel unde bech.
dô daz schif wart gerech
und ûf dem mer gevüllet vlôz,
sich huoben starke winde grôz
und waten gegn der ûzern schar
des endes krefteclîche dar
dâ daz ûzer antwerc stuont.
die inren tâten, als noch tuont
die mit nôt begriffen sint,
sie rihten ir schif in den wint
und huoben sich vil swinde
des nahts nâch dem winde.
als sie begunden nâhen,
sie îlten balde gâhen,
daz selbe schif sie zunten an.
sie kêrten in ir barken dan
die sie mit in dar brâhten
dô sie den list erdâhten.
daz schif dô vil sêre bran.
als ez brinnen began,
der wint ez an diu antwerc truoc,
daz viur umb sich sô vaste truoc,
daz diu antwerc verbrunnen gar
und daz alexanders schar
leit angest und grôze nôt.
dô lac manec degen tôt
der in dem viure und in dem mer
verderben muoste ân alle wer.
disiu leitlich arbeit
wart alexander dô geseit.
der maere wart sîn herze unvrô,
von arâbje kêrter dô
gen tîr aber wider dan.
dô hiez er aber sîne man
mit krefteclîchen sachen
ein ander antwerc machen
ûf die swelle sâ zehant
dâ jenez ûfe was verbrant,
und tet in schaden michels mê
und groezers leides vil dan ê.
die inren helden maere
santen ir tuchaere
undr die vlôz an den grunt
und hiezen swâ in würde kunt
daz die boume haeten bant,
daz sie die lôsten sâ zehant,
daz sie niht krefte haeten
sô starke winde waeten,
und leiten starke hâken dran.
zuo den schiffen wider dan
grôze ketenen giengen,
dar an die kraphen hiengen.
noch was ez wintstille.
dô huop sich grôz gewille
von starken winden ûf dem mer,
dô dâhte an sîne wîse wer
daz inner her mit liste kraft,
mit starken ankern wart behaft
ir schif in der habe aldâ.
sie begunden ziehen sâ,
sie zugn und zugen vaste,
von dem obern laste
und von den starken winden
begunden sich enbinden
in der gruntveste diu bant.
als ein boum weich, sô weich zehant
swaz an den was gebunden,
an den selben stunden
weich diu gruntveste.
ê daz ez iemen weste,
dô was ir vil ertrunken,
diu antwerc gar versunken.
als alexander daz gesach,
ez was im leit und ungemach
und tet im herzeclîche wê.
weder er nû dâ bestê
odr er dannen kêre
und er die stat niht mêre
müete, des bedâhte er sich.
in dûhte ez waere zagelich
ob sich diu stat erwerte alsô.
des ungelückes was unvrô
der künec alexander.
der herzog clêander
den er dâ vor sande
gen lîzîâ dem lande,
der kam gevarn ûf dem mer
und vuorte ein werlîchez her
in niunzc und hundert kielen.
diu maere wol gevielen
alexander und den sînen,
daz liez er dô wol schînen.
den vürsten muotes rîche
enphienc er minneclîche
und lêch im mit sîner hant
liute vil, guot und lant.
dô teilt alexander
und der herzog clêander
diu schif enzwei und ouch daz her
al umb die stat ûf daz mer,
wâ sie solden strîten.
an der winstern sîten
der werde künc von kipper was,
der was genant pnîtagoras,
und crâterôn, der wîse degn.
der zeswen sîten solde phlegn
der herzog clêander,
der künec alexander
der sold an der selben zît
von dem lande geben strît.
dô die schar wârn geschart,
diu stat was vil ungespart
diu mange grôze nôt gewan,
man streit sî allenthalben an
sô vîentlîche sêre
daz sie dô niht mêre
getorsten setzen sich ze wer
mit ir schiffen ûf dem mer.
diu schif gewunnen in dô an
des rîchen alexanders man
und besancten sie zehant.
sie hâten mit in in daz lant
mangen, pheteraere
brâht. die helde maere
eins listes dô begunden,
mit kreften sie bunden
ie zwei schif an ein ander.
der herzog clêander
ûf diu schif wol brücken hiez,
ein tülle man darumbe stiez,
von dicken taveln hülzîn,
dar inrethalben solden sîn
die schützen und diu antwerc,
daz tülle was in ein geberc.
mangen, pheteraere
wâren, giht daz maere,
ûf diu schif enbor gesat,
die zallen zîten in die stat
bî steinen viur wurfen dar.
diu branten und brâchen gar
swaz veste bî der mûre was
hûs, türne und palas.
ouch machet alexanders her
ein ander antwerc ûf dem mer
mit kündeclîchen witzen.
sie hiezen boume spitzen
und sliezen vor an die galîn,
die muosten wol beslagen sîn
mit stahel und mit îsen gar.
swenne ez kam mit kreften dar,
ez stiez al die mûre nidr:
daz antwerc hiezen sie< den - widr>.
swaz sie der mûre brâchen
und tages nider stâchen,
daz widermachten sie die naht:
mit zorne man sie ane vaht,
doch was ir wer vil manlich,
sie werten ritterlîche sich.
die galîn schaden nâmen
vil ofte dô sie kâmen,
mit solher kraft sie stâchen
daz sie selbe brâchen
und liute dicke vil verdarp.
swie vil der galiotten starp,
sô vant man ie die andern
die durch alexandern
huoben an der selben zît
in den galînen disen strît.
dô tîre was mit solher nôt
die ir alexander bôt
der sî besaz mit grôzer kraft,
dô kam gewaeriu botschaft
der ritterschaft von kartagô,
kartagô waer besezzen dô,
mit grôzen kreften laegen dâ
die von sîracûsâ
und waer africâ daz lant
von in verhert und verbrant.
des wurden tîraer unvrô,
dô gerten die von kartagô
an alexandern sâ zehant
daz er in wider in ir lant
gaeb ein geleite
und in daz niht verseite.
des gewerte er sie dô sâ.
diu ritterschaft nam urloup dâ
und vuoren heim ze lande dan.
mangen werhaften man
liezen sie dâ belîben,
mit kinden und mit wîben
wâren sie gen tîre komn,
als ir habet ê vernomn,
daz sie leisten ir gotn
daz in von alter was gebotn.
als ez sich gevuocte alsô
daz diu schar von kartagô
was ze lande wider hein,
dô wurden die von tîre enein
daz sie phlaegen solher wer
daz man iht spraeche< sît daz her
ze lande von ir helfe schiet,
sît was ez ein werlôsiu diet>.
ir her vil selten ruowe phlac,
ez waere naht oder tac,
sô bûtens ie die veste widr
die diu antwerc brâchen nidr.
sô der wint daz ûzer her
irte strîtes und daz mer
dar nâch von winde stille vlôz,
sô was ie ir wer sô grôz,
als die ûzern kâmen
daz sie schaden nâmen.
sô man diu antwerc treip an sie,
sô wâren sie mit kreften hie
und zugen mangen und den den widr
und die pheteraer dar nidr.
dô überluot sie vaste
mit grôzem überlaste
des rîchen alexanders schar,
sie drungen ie dar und dar
mêre und mêre herhaft
ie mit wahsender kraft
mit stolzen helden jungen
biz sie sie überdrungen
und ir wer wart alsô kranc
daz sie giengen âne ir danc
unz an die mûre zaller zît,
sô sie den ûzern gâben strît.
gegen dem lande vor dem tor
dô alexander saz dâ vor,
dâ wârn die burcgraben vol
und überbrucket alsô wol
daz man unz an die mûre gie
sô werten sich die inren ie,
sie tâten vreche wer erkant,
sie nâmen leim, stein und sant
und glüejetenz reht als ein gluot
und wurfenz ûf die helde guot
und wallendez wazzer.
dâ was dehein sô lazzer,
ez kunde in wol betwingen
daz er muoste springen.
hie vor kunde niht gewern:
dô sies ze wer begunden gern,
sie erzeicten vil nâch daz her
harter dan mit ander wer.
mit disen selben listen
muosten sie sich vristen
biz daz sie aber überkraft
an gie von der ritterschaft.
dô diz alsus was geschehn,
eines tages lie sich sehn
bî den schiffen ûf dem mer
daz inner und daz ûzer her
ein starkez merwunder grôz,
bî den schiffen ez ûf schôz
ûf dem mer mit solher kraft
daz beidenthalp diu ritterschaft
ze vorhtlîchen sorgen kam,
dô man sînen diez vernam.
diu her wâren nâch verzagt,
diu schrift gewaerlîche sagt
ob alle winde waeten,
daz sie der kraft niht haeten
daz sie sus wegeten daz mer.
sô gar verzagten diu zwei her
dô daz selbe wunder
sie kumbert al besunder!
ez was vil lanc, unmâzen grôz,
man sach ez ob dem wazzer blôz
mit vüezen swimmende gân.
sô wunderlich ez was getân
daz vor den zîten nie man
der forme künde nie gewan.
man muost im die habe lân
unz man ez sach dar inne gân
daz niemen von deweder schar
vor im getorste komen dar.
wie ez geschaffen waere
daz sagent niht diu maere,
wan ez sô eigenlîche niht
kam an ir ougen gesiht.
beidenthalp sie jâhen
die daz wunder sâhen,
sîn kunft diu waer bezeichenlich.
sie trôsten sîner künfte sich:
die ûzern jâhen daz diu stat
würde schiere an vröuden mat,
die inren jâhen aber sus
daz in ir got neptûnus
haete dar gesant ze wer
sîne helf ûz dem mer,
und hâten dô enwiderstrît
durch den got ein hôchgezît.
an dem dritten tage dar nâch
dô was dem ûzern her vil gâch
gegen der stat ûf einen strît.
dô huop sich an der selben zît
den sînen alexander vor
mit grôzer kraft unz an diu tor.
swenn ein schar aldâ gestreit,
dô was diu ander vil bereit
ie mit helden niuwen,
diu tor sie vaste hiuwen,
die mûre sie brâchen.
dô sluogen und stâchen
die inren her und sie hin in,
dô wuohs vil manges ungewin
und iemer klagelîchiu nôt.
swaz ie gelac der ûzern tôt,
drûf ahten sie kleine,
sie drungen al gemeine
zuo zin mit gelîcher wer
von dem lande und von dem mer.
swaz man gewarf odr geschôz
des die inren niht verdrôz,
daz was den ûzern gar ein wiht,
mit gelîcher sinne phliht
zen inren în drungen
die ellenthaften jungen
und giengen in die türne zin
von den ebenhoehen hin.
dô hiez der ellentrîche man
allenthalben zünden an.
sich hâten kint man und wîp
durch beschirmen den lîp
in daz betehûs gezogn.
die helde an manheit unbetrogn
wâren alle an ir gewer.
nû was an alexanders her
die von sidônje gevarn
mit vil werlîchen scharn,
die schirmten tîraere.
in was ir kumber swaere,
wan ietweder stat dâ vor
gestiftet hât agenor.
sie viengen dâ und vuorten dan
vünfzehen tusent man,
sehs tûsent helde lâgen tôt.
alexander dô gebôt,
ez waere man oder wîp,
swer durch behalten sînen lîp
in diu betehûs waer komn
als ir habet ê vernomn,
daz der vride haete
und daz man dem niht taete.
zwei tûsent hiez er vâhen
und hiez sie alle hâhen.
dô was jâmer und nôt.
swie vil dô liute laege tôt
rîch und armer über al,
diz ist ûzerhalp der zal.
die aldâ von kartagô
in tîraere helfe dô
wâren dannoch gewesn,
die lie der künec gar genesn
und lie sie hein ze lande.
sus wart aldâ sîn ande
gerochen und sîn ungemach
daz im von der stat geschach.
die rîchsten und besten dâ
wurden von den gesten sâ
verderbet. niemen dô genas
dô diu stat gewunnen was
an der angestlîchen wer,
wan die in alexanders her
die von sidônje nerten.
und sie heimlîche werten.
dô hiez der ellenthafte man
tîre dô er sî gewan,
zerbrechen al gemeine:
stein obe steine
wart niender gelâzen dâ.
die gevangen wurden sâ
hin und her wît in diu lant
zerteilet und gar zersant.
vier wochen und ein halbez jâr
was dô gewesen, daz ist wâr,
daz alexander mit her
die stat besaz mit rîcher wer.
diu vorhte daz der wîse man
die stat mit solher kraft gewan,
betwanc in vil kurzem zil
wîter einlande vil,
wan si sô starc, sô rîche was.
swaz man liset und sît las
latînescher buochstabn,
die wurden dâ von êrste erhabn
dô sie der wîs agenor
gestiftet hât ê dâ vor.
ir kraft, ir hêrschaft was sô wît
daz von ir wart gestiftet sît
kartagô in africâ,
têbê in bêôtîâ.
swem sie tiuschen ist erkant,
dem ist tîre sûr genant.
wie sie gemachet wurde widr
und wie daz geschaehe sidr,
daz wil ich ûz der ahte mîn
ze sagenne hie lâzen sîn.
die âventiure haben sol
ir herre! der bedarf ir wol,
daz man iht manger hande wege
dar in ze wîzenne phlege.
gen rôde huop sich dô mit kraft
alexanders ritterschaft,
diu gap im sich sâ zehant.
wie er besazte siniu lant? -
sôcrates, ein wîser degn,
solde dô zilîzje phlegn
und die naehsten inseln gar
twingen dô mit sîner schar.
swaz lande tîre dô gelegen was,
der phlac ouch philôtas
und twanc diu naehsten bîlant.
dô wart ephestiôn gesant
durch twingen ûz mit grôzem her
in vil schiffen ûf dem mer.
clêander und pnîtagoras,
swaz heres mit den komen was,
die santer werlîche
anthalp in diu rîche.
in paphlagônje was
der rîche künec calas,
der hâte ouch bîlande vil
betwungen an dem selben zil.
diu âventiure seit alsus
daz der vürste antigonus
lîcaônje solde phlegn.
swaz dem lande was gelegn,
diu betwanc antigonus.
der herzoge balacrus
betwanc milête die stat.
die hâte dârîus besat
mit einem vürsten wît erkant
der was hidarnes genant.
den vertreip er dannen sâ,
stat und lant betwanc er dâ.
hegelôch und amphotêr,
die zwêne rîchen vürsten hêr
wâren ûf dem mer gevarn
mit vil werlîchen scharn
in sehzec und hundert schiffen.
sie hâten gar begriffen
mit ir ellenthafter hant
al diu wîten bîlant
diu enzwischen asîâ
lâgen und achâjâ.
ze kîun lac farnâbâzus
den der künec dârîus
dâ vor hâte dar gesant.
swâ der von wârheit bevant
der mâzen helfaere,
den tet er mange swaere
und vuoct in arbeit genuoc,
ir helfer vienc er und sluoc
swâ er begreif deheinen ie.
nû widervuoren ime die
dô mit rîchen dingen
alexander solden bringen
den zins von mangen landen
diu den zins im sanden.
die vienc er und sluoc sie gar.
nû hât er in sîner schar
zwêne vürsten rîche
die wâren werlîche
mit im komen in daz lant,
apollônides der wîgant
der von art ein vürste was,
und ouch atanâgoras
ein herre grôz von persîâ.
den liez er die gevangen sâ
und die stat. in daz rîche
huop er sich krefteclîche
und tet den mâzen schaden vil.
dar nâch kurzlîch in dem zil
kam er ze kîun wider dan.
dô kâmen alexanders man
hegelôch und amphotêr
mit mangem helde muotes hêr
ze kîun vür die veste sâ
und sâzen mit gewalte dâ.
sie vunden dâ der vürsten her
in vil manlîcher wer:
swaz dô geschaeh under in,
den ûzern her, den inren hin,
des mac ich hi niht gesagn.
swer dô gevangen und erslagn
wart, daz wil ich hie lân,
des wart dô vil und mê getân
denne ich welle sagen hie.
doch wil ich iu künden wie
den inren nâhet ungewin:
sie zerwurfen under in,
ir zorn wart sô vîentlich
daz sie wâfenten sich
gegen ein ander ûf die wer.
dô teilte sich der persen her
ûfn ander vîentlîche enzwei.
dô die mâzen daz geschrei
und daz geschelle vernâmen,
vür diu tor sie kâmen
unde hiewen sie sô nidr
daz sich dâ niemen sazte widr
und es niemen wart gewar.
ê daz sie kâmen mit ir schar
in die stat gedrungen,
dô wurde gar betwungen
sunder danc und âne wer
von persîâ der vürsten her.
dô wart erslagen manec man
des ich niht genennen kan.
die den persen wâren bî,
die ellenthaften vürsten drî
wurden ouch gevangen sâ.
nû vunden unser vürsten dâ
zwelf schif ûf dem mer
diu truogen gein manlîcher wer
helde unwandelbaere.
wol drîzec schiffe laere
sie bî den selben vunden,
der sie sich überwunden
und viengen alle die schar
die diu zwelf schif truogen dar.
dô wart schaden vil genomn.
durch solt der persen wâren komn
driu tûsent kriechen in daz lant,
die viengen sie ouch sâ zehant.
dô diz geschehen was alsus,
der herzog aristônîcus
von medimnêâ dem lande,
den man sô vrech erkande
daz er mit sînen rotten
roubte die galjotten
den mâzen zallen zîten leit
tet und manec arbeit.
dem vuoren werlîche bî
piraticî lembî,
daz was ein galjotten her,
die roubten lant unde mer.
der selbe vürste enwesse niht
umb die grôzen geschiht
diu ze kîun was geschehn.
die persen wolde er hân gesehn
und wold alexanders man
mit ir râte rîten an.
des tages gâhter ûf die vart
dô diu stat gewunnen wart,
gegen der veste mit der schar.
alsus kam er des nahtes dar.
dô vrâgten die wahtaere
wer dô komen waere.
sie sprâchen< aristônîcus
ist aldâ. farnâbâzus
den wolden wir vil gerne sehn
und unsers willen im verjehn
wie er geriet uns daz wir
solden varn nâch sîner gir.> -
< ja! der ist hie, doch slâfet er:
swer in ze sprechenne ger,
der beite sîn unz morgen vruo,
wir bringen in dem vürsten zuo.>
sie sprâchen< daz sol sîn getân,
wir süln in gerne rouwen lân>.
dirre maere wâren geil
die wahtaer, ir lief ein teil
zuo dem vürsten rîche
und sagten im heimlîche
die gewaeren maere
wie dô komen waere
der in die groesten arbeit
ie tet und daz groeste leit.
dô machete sich ûf diu schar
heimlîche und stille gar
und bereiten sich ze wer
in der habe und ûf dem mer
unde grifen sie die schar.
ê daz sies wurden gewar,
dô vuorten sie gevangen dan
den vürsten und sîne man.
câres von atêne
der was ze mitelêne
mit zwein tûsent persen komn
und hâte an sich die stat genomn.
den besâzen dô mit kraft
die vürsten und diu ritterschaft
und twungen in daz er die stat
gap und sie geleites bat
in imbrun daz einlant.
daz gâben sie im dô zehant.
dô dem herren unverzagt
alexander wart gesagt
diz vröudebaere maere,
der wîse unwandelbaere
gap den sînen durch ir nôt
grôz und rîch botenbrôt.
câres der vürste dannen schiet.
war mit der werlîchen diet
alexander nû sî komn,
der er sich haet an genomn,
daz wil ich iu machen kunt.
er vuor an der selben stunt
gewalteclîch âne wer
gen jerûsalem mit dem her.
jaddus und die juden gar
mit vorhten wâren, dô diu schar
gegen der stat nâhen began.
jaddus der vil guote man
der vorhte sêre den tôt,
eine vasten er gebôt:
kiuscheclîche drîe tage
mit gebete in sünden klage,
in vlêhender diemüete
vlêhten sie die güete
diu nie wart übergüetet
noch überdiemüetet
und die krist überguote,
dô er sich diemuote
durch unser süntlich arbeit
in menschlîche broedekeit,
dazs in tet helfe schîn erkant.
ir opher brâhten sie zehant
unser schephaere
daz er sie von ir swaere
durch sîne güete lôste
mit sînem süezen trôste.
daz geschach, wan got noch nie
die sîne in noeten verlie.
des nahtes dô diz sus geschach
der bischof slief, ein stimme sprach
hin zim in dem slâfe alsô
< dû solt wachen! wis vil vrô,
wan ich wil sîn bî dir ze wer!
vruo, sô alexanders her
kumt, sô sült ir des niht lân,
ir sült gen im vil schône gân
und alle tragen wîs gewant,
sô diemüete ich sâ zehant
sînen zornigen muot,
daz er iu wirt sanft unde guot
und im des wirt ze muote
daz er iu kumt ze guote>.
als der ander morgen schein,
die juden wurden des enein
daz sie tâten als in got
geboten haete. sîn gebot
leisten sie mit vlîze:
sic huoben alle wîze
mit diemuot vür die stat al hin.
ein bühel ist genant sophin,
dâst ein gerüst ûf gesat,
dar abe siht man in die stat,
dâ stuondens ûf unde bitn
unz alexander kam geritn.
der bischof was vil wol bekleit
nâch gotlîcher werdekeit.
mange stôle guldîn
truoc er, diu gap liehten schîn
geliutert und gereinet
von golde, wol gesteinet
mit mangem jâchande.
ob dem wîzen gewande
truoc er ein infel sidîn,
diu gap von steinen liehten schîn,
von guldînen buochstabn
was in êbrêisch dran gegrabn
tetragramaton, der name
gots der vil lobesame
die andern al gelîche
truogen stôle rîche
von wîze wîz alsam ein snê.
gekleidet nâch der alten ê
hâten sie sich ûz genomn
und wolden von der stat niht komn
ê daz sie war genâmen
daz die mâzen kâmen.
dô sâhens alexandern
verre vor den andern
rîten mit werlîcher kraft,
nâch im die grôzen ritterschaft
mit vîentlîchen siten komn.
er hâte sich verr ûz genomn
und reit hin vor sîner schar.
als er kam zen juden dar,
die sîne hiez der wîgant
stille halten, sâ zehant
erbeizter vor den juden hie,
vür den bischof er dô gie.
als er gesach den namen gots,
durch die lêre sîns gebots
betet er den namen an
den bî im truoc der guote man.
er bôt im manec êre
nâch gotlîcher lêre.
des wart daz gotes liut vil vrô,
sie sprachen al gelîche alsô
der eine und ouch er ander
< künec alexander,
got lâze dich mit saelden lebn
und ruoche dir mit vröuden gebn
iemer wernder saelden teil
und vüege daz êr unde heil
niemer werde dir benomn!
wis uns und got willekomn!>
des saget in der herre danc
güetlîc âne valschen wanc.
dô daz parmênîôn ersach
z alexander er dô sprach
< alexander, herre mîn,
nû sag mir durch die hulde dîn,
durch waz hâstû disen man
sô vlêhlîche gebeten an,
und manger heizet herre dich
dem dise liute zinsent sich?>
er sprach< ich wil dich wizzen lân
durch waz ich ez habe getân:
ich êrtin niht, ich êrte got
und des hoehsten gotes gebot
in des botschaft er noch stât
und sînen namen bî im hât.
dô mir von êrst ze muote wart,
ich wolde varn ûf mîne vart
und wolde twingen elliu lant,
mir wart der hoehste got erkant,
der schein mir in der selbe wât
in der hie sîn bote stât,
und hiez mich âne vorhte varn.
sîn kraft wolde mich bewarn
und wolde persîam daz lant
mir geben gar in mîne hant
und beide hei, dort unde dâ
gar diu rîche in asîâ.
der hât genâden alsô vil
daz ich des niht zwîveln wil,
swes ich beginne, ez muoz ergân
die wîle ich sîne hulde hân.
den hân ich gebeten an
und an im gêret disen man,
sît ich in dem gewande
niemen sît erkande
wan alhie, dô mir diz gewant
die gotes bîschaft tuot erkant.>
ûf huobens sich hin wider in
gen jerûsalêm von sophin.
als er kam hin an die stat,
den bischof er sich wîsen bat
in den gotes tempel sâ.
daz geschach, er gap aldâ
sîn opher, got er êrte
als in der bischof lêrte.
nû diz allez was geschehn,
der êwart lie den künec sehn
ein buoch dâ was geschriben an
waz dânîêl der wîse man,
der gotes wîssag, ie gesprach,
an dem er geschriben sach
daz eines kriechen gewalt
sô grôz und ouch sô manecvalt
werden solde daz sîn hant
betwunge persîam daz lant.
daz was sô vremde bî den tagn
daz ez muoste vor hin sagn
wîssagend überlût
dânîêl der gotes trût.
dô der êwart gelas
de rede als si geschriben was,
alexander wart vil vrô.
in sînem muote dâhter sô
daz er der kriechen waere
von dem diz selbe maere
diu gotlîche wîsheit
sô verre haete vor geseit,
er sprach< ir herren, swes ir gert,
des sît ir von mir gewert.
nû sprechet! swes ir wellet gern,
des wil ich iuch hie gewern.>
sie sprâchen< lieber herre mîn,
süln wir des gewis sîn
daz dîn genâde uns wil gewern
des wir an dich wellen gern?>
der künec sprach< benamen, jâ!>
der juden bischof sprach dô sâ
< herre, sô laz uns die ê
die wir hân von moysê
und von des hoesten gotes gebote
leisten âne vorhte gote.>
der künec sprach< daz sî getân!> -
< sô ruoche uns, lieber herre, lân
daz sibende jâr von zinse vrî,
und swaz in babilônje sî
juden oder anderswâ
in medjâ und in persîâ,
daz die niemen von ir ê
getrîben müge. nihtes mê
wellen wir an dich nû gern.
wil uns dîn hulde des gewern,
sô ist uns diu genâde dîn
genaedeclîche worden schîn.>
dô sprach der degen staete
daz er daz gerne taete.
dô vröute sich diu gots diet,
daz sî got alsus beriet,
sie sprâchen< herre, sît daz dû
dich an uns hâst gêret nû
nâch gotlîcher lêre,
sô wellen wir ein êre
und an lobe ein lebendez lebn
dînem hôhen namen gebn
dâ bî man dîn gedenken mac
biz an den jungesten tac:
swaz under uns lêvîten sî
in dem geslehte von lêvî,
der sol iemer einer sîn
nâch dir genant. den namen dîn
wellen wir in unser ê
dem gesleht iemer mê
zeinem erbe durch dich lân
daz sî durch dîn êre getân.
uns muoz dîn name geniuwet sîn
in der grôzen gehügde dîn
und sol niemer mê zergân
biz got lât unser ê gestân!>
der rede was der künec vrô,
der êren danket er in dô.
die juden lobten sêre got
und sîn gotlich gebot
daz er sie alsô lôste
mit sînem süezen trôste.
alexander dannen schiet,
er lie der israhêlschen diet
einen stolzen wîgant
der was andrômachus genant.
dirre vürstlîche degn
solde ir und des landes phlegn.
die stete gegen im vuoren,
in sîn gebot se swuoren
übr al daz künecrîche
und enphiengen in güetlîche
mit einem muote hie und dâ.
nû was aldar von persîâ
sarballâ gesant
zeinem rihter in daz lant,
daz tet der künec dârîus.
der êwarte jaddus
hât einen bruoder bî im dô,
des gemüete stuont alsô
wie er daz reht erwürbe,
swenn sîn bruoder stürbe,
daz er êwart waere.
diu gerndes herzn swaere
sîn herze dicke in sorgen stiez,
manasses der selbe hiez.
diz was der juden wille niht.
von der selben geschiht
nam er im ze wîbe dâ
saraballen tohter sâ,
daz er im mit gewaltes kraft
gehulfe dirre hêrschaft.
diz lobter im: ez geschach,
daz reht er mit gewalte brach
und half im âne reht des namn.
des muosten sich die juden schamn,
sie hiezen in die vrouwen lân
odr von gotes ambet gân:
dô was im daz schoene wîp
lieber dan sîn selbes lîp
und was ir alsô gerne bî
daz er daz ambet lieze vrî
von herzen und von sinnen
durch der vrouwen minnen,
wan er in sînen sinnen
die schoenen muoste minnen.
dô mohter niht belîben dâ,
mit der schoenen isachâ
vuor er ze sînem sweher dô
von jerûsalêm, der was sîn vrô.
der wonte in monte - garizim.
eine gegene gap er im,
diu was abigsâ genant,
die bûweter sâ zehant.
nû gap saraballâ
den juden grôze gâbe sâ
dâ mit er ir mangen schiet
von ir ê und von ir diet,
daz sie ze sîner tohter man
in sîne gegene vuoren dan
und wolden dâ belîben.
mit heidenischen wîben
sie aldâ gesâzen,
ir ê sie gar vergâzen.
dô sach sarabalâ
daz sie begunden wahsen dâ
bî sînem sweher und bî im.
er wolde in monte - garizim
mit rîlîchen sachen
ein solich tempel machen
als in jerûsalêm dô was
dâ man gotes dienest las,
daz dâ vor ê zorobabêl
wider bûte in israhêl
dâ nâbuchodônosor
lange brach ê dâ vor
salomônis tempel nidr,
nâch dem wart diz gemachet sidr.
ein alsolhez wolden sie
bî im hân gemachet hie.
solden sie daz machen sus,
daz müese der künec dârîus
lan mit sîner hulde ergân
odr sie müesten ez lân.
des hâten sie ê lange zil
mit guote dicke engolten vil,
daz sie ze keinen stunden
ez nie erwerben kunden.
daz muote sie und tet in wê.
sie wolden eine sunderê
von den juden scheiden,
juden noch heiden
wâren sie vil lange zît
dâ vor und lange sît
hiez man sie samarîten.
sie hâten in den zîten
in ir ê niht mêre
der gotlîchen lêre
wan diu vünf buoc von moysê.
ir sunderleben und ir ê
hâten lâzn in den tagn
diu buoch der reinen wîssagn:
sie wolden juden heizen niht.
geschach den juden leides iht,
dô jâhens an den zîten
sie hiezen samarîten.
swenn abr ir dinc nâch wunsche gie,
geschach in wol, sô jâhen sie
sie waeren ouch der selben diet
die got von egipten schiet.
sus wâren sie gescheiden
von juden und von heiden,
sie hâten beidenthalp begebn
juden unde heiden lebn
und lebten doch gar wider got
und wider al sîn gebot.
dô diu selbe schar vernam
daz alexander dô kam,
sie vuoren im engegen sâ.
dô brâhtim saraballâ
ahte tûsent helde guot
in vrecher wer vil hôchgemuot
und bôt im sînen dienest dô,
des was alexander vrô.
nû bâtens in daz er sie
daz tempel lieze machen hie.
als er des gebeten wart,
er lobtin, an der widervart
wolde er in des urloup gebn,
ob er die zît solde gelebn.
doch tet erz durch ir helfe sît.
sie bûtenz. ez stuont lange zît
biz nâch der gotes ûfvart
jerusalêm zerbrochen wart,
dô sî rômaere brâchen,
und gotes anden râchen.
ouch bâten sie in mêre
daz er die selben êre
in gaebe und ouch daz vrîe lebn
daz den juden was gegebn.
er sprach< nû sagt mir âne strît
ob ir ouch rehte juden sît?>
dô verjâhen sie des im
daz manasses und efrâim
waeren des geslehtes stam
an dem ir vruht urhap nam.
sie getorsten sich niht maeren
daz sie juden waeren,
sie getorstens ouch versprechen niht
von der süntlîchen geschiht
daz sie hâten sich ergebn
sunder in ein sunderlebn.
dô sprach der zühte rîche
vil gezogenlîche
< iuwer zwîvel ist sô grôz,
daz ir sît der juden gnôz,
daz ich iuch heizen wil daz ir
widervart und dienet mir.
ich gihe daz ich daz vrîe lebn
niuwan den juden hân gegebn.
waeret ir juden, iu waer bereit
disiu selbe werdekeit:
des sült ir niht sus jehen ir.
nû vart hin und dienet mir!>
die hâten beidenthalp verlorn,
den künc, ir ê und got verkorn.
daz rach alexanders gote,
er wart genant von gotes gebote
gotes geisel, wan er rach
swaz gote unrehte dô beschach.
durch daz was er ûz gesant
daz gote raeche sîne hant
daz unreht an verworhter diet
diu sich von gotes gelouben schiet.
got von dem ellenthaften man
sînen knehten vride gewan,
die im wâren undertân.
sînen zorn liez er gân
von sîner hant übr alle die
sich von im gebrâchen ie.
vil manger got richet
an dem der gote brichet
sîne lêre und sîn gebot,
dem es doch wênec danket got.
als alexander geschach
der gotes zorn und anden rach
und ez doch nie getet durch in
wan durch sînes lobes gewin,
und daz got sîn wunder
zeicte an im besunder.
rechende den gotes zorn
vuor der degen wol geborn
von lande ze lande,
als in got selbe ûz sande.
sîn vorhte wuohs hie und dâ.
nû was der künc von persîâ
mit leide zallen stunden,
wan in hât überwunden
der künec alexander.
der vürsten vil besander
die im wâren undertân.
der herzog von bactrîân
der was bessus genant,
sîn rîcheit was sô wît erkant
daz der künec sîne kraft
vorhte an sîner hêrschaft
daz er nieman sô sêre entsaz,
ob er an in kêrte sînen haz.
die liute von bactrîân
die bessen wâren undertân,
wâren wunderlîcher site:
in wonten zallen zîten mite
niuwan urliuge und strît.
man kunde sie deheine zît
gein wer vinden unbereit,
daz her vil manec lant erstreit
daz ir kraft wart undertân.
sie muosten roubes sich begân,
sie warten ander gülte niht
als uns diu âventiure giht.
bî zîtîâ dâ lac daz lant.
von persîâ des künges lant
lêch daz lant dem vürsten wert
nâch manschaft als es was gegert.
dô kam der vürste bessus,
als im der künec dârîus
enboten hât unde bat,
ze babilônj in die stat.
den bat des rîchen künges munt
daz er ime taete kunt
sînen rât und sînen muot
wie sîn gewerbe in dûhte guot.
dô riet er vürste sâ zehant
daz er krône rîcheit lant
lieze an eine wâge
und vriunde, man und mâge
lieze lêren arbeit
biz daz er sîn herzeleit
nâch êren überwunde.
er riet, swâ er den vunde
der durch reht im hulfe niht
als ez vil dicke geschiht,
daz er den mit solde,
mit silber und mit golde
an sich gewinnen solde,
ob er sich wern wolde.
dem râte wart dô volge schîn:
in allem dem rîche sîn
der künec sich besande,
von mangem vremden lande,
man sach die boten strîchen
in verren künecrîchen
nâch helfe dar, her und hin,
als ez was geboten in,
und wurben vil groezlîche
umb grôze helfe rîche.
diu mêrte zallen zîten sich,
von tac ze tage tegelich
den persen wuohs ir ritterschaft,
sie ruomten sich ir grôzen kraft
und hâten manger hande drô.
wie alexander lebte dô?
sîn heil noch sîn êre
gevröute in nie sô sêre
daz er überspraeche sich.
swie daz sî unmügelich,
er muoz vil guoter zühte hân
des dinc man siht nâch wunsche gân.
mac sô diu zuht an im gesign
daz er die zunge lât gelign
und überiges sprichet niht:
der nâtûre wârheit giht
daz niht sô lîhte waere
( daz man doch habe sô swaere)
sô daz ein man di zungen
habe alsô betwungen
daz si die rede verbaere
diu niht ze redenne waere.
überigiu wort verbar
der künec alexander gar:
er sweic stille und liez sie dröun.
man sach in sîn gemüete vröun,
et tet diu werc, verbar diu wort,
sîn zuht was aller zühte hort.
ze nôt er doch mit witzen sprach,
swie manz an in vordern sach:
er hiez zallen zîten spehn
die vîend und ir kraft besehn.
sus kam der saelden rîche
mit kreften werlîche
vür die stat ze gazâ.
bêtis von persîâ
ein vürstlîcher wîgant
was dar ze herzogn gesant,
dem was - als ich vernomen hân -
stat und lant undertân.
diu stat was werlîche behuot
mit mangem helde hôchgemuot
und mit rîches bûwes kraft.
dâ saz der degen ellenthaft
alexander mit dem her,
er vant dô manlîche wer.
swaz antwerke er brâhte dar,
diu verbranten sie vil gar.
welher hande strît er ie
mit den sînen kerte an sie,
sô was ir wer sô grôz bereit
daz er schaden von in leit.
der âventiure wârheit giht
daz alexanders wunders iht
möhte bî der zît geschehn,
er möhte ein zeichen vor hin sehn
daz im mit rehter bîschaft
erzeicte vor des wunders kraft.
als daz selbe im dô geschach:
einen rappen man dô sach
vliegen ob dem herren hin,
der lie vallen hin ûf in
einen ertschollen sâ,
den vuort er in sîner klâ.
sus vlouc er von im vürbaz
ûf eines turnes knoph er saz,
der was mit lîme wol bedaht.
der rappe vliegende vaht
als er gerne waer von dan,
dô klebten im die vüeze dran,
wan diu hitze was sô grôz
daz er smelzende vlôz,
als er wolde widere,
sô hafte im daz gevidere
und liez in niht ûf sîne vart
ê daz er dô gevangen wart.
dô wart aristander
besant. alexander
vrâget in besunder
waz diz grôze wunder
an im bediuten wolde
und waz ez meinen solde.
er sprach< diu stat muoz sich dir
ergeben, daz geloube mir!
doch soltû ze dirre zît
niht heben an die stat den strît,
ern sî gewerlich. daz rât ich
wan ich wol versihe mich
die müeze schade widervarn.
dâ vor soltû dich bewarn:
lâ disen tac mit vride sîn,
daz râtich ûf die triuwe mîn!>
der vride wart bestaetet hie.
dô der morgen ane vie,
dô was mit grôzer manheit
daz her ûf einen strît bereit
beidenthalp ûf nander.
sich wâfent alexander
gein strîtes wer mit rîcher kraft.
dô huop sich diu ritterschaft
mit schiezenn und mit slegen grôz:
der sluoc, der warf, der stach, der schôz,
dô wuohs angestlîchiu nôt
an mangem der dô nam den tôt.
dô dranc alexander vor
den sînen vaste unz an diu tor
und tet den inren schaden vil
und mê denn ich iu sagen wil.
arabs ein werder wîgant
was dar von persîâ gesant
durch lobelîchen ritters prîs,
er was küene, an strite wîs.
dô der alexandern sach
wie er sluoc unde stach,
er dranc zuo zim vaste hin
und sluoc vil mangen slac ûf in,
er und alexander
sluogen vaste ûf nander.
der persen krefteclîche wac
ûf alexandern einen slac
daz er vil bî die kraft im nam.
als er ze kreften wider kam,
er sluoc dem stolzen helde wert
die hant in der er truoc daz swert,
daz sie verre vuor dort hin.
dô schôz von der stat ûf in
ein schütze vîentlîche,
dem herren muotes rîche
gie der phîl unz an den zein
durch daz winster ahselbein
und daz im von der wunde
vil nâch swachen begunde
und unkreften ander zît.
dô kam diu naht und schiet den strît.
vil manec werlîcher degn
was des tages tôt gelegn,
den man sach sîn êre wern.
beidenthalben in den hern
wart schaden vil genomen dâ.
sus was der strît gescheiden sâ.
dem künge wart dô sâ zehant
sîn bester arzât besant,
philippe, der ûf taurimunt
dâ vor machet in gesunt.
der zôch dem êregernden man
den phîl ûz der wunden dan.
sîne wunden er verbant
und heilt schier den wîgant.
als begunde nû genesn
und genesen vil nâch wesn,
dar nâch an einem morgen vruo
hiez er diu antwerc trîben zuo,
die ebenhoehe unz an die grabn.
dô wart an die stat erhabn
der strît. mit grôzem zorne
der edel wol geborne
lêhen und eigen bôt
den sînen klagter sîne nôt
und mante sie und lie sie sehn
waz im dô leides waer geschehn.
daz reiztir haz und ir nît
ûf den vîentlîchen strît,
sie wurden beidenthalp mit schadn
her ûz und hin în verladn.
diu stat vil wênec iht genôz
swaz man her ûz warf odr schôz.
die werhaften jungen
an die mûre drungen
und triben al die inren widr.
die mûre hiewen sie dô nidr
und zunten allenthalben an.
dô wart der ellenthafte man
alexander sâ zestunt
von einem wurfe sêre wunt,
den warf mit kreften ûf in sâ
bêtis von persîâ,
der wart ouch toetlîch ungesunt
von manger grôzen wunden wunt.
den viengen alexanders man
und vuorten in gevangen dan.
diu stat wart ie sâ zehant
zerbrochen und gar verbrant.
dô wurden in den selben tagn
zehen tûsent man erslagn
ân ander volc daz ungespart
dô was, des vil verderbet wart.
bêtis, den ich hân genant,
wart alexander sâ zehant
brâht. als er in gesach,
der künec zornlîche sprach
< vür hin! er sol verderben
und lasterlîche sterben!>
dô nâmen sie den wunden,
an wildiu ors sin bunden,
diu zugn in nâch des künges ger
durch die stat hin und her
und zervuorten in zehant.
alsus verdarp der wîgant.
dô hiez der künec sîne schar
die stat nider brechen gar
unz an die gruntveste.
dô rûmtenz die geste.
sie kêrten werlîche zehant
mit kreften gen egiptenlant.
dô diz alsus geschehen was,
der herzoge amintas
mit zehen schiffen was gesant
ze mâzedônj in daz lant
daz er niuwe ritterschaft
braehte mit werlîcher kraft
und aber werlîchiu her
sînem herren über mer
von sînen erbelanden
diu in ze herren nanden.
dô der ellenthafte degn
was in botscheft underwegn,
dô was alexander komn
- als ich die wârheit hân vernomn -
übr eine volle wochen
dô gazâ was zerbrochen,
in pelûsium daz lant.
der muotes rîche wîgant
lie sîne sarjande dâ,
mit den rittern kêrter sâ
in egipten daz lant.
dô samenten sich sâ zehant
die herren von dem rîche,
sie enphiengen minneclîche
ir lieben lantherren dô,
sie wâren sîn ze herren vrô.
nû der künec dâ gesach
des vater sûl - als ich ê sprach
die sie dô dem wîsen man
ûf rihten dar dô er entran,
dar an vil wol geschriben was
wie er entran und künftec was
alexanders sigenunft
und in egipten sîne kunft, -
er vrâgte wes sie waere.
dô seitens im diu maere
allez von dem wîsen man,
wie er von dem lande entran
und wie der gote wârheit
im haete daz vür wâr geseit
er solde ein kint in senden dar
dem sie solden dienen gar
und des lant und sîn hêrschaft,
der sie dô twanc mit sîner kraft.
wenn sie daz kint solden sehn
und wenne daz solde geschehn,
des sie belangte lange stunt,
unz in wart diu wârheit kunt.
< ich bin mit saelden nû her komn,
ich hân von wârheit vernomn>
sprach der degen wol geborn,
< daz mir ze vater was erkorn
nektânâbus der wîse degn
den man sach iuwer krône phlegn.
mir hât ervröut mînen sin
daz ich nû weiz wer ich bin:
diz lant sol von rehte sîn
nâch veterlîchem erbe mîn.>
sus viel er vür den stein alhie,
die schrift er balde zuo zim vie,
er kuste sî, mit vröude er las
daz dar an geschriben was.
nû hâter mâge vil aldâ
von geburt, die kâmen sâ
und gruozten in vriuntlîche.
diz wâren vürsten rîche,
die sîn ze mâge wâren vrô.
hulde swuoren im dô
gar die lantherren dâ.
astacê von persîâ,
den hâte dârîus gesant
ze herzogen in daz lant.
oron und memphî,
zwei wazzer grôz wârn dâ bî,
diu scheiden sînen gewalt.
astacê der degen balt
mit kraft gen alexander vuor,
in sîne helf er im swuor
und ergap an in vil gar
lant, hêrschaft und schar
und swes er was gewaltec dâ
daz er dar brâht ûz persîâ.
dô alexander niemen vant
übr diu naehsten bîlant
der wider ime waere,
der hôhe unwandelbaere
mit sînem her ze râte wart
daz er ûf der selben vart
gen hammônes walde
dô wolde kêren balde.
ein betehûs dar inne was
als ich an den maeren las,
dâ dô elliu heidenschaft
ir gelouben hoehste kraft
nâmen und ir reht vil gar.
vil müelich was daz komen dar,
wan von hitze was daz lant
sô viur heiz und ouch der sant
daz ez vil sêre brande.
in grieze und ouch in sande
die von der heizen sunnen
in hitze sêre brunnen,
rihten sich die wege dar.
dem künge widerrieten gar
die lantliute dise vart,
wan es im dô ze muote wart,
dô muostez unwendec wesn,
er solde sterben odr genesn,
er wolde doch dar kêren
sînen gotn z êren,
wan hammône und allen gotn
was diu êre dô gebotn
daz in der vorst gewîhet was
und man ir dienst dar inne las.
alexander was nû komn
mit den dier hâte an sich genomn,
in paludem - marêôtim.
mit prîsanten kâmen zim
boten die hât im gesant
cîrêne daz rîche lant,
daz swuor sîner hêrschaft
iemer wesen zinshaft.
des was der hôchgemuote vrô,
in sînem muote dâhter dô
vollevüeren die vart
der im ê ze muote wart.
sus nam er zuo zim sîne man,
den andern tac huop er sich dan
durch mange wüeste wilde.
in holz noch in gevilde
dehein schate küele bar,
in dem sande wuot diu schar,
als man sî saehe in wazzer sîn.
öl wazzer unde wîn
began von hitze wallen
ûf den soumen allen,
von der hitze was daz her
vil bî verzagt und âne wer,
sie wânden alle wesen tôt.
vür die sunnen sich dô bôt
ein wolken dicke unmâzen grôz
daz solhen regen nider gôz
daz alexanders ritterschaft
wider kam zir besten kraft.
sus vuocte sich nâch saelden ie
swaz alexander ane gie.
got wolde in noch vürbaz bewarn!
daz her begund irre varn.
dô kam vil rappen vür die schar
ûf den wec gevlogen dar,
die wîsten sie den rehten phat
gegen der gote betestat.
hie was der reht urhap
der anevanc ir glouben gap,
ez hiez< der gote gestüele>.
senfter luft vil küele
was in dem walde zaller zît,
die vogele sungn enwiderstrît,
mit rîchen vröuden manecvalt
zierte sich der gote walt.
wie daz lan gelegen sî?
an einer sîten lît im bî
etîôpîâ daz lant
dâ die môre sint erkant.
sundert gein arâbîâ
ist ein lant gelegen dâ
daz heizet tragôdîtis.
uns tuot diu âventiure gewis
ez reiche unz an daz rôte mer.
sô wont ôsterhalp ein her
an den wonet nâhe bî
die heizt diu schrift sîmuî.
nordert sint nasâmônes,
von den bin ich gewîset des
daz sie niuwan roubes phlegn.
bî dem walde sint gelegn
hamôniî ein wildiu diet.
dô diu zer wilde geriet,
sie machten veste disen walt
mit rîchem bûwe wol gestalt,
drîe mûre drumbe giengen
die den walt umbeviengen.
die ir kemphen wâren
in den selbe jâren,
die lâgen zûzerst umbe sie.
in den inren mûren hie
lâgn ir wîp und ir kint.
nû wâren dô als noch sint,
ir êwarte bî ir gotn
als ez was ir ê gebotn.
ein brunne in guoter mâze grôz
vliuzet dâ als er dô vlôz.
der heizt< der sunnen brunne>:
des morgens sô diu sunne
ûf gât, der brunne ist lâ
und beginnet kalten sâ,
nâch der âventiure sage
wirt er sô kalt ze mittem tage
daz niemen sîn getrinken mac.
sô denn endet sich der tac,
sô wirt er warm. ze mitter naht
wallet er in solher maht
daz er niht ze nutze kumt
und nie man ze nutze vrumt,
man wolde danne sieden mite.
durch disen wunderlîchen site
hânt sie den ouch vür einen got
durch des tiuvels gebot.
sîn opher und sîn gebet
der künec dô den goten tet,
von diu wart im trôst gegebn
die wîle daz er solde lebn,
daz er elliu rîche
alsô gewalteclîche
twingen solde in sîne kraft
dazs im würden zinshaft.
dô kâmen di ich hân genant
über al diu naehsten lant
und swuoren im hulde dâ.
dô kêrter von dannen sâ,
von hammône vuor er dô
in die insel ze phârô
und in marêôtim.
sîne sinne rieten im
ez waer im gar daz beste,
möhte er eine veste
gemachen in daz rîche
daz er gewalteclîche
behabte deste baz diu lant.
die veste bûwet er zehant
sîns gewaltes urhap,
sînen namen er ir gap:
sî hiez der wandels vrîe
nâch im alexandrîe.
diu stôzet an egiptenlant,
si ist der lande slozbant
egipte und babilônje.
die von mâzedônje
begunden sie sô vesten
daz si vil bî zer besten
und zer rîchsten wart erkant
über heidenischiu lant.
in dirre selben jâre zil
was dô gewürmes alsô vil
daz sie daz rîche wuosten
und daz die liute muosten
daz lant unberhaft lâzen lign,
in mohte niemen an gesign.
der ellenthafte wîse man
mit listen denken began
wie er gedaeht einer wer
von der diu stat und sîn her
iemer vride haeten,
daz in die würmer iht taeten.
do santer in egiptenlant,
dâ der gotes wîgant
der heilege jerêmîas
der wîssage begraben was,
und hiez dô sîn gebeine
das heileg und daz reine
nemen unde bringen dar
und hiez ez in die mûre gar
al umbe legen. daz ergie.
sît daz geschach, sô wart ouch nie
in der stat, daz hoere ich jehn,
eiterhafter wurm gesehn.
des giht diu rehte wârheit
als uns diu schrift hât geseit.
ouch ist von im geschriben sô
daz er in egiptô
het mit grôzer rîcheit
eine grôze stat geleit,
der ist der selbe name erkant,
alexandrîe ist si genant.
ein vürste was geheizen sus
der werde vürst eschalus,
dem bevalch er die stat.
egiptenlant er phlegen bat
einen vürsten wîte erkant,
der was peucestes genant.
polîmones ein rîcher degn
mit drîzec schiffen solde phlegn
des phlûmes der vür dâmiât
in daz mer durch egipten gât,
der ist geheizen nîlus.
der werd apollônîus
solde mit rîchen dingen
der lande zins im bringen
z alexandrîe in die stat
als er gebôt und in bat.
nû er z alexandrîe lac,
mit schimphe grôzer vröuden phlac
und man dô sach mit vröuden sîn
vil edler juncherrelîn
als noch die jungen gerne sint,
ector, parmênîônes kint,
stôrte ir aller vröude dô:
sich vuocte ein ungelücke alsô
daz der juncherre guot
vuor ûf der wilden wâges vluot
und wolde durch kurzwîle badn,
sîn kleinez schif wart überladn
sô sêre daz ez dô versanc
und der juncherre ertranc.
daz vuocte in allen jâmers nôt,
um des juncherren tôt
huop sich an dem selben tage
von dem her ein michel klage,
wan alexander ê nie wart
dehein juncherr alsô zart.
swenne ein leitlich ungemach
geschiht als ez dô geschach
dâ stât vil gerne ein anderz bî,
jâ leider! daz ez alsô sî,
diz wart ouch bewaeret dâ
mit einem groezern leide sâ.
dem künge wart von wârheit
ein leitlîchez maere geseit:
andrômachus der wîgant
waer alsô lebende verbrant,
das haeten in den zîten
getân die samarîten.
dem künge wurden swaere
diu klagelîchen maere.
sîn botschaft er sande
gen sîrîâ dem lande
mit grôzer werlîcher schar
und hiez die verderben gar
von den der vürstlîche degn
andrômachus was tôt gelegn.
ouch hiez er verderben sâ
die vürsten von mêdimnêa,
der was aristônîcus
und der vreche crîsôlâus,
die ze kîun amphotêr
vienc, der rîche vürste hêr,
und sîn geselle hegelôch,
den elliu zageheit ie vlôch.
dem künge kâmen maere
im santen atênaere
ir gîsel und ir botschaft,
die ê mit werlîcher kraft
warn ûz sînen hulden,
die buten nâch ir schulden
ir dienstlîche sicherheit.
der was der degen wol bereit
und enphienc sie sâ zehant.
er liez in wider gar diu lant
nâch manschaft, diu in sîne man
dâ vor ê gewunnen an.
vil lantherren tet er sam:
ir aller sicherheit er nam,
im sicherten vil vürsten dâ
des küneges von persîâ.
nû hâte dârîus gesant
hin ze crête in daz lant
von persîâ ein michel her
und von spartân über mer
werlîche grôze ritterschaft
die mit vîentlîcher kraft
twungn daz selbe rîche.
dar wart vil krefteclîche
amphotêr mit her gesant
daz er lôste daz lant.
als er dâ kam, dô vluhen sâ
des künges man von persîâ.
sus nam er daz selbe lant
widr in sînes herren hant,
daz im was vil nâch genomn.
nû was gewissiu botschaft komn
dem künege von persîâ
wiez ergangen was aldâ
und daz alexander dô
waer komen von egiptô,
und in africâ nû laege
und hôhes muotes phlaege
nâch küneclîcher lêre.
dô zwîvelt er vil sêre
waz im nû waer daz beste,
ob er der werden geste
in mesôpotâmje bite
und in bâbilônje strite,
odr ob er solde entwîchen
gen sînen vesten rîchen,
die er hâte in persîâ.
doch was daz lant vil veste dâ
von den zwein wazzern grôz
der ietwederz dâ nâhe vlôz,
eufrâtes und tigris.
ouch was der künec vil gewis
verre komender ritterschaft
mit helflîcher ritter kraft
von zîtîâ dem lande,
die man werhaft erkande,
von bactrâ, von indîâ,
den vorhter sîn ze verre dâ
wan sie dar von ir rîchen
ze verre müesten strîchen.
ze jungest er sich doch beriet
daz er der werhaften diet
aldâ wolde bîten
und mit im dô strîten.
dô wuohs und wuohs des künges her
von tage ze tage in rîcher wer
ie groezer baz unde baz,
wan sîn vorhte sêre entsaz
von alexanders laster.
ie vaster und vaster
diu her begunden mêren sich
mit grôzen kreften tegelich,
des wart der persen vil geil.
mê dann übr daz halbe teil
wart daz her vil groezer dâ
dan dâ vor in zilîzîâ,
dô der sturm gstriten was
von taurimunt als ich ê las.
dar kam vil manger vremder gast.
ob ihtes ê dem her gebrast
an gezierde, an werlîcher kraft,
an unverzagter ritterschaft,
daz wart dô gebüezet sô
daz ez wart gezweiet dô
daz man ê sold eine hân.
daz vil lîhte wart gelân
durch die zal der grôzen schar
der sô vil was komen dar
daz sie wânden an der zît
al dirre welte geben strît,
wan sie der selbe wân betrouc
und in diu gewisheit louc,
sie reiten sich vil baz ze wer
dan ob sie haeten kleiner her.
dô sich ze babilônje gar
gesamenten die grôzen schar
von vremden landen verre,
der welte dritteils herre
dârîus der rîche man
vuor in mesopotâmje dan.
dô kam daz her vil gar zuo zim.
er zoget über tigrim,
daz wazzer von dem paradîs.
nû was mit im ein vürste wîs,
der was satrôpates genant,
sîn marschalc der von sîner hant
hâte guot mit êren,
den hiez er vür hin kêren
mit tûsent helden wol bewart
die wege besehen ûf der vart.
dô gebôt der künc alsus
daz de vürste mâzêus
sehs tûsent helde naeme
sô alexander kaeme,
und im an dem geverte
der wazzer vürte werte.
ouch hiez er in diu rîche
verwüesten al gelîche
dar durch alexander dar
solde varn mit sîner schar
daz dâ die sîne envunden niht.
mit der selben geschiht
wânder in erwenden sus.
ein wazzer heizet lîcus,
dâ wa der künc und sîne man
mit ir kreften komen an
bewart nâch ritterlîcher art.
ein brücke aldâ geslagen wart,
dâ zogtens über sehs tage
nâch der âventiure sage.
der künec herbergete dâ
un der stat z arbêlâ,
daz ander her dort und hie,
als es ie der man gevie,
alsô herbergeter dô.
ein wazzer heizt bôumêlô,
dâ lac daz her über al
ze berge bî und ze tal
ûf einen wünneclîchen plân
eben sleht und wol getân
sô wîter ougen weide
daz die vil breiten heide
niemen gaehes übersach.
si was hert unde vlach.
swaz brâmen und stûden dran
stuont, die hiez der wîse man
al der sarjande schar
slihten, abe riuten gar
wan er dâ wolde strîten
und der vînde bîten.
ouch gebôt er an daz lebn
dem lantliut, sie solden gebn
rehte guoten market dâ.
daz tâten die lantliute sâ.
den ban er vridete dan und dar.
vil schalclîche was diu schar
aldâ mit grôzer rîcheit
gein alexanders her bereit.
dô dem herren unverzagt
alexander wart gesagt
mit rehter wârheit alsus
daz der künec dârîus
haete ein alsô michel her,
mit als manlîcher wer,
er gedâhte wie daz möhte wesn
wan ir sô lützel was genesn
in dem êrren strîte,
wier in sô kurzem zîte
iemer des gedaehte
daz er zesamene braehte
sô grôz her in sô kurzen tagn
und ir was ê sô vil erslagn
und alsô vil gevangen,
von den er haete enphangen
triuwe und staete sicherheit,
der helfe im müest sîn verseit, -
durch die selben geschicht
wold er ir kraft gelouben niht.
die sîne er doch besande.
von mangem vremeden lande
kâmen im die sîne dar
mit manger wünneclîcher schar
der er mit guote ouch vil gewan.
dô kam der hôchgemuote man
mit den ritterscheften grôz
hin dâ eufrâtes dô vlôz
daz wazzer, von dem paradîs.
der hôchgeborne herre wîs
mit den sînen sich beriet
ob er die ellenthafte diet
mit deheinen dingen
dar über möhte bringen,
wan niender übr daz wazzer hie
deheiner slahte brücke gie.
dô kunde niemen im verjehn
daz ez möhte geschehn
wan ez was snel unde breit.
dô riet im sîn wîsheit
daz er hiez balde machen
mit krefteclîchen sachen
grôze ketenen îserîn.
er vant dâ kleiniu schiffelîn,
dar inne er über ziehen bat
die ketenen an daz ander stat
und in die erde zwicken
mit starken nagelen dicken.
di ketenen hiez er strecken,
mit hürden vaste decken.
sus wart ein brücke bereit,
swebend über daz wazzer breit,
gestraht und ouch ein teil gebogn.
die sîne hiez er über zogn.
dô zwîvelten sie sêre
dort an der überkêre,
sie getorsten niht von vorhten dran.
dô hiez der êregernde man
daz vihe vor hin über jagn.
dô er die ritter sach verzagn,
dô reit er vor in allen an,
dar nâch riten sîne man.
nû diu schar was überkomn
und in diu vorhte was benommn,
alexander kêrte widr
und hiez die brücke houwen nidr
und lie sîz wazzer vliezen hin.
die sîne sprâchen under in
< ôwê! warumb ist diz getân?
ez mac uns wol ze leide gân!
werden vlühtec wir gesehn,
daz vil lîhte muoz geschehn,
war süln wir danne entwîchen
swenn uns in disen rîchen
ze vriunden ist diu vluht benomn?
wâ süllen wir ze vriunden komn?
wan wir sîn ûf ir ungewin
durch unsern vîentlîchen sin
in ze schaden her gesant,
darumb hazzent uns diu lant.>
< ob ir des vürhtet, sprach der degn,
sô sült ir solher manheit phlegn
daz ir den sic gewinnet
und niht durch vorhte entrinnet.
daz ich die brück ie gebrach,
daz wizzet rehte, daz geschach
durch niht wan daz ir möhtet jehn,
sold iu diu zageheit geschehn
ob ir entrinnen woldet,
daz ir gedenken soldet,
swar ir die vluht gewinnet
und swar ir hin entrinnet,
daz ir doch verdürbet:
ich wolde daz ir stürbet
gerner in werlîcher nôt
denn ir in vlühte laeget tôt,
daz selten edel herze tuot.
dâ von habet mannes muot
und wert iuch als umb den lîp,
wan ich iuch vriunt, kint noch wîp
niemer ê beschouwen lân
ê daz wir betwungen hân
alle lebende heidenschaft
mit unser werlîcher kraft
unz an der welt endes zil.
diu rede ist niht ein kinderspil!
habt ir sô guotlîchen muot
daz ir ez willeclîche tuot
und âne zornlîche site,
so ist iu dester baz dâ mite:
habet irs haz unde nît,
ir habet dester wirser zît!>
sus was mit rîcher wîsheit
alexander ie bereit
daz er ze schimph und ze nôt
ie daz beste antwürte bôt,
von zageheit er lôste
vil mangen mit dem trôste.
in was kein muot dô benomn:
sie wâren in ellende komn,
des muosten sie dô sîn gewis.
eufrâtes und tigris
gânt von dem paradîse,
ir vluzzes ich iuch wîse:
daz eine nimet sînen strich
durch babilônje es rihtet sich,
dem andern ist sîn vluz beschert
durch mesopotâmje ez vert.
sô sie dan zesamene gânt,
ir rehten vluz sie samene hânt
in den phlûm der vür dâmîât
nider durch egipten gât.
nû schrîbent sumelîche alsus,
sô daz wazzer nîlus
ûz gê und egiptenlant
vrühtec mache, sâ zehant
versîhe dirre beider vluz
und werdent trucken als ein nuz.
als ez danne wider gê,
sie vliezent wider drin als ê.
in egipten regentz niht
wan daz man ez netzen siht
daz wazzer daz ich hân genant,
daz ist vil liuten wol erkant.
troestende die werden schar
hâte sich her und dar
an daz selbe wazzer breit
alexander dô geleit.
dô mâzêus sach daz her
über zogn, er liez die wer
wan er mohtes niht bewarn
sie wolden zuo zin über varn.
dô reit er vor hin durch daz lant
und brantez gar, swaz er dô vant,
er liez dô niender überz lant
dehein hûs stân unverbrant,
unz daz er zuo der persen schar
gestrichen kam hin wider dar.
an dem vierden tage dar nâch
was alexander nâch im gâch
mit mâzen und mit kriechen,
sie sâhen daz lant riechen,
wan niender hûs dô was belibn
und daz die liute gar vertribn
wâren von dem lande dan.
dô sprach der ellenthafte man
< ich wil mich vil wol versehn,
diz sî durch anders niht geschehn
wan daz die persen waenent mich
hie mite wenden und daz ich
sî âne guot, daz doch niht ist.
sie hilfet kleine dirre list,
wan mir niemer muotes
gebresten mac noch guotes:
wüestent sie ze leide mir
sich und ir lant, der schade ist ir
unde mîn vil selten.
ich wil es niht engelten:
swenn abr ez mîn werden sol,
sô widerbûw ich ez wol.>
dô disiu rede ergienc aldâ,
dô kâmen sîne boten sâ
die er hâte vür gesant,
und tâten im diu maere erkant
daz ez wol stüend ûf der vart.
der künec dô ze râte wart
daz er die vürte spaehe,
des wazzers vluz besaehe
tigris daz dâ nâhe ran.
dô die besâhen sîne man,
er zogete mit sîner schar
an daz selbe wazzer dar,
daz was in sînem vluzze hel
und als unmaezlîche snel
daz ez nâch bolzes snelheit vert.
tigris der name ist im beschert
niuwan von sîner snelheit.
diu schrift gewaerlîche seit,
über indîam daz lant
sî in der sprâche genant
tigris ein schoz. den namen hât
daz wazzer wanz sô balde gât.
nû was ez âne brücke dâ.
vor sînen mannen reit ez sâ
der künec alexander an,
er hielt unz alle sîne man
nâch im über kâmen.
die helde schaden nâmen
von des wazzers snelheit
liten sie vil arbeit,
diu muost in dâ sîn erkorn.
vil liute und guotes wart verlorn
in des selben wazzers trân.
jensît ûf einen wîten plân
sluogens ûf ir gezelt.
dô kâmen dort her über velt
des künges wartliute gerant
und tâten werlîche erkant,
satrôpates von persîâ
waer mit tûsent mannen dâ
nâhen ûf ir ungewin
und wolde gerne schaden in
obe er möhte, und brechen abe
liute odr etelîche habe.
der künec was der maere vrô,
er hiez ein teil der besten dô
sich bereiten ze wer
die er vant in sînem her.
nû was von pêônje dâ
der burcgrâve aristonâ,
den hiez er mit der selben schar
kêren ûf die vînde dar.
sich wâfente der herre wert
als der künec het gegert,
und huop sich mit vil rîcher wer
ûf den marschalc von dem her.
als in die persen sâhen
sô balde zuo zin gâhen,
dô begunde vliehen gar
mê dan halpteil der schar.
dô kêrte sich der marschalc sâ.
ûf den kam aristonâ
der werde burcgrâve gerant.
der edele degen wît erkant
stach in durch die barbier
daz sîn kel durch kollier
durchstochen mit der glaevîn wart.
die andern wâren ungespart
die mit ime kâmen dar,
die wurden ouch erslagen gar
ob sie niht entrunnen dâ.
dô erbeizte aristonâ
zuo dem marschalc ûf den sant,
den helm er im abe bant
und sluoc im daz houbet abe.
an êren und an rîcher habe
wart dô wol gewunnen.
die dô warn entrunnen,
die seiten dort ze maere
wie in gelungen waere
und daz der marschalc was erslagn:
sie muosten ungelücke klagn,
die mâzen muosten vröude hân,
der was der persen her erlân.
alsus was gescheiden
an disen hern beiden
ir gelück under in:
dort was verlust, hie gewin,
dort was leit mit sêre,
hie was gewunnen guot und êre,
der wârn sie dort beroubet.
des marschalkes houbet
leit aristonâ
vür alexanders vüeze dâ,
des was er herzeclîche vrô.
dem burcgrâven lêch er dô
beidiu liut unde lant
und machet in vil wîte erkant
und dar zuo guotes rîche.
dar nâch vil kurzlîche
dô kam diu naht. der tac verswein,
des mânes schîn, der liehte schein,
erlasch und wart rôt gevar
als ein bluot. die grôzen schar
erschrâken al besunder
und vorhten diz wunder.
die wîssagn begunden jehn
benamn dô müeste geschehn
daz groeste mort daz dâ vor ie
mit deheinem strîte ergie.
diz was als sie jâhen.
dô die mâzen sâhen
den liehten tac, sich huoben dan
des wîsen alexanders man,
als er sie het geheizen.
dem her begunde heizen,
wan sie in grôzer hitze ritn,
von hitzen grôzen kumber litn
beidiu liut unde ros.
er kam ze montes kordêos.
daz gebirge lac vor in,
dâ muosten sie über hin,
es waz in guoter mâze grôz.
tigris daz wazzer vlôz
einhalp zer zeswen hant
nider durch daz selbe lant.
jensît des gebirges was
der persen her als ich ê las,
mit küneclîcher rîcheit
in daz selbe rîche geleit
hin und her mit grôzen scharn,
die sich wênec kunden sparn
swenne ez an den ernest gie.
nû gedâht alexander hie
wie sie mit kündeclîchen sitn
sô wîslîch in daz rîche ritn,
sô man sie komen saehe,
daz man in des jaehe
sie haeten groezer ritterschaft
denn sie werlîcher kraft
in diu rîche haetn brâht.
dô des wart von im gedâht,
dô hiez der junge degen wîs
die sîne stûden und rîs
nâch in ziehen und loup
daz von in würde grôzer stoup
und groezer denne waer des hers.
disehalp noch jensît mers
gevuor vie sô kleinez her
sô wîslîch in sô wîser wer,
daz tâten sie vil dicke schîn.
mit den hôhen witzen sîn
liez alexander schînen
vil kraft und mit den sînen.
mit alsô kündeclîchen sitn
kam der mâzen her geritn
zuo den persen in daz lant.
dô in ir komen wart erkant
und sie den stoup ersâhen,
von wârheit sie des jâhen
ir waere vil mê dene ir was.
ûf des gevildes grüenez gras
herberget alexander.
vil werlîch sander
sîne wartliut in daz lant
und hiez swenden sie den brant
swâ dô in em lande
der persen her dâ brande.
ûf die vînde was in gâch:
die branten vor, sie laschten nâch,
an den selben stunden
vil kornes sie dâ vunden
und swes sie solden sich begân
daz in die persen muosten lân
und es möhten niht erwern.
zwischen disen zweien hern
was veldes landes heide
mê denne ein tageweide
dâ beidenthalben ûf der vart
maere vil vernomen wart
unde manger hande mort,
hin und her, hie unde dort
wart an dem selben zil
gesehen spehender boten vil,
die beidenthalben brâhten in
diu maere her unde hin.
vil vruo an dem andern tage
kam mit jaemerlîcher klage
ein trûrec kameraere,
der seit dô ze maere
tôt die lieben vrouwen sîn
von persîâ die künegîn
diu an dem êren strîte was
gevangen als ich hie vor las.
die hâter brâht nâch im aldar
in daz lant mit sîner schar
und hâtes in ein veste guot
bevolhen, diu was wol behuot
ze wer gein vîentlîcher nôt.
dô der künc bevant ir tôt,
er weind und was unvrô.
die groesten vürsten nam er dô
und reit hin dâ diu vrouwe lac,
mit jâmer er unvröuden phlac.
sî hiez der künec schône
mit einer liehten krône
kroenen keiserlîche,
der edele tugentrîche
leite sî mit werdekeit.
dô diu vrouwe wart geleit,
der andern weinen was vil grôz.
die juncvroun er an sich slôz
güetlîche mit den armen,
sie begunden in erbarmen,
er trôst ir gemüete
mit zühteclîcher güete
und bat sie allez trûren lân
unde staete vröude hân,
er sprach< benamen, sol ich lebn,
ich wil iu solch ergetzen gebn
daz ir der werden künegîn
wol ergetzet müget sîn>.
des trôstes wurden sie vil vrô,
sie dancten im der rede dô
und sîner zuht die er alhie
sô zühteclîche an ir begie.
der trûrec kameraere
der disiu selben maere
und daz klagelîche leit
hât alexander ê geseit,
was tîriotes genant.
er was komen dô zehant
ze sînem lieben herren sâ
dem künege von persîâ.
dô der sîn ungehabe sach,
nâch gruoze er trûreclîche sprach
< owê der ungehabe dîn!
wê dirre klage! was sol ez sîn?
ôwê der gevangen schar!
sint sie nû verderbet gar
und ist unser saelde tôt?
ôwê dîner klagender nôt!
sage lieber waz dir werre!>
er sprach< vil lieber herre,
dô ist diu liebe vrouwe mîn
von persîâ diu künegîn,
dîn wîp diu bî dir schône
truoc manger lande krône,
erstorben nû. daz ist diu klage
die ich klage und nâhe trage.
diz sint mîniu maere,
mîn trûreclîchiu swaere.
mîn juncher dîn sünelîn
und die lieben tohter dîn,
dîn muoter und dîn swester,
die sach ich lebende gester
gesunt. in wirret arges niht
wan daz man sie trûrec siht
und in grôzer swaere
von disem leiden maere.>
der künec was der rede unvrô.
übr al daz her huop sich dô
klage und jaemerlîchez leit
in manger hande trûrekeit.
dârîus der rîche man
vil sêre trûren began
umb sîn herzeliebez wîp,
er wânde ir hieze nemen den lîp
der künec alexander.
sîne hende wander,
er sprach< ôwê mir! waz hân ich
alexander, wider dich
getân daz dû dich niht verstâst
daz dû an mir vergezzen hâst
dîner hôchgelobten tugent
die man lobt an dîner jugent?
dêst ande! ez ist unritterlich
daz dû an einem wîbe dich
als unmanlîche raeche
und al dîn êre braeche
an wîben ze leide mir!
ich getet ez niemer dir
daz als unmanlich waere.>
dô swuor der kameraere
bî sîner gote heilekeit
daz er ir nie getaete leit
und daz er unz an ir zil
ie bute bî im êren vil.
dô nam der jâmers rîche man
den kameraer besunder dan,
er sprach< sag an und triuc mich niht!
wie vuocte sich diu geschiht
daz diu küneginne starp?
ich weiz vil wol, daz si verdarp
von alexanders schulden.> -
< her, bî dînen hulden
wizzest und geloube daz!
nie vrouwe wart behalten baz
noch mit sô grôzer werdekeit.
dêst wâr, mîner vrouwen leit
muot in vil herzeclîche:
der edel tugentrîche
leite sî mit sîner hant,
swer dô vürste was genant,
der muoste zir begrebede sîn.
eine krône guldîn
sazt er ir ûf. sî wart geleit
mit sô rîlîcher rîcheit
daz mans im iemer danken sol.
nâch ir jaemerlîchen dol
trôst er der andern vrouwen pîn
und bat sie vrô nâch leide sîn
und lân ir jaemerlîche klage.
sî diz niht als ich dir sage,
sô müez ich verteilet sîn
iemer mê der hulden dîn!>
dô sprach vil trûreclîche
der herre jâmers rîche
< ôwê, lieben gote wert!
waz ungelückes hât gegert
daz ir mir teilet iuwer zorn
und mir des ist sô vil erkorn?
ôwê hoehster got, waz hân
ich gegen den hulden dîn getân
sô mir sô wênec liebes iht
und liedes alsô vil geschiht?
herre, des ergetze mich
mit dirre bete! sol ich
verliesen krône liute lant,
daz vüege in alexanders hant,
des jugent solher tugent phligt
diu allen tugenden an gesigt,
und lâ genaedeclîche ergân
des dû gein mir wilt willen hân,
ez sî vlust odr gewin,
daz vüege her oder hin
als ez well ie diu gnâde dîn!>
dô der künec disen pîn
leit sô klagelîche,
zehen vürsten rîche
die hoehsten über siniu lant
besanter vür sich sâ zehant
und suochet umbe ein suone ir rât,
er sprach< nû râtet als ez stât
mit wie gewanten sinnen
ich wider sül gewinnen
muoter swester und kint
diu bî alexander sint.>
sie sprâchen< herre ob dû daz wilt,
sô muostû tuon daz dich bevilt,
und muost im lân in sîne hant
beidiu liut unde lant
in sô rîcher mâze
daz er sie gerne lâze.>
er sprach< swie er sie lâzen wil,
des wil mich dunken niht ze vil.
nû vart enwec und saget im,
swaz enzwischen alim
dem wazzer grôzer lande wît
unz an eufrâten lît
und als ellesponte stât
und lîdîâ ende hât,
diu rîchen künecrîche
wil ich im eigenlîche
geben, wil im des gezemn
daz er mîn tohter welle nemn
und mir die andern vrouwen lân.
mînen sun sol er hân
ze gîsel, unz ein suone enein
werde brâht under uns zwein.>
nâch wîser vürsten râte
die boten vuoren drâte
z alexander dâ er lac
unde grôzer vröude phlac.
dô die mâzen vernâmen
daz die boten kâmen,
sie seitenz alexander.
die boten die besander
und dar zuo sîne vürsten gar
in sîn gezelte zuo zim dar.
die boten sageten dô sâ
waz im der künc von persîâ
ze hîstiur und ze suone bôt
und wie er gerne von ir nôt
lôste die gevangen sîn,
taeter es im volge schîn.
ouch wart im danc von in geseit
der küneclîchen werdekeit
die er der küneginne bôt
und daz er klagte sô ir tôt
und er durch sînen zorn nie
kein unvuoge an ir begie
als in gezigen hâte ir man,
und er dâ was unschuldec an.
die boten er entwîchen bat
unz er an der selben stat
gen in beriete antwürte sich
sie wichen. daz was zimelich.
dô sprach der künec< râtet an,
mîne vriunt und mîne man,
wie ich gebâre mich dar zuo,
waz ich antwürte, waz ich tuo!>
dô swigen sie durch die geschiht,
sie enwessen sînes willen niht.
sie sâhen al - ein - ander an.
parmênîôn der wîse man
sprach< her, ich wolde râten dir
ob dû woldest volgen mir
und ob ez riete dir dîn muot,
sît man dir biutet sô grôz guot,
daz dû die gevangen gar
liezest und der vrouwen schar
die bî dir nû sint behaft,
und die gevangen ritterschaft
die wir viengen ze dâmas
dâ der persen hort dô was:
die buten ouch liut und lant
ze ledegunge dîner hant.
daz dû die lâzest, dêst mîn rât.
ir vancniss uns gevangen hât
mangen ellenthaften degn.
ich meine, die ir müezen phlegn
die uns ze staten niender stânt,
wan sie unmuoze mit in hânt.
ouch ist ez umb die vrouwen sô:
ein altiu vrouwe und junger zwô
sint genuoc tiure.
guoter hîstiure
sol mit willen dich gezemn,
dû solt sî willeclîche nemn
und die juncvrouwen wert
als der künec hât gegert.
noch wolde ich gerner volgen des,
als ister und eufrâtes
vliezent, daz ich waere
dâ zwischen âne swaere
gewaltec aller rîche,
dan ich zwîvellîche
mich selben hin gen indîâ
wâgen wolde und gein bactrâ
dar dehein dîn lantman
künde nie hin gewan.
daz zwîvellîche wolde ich lân,
daz groeste guot mit vride hân
daz dehein mîn vriunt an mich
gewunnen haete. daz riet ich,
dem woldich mich niht verren.
der welte dritteils herren
wold ich ze sweher gerne hân.
diz taetich soldez an mir stân.>
der künec smierlîche sprach
dô des vürsten rât geschach
< ich naem ouch vür êre guot
haet ich parmênîônes muot.
nû wil ich hân andern sin,
wan ich alexander bin:
guot wil ich niht vür êre nemn,
vür êre sol dir guot gezemn,
guot und êre wil ich hân.
sol aber ich daz eine lân,
sô lâz ich guot vür êre.
dêst aber niht dîn lêre.
mîn êre ist mir niht veile.
swaz guotes ich mit heile
bejage, daz verkiusich niht.
ob mîn wille mir vergiht
daz sol ich die gevangen lân,
daz muoz âne guot ergân.
ich wolde sie vil gerner gebn
âne guot dan ich mîn lebn
an in durch guot entêrte,
mîn lop durch miete sêrte.
welle er mit mir süenen sich,
sô ergebe er sich an mich
und enphâhe sîniu lant
mit zinse gar von mîner hant.
ez wirt anders niht getân.>
er hiez die boten vür sich lân
und antwurte ir botschaft sus
< danket mir dârîus
der grôzen wirde die ich hân
sînen vrouwen getân,
dat tuot er vil gar âne nôt.
mîn zuht den willen mir gebôt:
ich getet ez nie durch in
wan als mir geriet der sin.
vorht er ouch des daz sîn wîp
von mîner hant verlür den lîp?
des bedorfter gegen mir niht.
mit swem mich iemen strîten siht,
der muoz gein mir gewarnet wesn:
von mîner hant mac wol genesn
ein iegelich werlôser lîp,
ez sî man oder wîp.
ez ist ouch genuoc wunderlich
daz ir waenet triegen mich
sô daz ir bietet mir diu lant
diu ich doch hân in mîner hant.
ir mügt mir wol vrîlîche
bieten disiu rîche,
wan sie sint iu tiure.
die hoehsten hîstiure
die ir mir hât erboten noch,
hân ich gewalteclîche doch.
deist wâr er hât mich gewert
swenn er ze tohterman mîn gert,
der er niht âne werden kan,
si müeze nemen ein sîn man.
hât mich der künec dârîus
werder denne mâzêus
sîn lantvürste an wirde sî,
dêswâr dâ enist niht wunders bî.
ich sage iu gar den willen mîn:
undr uns mac suone niht gesîn,
iuwer herre müeze sich
ân alle widerrede an mich
ergeben eigenlîche
und sîniu künecrîche.
er waent mir êr unde habe
mit vremdem guote koufen abe.
sît daz er sô gewaltec sich
ie dûhte, sô betwinger mich
des er mit vlêhlîchem site
mich sô vlêhlîche bite.
swenn er die hôhen sinne mîn
überkumt des willen sîn,
sô ist im gelungen
und ich bin betwungen.
daz sol ich behüeten sô
daz er iemer werde vrô
des ruomes und er rüeme sich,
er hab überwunden mich
mit bete wes er wolde
und als er wünschen solde.>
die boten sprâchen sâ zehant
< wir sîn alsô niht her gesant
daz wir staeten dir daz dû
muotest an den künec nû,
und râten wir es im ouch niht.
swie erz getuo und ez geschiht,
dz wirt ân unsern rât getân.> -
< mac ez dann alsô niht ergân>
sprach der wîse degen wert
< sô muoz harnasch und swert
den kriec und uns beiden
nâch gelücke scheiden.>
die boten nâmen urloup dâ.
sie gerten eines vrides sâ
drîe tage daz sich diu her
bereiten möhten wol ze wer.
bestaetet wart der vride alsô.
die boten vuoren wider dô
und seiten gar unz an daz ort
waz sie geworben haeten dort.
des was der persen her unvrô.
der künec sprach zen sînen dô
< nû seht, swer vuoge erkennen wil,
daz ich mêre den ze vil
gein alexander wolde hân
umb eine suone getân,
daz mac niemer mê geschehn.
wolderz joch vil gerne sehn
und wolders gern, er müeste sich
ergeben ân alle rede an mich.
mir wart der suone ouch ernest nie
wan daz ich mîne zuht begie
daz ie man durch sînen muot
spraeche daz mir lieber guot
waere danne mîniu kint
diu in sînen banden sint.
ich lâze ouch undr uns beiden
gelücke gerne scheiden
den kriec als er sich scheiden sol,
daz sî übl odr ez sî wol.>
dô diu rede geschach alsus,
der wîse vürste mâzêus
mit drin tûsent helde wart
vür gesant ûf die vart
daz er haete in sîner phlege
beide vürt unde wege,
diu alexander solde dar
komen dô mit sîner schar.
in alexanders reise was
ein vürste hiez mênidas,
den santer vür und hiez in spehn
die vîend und ir kraft besehn
mit der ritterschaft die dâ
hâten die von cîtîâ,
diz wart vil schiere getân.
nû sach er wâ der persân
mâzêus mit den sînen lac
der der wegeveste phlac.
dô getorst er niht vürbaz
wan er des persen vorhte entsaz.
als in mâzêus komen sach,
diu selbe vorhte ouch im geschach,
er wânde daz dâ kaeme gar
des wîsen alexanders schar.
von vorhten er verzagte,
diu vorhte in wider jagte
zuo den sînen sâ zestunt,
und tet in von wârheit kunt
daz der unwandelbaere
künc alexander waere
komen dar mit sînem her.
dô bereite sich ze wer
der rîche künec dârîus,
er scharte sîn her alsus.
von bactriân die ritterschaft
schihter mit werlîcher kraft
schilteshalp vür sîne schar
mit tûsent rittern, die sie dar
hâten in den zîten dô
brâht dem künge dârîô.
den schihter zuo der dâchen her
nâch ûz erkorner ritters wer
mit tûsent helden ûz gelesn
der besten die dô solden wesn,
die swâne und arâcôsî
den reit vier tûsent helde bî
die wurden zuo zin ûf die vart
mit hundert wagevanen geschart.
dô hiez der künec dârîus
daz der vürste bessus
von bactriân der rîche degn
al dirre schar solde phlegn
mit ahte tûsent helden wert.
der massagêten wart gegert
daz si nâch disen scharn ritn.
mit zwein tûsent helden stritn
von sogdîân vil grôze schar
und die die marden brâhten dar,
der phlac arjôbarzanes.
orîombates
phlac des hers von persîâ
daz die persen hâten dâ.
zwei hundert wagevanen hôch
wol bereit man nâch den zôch,
die wâren umbe und umbe wol
ze wer gezinnet unde vol
scharpher lanzen stehelîn.
rûch als ein wildez merswîn
sach man zogen sie dort her,
sô man drinne sach diu sper
al umbe ragen und enbor.
in jegelîchem joche vor
stahten driu scharphe swert.
schützen vrech und ritter wert
sach man die karrâschen tragn.
ieglich rat daz was beslagn
mit îsen vesteclîche wol,
die wâren ouch al umbe vol
krumber îsen diu wol snitn,
deweder bein noch stahel mitn,
der wâren ûf unde nidr
hundert vür, hundert widr
geslagen in die speichen.
swaz sie möhtn reichen
daz snitens hin âne wer.
mit der persen besten her
nâch den karrâschen streit
ein edel degen wol bereit
der wîse vürste orsines.
der hôchgemuote frâdâtes
phlac des hers von kaspîâ
und von der êrsten indîâ
vuort er vil wünneclîchiu her.
die von dem rôten lebermer
vuorten stolze helde fier
die under sîner banier
aldâ solden strîten.
an der linken sîten
wâren disiu her geschart,
nâch in zogten ûf der vart
diu her der sarjande
von iegelîchem lande,
nâch den rotten disiu stritn
als sie vor hin mit kreften ritn.
an die zesewen sîten
scharter die bêlîten
von armênje dem lande
die man die minren nande,
die schihter und ir ritterschaft
zuo der babilônjen kraft.
von dem gebirge ûz cossîôn
was dar ûf ritterlîchen lôn
manec werlich degen komn,
die wurden ouch zuo zin genomn
daz sie bî den selben scharn
mit ir kreften solden varn.
nâch den scharter eine schar
diu verre was gestrichen dar,
die hiez man eubôîzê.
die ellenthaften gortuê
wâren mit den mêden dâ.
sie hâten die von mêdîâ
dâ vor betwungen und dar
brâht mit ellenthafter schar.
von katâô dem lande
was dô vil wîgande
die mit ritterlîcher wer
den persen brâhten michel her,
die solden nâch den strîten sâ
und die schar von phrîgâ,
die parten und die zîten
soldn dar nâch strîten.
nâch den solden kêren
von armênje der mêren
diu her und in strîten bî,
nâch den die vrechen câdûsî
und die von sûrîe.
vil manges trût amîe
hâten dar ir trût amîs
besant ûf ritterlîchen prîs.
der künec zuo zim selbe ûz las
die ritterschaft diu dar was
mit grôzen werlîchen scharn
von kapadôzje gevarn,
die solden im dô strîten bî
und ouch die werden mêdî.
nû gie vor iegelîcher schar
vünfzec wagevanen dar
vest unde guot genuoc,
der iegelîcher schône truoc
schützen, ritter wol bereit.
als ich von jenen hân geseit,
alsô wâren dise ouch hie
ze wer bereit, sus wâren sie
geschart ûf werlîche wer.
dar zuo hât iegelîchez her
sîne sunderwer aldô.
dô zogeten sie vürbaz sô
daz der künec sîne schar
besaehe und schouwete vil gar
sîne grôzen ritterschaft
und sîn küneclîche kraft.
nû hiez der künec über al
daz her summieren und des zal.
an der summen man dô las
daz vünf und vierzec tûsent was
der die dô riten unde stritn
z'orse nâch ritters sitn.
von mangen vremden lande
zwei hundert tûsent sarjande
zogten nâch in ûf die vart.
alsus was daz her geschart.
alsô alexanders her
gesach der persen grôze wer,
sie wâren gar an wer verzagt
und an der zageheit betagt,
wan daz er sie trôste
und von ir zageheit lôste
und vorhtlîche sorg in nam.
dô der ander morgen kam,
mâzêus gâhte harte
an eine hôhe warte
dâ er alexanders schar
übersach kuntlîche gar.
in dûhte ir sô vil daz er jach
ir waere mê denn er dô sach.
hin wider gâhet er dô sâ
und seite den von persîâ,
die mâzen haeten groezer kraft
unde groezer ritterschaft
unde rîcher helfe noch
dan sie heres hâten doch.
er jach sie laegen dâ er lac,
dô er mit wer der wege phlac,
und zogten nâhe und nâher hin
und daz ze strîte stüende ir sin
und sich rottierten ûf den strît.
nû was an der selben zît
diu hitz in dem her sô grôz
daz ob in ein nebel vlôz
sô dicke von des loumes kraft
daz nie man die ritterschaft
möht übersehen gar.
daz brâhte in zwîvel beide schar.
dô hiez alexander sâ
die von peônje wâren dâ
vür hin gezogen unde spehn
diu her und die wege besehn,
der persen wartliut ûf enthabn.
er hiez einen tiefen grabn
die sîne werfen umbe sich.
des tages lieht liez sînen strich
und entweich der trüeben naht.
dô suochte in wîslîcher maht
der künec von den sînen rât
wie sim âne missetât
rieten waz sie dûhte guot.
dô sprach der degen hôchgemuot
parmênîôn der wîse man
< sô wol ich uns gerâten kan
waz uns allerbeste kumt
und zem waegesten vrumt:
die persen vremde liute hânt,
sô vremde daz sie niht verstânt
meisteil ein ander sprâche.
wiltû dîne râche
mit zorne gegen in kêren,
ich kan dich wol gelêren
wie dû an in gesigen maht.
sô aller trüebest sî diu naht
und in rouwe sîn die schar,
sô süln wir uns bereiten gar
mit unsern besten allen,
sô süln wir zuo zin vallen:
ê sie ze wer danne komn,
wir hân in sô die wer benomn
daz uns grôzes schaden niht
von den vîenden geschiht.
ê sie werdn erwecket,
und gaehes ûf erschrecket,
wir hân ir alsô vil erslagn
daz sie müezen gar verzagn.>
der wîse polipercôn
sprach< herre mîn! parmênîôn
mit witzen dich gelêret hât
den aller waegesten rât
der uns alle dunket guot.
die persen sint sô wol behuot,
möhten wir in liut odr habe
mit unser kraft gebrechen abe,
daz waere uns gar daz beste.>
dô sprach der muotes veste
der künec alexander dô
< sage an, dunket dich also?> -
< jâ, herre mîn! ich râtez dir.> -
< nû darf niemen râten mir
daz ich durch sîne liebe
lebe als arge diebe,
die süln dem man lîp und guot
abe steln: dêst niht mîn muot:
die morder süllen morden,
die habent solhen orden,
ich bin hôhes muotes,
wirde und rîches guotes
nâch êren alsô rîche
daz ich in offenlîche
mit kreften an gestrîte wol.
ein morder steln und rouben sol.
ein iegelich ellenthafter degn
sol manheit mit triuwen phlegn.
waz hülfe mich der hôhe muot
ob ich mit solhen êren guot
gewünne nû, dâ von mîn name
müeste dulden wernde schame?
swer mîne vriuntschaft gerne habe,
der tuo sich solhes râtes abe
und sehe daz e'r iht lêre
daz krenke mir mîn êre,
wan des wer ich gerne mich!
ieglîcher bereite sich
dar ûf, wan ich in kurzem zil
in disen tagen strîten wil.>
dô disiu rede alsus geschach,
die herren vuorn an ir gemach
ruowen und slâfen
und hiezen ouch ir wâfen
bereiten gegen dem strîte sâ.
nû vorhten die von persîâ
des parmênîôn geriet.
dârîus hiez al die diet
die naht gewâfent wachen,
vil grôzer viure machen
und in den hern über al
mit trumben heben grôzen schal:
dô slief vil nâch niemen
oder wênec iemen,
ir her vil grôzer huote phlac
durch die naht unz an den tac.
dârîus der wîse man
sîne gote ruofet an
über alexandern.
den wîsen aristandern
besant alexander dô,
daz er riet im alsô
wie er gopherte den gotn,
daz sîner ê was gebotn,
daz lêrtin aristander.
dô ophert alexander
den gotn umbe ir helfe sâ,
dar nâch gienc er slâfen dâ
biz daz diu naht ein ende nam
und der ander morgen kam.
parmênîôn hin zuo zim reit,
im was sîn langez slâfen leit.
der edel degen wîse
den künec wahte lîse.
< herre, sprach er, slâfest dû?
wie slâfestû sô lange nû?
dîn her ist noch ungeschart,
dû hâst dich noch vil ungewart
wie die dîne rîten
nû soltû morne strîten
und hâst dich und dîne schar
noch unbereit ze strîte gar!>
dô sprach der degen wol geborn
< dû maht lâzen disen zorn,
er ist ein teil gen mir ân nôt.
diu ruowe mir den slâf gebôt
daz ich mich sorge entlüede
in der ich ê was müede.
diu hât nû ende ein teil genomn.
nû heiz al die vürsten komn
daz wir uns mit râte scharn
und mit witzen uns bewarn
gein der ellenthaften diet.>
parmênîôn von dannen schiet
gen sîner herberg überz velt,
in alexanders gezelt
besant er die vürsten gar,
die huoben sich vil schiere dar.
der künec ûf gestanden was.
die er ze sînem râte ûz las,
die wâren alle zuo zim hin
komen in sîn gezelt vür in.
der herre muotes rîche
gebarte sô vroelîche
daz sie vergâzen gar ir nôt.
gruoz mit lachenn er in bôt,
des genâdetens im dô,
sîn vröude machte ir herze vrô
und wertin alle zageheit,
diu muostin sîn von im verseit.
dô sie gesezzen wâren
sîn vroelîchez gebâren
und sîn vil güetlich aneblic
gehiez in künftigen sic.
do scharter sîn her alsus:
der ellenthafte clîtus
vor den êrsten rotten streit.
philôtas vor den andern reit
mit werlîcher heldes ger,
dar nâch meljâger
mit stolzen helden ellenthaft,
der phalangen ritterschaft
solder vüeren und ir schar
mit werlîchen helden dar.
argraspites daz her
streit dar nâch mit rîcher wer,
der ellenthafte nîcanor
sold in mit witzen strîten vor
und herzoge zênôs,
den er im ze helfe kôs.
den vürsten oresten
hiez er den linzesten
strîten vor, der ritterschaft
hâte werlîche kraft.
poliperkôn ein wîser degn
der soldenaere solde phlegn
und der vreche amintas.
swaz niuwer ritterschaft dô was
durch in komen in daz lant,
der phlac ein werlich wîgant
phaligrus balacricôs
den er in zeinem vaner kôs
und in vor solte strîten.
an der zeswen sîten
wâren sus diu her geschart
vor alexander ûf die vart.
crâterus der wîse degn
solde werlîche phlegn
der von peloponense
und der schar von lôkrense.
nâch den solden strîten sâ
die von achâje wâren dâ.
vor den solde malêôn
ûf ritterlîchen ritters lôn
werlîche rîten.
die an den selben zîten
von tessâlje wâren dar
gevarn mit vil grôzer schar,
die wurden nâch in ûf die vart
mit ir ritterschaft geschart,
den wart ze vaner dô gegert
philippes eines vürsten wert
der ir herzoge was.
die besten er dô gar ûz las
daz sie diu herumbe ritn
und aldâ niht anders stritn
wan daz sie wol behuoten
daz die hôchgemuoten
ie man ze rücke an wande
swâ man sie ane rande,
daz sie dâ gegen hielten,
der her mit huot wielten.
daz was diu schar von agrîân.
die schützen wurden zin gelân,
die von crête kâmen dar,
attalus phlac der selben schar.
sus wâren schilteshalp diu her
bewart mit ritterlîcher wer.
die von illîrje wâren dâ
und diu her von trâzîâ
und die solt von im nâmen
und durch solt dar kâmen,
die hiez er ze jungest varn
undr ougen halten gegen den scharn,
die rücke wenden gegen den hern
und der persen kreften wern
ze rücke und ouch ze sîten.
swâ man sie wolde an rîten,
dâ was daz her mit manheit
allenthalp ze wer bereit
mit kraft gein vîentlîcher nôt.
alexander dô gebôt
die vürsten die dô vor hin stritn,
sô die persen an sie ritn
und ir wagenvanen vür
schihten mit werlîcher kür,
daz sie sie dannen liezen gân,
sô haeten sie vil guoten wân
die mâzen waeren âne wer.
al sie danne solhiu her
zuo zin geliezen rîten
den sie möhten gestrîten,
daz sie ûf die kêrten widr
und die wagene hiewen nidr
und ûf sie machten ein geschrei,
sô braechin gar ir kraft enzwei.
die gevangen geste
liez er in guote veste.
selbe wolde er rîten
an der zeswen sîten.
parmênîôn zer linken reit
mit ritterlîcher werdekeit.
bîôn ein degen wîte erkant
z alexander kam gerant
und seitim solhiu maere
daz ûf dem velde waere
geströuwet an dem selbn zil
wasser vuozîsen vil
dâ sie solden rîten hin.
dô hiez er behalten in
und hiez an der selben stunt
den sînen tuon diu maere kunt
daz sie dâ vor sich huoten.
die werden hôchgemuoten
der stolze degen trôste,
von zwîvel er sie lôste,
mit sîner bete manter sie
daz sie an wer verzagten nie
und daz sie des gedaehten,
ir prîs sie vollebraehten,
daz sies iemer mêre
haeten prîs und êre.
< ich troeste iuch> sprach der degen balt,
< kumt in unsern gewalt
persîâ daz rîche,
sô muoz sich ledeclîche
der welte dritteil asîâ
uns zinsen und dienen sâ.
nû wert iuch! sie sint sigelôs,
ir kraft nie sic an uns erkôs.
her an sült ir gedenken wol.
ich weiz wol daz sich enden sol
ûf disem velt unser nôt:
ir werist hin, ir kraft ist tôt.
nû ellenthaften helde wîs,
kroenet iuwern hôhen prîs
und iuwer hôchgemüete,
gedenket wîbes güete
und traget durch sie hôhen muot,
daz ist ze mannes manheit guot!>
diz lobten sie dem helde wert,
als es mit bete wart gegert.
nû was alexanders her
geschart gen manlîcher wer.
der liehte tac ein ende nam,
diu naht mit ir trüebe kam.
dârîus sich dô versach
der vorht als ich ê verjach,
daz im alexanders schar
in die herberge rante dar.
er hiez sich und sîn her
behüeten wol mit rîcher wer.
die ritter er besante dar,
die dô wârn in sîner schar,
er sprâch< vriunt mâge man,
nû gedenket wol her an
daz wir sô grôze ritterschaft
und alsô manlîche kraft
alhie in unser helfe hân,
und wolde uns al diu welt bestân,
wir solden doch vil wol genesn.
swâ wir vlühtec sîn gewesn,
daz kam von grôzer ungeschiht
und von unser zageheit niht.
dô memnôn den lîp verlôs
und ritterlîchez ende kôs,
dô was alexanders kraft
groezer und sîn ritterschaft
danne mit dem vürsten dar
kaeme werlîcher schar,
des muosten alexanders man
im den sic erstrîten an.
in zilîzje was mîn her
alsô grôz und mîn wer
daz ich alexandern gar
versmâhet und sîne schar,
des wurden wir dô überritn,
entschumphiert und überstritn.
daz mac nû niemer mê geschehn,
welt ir an unser krefte sehn.
hânt uns alexanders man
lande ein teil gewunnen an
unde rîlîcher habe,
dâ sült ir niht erschrecken abe.
hât er uns leides iht getân,
des er sol z buoze stân,
daz muoz der tôrheit rîche
uns büezen lesterlîche,
welt ir solhe manheit hân
daz ir ein ander welt gestân,
mit triuwe ein ander meinen:
ie sehse vür einen
hân wir gegen der mâzen hie.
nû gedenket rehte wie
und warumb unser strît geschiht:
wir strîten nû durch anders niht
wan umbe guot mâge und kint
diu uns aller liebest sint.
welt ir mannes manheit hân,
sie geturren niemer uns bestân.
nû ellenthaften helde wîs,
helfet iuwern ritters prîs
und iuwer guot, mîn êre wern!
ich wil des bî den goten swern
daz ich von disem plâne
niemer siges âne
oder sigelôs wil komn,
in habe werden sic genomn
odr ich sî sigelôs gelegn!
sammir der gote hoehster segn
von den ich künc geheizen bin,
und gesige ich hie an in,
ich lâze ir einen leben niht
den man gen uns hie strîten siht!
nû sît vrô und hôchgemuot.
swer mir hilfet nû mîn guot
beschirmen und mîn êre,
den rîche ich iemer mêre.
gedenket an die vrîheit
diu von art iu ist bereit:
iu dienet eigenlîche
vil manec wîtez rîche
und sît ir niemen undertân.
dêst wâr unz ich mîn leben hân,
ich urbor mich alsô, welt ir
getriuwelîche helfen mir,
daz wir den sic erstrîten
und wir sie überrîten
und âne wer gesigen an.>
des lobten alle sîne man
ir helfe im helflîche.
des wart er vröuden rîche.
nû beidenthalp der künge her
wurden ûf manlîche wer
sunder gerottieret,
gein wer gordinieret,
alexander sich beriet
ob er die hôch gemuoten diet
vriunt man und mâge
vor der vuozîsen lâge
möhte wîslîche bewarn
und die lâg umbevarn
sunder leit gar âne nôt.
sînen rotten er gebôt
daz sie kêrten mit im sâ
hin dâ der künc von persîâ
mit sîner massenîe lac,
der vil hôhes muotes phlac,
als im mit rehter wârheit
bîôn ê hâte vor geseit.
die mâzen sich rottierten,
ir hôhen muot sie fierten,
ir geherzet herze was
hert als ein herter adamas
gegen der wer ûf disen strît.
daz in dâ vor sô mange zît
an strîtenn ie sô wol gelanc,
daz starcte ir manlîchen gedanc.
gein wer sie sich bereiten,
der zît sie kûme erbeiten
daz man den tac ûf dringen sach.
manlich was ir ungemach
und ir unmuoze aldâ.
dar nâch begundez tagen sâ.
dô bereite sich ze wer
des werden alexanders her,
sie truogen ellentrîchen muot,
die ellenthaften helde guot
sach man schône zogende varn
durch daz gevilde mit ir scharn
an den künc von persîâ.
der was mit grôzen vröuden dâ.
dô drungen beidenthalp diu schar
gemach wol ûf ein ander dar.
dô kam mit werlîcher wer
der vrechen bactrânen her
gegen den mâzen dar geritn.
dô drungen mit werlîchen sitn
nâch in die dâchen ûf die vart
und die dô wâren zin geschart,
die wîsen arâcôsî,
den sie swâne riten bî.
dô was mit ritters manheit
clîtus werlîche bereit
gegen den persen schône.
in vîentlîchem dône
huop sich ein vîentlîcher schal
der in den rotten lûte erhal
von reisenoten süezen.
der dôn begunde grüezen
ors und liute beider schar
mit floitenspil vil suoze dar,
dô sie z ein ander gâhten.
die rotten sich dô vlâhten:
schilte und sper von stichen klubn,
die sprîzen von den scheften stubn
obe den vrechen helden stolz
als dâ man houwen siht ein holz
dar ûz die spaene springen.
hurten und dringen
sach man mit ritterlîcher kraft
ûfn ander dô die ritterschaft.
ûf die schar reit clîtus.
dô gevuoctez sich alsus
daz clîtus ir vaner sluoc,
des herze ein manlich ellen truoc,
und dar nâch die fier schar
mit wer verzagten alsô gar
daz sie âne wer verdurben
wan in die besten sturben.
ir hoehste vaner bessus
entweich, dô sich clîtus
ûf in mit zorne kêrte,
er weich: sîn wîchen rêrte
mangen stolzen wîgant
nâch im tôt ûf den sant.
dô kam arjôbarzanes
und orîombates
ze helfe den bactrânen
mit den sogdiânen
und mit der marden ritterschaft,
die wâren vrech und ellenthaft.
des hôrte man sie dicke manen
mit den zwein hundert wagenvanen
von den ich hân gesprochen ê,
die schadeten den rotten mê
( und leiten mangen degen tôt)
dan ander wer die man in bôt.
dô weich in clîtus an der zît
und machet eine strâze wît,
als ez was ê gerâten,
dem her sie schaden tâten.
dô wart ein niuwer schal vernomn
dô sie zen mâzen wâren komn,
die wichen überz velt hin dan:
dâ dannoch alexanders man
und ê daz her gelegen was,
dô kam in philôtas
der edel vürste hôchgemuot
mit niuwen helden wol behuot
nâch ritterlîcher manheit.
dô wart als uns daz maere seit,
alrêst der strît mit zorne grôz.
swaz man dô stach, sluoc odr schôz,
daz ahten die von persîâ
zeinem kleinen schaden dâ,
sie wâren an wer unverzagt.
mit kreften stille und unbewagt
sach man die karrâschen stân,
darumb wart schaden vil getân
von den sie wâren wol geladn.
in kunde nie man geschadn,
in mohte niemen nâhe komn,
des wart dô schaden vil genomn.
der werde philôtas
der der mâzen vaner was,
tet mit sîner manheit
den persen unverklagtez leit,
iedoch muost er entwîchen
den werden muotes rîchen.
dô diz geschehen was alsus
und der vürste mâzêus
sach daz philôtas
der persen her entwichen was,
er gâhte bald überz velt
hin in der herbergen gezelt
dâ die gevangen lâgen
der die mâzen phlâgen;
er vant alexanders her
unbereit gen im ze wer,
er sluoc sie alle die er vant,
er brach die boug und diu bant
dâs in versmidet wâren.
dô wart ir gebâren
von lieben maeren vroelich,
sie versâhen alle sich
alexander der degn
waere sigelôs gelegn:
des sie der vürste trôste,
der sie von banden lôste.
der wîse helt polîdâmant
z alexander kam gerant
und seitim disiu maere,
wiez ergangen waere.
dô wart der werde amintas
der von art ein vürste was,
in gesant ze helfe dar
und arêtes mit grôzer schar
gegen der schar von zîtîâ
die mâzêus hâte dâ.
den verjagten sie von dan
und sluogen im sîne man
und ouch der zîten herzogn,
der was an manheit unbetrogn.
die gevangen sie behabten doch
gevangen in den banden noch.
dô kam mit vrevellîcher ger
der vürste melêager
mit der phâlangen ritterschaft,
die brâhten ritterlîche kraft.
dô gâhten die karrâschen:
ûf hôher hielten dô die schar
biz sie dô umbesluogen
die die karrâschen truogen.
dô schrê melêager
ûf si mit vrevellîcher ger
< harte ûf sie! lâ sie niht hin!
verswunden ist diu wer an in.>
daz her ûf sie genande
als sie der vürste mande.
dô was daz getemere grôz,
dicker dan ûf anebôz
der smide slege erknellen,
hôrte man dô hellen
die slege ûf helme herte,
die man sô sêre berte
daz die geneistern dicke
mit mangem viures blicke
ûz den helmen sprungen.
die mâzen diu her drungen
mit slegen und mit stichen
daz sie an sie wagen wichen.
des twanc sie melêâger.
dô rigen sie sich an diu sper
dâ von sie schaden vil erkurn,
wan sie dô mangen helt verlurn.
daz gesmîde gar zerbrach
swaz dâ sneit oder stach,
daz an die wagene was geslagn,
als ir mich ê hôrtet sagn.
in der wîsen mâzen her
sich begunde ritters wer
mit staeten kreften niuwen.
die karrâschen sie hiuwen
und valten und ersluogen
die sich ze wer dar truogen.
nû gâhete philôtas
dâ arjôbarzanes dô was
und twanc den wîsen wîgant
vlühte dô mit sîner hant.
dô dranc mit ritterlîcher wer
meljager durch daz her
dâ orîombates dort streit
mit werlîcher manheit,
und stach in nider ûf den sant.
dô beschutten in zehant
die sîne und liezen in niht hin.
daz dûhte sie ein grôz gewin,
daz sie in behabten dâ.
dô kam in niuwe helfe sâ
die der vürst orsines
brâht und phrâdâtes
von kaspîâ mit grôzer wer.
die von dem rôten lebermer
wârn, der phlâgen sie dâ
und der her von indîâ.
mit den drungens in den strît.
dô huop sich an der selben zît
mit ernest angest und nôt,
dô lac sô vil der persen tôt
daz in die mâzen vürbaz niht
entwichen - des diu wârheit giht.
von der zeswen sîten
kâmen die bêlîten
und die von armênje dar.
der persen brâhte grôze schar
ûf die von mâzedônje.
die von babilônje
nâch disen rotten drungen.
dô wurden sie betwungen
mit menig und mit überkraft
daz sie mit ir ritterschaft
werlôs wurden an ir wer
und wichen widr unz an daz her.
die persen huoben grôzen schal
der in dem her vil wîte erhal,
und schalten mit vroelîchen sitn
als sie den sic haeten erstritn.
argraspites diu schar
kam mit grôzen kreften dar,
den der vürste nîkanor
streit mit ritters kreften vor
mit werlîchem prîse,
und zênôs der wîse
der im ze helfe was erkorn,
in was der persen schallen zorn.
sie brâchen in liut und habe
mit zornlîchen siten abe,
doch hâten sie sô rîche wer
daz vürbaz weich der mâzen her
und grôzen schaden nâmen,
swie werlîche sie kâmen.
dô sach man oresten
mit den vrechen linzesten
den mâzen helfe bringen.
nâch den sach man dringen
mit ir wer vil schiere
die werlîchen soldiere
die brâhte wol bereit alher
der ellenthafte poliper.
niuwe komende ritterschaft
brâhte und werlîche kraft
der muotes rîche amintas.
nâch dem gerottieret was
phaligrus balacricôs
der nie ritters prîs verlôs.
mit grôzen rotten in den strît
kam er gedrungen an der zît
und vrumet angest und nôt.
dô lac sô vil der persen tôt
daz in brach ir wer enzwei.
dô wart ûf sie sô grôz geschrei
daz die persen disen dôn
erhôrten. die von cassiôn
kâmen in ze helfe dar
mit vil krefterîcher schar,
nâch den die starken gortuê,
die vrechen eubôizê
und die catâônîten.
die parten und die zîten
und die küenen kâdûsî,
die riten den armênjen bî.
von sûrîe und phrîgîâ
die kâmen mit ir helden sâ
gedrungen zuo der persen schar
mit vîentlîchen kreften dar.
dô was diu kraft und ouch diu wer
sô grôz von iedewederm her
daz niemen noch den sic gewan
und ouch dô nie man entran.
die muotes rîchen vürsten hêr
vrumten leit und herzesêr
an der grôzen ritterschaft.
dô wuohs mit zornlîcher kraft
sunder liep grôz herzeleit
mit angestlîcher arbeit
an den wol gebornen.
die wîsen ûz erkornen
vil vrevellîche ûf nander ritn
mit sô vîentlîchen sitn
daz dô manec helt verdarp
der dicke hôhen prîs erwarp.
dârîus dô selber streit
mit ritterlîcher werdekeit
mit sîner ûz erwelten schar
die von capadôzje dar
im ze helfe wâren komn.
ouch hât er an sich genomn
die schützen die im ritten bî.
die persen und die mêdî
kâmen ouch mit kreften dar
mit manger ellentrîcher schar.
dise rotten kâmen dô
mit dem künge dârîô
gedrungen in die reise.
die worhten mange vreise
an den hôchgemuoten
die sô mit wer sich huoten
daz sie niht möhten in geschadn.
doch wurden sie sô überladn
mit grôzer überwegender wer
daz sie entwichen gar dem her,
des betwanc sie dârîus.
dô kam gevarn krâterus
mit der schar von lôcrense
und von pêloponense,
mit grôzer werlîcher wer
von achâjâ michel her
brâhte ûf ritterlîchen lôn
der rîche vürste malêôn.
dô wart vil rûch diu slihte,
vil krump diu rehte rihte,
diu wîte wart vil enge,
mit grôzem gedrenge
wart in des strîtes vreise
gemachet manec weise
und manec riuweclîcher mâc.
dô wart der zorn und der bâc
mit zornlîchen siten grôz,
dô rotte sich ze rotten slôz.
nû wâren die von persîâ
mit volleclîcher helfe dâ
und mit al ir ritterschaft.
diu überwegend überkraft
betwanc alexanders man
daz sie muosten wîchen dan,
unz alexander mit wer
brâhte hôchgemuotiu her
mit wol bereiten rotten grôz.
der sluoc, der stach, vil manger schôz
daz die phîl sô dicke vlugn
daz sie der sunnen schîn bezugn
sô gar daz ir lieht verswein
und abe dem strîte kûme schein.
die phîl sô dic dô wâren
daz sin schaten bâren.
dô sach man zuo zin dringen
die betschelier mit slingen
die ieglîcher sêre warf.
swes ie man ze wer bedarf,
daz wart vil gar dô vunden
an den die strîten kunden:
der hurte den mit kreften nidr,
dô dranc diu schar die ander widr,
der wart ertreten, der erslagn,
den sach man strîten, den verzagn,
der sluoc den, der den andern.
dô sach man alexandern
und den rîchen persân
vaste dringen ûf den plân
ietwederhalp mit grôzer wer.
dô wuohs schaden vil dem her.
dô wâren beidenthalp die schar
als geparrieret gar
daz sie sich sêre wunden
und sich sô wern kunden
daz ir wern mangem war
der sich war ûf strîten dar.
mit lanzen und mit gêren
sach man ze samene kêren
der vrechen sarjande her.
die ritter phlâgen ritters wer,
die nît mit hazze truogen,
sie stâchen und sluogen,
man sach sie zorn ein ander tragn,
des wart dô manec helt erslagn.
als alexander bevant
daz mit werlîcher hant
die sîne nôt mit kumber litn
und doch sô werlîche stritn
daz der vînde vil ir lebn
muosten dôze phande gebn,
gegen der herte er kêrte:
sîn kunst ir mangen lêrte
sterben und lîden nôt,
sîn strît in solhe vorhte bôt
daz sie vluhn alsô er kam.
vil maneger dô sîn ende nam.
dô machte manec tôdes mâl
sîn ors der vreche bûzevâl,
ez kunde strîten als ein man,
ez truoc in hin her und dan,
ez dranc, ez stiez, ez sluoc, ez stach,
die schar ez aller zît durchbrach
beide wider unde vür
in sô vrevellîcher kür
daz man sîn hurten spurte.
swâ er den strît hin hurte,
sie sluogen, stâchen, schuzzen gar.
nû was sô grôz der persen schar
daz sie vil schaden nâmen.
sie kunden niht gerâmen
der mâzen wan vil selten ie,
dâ von der groeste schade ergie.
her under wuohs der persen nôt:
sie lâgen von ir vriunden tôt.
dô vrumten mangen siechen
die mâzen und die kriechen,
die alexander brahte dar.
swâ sie sach der persen schar
zuo gâhen, dô verzagte ir wer,
sie sluogen âne wer daz her, -
niht âne wer, doch was ir wer
verdorben gegen der kriechen her.
die werden helde wol geborn
vielen sam daz rîfe korn
von des hagels vreise tuot,
des heres viel dô manec vluot.
vil kleiniu zal gap tûsent dâ,
dô der helfaer von persîâ
sament zehen tûsent lac,
die zal man dannoch ringe wac.
der sarjande wer gebôt
der vînde toetlîche nôt.
ir kraft began sich niuwen,
die wagene sie zerhiuwen
und valten und ersluogen gar
die sie getragen hâten dar,
wan âne die zwei hundert
wâren ûz gesundert
vünve z iegelîcher schar
die grôze helfe brâhten dar
dem künege von persîâ,
die wurden gar verderbet dâ.
parmênîôn der wîse degn
der schilteshalp dô solde phlegn
alexanders ritterschaft,
vaht in vîentlîcher kraft
daz ir vil sterben lêrte.
der persen helfe rêrte
die helfer dicke und dicke.
in mangem leiden stricke
was beidenthalp diu ritterschaft
in angestlîcher nôt behaft.
mâzêus der der wege phlac
und die strâzen ê verlac,
was komen vîentlîche
mit helden muotes rîche
und dranc ûf alexandern hin.
dô wanter bûzevâln ûf in
und twanc in daz er kêrte,
die sîne wîchen lêrte
und aber wider kêren,
daz vrumte mangen sêren.
dô dranc zênôs der vürste dar
und durchbrach die vînde gar
von ende z ende hin und her.
dô drungens hin, der und der
ûfn ander, beide die und die.
nû wâren vreche schützen hie
die schuzzen ûf sie sâ zestunt.
dô wart er sô sêre wunt
daz er kûme sît genas.
dô kam der vürste mênidas,
der wîs unverdrozzen,
der was ouch nâch erschozzen,
wan er an den stunden
enphie vil grôzer wunden,
dô er ûf die persen dranc
sô sêre daz er sie betwanc
mit slegen und mit stichen
daz sie den mâzen wichen.
dô gevuocte ez sich alsus
daz der vürste mâzêus
sêr überdrungen wart,
dô jaget er die widervart
und vlôch gein babilônje.
diu her von mâzedônje
wârn in wahsender kraft,
sô wîs und sô ellenthaft
wâren sie mit manheit
derhalp dâ alexander streit
daz sie mit vroelîchen sitn
der persen her gar überstritn.
dô kam der vürste perdiccas
der grôzer rotten vaner was,
mit ephestîône
hin zuo parmênîône
der vil nâch was überhert.
ê daz mit kreften wart erwert
mit ritterlîchen dingen
ûf sie der persen dringen,
dô huop sich nôt und arbeit
und manger hande herzeleit.
die vrechen wîsen jungen
mit grôzen kreften drungen
hin und her durch al die schar.
ûf ephestîônen dar
kam gevarn ein vürste sâ
wîse und wert von persîâ.
durch den arm er in stach.
ephestîôn die wunden rach
und sluoc in daz er tôt gelac.
der mâzen her vil vröuden phlac.
in grôzer unmuoze was
der rîche vürste perdiccas
mit strîte lange wîle,
mit mangem herten phîle
wart er ouch wunt unz an den tôt.
dô wuohs êrst der persen nôt,
sie begiengen schiltes amt
tûsent tûsent vielen samt,
unz in wart der sic benomn
und sie von wer wâren komn.
mit disen noeten sach dô sus
der rîche künec dârîus
mit werlîchen dingen
die sîne sêre ringen.
sîn manlich muot im gebôt
daz er vil gerner laege tôt
danne er solde sehen an
sô mangen ellenthaften man
durch in lîp unde lebn
dem tôde durch sîn êre gebn.
er was in klagender pîne,
dô rieten im die sîne
daz er der witze wielte
und er den lîp behielte:
lebt er, ir möhte werden rât.
der rât dûht in ein missetât,
er kêrte wider in den strît
und wert an der selben zît
die sîne und ouch sîn êre
nâch manlîcher lêre.
dô huop sich niuwe klagendiu nôt,
dô lâgen êrst die besten tôt
dârîus vor den sînen streit
mit vil grôzer manheit
biz daz im entweich sîn her
und dem her entweich diu wer.
die mâzen riefen< phîâ phî!
hurt ûf sie hin! schrîâ schrî,
nû hin ûf die verzagten schar,
sie sint an wer verdorben gar!>
sie ruoften und sungen,
sie hurten und drungen,
sie sluogen und stâchen,
schaft und schilt sie brâchen,
sie sluogen ors unde man
und swaz sie dô kâmen an,
unz sie verzagten an ir wer
der ellenthaften persen her.
dô der schal und ouch der dôz
in dem strîte was sô grôz,
attalus der wîgant
kêrte sich dar zehant
mit der schützen vrechen schar
die von crête kâmen dar,
und mit dem her von agrîân
daz er ze helfe solde hân,
mit den er nâch den rotten strite,
ob man sie ze rücke an rite.
mit sîner grôzen kraft er kam,
dô er der mâzen schal vernam.
sus dranc der degen werhaft
ûf der persen ritterschaft
mit helden wol geruowet gar.
die liezen der persen schar
mit ir wer ze wer niht komn
ê daz in wart diu wer benomn
sô gar daz sie begunden
vliehen an den stunden,
ze vluht was in ze nôt vil gâch.
des jagten in die mâzen nâch,
niemen meit die vluht aldâ,
swer dô was von persîâ,
die huoben âne wer die vluht,
sunder milte vriundes zuht
jagtens vîentlîche
die kriechen muotes rîche.
diu vluht vil sêre girret wart
von den wagenen ûf der vart.
der was als ich hoere sagn,
sô vil zerhouwen und zerslagn
daz sich die persen und ir man
sêre verbarrierten dran
und liezen sie niht komen hin.
daz was ir groester ungewin.
dô vlôch der künec dârîus
hin dâ der grôze lîkus
durch daz selbe rîche vlôz.
ein brücke wît hôch und grôz
gienc übr daz selbe wazzer dâ.
dem künege von persîâ
was ze vlühte drüber gâch,
dô vluhen im die sîne nâch,
des twanc sie alexander.
von einem stade anz ander
diu brücke wart geladn wol,
si wart von menig alsô vol
daz sî der grôz überlast
druhte nider daz si brast
und ze grunde versanc:
des heres harte vil ertranc,
an der vluht nie man genas
wan der unmâzen wênec was.
die dô niht möhten überkomn,
den wart daz leben dô benomn
ûf der wîten rifiere.
dô wart verendet schiere
der persen groestiu hêrschaft,
aldâ verswant ir bestiu kraft
die sie an mangem lande erstritn
mit gewalteclîchen sitn.
lant und liute hâte ir hant
betwungen vil, in was benant
der welte mônarchîâ,
der phlac der künc von persîâ.
( daz ist in tiusche sundergewalt).
dârîus der degn balt
hâte dise hêrschaft
gerbet und mit sîner kraft
betwungen mangen herren grôz,
künge, herzogn genôz,
daz sie zinsten sîner hant
ir grôze hêrschaft und ir lant.
daz brach in alexander,
die persen überwander
des sie dâ vor vil lange zil
überwunden lande vil.
nâch der âventiure sage
wart in an dem selben tage
ir wer, ir rîlich hêrschaft
gar verswendet und ir kraft.
des vröute sich der mâzen schar.
drîzec tage teilte gar
alexander den gewin
der dô gewunnen was an in.
den goten er mit opher bôt
grôz êre. die dô wâren tôt
die hiez er begraben sâ,
die sîne und die von persîâ.
diz was sîn site des er phlac.
swer wunt oder tôt gelac,
des hiez er nâch dem rehte phlegn
als ez danne was gelegn.
wie vil der persen was erslagn,
des kan ich iu niht gesagn
wan daz diu âventiure giht,
die mâzen kunden gahten niht
mit wârheit der tôten zal.
sie vunden ligen in der wal
sehzec tûsent erslagn
die man sêre hôrte klagn.
dise zal sie vunden:
niht vürbaz sie kunden
der tôten zal geprüeven dâ
der helfaer von persîâ
die in dem strîte sturben.
der und die dort verdurben
in des grôzen wazzers vluot,
kunden die helde hôch gemuot
mit der zal gerâmen nie,
an den des tôdes val ergie.
diu schrift der rehten wârheit
hat uns gewaerlîche geseit
daz ê dâ vor nie noch sît
geschach dehein sô grôzer strît
dâ sô manec man sîn lebn
verlür unde müeste gebn.
dô was verendet, daz ist wâr,
nâch jenen zwein daz dritte jâr
daz er die persen êrste an reit
und mit ir helfaeren streit.
was in den selben zîten
in allen disen strîten
liute tôt gelegen was,
daz sage ich iu als ich ez las:
vünfzehen stunt tusent hundert.
swen dirre zal nû wundert,
der sol gelouben daz ez got
gebôt: ez was sîn gebot
und wold al die heidenschaft
twingen mit des heldes kraft,
durch daz liez er ergân alsus.
daz giht der wîse jôsephus,
der rehte und der gewaere
und ander buochmachaere
der iegelîches wârheit
von im grôziu wunder seit.
sît er mit gotes helfe streit
und im diu was ie bereit,
des sol man güetlîch âne haz
die zal gelouben dester baz
von der wir hie sprechen:
got selbe wolde rechen
an der vorworhten heidenschaft
sînen zorn mit der kraft
diu mit hôher wîsheit
an alexandern was geleit
und die er im gap durch daz
er im raeche sînen haz.
swer wider gotes gebote lebt
und wider sîne hulde strebt
und im des niht ze buoze stât
durch sînen süntlîchen rât,
dem tuot er ie etewaz
dâ mit er an im richet daz.
sus rach alexanders kraft
got an der grôzen heidenschaft
und sînen wol verdienten vluoch.
hie endet sich daz dritte buoch
von alexanders getât.
diz buoch alhie geteilet hât
in maneg âventiure sich,
wan die âventiur sint mislich
durch daz nenne ich aber al
an disem buoche solhe zal
als ir mê dan einez sî, -
dem einen wonent gnuoge bî -
und hât doch niht wan einen namn
von dem werden lobesamn.
wie er persîam betwanc,
hebt sich des vierden anevanc. iv
ez waere unlobebaere,
swer lop mit lobe baere
dem der alwaere
an hovesite waere:
daz wir den lobebaeren
lop mit lobe baeren,
daz waere reht, ez solde sîn.
swem in dem gemüete sîn
sô liep und alsô maere
dâ sint diu selben maere
daz sim wellen maeren,
dem wil ich hie maeren
wie der wîse degen wert
sô hôhes prîses wart gewert
daz niemen kunde werden
geprîset vor dem werden
an ritterlîchem prîse,
den lop ich an im prîse. -
swer dirre welte prîses ger,
der sol niht vürbaz dan her
kêren und suochen
an den gewaeren buochen
wie manger hande werdekeit
den mit lobe was bereit
die vor uns sint gescheiden hin,
mit vlîze lernen daz an in
wie sie nâch êren strebten
die wîle daz sie lebten,
juden kristen heiden
swer im daz lât bescheiden
wie kiusche sie behielten
ir orden und des wielten
und iedoch der welte prîs
bejagten in vil mange wîs,
der mac sich wol gebezzern dran,
ez sî wîp oder man,
ob er der lêre volge giht
die er dar an geschriben siht.
der selben maere hân ouch ich
eines underwunden mich
daz guoter lêre waltet,
swer gerne sî behaltet,
und hân dem nâch gesuochet vil
als ich iuch bescheiden wil,
von wem diu âventiure
hât deheine stiure.
die hân ich vil nâch vunden gar,
nâch den ich gerne volle var.
nû hoeret rehte wer die sîn!
dô der künec constantîn
truoc mit gewalte schône
die roemische krône
und er mit dem rîche was
ze constenôpel als ich las,
ze rôme hât er gelân
die im wâren undertân,
zwêne rihtaere
reht und unwandelbaere,
jôhannes und marînus,
die herren beide hiezen sus,
die solden neizwaz enden
und einen boten senden
dem keiser hin ze kriechen dô.
nû was der wîse lêô
ze rôme ein meister alsô wîs
daz von kunst der hoehste prîs
an im sô meisterlîche lac
daz er mit lêre ir râtes phlac.
der wart ze kriechen in daz lant
ze boten dô von in gesant,
der solde in wîslîcher kraft
werben s rîches botschaft.
dô der dem keiser tet erkant
warumbe er waere dar gesant,
und der künec sich beriet
waz er enbute sîner diet,
lêô begunde suochen
an kriecheschen buochen
etelîchiu maere,
diu waeren sô gewaere
daz er niht taete wider gote
und wider sînem gebote,
ob er ir schrift berihte
und in latîne tihte
und ze bezzerunge kaeme,
swâ man sî vernaeme.
nâch sîner gernder suoche
vant er dô vil buoche
diu er complierte,
die schrift dâ mite zierte.
bî andern buochen vander
waz von alexander
aristôtiles ê schreip.
in des râte er ie beleip,
nâch des gerihte er tihte
in latînscher rihte
wie er geborn der welte wart
und waz er ûf sîner vart
wunderlîcher wunder vant,
wie er mit kreften überwant
elliu künecrîche.
daz seiter kurzlîche, -
die geburt und sîniu wunder
seiter gar besunder
und lât die strît ungeseit,
die er bî sînen zîten streit.
mit disen maeren kêrter widr
und schreip sie disen herren sidr.
dâ diu maere an im belibn
ungeseit und ungeschribn
dâ nam sie curtus rûfus,
ein wîser phaffe hiez alsus,
und schreip ouch in latîne
gar die strîte sîne
die er streit mit sîner hant,
und wie er gar betwanc diu lant. -
waz er mit den juden ie
grôzer wunder begie,
daz seit der wîse jôsephus.
der heilige metôdîus,
kristes martelaere,
der schreip von im diu maere
wie er gog mâgog beslôz,
die vervluochten künne grôz,
und wer diu vrouwe olimpîas
von art und von gebürte was
und wie ez umb die vrouwen kam,
dô alexander ende nam.
nâch der urkünde wârheit
die ieglîcher von im seit,
hân ich gesuochet lange her
und hân nâch mînes herzen ger
vunden ir aller stiure
die sie der âventiure
gegeben hânt mit wârheit,
als ir gewaeriu wârheit seit.
nâch der wil ich vollevarn,
die wârheit an der tiusche bewarn
daz ich dar zuo spriche niht
wan des diu âventiure giht,
und wil vürbaz sagen hie
wie ez nâch dem strîte ergie.
dô der strît ergangen was
von dem ich iu hie vor las,
dô kam der künc von persîâ
in die stat z arbêlâ
vlühtec wol ze mitter naht.
im was entwichen gar sîn maht,
er was trûrec, niht ze geil,
er vant dâ sîner manne ein teil,
die bat er sâ im rât des gebn
wie er taete und solde lebn,
wan im der edel werde man
haete gar gewunnen an
lant veste und rîche
alsô gewalteclîche
daz er vil kûme möhte wesn
dâ er möhte genesn
in wîten landen. er beriet
sich aldâ mit sîner diet
daz er kêrte sâ zehant
in sîniu engesten lant.
er vorhte unzwîvellîche
daz elliu sîniu rîche
sûsîs und babilônje
die von mâzedônje,
des wîsen alexanders her
gar betwungen âne wer.
von vorhten er verzagte,
der zwîvel in verjagte
daz er vlôch gen mêdîâ
und wolde sich enthalten dâ
in starken engen vesten
vor den unsanften gesten.
dar nâch vil kurzlîche
kam der muotes rîche
der künec alexander dâ
in die stat z arbêlâ,
diu gap sich im âne strît.
dâ vant er an der selben zît
von persîâ des künges hort,
vier tûsent marke wart im dort
goldes daz der wîgant
den sînen teilte sâ zehant,
und ander grôzer rîcheit vil.
nû mohte in alsô kurzem zil
die tôten niemen ûf gehabn
und alsô ganzlîche begrabn,
der sô vil ûf der erde lac
daz daz lant sô vulte ir smac
daz alexander mit den scharn
muoste von dem lande varn,
daz sie dem smac entrunnen
und bezzern luft gewunnen.
sie kêrten nâch der linken hant
gen arâbj in daz lant,
daz hât sô grôze genuht
und alsô berhafte vruht
daz niemen dô getar gelân
daz vih an der weide gân.
daz kumt von zwein wazzern grôz
der einz ietwederhalp dâ vlôz,
eufrâtes und tigris.
diu rehte schrift tuot uns gewis
daz ieglich lant der arte sî
daz in ist gelegen bî,
mesopotâmj ist genant
daz genuhtsamste lant
daz diu wazzer besliezent
und drumbe nider vliezent.
dâ diu wazzer nider gânt,
ir vluz durch ein gebirge hânt,
dâ ist gelegen zwischen in
oberhalp arâbje hin
mêdîâ daz rîche
beslozzen vesteclîche,
ouch stôzet babilônje dran.
sie vliezent durch egipten dan
und reichent gegen dem rôten mer.
alexander und sîn her
kam in die veste mennim,
diu selbe stat ergap sich im.
dâ vant er einen brunnen grôz,
dar inne sô vil kleibes vlôz
daz gar dâ mit gemûret was
babilônje. als ein glas
macht ez die mûre herte
gein werlîchem geverte,
wol gewart gein rîcher wer.
des wîsen alexanders her
was etelîche wîle dâ.
gein babilônje vuor er sâ.
dô der ellenthafte man
nâhen gegen der stat began,
sie vunden an den zîten
ûf dem gevilde wîten
vil mangen rîchen palas
der dâvil gebûwen was.
xerses von persîâ
hâte sie gebûwen dâ
mit vil grôzer rîcheit
und grôzen vlîz dar an geleit.
nû sie die mâzen sâhen,
sie îlten balde gâhen,
sie branten und brâchen sie,
swaz sie rîcheit vunden ie,
daz nâmens an den stunden.
dô sie des begunden,
alexander wertez in
und hiez sie lâzen den gewin
der dô mit roube was erhabn.
von alter wâren dâ begrabn
die künege von persîâ
die rîchsten und die groesten dâ
mit keiserlîcher werdekeit,
durch daz was alexander leit
daz diu grap ie man ûf brach
dâ man sie begraben sach.
er hiez in vride bannen
von allen sînen mannen.
bî den andern schône lac
nînus der künec der ê phlac
des landes in assîrîâ,
der was ouch begraben dâ
sô schône daz dâ vor nie man
dehein rîcher grap gewan.
die sîten al gemeine
daz waren edel steine,
ein sîte ein ametiste was
durchliuhtec lûter als ein glas,
der gap vil wünneclîchen schîn.
dâ wâren kleiniu vogelîn
ergraben an mit listen.
durch den ametisten
was der glast sô lieht, sô klâr
daz des lîchamen hâr
und der lîp ûz durch den stein
wol sihtec was und schône schein.
die andern edelen steine
wâren lieht und reine
und wünneclich ze sehen an.
gebalsmet was der selbe man
der dinne lac begraben dâ
nînus von assîrîâ.
sîn gewalt sô hôhe swebte
dâ vor dô er lebte
daz niemen mê sô grôz gewalt
was benant und gezalt.
die grôzen wîten nînivê
hât er dâ vor gestiftet ê,
er hâte sîniu lebenden zil
gewaltes vil und alsô vil
daz er an kreften was sô rîch
daz im niemen was gelîch
in allen den rîchen
kund im sich niht gelîchen.
dô diz geschehen was alsus,
von babilônje mâzêus
vuor gen alexander dan.
der wîse hôchgemuote man
vuorte dar in sîner schar
die edelsten juncherren gar
die er ze babilônje vant.
die stat ergap er al zehant
dem küneg unde sînem her
sunder bete und âne wer.
des was alexander vrô,
der êren danket er im dô.
die zwêne herren teilten gar
in vier rotten al die schar,
ie zwêne bî ein ander ritn
mit zühteclîchen hovesitn
ritterlîche wol bekleit.
nû wâren, giht diu wârheit,
die rincmûr ûz und innen
vol und al die zinnen
wartliute die dô wolden spehn
den niuwen künc und in gesehn.
bâgôfanes von persîâ
ein rîcher vürste was ouch dâ,
der was, giht daz maere,
des persen kameraere.
dô der gesach daz mâzêus
alexandern êrte sus,
er gunde im solher êren niht
als ez vil lîhte noch geschiht,
daz er in überschalte sô:
mit liehten bluomen hiez er dô
die strâzen und die gazzen gar
ströun vil schône gein der schar.
die wende er ouch behenken bat
gegen den gesten durch die stat
übr al die hôhen gazzen wît:
phell unde sâmît
gâben dô vil liehten schîn,
vil declachen sîdîn
hiez er mit kostenlîcher kür
durch gezierde henken vür,
dâ vor manec teppich breit
durch sîne bete wart gespreit
ûf den strâzen über al.
dô wart ein wünneclîcher schal
von süezem gesange dâ,
wan aldâ von kaldêâ
die besten singer wâren
die man in den jâren
vinden kunde und iender vant
über al diu naehsten lant.
die sungen alsô süezen sanc
daz nâch in diu stat erklanc.
der vürste hiez dô brennen ouch
mirren und wîrouch
durch süezen und reinen smac,
als man dô bî den zîten phlac
in der heidenschen ê,
sie branten lignâ âlôê.
swaz reinen smac mit süeze gît,
daz hiez er an der selben zît
durch hêrschaft an die wege ströun.
vremdiu tier, lêbarten, löun
hiez er ziehen hin gein in.
nâch den reit er selbe hin
mit vil grôzer ritterschaft
die nâch hovelîcher kraft
bî den rittern ûf der vart
wâren schône geschart.
süezer videlaere vil
floitierre mit seitspil
und tambûrr die grôzen schal
huoben der vil wîte erhal.
ouch liezen sich dô schouwen
die hôchgemuoten vrouwen
gegestet wünneclîche
gegen dem künge rîche.
dô reit in babilônje
der künc von mâzedônje
mit rîcheit wol gezieret,
er wart gesâlûieret
und enphangen schône,
mit küneclîchem lône
lônd in des edelen künges hant,
er lêch in liut unde lant,
er gap in silber und golt.
im wurdn die lantherren holt
und swuoren im hulde sâ.
mit grôzer hêrschaft was er dâ
vil nâch vier und drîzec tage
nâch der âventiure sage
und slihtet über allez lant
swaz er ungeslihtet vant.
die vürsten von dem rîche
kâmen al gelîche
und enphiengen al ir lêhen dâ.
swaz der künc von persîâ
lêhen solde lîhen in,
diu lêch er gar den vürsten hin
und enphie sie dô ze man:
daz lant er sus an sich gewan.
als er von dannen wolde varn,
dô kam gevarn mit grôzen scharn
der werde vürste amintas,
nâch niuwer ritterschaft er was
gen mâzedônje gesant
und ouch in anderiu lant.
vil grôzer her brâht im der.
dem künge sante antipater
von sînem eigenlande
sehs tûsent sarjande,
vünf hundert helde wol bereit
z orse in rîcher manheit.
ouch hâter dar von trâzîâ
sehs tûsent sarjande sâ
brâht in der selben schar,
von pêloponense dar
zwelf tûsent soldiere guot.
mit rîcher manheit wol behuot
brâht er driu tûsent ritter dar.
ouch brâht er in sîner schar
vünfzec juncherrelîn
die von arte muosten sîn
edel vürsten hôch geborn
die dar zuo wâren ûz erkorn
daz sie des künges huoten
des edelen hôchgemuoten
soldens zallen zîten phlegn,
swâ der ellenthafte degn
kêrte hin, dâ solden sîn
bî im die juncherrelîn,
ze tische und sô er jagte
und swâ der unverzagte
sliefe odr solde strîten,
dâ was er zallen zîten
mit ir phlege wol bewart
getriuwelîche ûf sîner vart.
der edel künec rîche
enphie vil minneclîche
mit gruoze in vriuntlîcher kraft
die vürsten und ir ritterschaft
und was ir herzeclîche vrô.
die stat, daz lant besazter dô.
ein vürsteclîcher wîgant
der was agatôn genant,
den sazte er ûf den palas
der wol mit wer gezieret was,
dem liez er driu hundert man
die er mit solde an sich gewan,
und von sînem lande
siben hundert wîgande
mit den der ellenthafte degn
dirre veste solde phlegn.
ein vürste hiez mênêtas
der ouch von arte ein vürste was
der solde dô des landes phlegn
und swaz lande im was gelegn.
er und apollodôrus,
bagôfanes und mâzêus
solden phlegn dô der stat
als sie der rîche künec bat.
mitrênes armênje phlac.
swaz in babilônje lac
von silber und von golde,
den hort gap er ze solde,
der dârîô von persîâ
ze samene was geleit aldâ.
nû erz dâ beschuof alsô,
von babilônje kêrter dô
in ein guotez rîchez lant,
daz was satrapêne genant,
daz gap sich alexander sâ.
mit den sînen saz er dâ
unz er vil veste an sich gewan.
der ellenthafte wîse man
teilte in niun teile gar
sîne man und al die schar,
wan im niht anders töhte
daz er berihten möhte
daz in dem her ze rihten was.
niun werder vürsten er ûz las
und hiez ir iegelîchen dâ
phlegen tûsent ritter sâ.
der rîche vürste adârîas
der êrsten schar herzoge was,
der alicarnasen gewan.
antigênis der wîse man
der andern schar solde phlegn.
philôtas der wîse degn
der dritten schar vaner was.
der vierden phlac amintas.
die vünfte bewarte er sus,
der phlac der vürste antigonus.
amintas von linzeste
der wîse muotes veste
der sehsten phlac mit wîsheit.
diu sibende schar was wol bereit,
der phlac têôdêtus,
der ahten ellânîcus.
die niunde kôs er sîner phlege.
alsus was ûf sînem wege
alexander der rîche
bewart vil wîslîche.
swâ er hin durch twingen vuor,
ieglich schar ir herren swuor
daz sie des niht enlieze,
si taete wie er hieze.
ouch versicherten sie daz
sie die schar niht vürbaz
hiezen vruo noch spâte
wan daz mit ganzem râte
wart mit der vürsten wîsheit
gemeinlîchen ûf geleit.
in dûhte ez waere missetât
daz er alsô wîten rât
zallen zîten wolde hân.
diz dûhtin bezzer vil getân,
wan enger wîslîcher rât
dicke wîse lêre hât.
mit vil liuten wîter rât
selten sich gesament hât.
abûlites ein herre wîs
der burcgrâve - von - sûsîs,
hôrte sagen maere
wie gewaltec waere
der künec alexander.
sînen sun den sander
im ze gîsel sâ zehant
daz er im stat und daz lant
gaebe in sînen gewalt.
des vröute sich der degen balt,
daz kint er minneclîche enphie
und lêch im vor den vürsten hie
nâch manschaft daz rîche.
dô zogeter krefteclîche
an aspen ein wazzer grôz
daz durch daz selbe rîche vlôz.
abûlites gegen im vuor,
in sîne huld er im swuor,
er gap im stat und daz lant.
der ellenthafte wîgant
brâht im, als ich iu sagen wil,
grôzer prîsante vil,
zwelf grôze helfande
von indîâ dem lande,
vil sneller dromedârjen guot
gap im der degen hôchgemuot
und vil starker kembel hôch
und orse vil diu man dar zôch.
daz brâhte abûlites vil gar
ze gâb alexander dar
und enphie von sîner hant
sîniu rîche und sîniu lant
des in gewaltec machte dâ
biz dar der künc - von - persîâ.
sus vuor der stolze degen wîs
mit dem burcgrâven - von - sûsîs,
der antwurt im güetlîche dâ
des künges hort von persîâ,
silbers vünfzec tûsent phunt.
daz hiez er teilen sâ zestunt
den sînen al gelîche,
des phlac der tugent rîche.
die er dô an sich gewan,
die rîchete der wîse man.
diz was des edelen herren site
dâ liebter sich der welte mite,
des phlac er dâ und anderswâ.
gein persjâ und gein indîâ
hugete dô der herre wîs.
er liez aldâ ze sûsîs
ze helfe dem burcgrâven guot
driu tûsent helde wol gemuot
bî einem vürsten der hiez sus
der grâv - archelaus,
der solde landes und der stat
im helfen phlegn. ez wart gesat
ze wer ûf den palas
ein herre der ein vürste was,
xênôphilus er hiez,
tûsent man er bî dem liez.
callicrates hiez ein degn,
den hiez er sîner zinse phlegn.
die künegîn von persîâ
liez er in satrapîâ,
daz was ein stat veste und guot.
den burcgrâven hôchgemuot
bat er ir phlegn, er wolde dan.
dem edeln hôchgelobten man
was von mâzedônje komn,
als ich daz maere hân vernomn,
samît und phelle breit,
von beiden grôziu rîcheit,
zobel vêch und härmîn,
die hiez er gar der künegîn
und den edelen vrouwen gebn.
nû sach man die vrouwen lebn
trûreclîche. sî began
jâmern nâch dem werden man,
sî jâmert in dem muote
nâch sînem und ir guote
daz sie hâten verlorn.
dem edelen herren wol geborn
alexander wart geseit
ir jâmer und ir senedez leit,
er kam und trôste ir ungehabe
und nam sî güetlîche drabe
mit zühteclîchem trôste
von unmuot er sî lôste
sô vil als des mohte sîn.
die hôchgeborne künegîn
liez er und die gevangen dâ.
von dannen huop sich dô sâ
der ellenthafte degen guot
an eines grôzen wazzers vluot,
tigris, daz ich hân genant.
ez vliuzet durch daz selbe lant
ein wazzer ist genant phâsim
tigris heizet dô nâch im,
von uxîôren lande ez gât,
tigris daz wazzer nâch im hât
den namn. ez ist nâch im genant
biz daz ez kumt durch daz lant.
über daz selbe wazzer breit
vuor der degen vil gemeit
mit sînem her, er kam zehant
in der uxîôren lant.
daz ist - als ich vernomen hân -
gelegen zwischen sûsîân
und der rîchen persîâ,
in engem gebirge dâ
ist daz selbe lant gelegn.
der des landes solde phlegn,
der was mâdâtes genant.
die engen stîg in daz lant
die werden geste kêrten,
als die landliute lêrten.
dô ez âbenden began,
der künc und mit im sîne man
drungen durch diu engen phat
und sâzen vür die houbetstat.
diu was mit ellenthaften wer
wider alexanders her.
die burger von der veste
enphiengen dô die geste
mit grôzem strîte herte.
diu stat sich vaste werte
mit werlîcher ritterschaft
biz daz sie von überkraft
wurden wider in getân,
daz sim niht mohten widerstân
und er mit kreften sie besaz.
er truoc in vîentlîchen haz
und dröutin sêr an daz lebn.
sie haeten gerne sich ergebn:
ir sicherheit er gar versprach,
dar an in leides vil geschach.
der edel degen wol geborn
truoc in mit hazze grôzen zorn,
wan sich daz lant und ouch diu stat
hâten wider in gesat.
dô die lantliute daz
sâhen daz sie sînen haz
niht gesenften kunden,
sie santen anden stunden
mit bet an die künegîn,
daz si in guot geruochte sîn.
der herzog von dem lande
den ich iu hie vor nande,
hâte ir swester tohter dô,
der sante an sî und bat sî sô
daz si in genaedec waere
und sîner vorhten swaere
leite gegen dem künge hin
und sîne hulde erwurbe umb in.
diz verseite si im durch daz
ez was ir leit und hâtes haz
daz sich daz lant und ouch diu stat
wider alexander het gesat.
doch wart si überwunden
daz si an den stunden
ir brief dem künge sande
und in mit bete mande,
daz er gedaehte sîner tugent
und sîner hôchgeborner jugent
und er lieze nâch ir gir
die stat durch sî geniezen ir.
als er die briev ane sach,
vil gezogenlîche er sprach
< daz tuon ich gerne, diz sol sîn
durch die edele künegîn.>
dô liez er sie hulde hân,
durch ir bete ez wart getân.
die lantherren kâmen dar,
der sicherheit enphienc er gar
und wurden alle sîne man.
als er daz lant an sich gewan,
er gab in silber und golt,
im wurdn die lantherren holt,
ir hôhez lop sie prîsten.
die berge sie in wîsten
gen persjâ kuntlîche
hin in das künecrîche,
des kunde er in wol lônen.
er hiez parmêniônen
daz er dô mit halber schar
die lantstrâze kêrte dar.
er wolde mit den andern scharn
oben in daz gebirge varn
daz mit einem striche dâ
reichet unz in persîâ.
die bercstrâze vuor daz her
vier tage ân alle wer.
dô kâmens an dem vünften tage
nâch der âventiure sage
in sûsidas pîlas.
mit zweinzec tûsent persen was
arjôbarzanes von persîâ
ze wer gen alexander dâ.
sie liezen die vil grôzen schar
zuo zin in die enge dar
komen gar ân alle wer.
dô werte sich der persen her
mit vîentlîchen dingen,
mit bogen und mit slingen
schuzzen sie und wurfen dar
werlîch ûf der mâzen schar.
sie liezen sie niht nâher zin
komen noch gedringen hin.
die mâzen nâher drungen,
die persen sie betwungen
mit grôzen velsen die sie nidr
sluogen daz sie kêrten widr
und in niht nâher mohten komn.
in was ir wer vil unbenomn
biz daz sie alexanders man
vertriben schiere von in dan.
nû was alexander leit
daz sie mit solher manheit
im erwerten sô die wege.
nû was aldâ in sîner phlege
ein gevangen dem erkant
was diu zunge und ouch daz lant
und dar zuo kriesche zunge.
der gevangen junge
seite ûf sîne wârheit
ez waer verlorniu arbeit,
swer iemer des gedaehte
daz er diu her braehte
durch die selben berge dâ.
von dannen unz in persîâ
giengen allenthalben
in unkünden alben
die wege durch grôze wilde,
durch walt ân gevilde.
daz joch der selben berge hôch
mit grôzer wüeste sich bezôch
an daz rôte mer von caucasas.
under dem gebirge was
ein wîtez lant veste und guot,
mit starken vesten wol behuot
und mit einem wazzer grôz
daz durch die selbe gegene vlôz,
daz ist araxes genant.
die wilden berge und ouch daz lant
besluzzen vesteclîche
persîam daz rîche.
alsus tet der man erkant
beide wege und ouch daz lant.
alexander vrâgte dô
den gevangen man alsô
< dû seist sô rehte von den wegn
und wie diu lant sint gelegn.
weistûz von rehter wârheit
oder ist ez dir geseit?> -
< nein ich, herre! ez ist mir kunt.
ich bin gewesen lange stunt
ein wildenaere mangen tac.
dô ich hie birsennes phlac,
mir wurden berge und daz lant
und al die wege wol erkant.
dar nâch wont ich in lîzîâ,
dô viengen mich die persen dâ
dô sie gewalteclîche
betwungen daz rîche.
die hâten mich unz an dich,
biz daz dû gevienge mich.
diz ist als ich dir hân gesagt!>
dô sprach der degen unverzagt
< nû wil ich dich heizen lân,
die stîge soltû vor uns gân
und uns wîsen. sô wil ich
iemer mêre rîchen dich.>
er sprach< lieber herre mîn,
daz tuon ich gerne. daz sol sîn!>
daz her bevalch der künec dô
dem wîsen degen crâterô,
zuo zim nam er von al den scharn
die mit jenem solden varn
der sie solde wîsen dar.
er hiez wâfnen sich die schar.
dô jach der leitaere
der harnasch waer ze swaere
ze tragenne durch die berge dâ.
dô sprach alexander sâ
< nû nim dir, swen dû wellest hân,
ich wil selbe mit dir gân,
wan ez ist billich daz ein man
sîn dinc grîf ernestlîchen an.
swer im denne helfen wil,
der tuot ez deste gerner vil
obe er jenes ernest siht,
daz er sich selben sûmet niht.
dâ von wil ich, swâ ich kan,
mîn dinc selbe grîfen an.
ich wil daz melêâger
mit den die er brâhte her,
mit uns gê ûf dirre vart.
wir vüern nâch werlîcher art
wol zehen tûsent helde guot
die mit geschütze sint behuot
mit werlîcher bereitschaft
werlîch mit werlîcher kraft.>
alsô diz gelobet wart,
sich bereiten ûf die vart
des wîsen alexanders man
und zogten durch die berge dan.
der künec dô die sîne hiez,
die er hinder im dâ liez
in den rotten über al
liehte viur und grôzen schal
machen zallen stunden
daz die vart iht bevunden,
dô er von dannen was gevarn
die daz gebirge bewarn
solden und die wilden wege
mit ir werlîcher phlege.
sus vuor der wîse degen balt
wüeste wege, wilden walt
mit sînen mannen gar die naht
in vil kumberlîcher maht
unz ez des morgens tagen began,
dô kam der saeldehafte man
in daz hôchgebirge wît,
daz was sô sêre besnît
daz die wege niemen sach
daz her eneben dem wege brach
über den gürtel in den snê,
in tâten kalte winde wê
und diu unkünden rîche.
sie sprâchen al gelîche
< diz ist ein grôziu missetât
daz wir durch eines mannes rât
uns alle hân und unser lebn
an die wâge gegebn,
der durch daz solde sterben
daz wir solden verderben!>
sus kâmens an dem andern tage
nâch der âventiure sage
ûf des gebirges hoehstiu joch.
ein grôzer walt lac vor in noch,
die vinster und kalt,
al die wege durch den walt
entseiten sich den gesten
von dicken grôzen esten,
die sich zein ander strahten,
die wege gar bedahten,
dâ durch streiften sie mit nôt,
von arbeit wâren sie nâch tôt
unz daz sie anderhalben
ûf den hôhen alben
in des gebirges wilde
sâhen ein gevilde,
dar ûf lie sich der mâzen schar
ze rouwe nâch ir kumber gar.
wan sie verarbeitet
wurden dar geleitet.
die schar leiten sich dar nidr,
unz sie ze ruowe kâmen widr
und sie vergâzen gar ir nôt.
alexander dô gebôt
daz cênôs und philôtas
und der wîse amintas,
poliperkôn der wîgant
einhalb zuo der zeswen hant
an die persen kaemen,
die schar halber naemen.
der ander schar nam er sich an,
mit der huop sich der wîse man
schilteshalp hin an daz her,
daz was niht bereit ze wer
wan vor, dâ man sie ane streit,
als ich iu hân hie vor geseit.
ez was nâch wol mitter tac,
daz her ungewarnet lac,
bîz sie die mâzen sâhen
allenthalp zuo gâhen,
einhalp alexandern,
anderhalp die andern.
sie umbesluogen mit ir wer
in zwô wîs der persen her,
swâ sie kêrten sich hin,
dâ lac der mâzen her ûf in.
dô wart der schal und der dôz
ûf sie sô krefteclîche grôz,
die dâ ze lantwer sâzen,
daz sie der wer vergâzen.
dô sluogen alexanders man
allez daz sie kâmen an,
und liezen niemen in dem her
dâ leben der sich bôt ze wer,
sie brâchen al ir kraft enzwei.
den grôzen schal und geschrei
erhôrten alexanders man
die sie vor solden strîten an,
der crâterus der vürste phlac
dâ daz her dannoch lac.
die ellenthaften jungen
die berge vaste ûf drungen
ie mit werlîcher kraft
vaste und vaste herhaft
baz und baz ie vester dar.
swer dô sach ligen in der schar
mâc bruoder vater kint,
daz wâc er lîht als ein wint.
sie drungen zuo zin âne ir danc,
allenthalben man sie twanc
vorn hinden und enebn,
dazs ir wer muosen begebn,
sie vluhen al gemeine.
dô was vil nâch eine
arjôbarzanes der degn,
der sîne was vil tôt gelegn,
er hâte niuwan vierzec man
zors die gegen den mâzen dan
mit dem vürsten kêrten
und mangen degen rêrten.
vünf tûsent sarjande
mit dem wîgande
phlâgen manlîcher wer
gegen der wîsen mâzen her,
iedoch twanc sie überkraft
und überwegendiu ritterschaft
daz sie liezen den strît
und vluhen an der selben zît
in daz lant ze persîâ,
daz was gelegen nâhe dâ.
persîpolis diu rîche
was vil krefteclîche
wol gebûwen und besat,
si was des landes houbetstat.
dar vlôch arjôbarzanes
als ich bin bewîset des,
daz er den lîp behielte aldâ.
dô hiezen die burgaere sâ
sliezen zuo diu bürgetor,
den vürsten liezen sie dâ vor.
crâterus in vil schiere erreit,
mit dem persen er dô streit
und sluoc mit sîn selbes hant
den ellenthaften wîgant
und al die mit im wâren komn,
den wart dô der lîp benomn.
dô antwurte sich dem her
diu rîche stat ân alle wer.
noch was der künec ûf dem wege.
der dô hâte in sîner phlege
des künges hort von persîâ,
der sant alexander sâ
sînen brief und hiez im sagn,
den hort wolden gar zertragn
die der veste solden phlegn
dar in der hort was gelegn,
und daz er deste balder dar
gâhete mit sîner schar
odr der hort waer verlorn.
der edel künec wol geborn
was komn und mit im sîne man
hin dâ der grôze araxes ran,
dô im diu botschaft wart erkant
diu im engegene was gesant.
nû lâgen guote veste grôz
an dem wazzer dâ ez vlôz,
die wâren laere und âne wer.
des rîchen alexanders her
schiere sie gewunnen,
die liute gar entrunnen
in ander bezzer veste.
nû vunden ouch die geste
eine prîsûne guot
beslozzen vaste und wol behuot
dâ bî ûf dem gevilde stân,
diu was als ich vernomen hân,
hôch wît und harte grôz,
die mange veste mûr beslôz.
dâ was mit vîentlîcher kraft
inne manec man behaft,
daz was ein vröudelôsiu schar,
die wâren an dem lîbe gar
geletzet und gevangen dâ,
die vienc der künc von persîâ:
genuoge an werlîchen sitn
die ûf sînen schaden ritn,
genuoge die durch gîselschaft
bî im wâren dâ behaft,
etelîchen der sîn guot
mit wer het vor im behuot
und er denne ergrifen was.
ir deheiner des genas,
im waere vuoz oder hant
ab geslagn. in starkiu bant
was diu selbe schar geleit,
sie hâten nôt und arbeit
erliten vil unde litn.
dô sie mit trûreclîchen sitn
hôrten und vernâmen
daz die mâzen kâmen,
sie ruoften alle< kêrâ kêr!
wir lîden nôt und herzesêr.
sî iemen dâ der edel sî,
der mache uns armen hinnen vrî
durch sînen tugent rîchen muot!
sî iemen dâ der sî sô guot,
der sol mit süezem muote
uns armen komn ze guote!>
jaemerlîche hôrte alsô
der künec alexander dô
ruofen vil die arme schar,
er kêrte mit den sînen dar
und hiez sie von der veste lân
ledeclîche enbunden gân.
dô vrâgter sie der maere
waz ir schulde waere.
sie klagten im ir arbeit
und sagten als ich hân geseit,
durch waz der künc von persîâ
sie gevangen haete aldâ.
dô muosten in erbarmen
die vröudelôsen armen,
er weinde als im sîn triuwe riet,
die vil liebelôsen diet
hiez er ûz ir banden lân.
bî den armen sach er gân
vier tûsent edele kriechen.
die vröudelôsen siechen
erkante er wol als er sie sach
der künec jaemerlîche sprach
< wê owê! waz tuot ir hie?> -
< genâde, herre> sprâchen sie
< dû solt erkennen wol daz wir
ze leide sîn gevangen dir
und wir durch den dienest dîn
behaft in disen banden sîn
und durch dich, herre wol geborn,
den lîp daz meisteil hân verlorn.>
dô sprach der tugent rîche
nâch jâmer trûreclîche
< dêst wâr, swaz leides ir durch mich
hât erliten, des wil ich
iuch ergetzen, sol ich lebn.
ich mac iu wider niht gegebn
den lîp, ich gib iu grôz guot
daz ir iuwer armuot
vergezzet gar. nû sît gewert
alles des ir an mich gert.
nû berâtet iuch wes ir
durch iuwer armuot muotet mir.> -
< herre, daz sol sîn getân.>
man sach sie ze râte gân
wes sie dô muoten wolden
und wes sie biten solden.
genuoge sprâchen under in
< ich râte daz wir biten in
daz er in unser rîche
uns helfe helflîche.>
genuoge widerrieten daz,
den behagte dâ belîben baz.
euctêmôn der wîse sprach
dô disiu zwîvelrede geschach
< ir herren, hoeret mînen muot,
waz mich herumbe dunket guot!
dô wir durch den herren mîn
durch den wir hie gevangen sîn,
wolden kêren in diu lant,
dô wâren wir dâ vür erkant
daz uns mit grôzer werdekeit
guot und êre was bereit,
wir hâten muot unde guot:
nû hân wir weder guot noch muot,
diu sint uns beidiu nû benomn,
wir sîn ir beider abe komn.
swer ê vuor in hôhem namn,
der müeste sich nû sêre schamn
swenn er in dürftigen wîs
gedaehte an sînen hôhen prîs
den man in sach mit êren hân.
swer dâ heime hât gelân
ein herzeliebez schoenez wîp
und ir nû einen halben lîp
ze lande braehte wider hein,
diu würde lîhte des enein
daz er ir würde smaehe
und in ungerne saehe.
sol ich in alten tagen mîn
ein spot, ein vingerzeige sîn,
daz muoz bî den vremden wesn.
dâ mac ich spotes baz genesn
dan bî mînen mâgen
die mich ê hôhe wâgen.
alsô tuot ein iegelich man
der ie lop und êre gewan.
dâ von biten wir uns gebn
ein lant dar wir inne lebn
und dâ wir bî unsern tagn
uns inne mügen wol bejagn.>
der red antwurt im alsus
der wîse têâdetus
er sprach< ich weiz von wârheit wol,
swer den man niht minnen sol
durch reht, daz im der selten guot
mit willeclîchem muote tuot
und aber dem noch vürbaz
dem er treit vîentlîchen haz.
die lantliute uns viengen ê
und tâten uns mit leide wê:
solden wir nû bî den sîn
und aber dulden wernden pîn?
daz dunket mich niht guot getân,
wan an dem künge muoz gestân
unser vröude und unser nôt:
stirbet er, sô sîn wir tôt.
durch der lantliute zorn
müezen wir hie sîn verlorn:
sô tuot der vriunt dem vriunden ie wol
der im triuwe leisten sol.
dâ von dunket mich vil guot
ob ez iuch alsam ouch tuot,
daz wir wider zuo den varn
die mit triuwen uns bewarn
beidiu man unde wîp.
wizzet wol daz wir den lîp
unlasterlîche hân verlorn.
von den wir dannen sîn geborn
die tuont uns vil baz danne die
uns hazzeten und hazzent ie.>
der rât was alsô von in zwein,
sie mohten dô niht über ein
des einen komen under in.
sie giengen vür den künec hin.
dô sprach gezogenlîche
der edele tugent rîche
< wes ir muotet noch an mich
und daz ir bitet, daz tuon ich,
des werdet hie noch baz enein:
welt ir varn, ich sende iuch hein,
welt ir aber hie bestân,
sô mach ich iu undertân
ein lant dar inne ir iuch begât
ob ir vriuntlîche site hât.>
dô berieten sie sich sâ
mit ir besten râte dâ
daz sie belîben solden
und niht ze lande wolden.
diz tâten sie dem künge kunt.
dô gap er in sâ zestunt
eine gegene diu was wît,
diu wart wol gebûwen sît
mit edelen guoten vesten
von den vremden gesten.
daz bûliut gap in sîn hant
die bûwen solden in daz lant.
in gap der degen wol geborn
spîse vih unde korn
und allez des sie solden lebn.
er hiez ir iegelîchem gebn
driu tûsent phenninge dâ.
sie danketen dem künge sâ
der êren grôz die er in bôt
alsus vergâzen sie ir nôt
und vuoren vroelîch in ir lant
daz in gap alexanders hant.
do der ander morgen kam,
der künec al die vürsten nam
und seitin dô ze maere
daz kein veste waere
vester dô in persîâ
den regjâ und persâgadâ,
daz warn die besten veste zwô
die dâ ze lande wâren dô,
daz hâten im von wârheit
die lantliute dô geseit.
dâ von bereiter sich alsô
daz er des endes kêrte dô.
ein teil sante er sîner schar
in daz lant her und dar,
die twungen al gelîche
die vest in dem rîche
die sie dô an den stunden
ûf der verte vunden,
wan sie al gemeine
vil nâch oede und eine
wâren dô in persîâ:
daz liut was gevlohen sâ
in die werlîchen veste
die ellenhaften geste.
diu âventiure seit alsus
daz sie der künec cîrus
bûte küneclîche krône.
dô er dâ vor in persîâ
truoc mit gewalte schône
des künecrîches krône.
der burcgrâve glôbârîs
ein ellenhafter vürste wîs
gegen alexander vuor,
in sîne huld er im swuor
und gap dem wîsen helde balt
die stete in sînen gewalt.
persîpolis der houbetstat
der künec dô behüeten bat
einen degen wert erkant
der was nîcartides genant,
und gap im dô ze huote
driu tûsent helde guote,
der phlac nîcartides.
der wîse tîrîdates
ein hôch gelobter wîgant
der antwurte im sâ zehant
des künges hort der dâ lac,
des er mit grôzer rîcheit phlac.
den rîchet er mit guote dâ:
swaz im der künc von persîâ
gelihen hâte, daz lêch er
dem herren dô nâch sîner ger.
gegen den inren persîâ
huget alexander sâ.
dô im des ze muote wart,
er huop sich bald ûf die vart.
die wîsen wîgande
muosten gegen dem lande
durch ein gebirge daz was kalt,
nâch grôzer wilde gestalt.
von kaltem îs und von snê
wart in ûf der vart vil wê.
dô sie die wilde sâhen,
von wârheit sie des jâhen
hie waer der welt endes zil.
ir aller sorge was dô vil,
sie vuoren ungeverte,
gevrorne wege herte
von snê und ouch von îse.
der hôchgemuote wîse
sach verzagen sîne man.
dô reit er vor in allen an,
sie muosten nâch im alle hin
swar er zogte hin vor in.
dô kam der ellenthafte degen
von den wilden waltwegen
in eine gegene lac dâ bî,
dar in die wilden mardî
sâzen bî den zîten,
die kunden niuwan strîten,
roube und urliuge phlegn.
swaz in wilde was gelegn,
die muosten sîn mit wer gein in.
an roube lac gar ir gewin,
an slingen was ir bestiu wer,
in wilde lac daz selbe her.
ir hâr was lanc, vil rûch ir kleit,
daz reichet - als diu schrift uns seit -
niht vürbaz wan an diu knie.
diz selbe liut ze vuoze gie,
sie kunden zorse strîten niht,
rîten was in gar ein wiht.
tier und vihe was ir nar.
die persen hâten dise schar
in gemachet zinshaft
und entsâzen doch ir kraft.
gen alexander vuor diu schar
und ergap sich im vil gar.
sus twanc alexanders hant
elliu diu naehsten lant
diu in der wilde lâgen dâ,
diz was diu inre persîâ.
dô der drîzigeste tac
nâch der selben zît gelac
daz alexander mit den scharn
was von persîpolis gevarn,
dô kam er aber wider dar
und zerteilte dô vil gar
den sînen mit sîn selbes hant
des künges hort den er dâ vant.
er gap an der selben stunt
jenem goldes zehen phunt
der in gewîset hât aldar
in daz lant und sîne schar.
der künec vuor gen mêdîâ.
platôn der vürste kam dô sâ
und brâhtim zehen tûsent man
zorse die er im gewan
von zilîzje dem lande,
und vünf tûsent sarjande,
des was alexander vrô.
mit den scharn wolder dô
dârîum den rîchen man
an den zîten rîten an,
den rîchen künc von persîâ.
der lac in ecbâtanâ
von mêdîâ der houbetstat.
diu was mit rîcher wer besat,
die bûte werlîche
in dem künecrîche
der rîche künec arfaxât,
als uns diu schrift bewîset hât.
nû was ez ergangen sus
daz der künec dârîus
was in grôzen zwîvel brâht:
vil ofte wart von im gedâht
wedr er nû vliehen solde
odr ob er sich noch wolde
bereiten mit sînem her
gein alexander ze wer.
drîzec tûsent sarjande
vrecher wîgande
het der rîche persân,
die wâren dâ von bactrîân,
der phlac der vürste bessus.
ouch het der künec dârîus
vier tûsent werder kriechen dâ.
die wâren dar in persîâ
werlîche komen schône
mit dem wîsen patrône,
daz was ein edel vürste guot
der het ie getriuwen muot.
der selbe vürste wart besant
und bessus den ich hân genant,
und nâbarzânes ein degn,
die des künges solden phlegn
mit lêre und ouch mit râte,
die besante drâte
der rîche künec dârîus
an sînen rât. er sprach alsus
dô sie vür in wâren komn
< ir herren, ir hât wol vernomn
und selbe dicke wol gesehn
waz uns leides ist geschehn
und wie uns alexanders hant
liute nimt unde lant.
nû râtet al und sprechet zuo
und seht waz ich herumbe tuo.
gar unser besten veste
hânt uns die vremden geste
mit ir kraft gewunnen an.
nû gewan ich nie getriuwer man
und lieber dann ir sît
mit staeten triuwen mîne zît,
des sült ir sîn gemant an mir:
durch iuwer triuwe sô sült ir
mit getriuwelîchem site
mir sîn mit staeten triuwen mite.
dô mir alicarnasus
und der vürste mâzêus
entweich und bâgôfanes
und ouch tîrîdates
und mitrênes den ich bat
milête phlegn der rîchen stat,
die nû von alexanders hant
hânt enphangen mîniu lant, -
dô hâtet ir ie niuwe
gegen mir iuwer triuwe.
ouch sît ir zwir bî mir gesîn
und tâtet mir vil helfe schîn
mit getriuwelîcher kür,
swie ich ie den sic verlür
dô ich mîne stürme streit:
durch der triuwen manheit
sô râtet mir wie ich nû tuo!
mir gât alêrst nû kumber zuo.
sol ich von mînen rîchen
vliehen und entwîchen
und sol sie vremden liuten lân,
des muoz ich iemer schande hân.
nû râtet, mâge und mîne man,
als mich gât ez iuch an:
swaz mir leides nû geschiht
der schade iu veilet anders niht.>
der red antwurt im alsus
ein alter vürste artâbâzus,
er sprach< wir wellen gerne sîn
bereit nâch dem willen dîn,
swaz dû wilt, daz wellen wir
und helfen dînes willen dir.
swaz schaden uns dâ von geschiht,
durch den lâzen wir es niht,
wir stân dir noch mit helfe bî,
swie wênec unsers hers doch sî.>
narbarzânes antwurte dô
des vürsten rede, er sprach alsô
< herre, ich sage dir mînen muot
waz mich herumbe dunket guot.
dû bist leider âne wer
unde sint dir dîniu her
erslagen und gevangen,
dîn wer ist sô zergangen
daz dû hâst leider niemen mê
der dir mit solher kraft gestê
daz dû mügst erwern dich.
durch die rede sô rât ich
daz dû nemest eteswen
eintweder disen oder den,
ob dû geruowet gerne lebst,
an den dû dîniu lant ergebst
und der habe alsolhe kraft
und alsô grôze ritterschaft
daz er dîn êre müge erwern
und dich mit sîner kraft ernern.
der vindst dû vil in bactrâ,
in sâges und in indîâ
die dîne hêrschaft wol erwernt
und dich vor alexander nernt.
herr, ich hân leider wol gesehn
ob ich des getar gejehn,
daz dir die gote niht gestânt
und grôzen zorn gegen dir hânt.
swaz dû her noch hâst gestritn
und ûf die vîende geritn,
dô sint sie nâch dem schaden dîn
ie noch wider dich gesîn,
dich hât ir helfe gar versworn,
des muoz diu arbeit sîn verlorn
daz wir an die wâge
sô dicke man und mâge
lâzen und hân gelân,
daz dunket mich gar missetân.
sît daz dû dich wol verstâst
daz dû niht gelückes hâst,
sô dunket mich wunderlich,
daz dû vergebene arbeitest dich
und dîn liut und ouch dîn lebn
dem tôde wilt sô dicke gebn.
dâ von rât ich daz dû diz tuost,
wan dûs ze jungest volgen muost,
sît uns gelücke ist selten bî.
der dan sigehafter sî,
dem gip daz urliug in die hant
und dar zuo liut unde lant,
daz er mit sîner wer bewar
dîn êr und dîn rîche gar.
sô daz urliug zergê,
sô nim dîniu lant als ê,
dû muost anders âne wer
entwîchen alexanders her.
ûf mîne triuwe daz rât ich,
wil der rât niht erschrecken dich.>
diz riet er ûf die rede alsus
daz der künec dârîus
ergaebe liut unde lant
bessô den ich hân genant,
wan ein gemeiniu sippeschaft
was under in mit liebes kraft.
dârîus der wîse sprach
dô der rât alsus geschach
< dêswâr, dîn lêr und dîn rât
nie man ze lobenne stât:
sol ich den mînen mich ergebn
und nâch ir genâden lebn,
sô hân ich leiden tac gelebt.
mîn herze in ungemüete swebt
daz ich getriben bin dar an
daz mir nû râtent mîne man
daz ich mich ir genâde ergebe
und nâch ir genâden lebe.
owê! nû wâ geschach daz ie?
benamen, ez geschach ê nie!
wem bin ich nû gelîchet,
die von mir sint gerîchet,
daz die nû muotent mîn ze man?
ê daz ich kaeme dar an,
ich würde ê alexanders man
der lop und êre gedienen kan,
doch hân ich noch sô rîche wer
daz ich mich vil wol gener:
ê ich wolde sus verderben,
mit êren woldich sterben,
daz waer noch groezer êre mir
dan ob ich solde volgen dir.
lâ dînen rât, er ist ein wiht!
dêswâr, ich sol sîn volgen niht.
soldich mich an dich ergebn,
sô möhtich ungerne lebn!>
dô dârîus der rîche
versprach sô zornlîche
des vürsten rât als er im riet,
nâbarzânes von dannen schiet,
her ûz nâch im gie bessus.
patrôn und artâbâzus
beliben bî dem künge dâ
und trôsten sîn gemüete sâ
mit manger rede sus und sô,
doch was er leidec und unvrô.
die vürsten beide schieden gar
von den andern dan ir schar
und huoben sich vil drâte
zeinem sunderrâte,
der eine zuo dem andern sprach
< uns solde wesen ungemach
daz dirre künec unsern rât
sô smâhlîche versmâhet hât.
wir soldenz niemêr vertragn.
wir sehen wol er muoz verzagn,
im ist entwichen al sîn kraft,
verdorben gar sîn ritterschaft,
er ist helfelôs belibn,
unz an uns beide ist er vertribn,
elliu helfe in hât gelân,
im ist niemen undertân
ân uns. nû waz vervâhet daz?
wir mügen wol gedienen baz
êre und guot umb einen man
der dienstes wol lônen kan.
dârîus kan lônen niht
swaz dienstes durch in geschiht.
des rîchen alexanders muot
ist als edel und sô guot
daz er durch sîner tugende rât
nihtes ungelônet lât.
er ist getriuwe und ellenthaft,
die gote hânt des wunsches kraft
mit tugent rîcher werdekeit
wunschlîche wol an in geleit.
dem süln wir dienen, dêst min rât,
sît er uns doch betwungen hât.
wir tuon im nû den dienest wol
des er uns iemer danken sol
und ouch endelîche tuot.
ob wir ez tuon, er hât den muot
daz er uns iemer rîchet.
sô nû der künc entwîchet,
sô vâhen wir in ûf dem wege
und haben in in unser phlege
biz wir in alexander gebn.
sô rîchet uns gar unser lebn
und vüegt uns saelde und êre
mit triuwen iemer mêre.
ist aber daz des niht geschiht
und daz er uns lônet niht,
sô hân wir wol sô vestiu lant
daz wir mit werlîcher hant
besetzen werlîche
der persen künecrîche.>
der rât sie beide dûhte guot
durch ir ungetriuwen muot
erdâhten sie der vreise dâ.
patrôn sach ir gebaerde sâ,
ir site im unbehagten
dem wîsen unverzagten,
er hiez die sîne zaller zît
sîn bereit ûf einen strît
und heinlîche ir harnasch hân
und den künc niht eine lân.
er warnete den künec guot
daz er vor in waer behuot,
dô was er solhes muotes
daz er in niuwan guotes
getriuwet als er solde,
niht vürhten er sie wolde.
nâch ir râte er dannen schiet,
mit sîner werlîchen diet
wolder varn gein bactrâ,
sus vuor er von ecbâtanâ.
nû was von unmuote dô
der künec leidec und unvrô
und alsô trûrec daz er was
von leide siech als ich ez las.
ûf einen wagn er wart geleit,
z'ors er vil selten reit,
diz dûhte sie ein hêrschaft dô,
dâ was der lantsite alsô,
diz hân ich iu hie vor gesagt.
dô der degen unverzagt
dârîus was ûf dem wege,
dô phlâgen sîn dâ in ir phlege
patrôn und artâbâzus,
die bat der künec dârîus
daz sie mit werlîchen sitn
bî im aller naehest ritn,
des werten sie den künec sâ.
patrôn der vürste hâte dâ
vier tûsent man in sîner schar.
mit jenen vürsten wâren dar
drîzec tûsent helde komn
der sie sich hâten an genomn,
die wessen wol die valscheit
die sie haeten ûf geleit,
und hâten sich dar zuo bewart
werlîch ûf der selben vart
als sie des helfen wolden
und ez vrumen solden.
patrôn zuo dem künge reit,
er sprach< herre, mir ist leit
daz niemen dih erwenden kan,
dû wellest varn mit einem man
der dich waetlîch und dîn lebn
mit untriuwen hin wil gebn:
bessus hât gesichert sich
und nârbarzânes ûf dich,
diz tuont sie mit gebaerde erkant,
und wiltû mit in in ir lant,
daz dûhte mich niht guot getân,
solde der rât an mir stân.
daz dû dich sus ergebest in>.
der künec sprach< wâ soldich hin?> -
< herre mîn, daz sagich dir.
dû weist von wârheit wol daz wir
von kriechen dem lande
vünfzec tûsent wîgande
dir brâhten ritterlîche
in dîniu künecrîche,
die sint in urliuges nôt
durch dich hie gelegen tôt.
ein teil ist unser, die noch lebnt
unde niemer dich begebnt
und dir mit triuwen gestânt
biz daz sie daz leben hânt.
bî den soldestû noch sîn,
daz rietich ûf die triuwe mîn,
sie hânt ouch nâch werlîcher art
vil guoter veste wol bewart>.
dô antwurte dârîus
patrônes râte, er sprach alsus
< ich weiz wol daz die kriechen gar
getriuwe sint und wandels bar,
doch muoz ich den getrûwen wol
den ich wol getrûwen sol:
brechent die ir triuwe an mir,
daz laster und diu schande ist ir.
ich mac untriuwe niht vervarn
und vor untriuwen mich bewarn.
ein ieglich man der stê mir bî
dar nâch als er getriuwe sî,
daz tuot er unbetwungen>.
diu rede wart underdrungen,
daz tet der vürste bessus,
der kam gedrungen. er sprach sus
< waz ist undr iu diu rede hie,
daz saget, wâ von oder wie
ist iuwer rede hie getân?>
er began wol verstân
daz in diu rede meinde
und sîne untriuwe scheinde -
wan sô des ungetriuwen rât
dehein untriuwe begât,
swâ der bî ein ander siht
zwêne stân und reden iht,
den dunket und hât es wân,
ez sî gar von im getân.
al daz selbe dâ geschach:
bessus des selben sich versach
und undervuor ir rede sâ
die sie von im retten dâ.
dô der künec und sîn schar
kam ze herbergen gar
und sich daz her nider lie
dô der selbe tac zergie,
zuo dem künge gie zehant
artâbâzus der wîgant.
der künec weinende sprach
dô er den wîsen vürsten sach
< nû ist der zît daz ich dir
danke daz dû hâst an mir
behalten dîne triuwe
mit staete ganz und niuwe
getriuwelîche dîniu jâr.
ich sich vil wol, ez ist wâr,
ich bin verrâten und mîn lebn,
ich muoz den lîp den mînen gebn:
nâbarzânes und bessus
hânt mich umbelegen sus
daz ich niht komen kan von in,
ich sich daz ich verrâten bin.>
disiu rede erweinde sie
daz sie jaemerlîche hie
vil sêre weinden beide
von jâmer und von leide.
artâbâzus vil ofte schrê
< wê mir verweiseten man, ôwê!
wem wiltû, lieber herre, mich
lân und weme lâze ich dich?>
der vürste jâmers rîche
schiet dannen trûreclîche
mit trûreclîcher swaere.
der hoehste kameraere
kam ouch gegangen überz velt
in des küneges gezelt,
mit dem diu selbe rede geschach
die er ze jenem vürsten sprach:
er brach abe im sîn gewant,
in daz her lief er zehant,
er roufte sich, vil lûte er schrê
anders niht wan< wê mir, wê
mînes lieben herren!
sol im iht arges werren,
sô müezen sîniu rîche
verderben leitlîche.
owê dir ungetriuwer rât!
wie uns dîn valsch verrâten hât
den der bî sînen zîten nie
dehein untriuwe begie,
dârîus von persîâ!>
die sîne klage erhôrten dâ,
die wânden nâch dem maere
daz der künec waere
verdorben. des was jâmers vil:
sie zeicten jaemerlîchiu zil,
grôz geschrei mit jâmers sitn
wart mit klage dô niht vermitn
von den die an den stunden
dem künge guotes gunden.
die vürsten vrâgten maere
waz disiu klage waere,
nâbarzânes und bessus.
man saget in daz dârîus
sich selben haete ertoetet dâ.
dô liefen sie des endes sâ
mit ir helfern überz velt
gegen des küneges gezelt.
der wart in von der wârheit
gesunt und lebendec geseit:
in daz gezelt sie giengen,
den künec sie dô viengen
mit ir ungetriuwen schar
die in ze helfe kâmen dar.
sie vuorten in gevangen hin
und hiezen dô versmîden in
in starkiu guldîniu bant.
dô daz artâbâzus bevant,
er woldez gerne erwendet hân,
dô mohter in niht widerstân:
dô vlôch der wîse wîgant
in partîânen daz lant
die grôzen untriuw und daz mort.
dô zerteilten sie den hort
den der künec brâhte dar
ir helfaeren und der schar
und gâben in vil rîchen lôn.
der rîche vürste patrôn
woldin wern die geschiht,
dô enhâter helfe gegen in niht
unde werlîcher maht.
sus was verendet diu naht,
ez begunde schiere tagn.
mit den ungetriuwen zagn
von den diz mort gerâten wart,
huop sich der künec ûf die vart
versmidet und gevangen dan
vuorten in dô sîne man.
alexander lac mit her
( er hâte werlîche wer)
in einer stat hiez tâbâ.
die sîne sageten im dâ
diu gewaeren maere sus
daz der künec dârîus
waere von ecbâtanâ
in gevlohen gen bactrâ.
ze tâbâ was der mâzen schar
gestrichen von lâcente dar
unmüezeclîche gar den tac,
daz her nâch müede ruowe phlac
und hâte sich dâ nidr gelân.
von babilônje bâgistân
ein ellenthafter wîgant
der kam vil balde gerant
und seite dô ze maere
dârîus der waere
gevangen von den sînen dâ,
gebunden vüere er gen bactrâ.
dô daz der künc gehôrte,
vil ungerne er stôrte
der sînen ruowe und ir gemach,
vil gezogenlîche er sprach
< ir herren mîne man, welt ir
mit triuwen hiute helfen mir,
sô machn uns ûf! ez ist zît,
sît an dem einen lîbe lît
daz groeste heil daz uns geschiht,
ob wir uns wellen sûmen iht,
sô suln wir nâch im gâhen:
swie wir in gevâhen,
sô wirt verendet unser muot
und mügen êr unde guot
mit solher rîcheit bejagn
daz niemen rîcher mac betagn.
ir hât arbeit unz hiute erlitn
und lange wege her geritn,
durch daz wold ich iuch ruowen lân.
nû tuot als ir ie hât getân
und lîdet aber arbeit
umb êre und guotes rîcheit!> -
< gerne herre, daz sol sîn,
wir helfen dir des willen dîn.
des wirt durch arbeit niht vermitn>
sprâchen mit vroelîchen sitn
die helde muotes rîche
mit vröuden al gelîche.
dô machete sich ûf daz her,
wol bereit gen rîcher wer
huoben sie sich ûf die vart.
dâ dârîus gevangen wart,
dar kam diu ellenthafte schar.
dô kam z alexander dar
mêlôn ein degen maere
ein helt unwandelbaere
des küneges von persîâ,
der saget alexander dâ
wie dârîus gevangen was.
alexander dô ûz las
sehs tûsent helde werhaft
die mit werlîcher kraft
mit im solden rîten,
der persen êre erstrîten.
daz ander her liez er aldâ,
ûf die vart huop er sich sâ.
dô kâmen zwêne herren wîs
die mit triuwen hôhen prîs
an lobe hâten gwunnen,
die wâren beide entrunnen
den vürsten, dô der rât geschach,
dô man den künec vâhen sach.
ir herze triuwe nie verstiez.
orsilôs der eine hiez,
der ander mitrâzênis.
dem künge tâten sie gewis,
die den künc von persîâ
viengen, daz die laegen dâ
nâhe, niht ze verre dan,
und daz sie in und sîne man
die naehe wîsen wolden
die sie nâch rîten solden.
der maere was der künec vrô,
mit den sînen kêrter dô
des endes vil balt ûf die vart.
in vier schar wurden sie geschart.
in widervuor brôcûbêlus
des vater was mazêus
von dem ich ê gesprochen hân,
der seite wâr ân allen wân,
nâbarzânes und bessus
und der gevangen dârîus
der ê was ir herre,
waeren dâ niht verre
und wolden daz niht lenger sparn,
sie wolden gen ircânje varn
oder abr in bactrâ.
dô hiez alexander sâ
setzen sporn ze sîten
und schûftes nâch in rîten.
mit vîentlîcher vreise
baz dan rehte reise
diu schar mit île rande.
von stoube und ouch von sande
wart ob in der stoup sô dic
daz sie dehein ougen blic
sach noch mohte dô gesehn,
noch ir geverte rehte spehn.
dô die vînde sâhen
die mâzen zuo zin gâhen,
sie verzagten an ir wer,
hin und her zerstoup daz her
durch daz wît gevilde
in walt und in die wilde.
die vürsten riten an den wagn
den man sach den künec tragn,
sie hiezen in ûf machen sich,
dô sprach der künec< war sol ich
ûf disem orse entrinnen?> -
< wir wellen dich von hinnen
vüeren heim in unser lant.>
dô sprach der künec sâ zehant
< ich wil nû niender rîten,
ich wil vil gerner bîten
des wîsen alexanders schar
danne ich iender mit iu var.
er ist sô tugent rîche
daz er getriuwelîche
bezzer triuwe leistet mir
mit staeten triuwen dann ir.>
sie sprâchen< ez muoz sîn alsus.>
dô sprach der künec dârîus
< ê lâz ich mich toeten hie.>
den wagen er vast umbevie
dô zôch er her und sie hin:
dô sie ûf wolden machen in,
sich selben sûmet er und sie
sô lange daz sie vil nâch hie
mit im ze lange sûmden sich,
ir zornec muot was grimmeclich.
die vil ungetriuwen zagn
begunden zornlîche klagn
daz sie der künec sûmde alsô,
sie zuhten zorneclîche dô
beidiu mezzer und swert
und sluogen den degen wert,
sie zuhten in unwerde
wunden ûf die erde.
mit manger verchwunden
liezens an den stunden
den künec halptôten dâ.
bessus vlôch gen bactrâ,
nâbarzânes der valsche man
gen ircânje kûme entran,
die andern her unde dar.
vünf hundert von der persen schar
sazten sich aldâ ze wer
mit kraft gen alexanders her
und wolden in noch halten vor,
dô wart der vürste nîcanor
der ellenthafte wîgant
mit sînem her gen in gesant.
der sluoc sie und vienc sie gar,
vürbaz erreit er dirre schar
driu tûsent man die er sluoc
und vienc ir vil und genuoc
und vrâgte sie der maere
wâ der künec waere.
des kundens im gesagen niht.
dô vuoget ez sich von geschiht
daz in ein werder mâze vant
der polistrâtus was genant,
er vant in dannoch lebende,
gegen dem tôde strebende.
der ellenthafte degen balt
brâhte eins vrischen brunnen kalt
und labete den halptôten man
dâ er von sô vil kraft gewan
daz er noch von kreften sprach,
daz doch vil kûme geschach.
als dô der getriuwe man
von dem künge wolde dan,
in sînen schilt leiter in,
im riet sîn getriuwer sin
daz er dem künge in sîner nôt
aldâ gemach und êre bôt
dar nâch als ez tohte
und er geleisten mohte.
der tugent rîche degen wert
nam des edeln künges swert,
ze sînem houbet er daz stiez.
ûf dem velde er ligen liez
den vil erbarmeclîche
der ê was alsô rîche
daz niemen ûf der erde
nâch küneclîchem werde
sô rîche was. den liez er sâ
vür den ermesten dâ
in der groesten armekeit.
gen alexander er dô reit,
der jaget ûf der vart hin nâch,
im was nâch dem künge gâch.
dô kam polistrâtus
und saget im wie dârîus
lac. er kêrte balde dar
mit polistrâtô. von der schar
kêrt er dâ hin selb ander.
dô kam alexander
der edel degen wît erkant
dâ er den künec ligende vant
der mit grôzen noeten ranc:
der âtme im ûz den wunden dranc,
er ranc in sterbender nôt
wan im nâhete der tôt.
kûme und jaemerlîche
lebte der tugent rîche
dârîus der wîgant,
dô in alexander vant.
er dahtin mit dem mantel sîn,
vil sêre klagter sînen pîn
und sîn leitlich ungemach,
er sprach< ôwê mir, ôwê ach!
bistû der rîche dârîus?
wer hât dich danne ermordet sus?
ôwê, daz ich ie wart geborn!
wie hâstû dînen lîp verlorn?
ôwê, herre, dîner nôt!
wer hât dir getân den tôt?
ôwê, tugent rîcher degn,
wie bistû herre sus gelegn?
nû weiz got daz ich von man
solhen jâmer nie gewan.
ich hâte des alsô gedâht
waerez alsô vollebrâht,
tugent rîcher helt, daz ich
mit dir wolde süenen mich
und wolde dir vil gar mîn lebn
sicherheit und helfe gebn
und iemer leides dich erlân,
gein al der welte dir gestân.
daz spriche ich âne valschen list.
daz mir der muot benomen ist,
daz ist mir herzeclîche leit.
daz weiz der gote wârheit
daz ez iemer müejet mich.>
zuo dem herren liez er sich
und leinde in schône an sîne brust,
er weinde sêre sîne vlust
und sîn leitlîchez ende,
ob im want er die hende
und klaget in vil sêre
mit trûreclîcher lêre,
als im sîn manlich triuwe riet
diu sich nie von im geschiet
do sach er alexandern an,
er sprach< zühte rîcher man,
dû hâst alêrst dîn edele vruht
an mir gêret und die zuht
die der gote wîsheit
an dich nâch wunsche hât geleit.
an mir ist nû worden schîn
swaz ich von den tugenden dîn
ie dâ her in mînen tagn
von der wârheit hôrte sagn,
und dîn manlich êre.
nû soltû mîner lêre
volgen als ich râte dir:
sich der welte lôn an mir
und welhen lôn ir endes zît
nâch dienste den liuten gît!
swaz gelückes dir geschehe,
swie grôzer hêrschaft man dir jehe,
swie grôz heil sich dir vüege,
sô sich daz dich genüege
diu mâze gar! die nim vür guot
und habe niht unmaezigen muot!
gedenk ie der jungsten zît
die diu welt mit grimme gît!
swie grôz êre dû bejagst,
in swelhen saelden dû betagst,
sô gedenke ie der geschiht
wie man die welt uns lônen siht,
daz dir iht alsam geschehe
sô man dîn leben enden sehe!
diu mâze sol dich lêren
nâch weltlîchen êren
werben wol mit sinnen
sô mahtû sî gewinnen.
êr ist ein ungetriuwer name,
swie kûme sich ir iemen schame,
doch swer dâ wil ân êre lebn,
der muoz got und die welt begebn.
ich wil dir die untriuwe sagn
die man siht die êre tragn:
swer wil êre koufen,
der mac ir niht erloufen,
er muoz lîp sêle und guot
nâch ir arbeiten und den muot
und muoz zallen zîten
mit kumber nâch ir strîten.
als er sî danne ergriffen hât,
sô muoz er haben wîsen rât
mit kuntlîchem sinne
dazs im iht entrinne.
si kumt den êregernden man
mit gemache selten an.
diu êre ist niemen undertân,
er müeze sî mit kumber hân
und mit arbeiten niuwen,
sus phligt si untriuwen.
ir gunst ist wankel gemuot
wan swer ir reht mit rehte tuot:
unmâze und überêre
schadent dicke sêre.
bî der êre ist mâze guot,
unmâze und übermuot
wanket vil oft underz rat
von der hoehesten stat.
swer êre hât mit witzen,
des heil siht man gesitzen
sô überêre wanken muoz:
unmâze prîs hât kurzen vuoz,
ir volge ist harte wilde,
des mahtû nemen bilde
an mir und merken dâ bî
wer ich ê was, wer ich nû sî!
gester was ich rîche,
nû lige ich jaemerlîche.
ich lebte in solhem werde
daz daz dritteil der erde
mich herre hiez. daz ist nû hin.
nû sich wie ich verdorben bin
und wie daz an mir ist geschehn
des ich dir ê hân verjehn,
wie der welte lôn geschiht
als an mir ir site giht!
süezer reiner werder man,
hie soltû gedenken an.
mich dûhte ouch nihtes genuoc
unz mich diu hôchvart übertruoc
und mich nû genidert hât.
dû solt von mir hân disen rât
und lâ dir bevolhen sîn
durch mich die lieben muoter mîn
und mîne vriunt die ich nû lân.
ich wil dich ze kinde hân:
dû solt mir zerben sîn genant,
mîn hêrschaft und mîniu lant
suln dir wesen undertân.
dû solt durch mich ze wîbe hân
rosânen die tohter mîn,
daz mac beidenthalp wol sîn
von angeborner edelkeit
die unser beider name treit.
tugent rîcher wîgant,
mich sol dîn ellenthaftiu hant
begraben, des wil ich dich bitn,
nâch den küneclîchen sitn
als ez gezeme uns beiden wol
und als man künge legen sol.
lâ mînen lanthern gestân
den site den sie von mir hân!
in was ie von mir bereit
mit êren hôhiu werdekeit,
daz lâ belîben staete an in,
sît ich des überwunden bin
daz ich von in scheiden muoz.
nû geben dir die gote ir gruoz
und ruochen dir mit vröuden gebn
iemer saeldehaftez lebn, -
ir kraft dir êr iemer gebe
sô grôz, der nam iemer lebe!>
sus erstarp sîn leben dô,
des was vil leidec und unvrô
der künec alexander,
sîne hende wander,
er sluoc sêre und roufte sich,
sîn klage was vil jaemerlich
die er riuweclîche dâ
begie. die sîne kâmen sâ,
er hiez den künc ûf machen
mit keiserlîchen sachen,
er und ander vürsten sîn
tâten grôze klage schîn.
den tôten hiez er vüeren sâ
gegen der rîchen rêgîâ,
dâ vuort er den künec hin
und wolde dô begraben in,
die bâre wolder selbe tragn.
dô kâmen - als ich hoere sagn -
die lantherren alle
mit jaemerlîchem schalle.
der künec schône wart geleit
mit keiserlîcher rîcheit
kroente in alexander.
ephestiônen sander
nâch den werden vrouwen gar.
dô kam al diu gevangen schar,
die hiez er alle ledec lân.
diz geschach. ez wart getân.
die kâmen trûreclîche
sie wâren jâmers rîche,
dô wart manec wuof erhabn.
dô der künec wart begrabn,
alexander kêrte dan,
er nam an sich des künges man,
die swuoren im hulde dâ.
dô mahelt er die vrouwen sâ
rosânen die schoenen,
er hiez ir houbet kroenen
vor den vürsten schône
mit einer rîchen krône.
in der stat gebûwen was
ein wünneclîcher palas,
den cîrus von persîâ
machte rîlîche dâ,
der was al gemeine
von edelem gesteine,
mit hôchgülter rîcheit
von golde rîlîche durchleit,
die wende und al der esterich
sô lûter wâren daz man sich
drin als in einem glase ersach.
swes ie man ze rîcheit jach
dâ mite was der palas
gezieret wol - als ich ez las. -
ein hôch gewelbe lûter klâr
was dâ gemachet, daz ist wâr,
nâch des himels geschaft,
daz habeten ûf mit grôzer kraft
grôze siule guldîn
die gâben wünneclîchen schîn,
die sternen al gemeine
daz wâren edele steine,
swer dâ stuont gienc odr lac,
dem gap daz gesteine tac
und zallen zîten liehtes vil.
dô wart - als ich iu sagen wil -
der edel alexander dâ
mit den vürsten von persîâ
enein und mit den vrouwen
die grôzen rîcheit schouwen.
dô er die gezierde sach,
von wârheit er benamen jach
daz er dâ vor gesaehe nie
sô grôze hêrschaft als die.
er vröute sich des guotes
und sînes hôhen muotes,
diu hêrschaft und daz grôze guot
gap im vröude und hôhen muot.
dem künge dô sîn triuwe riet
daz er die wîselôse diet
güetlîche troesten began,
er sprach< ir herren, mîne man
die mir hulde hânt gesworn
und ze herren mich erkorn,
ir sült unvröude gar begebn
und durch mich in vröuden swebn.
ist iu nû ein herre tôt,
dêswâr swaz iu der ie gebôt
êren und werdekeit,
diu ist iu von mir unverseit,
die wil ich gerne mêren
und iuch noch vürbaz êren
dan dehein persân
dem ir wâret undertân.
nû êret iuch und helfet mir
nâch lobelîcher gir daz wir
mit vridelîchen sachen
alsolhen vride machen
daz unser künecrîche
belîbe vridelîche,
sô rîchen wir an guote.
swer vridelîcher huote
phliget oder phlegen sol
dem gezimt gerihte wol,
tuot er reht gerihte erkant
sô rîchet er und sîn lant.
swer aber vrides sich begît,
der muoz armen alle zît
und die im sint undertân:
bî im siht man untriuwe ûf stân,
swer dâ ist ein rihtaere,
ist im gerihte unmaere.
rehten rihtaeren
sol rehte gerihte maeren.>
ein vürste wîslîche sprach
dô disiu rede alsus geschach
< herre mîn, des wellen wir
mit willen gerne volgen dir.
uns hât dîn küneclîcher trôst
von ungemüete gar erlôst,
des sîn wir von dir worden vrî.
swaz dîn bester wille sî,
daz helfen wir dir enden.
dû solt her besenden
die lantvürsten, dêst mîn rât,
an den diz künecrîche stât,
und lâ dir guoten rât des gebn
wie dû lebst und süllest lebn.>
des volget er. er sande
in allem dem lande
nâch den rîchen vürsten gar,
sie kâmen al gelîche dar
und swuoren im sâ zehant
hulde und gâben im daz lant.
ûf dem palas in der stat
was des rîches stuol gesat,
als in gemachet hâte aldâ
cîrus von persîâ.
dâ wart er gesetzet an:
der edel zühte rîche man
und diu vil süeze künegîn
muosten dâ gekroenet sîn
mit zwein krônen rîche,
die vürsten al gelîche
enphiengen dô von sîner hant
ir lêhen, ir gerihte, ir lant.
nâch der vürsten lêre
hiez der künec hêre
gebieten unz in elladâ
den lantvride von persîâ,
daz was manc tageweide wît.
er hiez gebieten an der zît
den vride in allen an daz lebn:
swer in braehe, er solde gebn
den lîp und ander buoze niht,
er hiez mit gemeiner phliht
des vrides reht gelîchen
den armen und den rîchen.
bî dem swerte und bîder wide
bien er al den strâzen vride
und hiez mit vride sie bewarn,
swer da'r wolde und dannen varn,
daz der vride haete
und man im niht entaete.
des wârn die lantliute vrô.
der wîse man sprach aber dô
< daz sô manec werlich degn
alhie ist von mir tôt gelegn,
daz ist mir iemer swaere,
swie liep ez mir dô waere,
ez ist mir nû von herzen leit.
ouch wizzet von der wârheit,
möhtich koufen in daz lebn,
darumbe woldich gerne gebn
swaz ie man der nû lebe
umb des andern leben gebe.
kund ich wol mit guoten dingen
iuch des wol innen bringen,
benamen taetich gerne daz
güetlîche ân allen haz,
wan ich sol iuwer herre sîn.
nû helfet durch den willen mîn
mir ein hôchgezît begân
ze der ich guoten willen hân,
die bitich leisten iuch durch mich.> -
< herre, daz ist billich,
swaz dû wilt, daz wellen wir
und wellens gerne volgen dir.>
der rede danket er in dô,
des wârn die lantherren vrô.
von persîâ die vürsten dar
wâren alle komen gar
und alle die von mêdîâ.
dô huop sich mit vröuden dâ
ein alsô rîchiu hôchgezît,
ob iender was deheiniu sît
sô rîche, des enweiz ich niht.
dô wâren - als diu schrift uns giht -
mit schalle gastlîche
die vürsten von dem rîche.
wie dô mit ritterlîchen sitn
wart geschallet und geritn,
wie man sie sach mit vröuden lebn,
wie dô wurde gegebn,
des vrâget den der dô enphie!
wan ich wils verswîgen hie.
ein vürste hiez duritus,
des swestersun was dârîus,
disen ellenthaften degn
bat er des jungen kindes phlegn
des küneges von persîâ,
dem lêch er daz rîche dâ.
diz selbe kint gevangen was
- als ich zem êrsten sturme las -
daz hiez er ouch ledec lân
und machte im daz lant undertân.
des künges bruoder lêch sîn hant
mêdîam daz rîche lant.
rihter grâven herzogn
an rehten triuwen unbetrogn
schuof der edel wîgant
nâch reht über sîniu lant.
dar nâch er brieve sande
wider heim ze lande
und hiez dô der künegîn
sagen und dem meister sîn
gar sîn gelück und sîn nôt.
in beiden er dar nâch enbôt
daz sie mit vröuden sunder strît
der brûtloufte hôchgezît
begiengen vroelîche dâ,
die er begienc in persîâ.
mit grôzen vröuden daz ergie,
diu künegîn des niht enlie
ez wurde alsô mit lobe getân
daz sies êre müesten hân.
sie vröuten sich der werdekeit
die alexander dort erstreit.
dô sante im vil groezlîche
diu edel tugent rîche
grôze prîsant an der stunt.
dâ bî tet im sîn meister kunt
wie er leben solde
ob er behalden wolde
sîn leben starc und gesunt.
daz tet er im mit brieven kunt,
er schreip sus< lieber herre mîn,
ich der getriuwe meister dîn
und dîn gewizzer dienstman
der dir mit triuwen êren gan,
enbiutet dir liep und guot,
mit dienste gunstlîchen muot.
ich wil dir rât mit lêre gebn
wie dû vristen solt dîn lebn
und wol gesunt behalten.
dû solt der witze walten...>
hin wider mit den maeren
ze dem unwandelbaeren!
der vrouwen boten kâmen sâ,
dannoch lac in persîâ
der edel künec rîche
mit vröuden vil groezlîche.
sie gâben daz im was gesant,
vil prîsante sâ zehant.
die sach der ellentrîche man
durch sînen nuz vil selten an
er ahte niht ûf den gewin,
er hiez ez allez geben hin
den sînen al gemeine
reht als ob edel steine
und golt die boume trüegen gar.
swaz dâ nôtiger schar
was übr elliu sîniu lant,
die rîchete sîn miltiu hant,
er zeicte sînen gebenden muot
und lie dô niemen âne guot
er liebet in von tage ze tage.
den armen büezet er ir klage,
der rîchen hôhen übermuot
machter senft unde guot.
die ellenthaften jungen,
die im diu rîche twungen,
lie der zühte rîche
leben zühteclîche.
swie ir wille was getân.
er hiez sie halten und lân:
unzuht wert in der herre wîs,
sie muosten zühteclîchen prîs
mit ritterlîchen sinnen
hân und mit zühten minnen.
alexander der degn
kunde solher witze phlegn
daz diu lant zallen stunden
mit wîsheit an im vunden
rât und wîse lêre.
dô wuohs sîn manlich êre.
sîn gelücke und ouch sîn guot
liebet im der sîner muot
und daz edele reine wîp
diu was im liep alsam der lîp:
ir beider zwei sich einden,
sie beide ein ander meinden
mit solher kraft daz von in zwein
ir beider muot sich slôz in ein:
si was sîn und er was ir,
sîn was ir wille und ir sîn gir, -
ir wille was im staete bî,
sîn wille wolde sî.
er minte swaz si minte,
sîn vriuntschaft an sî sinte,
ir herze, ir wille sinte an in.
dirre gemeinlîche sin
geselte sich mit solher kraft
daz ir beider geselleschaft
sich der triuwen nie geschiet
als ir gemeiniu triuwe riet:
der muot was an in beiden
mit triuwen ungescheiden.
swâ mit staete ein man ein wîp
minnet und si sînen lîp,
dâ minnet ietweders muot
swaz daz ander dunket guot.
sus tet ouch alexander dâ.
grôzen vürsten gap er sâ
der küneginne basen zwô
und swaz der werden vrouwen dô
was ân êlîchen win,
die gap der künec alle hin
und lêch ir man mit sîner hant
liute guot unde lant.
nû hân ich in hie vor gesagt
daz den degen unverzagt
danjêl seite künftec
mit krefte sigenünftec:
mit welher bîschaft daz ergie,
daz wil ich iu sagen hie.
ez was vil manec jâr hie vor
der künc nâbuchodônosor
gewaltec in assîriâ,
dem was diu mônarchîâ
der erde dienstes undertân,
diz ist wâr ân allen wân
daz sich diu erde und gar ir lant
zinsten in sîn eines hant,
wan er der erde krône phlac.
eines nahtes dô der lac
slâfend an dem bette sîn,
dô sach sîner ougen schîn
einen troum vil spaehe.
waz er in dem saehe
des kund er gedenken niht,
als vil lîhte noch geschiht,
und vergaz es alsô gar
daz ers der stunt niht wart gewar
und ez nie vinden kunde.
dô sante er an der stunde
nâch al den meistern überz lant
den diu witze was erkant
daz sie die troume erscheinden
und waz sie künftec meinden.
er sprach< ir herren, saget mir,
waz troumte mir? daz ist mîn gir.>
sie sprâchen< lieber herre mîn,
sag uns durch die genâde dîn
den troum, sô bescheiden wir
die bezeichnunge dir.> -
< des troumes ich vergezzen hân.
ir sült den troum mich wizzen lân
oder ich heiz iu den lîp
nemen, dar zuo kint und wîp
den liuten eigenlîche gebn.
ich nime iu guot êre und lebn
odr ir sagt mir die geschiht
waz mînes herzen gesiht
in mînem slâfe hân gesehn
und waz mir dâ von sül geschehn!
tuot ir des niht, sô wizzet daz
ich an iuch kêre solhen haz
der iuwer vruht erwendet
und iuwer leben schendet.>
sie sprâchen< lieber herre wert,
des dû hâst an uns gegert
daz taeten wir. nû enkünnen wir
des troumes niht bescheiden dir:
ez ist dir iemer ungeseit,
ezn sage der gote wîsheit.>
dô hiez er gar verderben sie,
ir keinen er genesen lie
die dô in den jâren
sîne wîsen wâren.
nu was dô von judêâ
der juden vil gevangen dâ,
der wâren in dem hove sîn
vier edele juncherrelîn,
der hiez einez danîêl,
daz ander hiez misahêl,
daz dritt ananîas,
asarîas der vierde was,
die drîe got ê lôste
gesunt von grôzem rôste.
die suochte man ouch sâ zehant,
als sie ouch solden sîn verbrant,
dô vrâgten sie der maere
waz ir schulde waere.
sie sprâchen< swer ein wîssag ist,
den toetet man an dirre vrist,
obe er niht dem künge seit
sînes troumes wârheit.>
dô bâten sie in vrist des gebn
und daz man sie lieze lebn
biz sie ir gebet getaeten
und got genâden baeten.
daz geschach. sie bâten got
daz er durch sîn hôch gebot
in den troum erscheinde
und waz sîn zeichen meinde,
daz sie lîp unde leben
umb die schulde iht solden geben.
dô hôrte got daz gebet
daz der kinde biten tet
und sante in sînen süezen trôst,
der sie von sorgen tet erlôst
und ir gemüete trôste
und von den vorhten lôste:
von gotes genâden daz ergie.
dô der morgen ane vie,
dô wart danîêl besant
den ich hân hie vor genant.
zuo dem gotes dienestman
sprach der künec< nû sag an
waz troumes ist getroumet mir!
seistû mir daz, sô wil ich dir
iemer saeld êre und guot
vüegen drumbe, dêst mîn muot.
ouch sage ich dir, ob dûs niht tuost,
daz dû von mir lîden muost
michel arbeit und nôt:
ir müezet alle ligen tôt,
dû und al daz künne dîn,
wirt mir der troum von dir niht schîn.>
dô sprach der saelden rîche
mit zühten witzeclîche
< herre mîn, ich wil dir sagn
den troum und dich niht verdagn
waz sîn vernunst bediuten sol.
got ist genâden alsô vol
daz mich sîn gotlîcher rât
in deheinen noeten lât,
des sol ich wol getrûwen im.
daz dir getroumde, daz vernim!
dû saehe ûf einem velde stân
ein bilde grôz hôch wol getân,
daz was gestalt reht als ein man,
dâ merken künftec zeichen an!
daz houbet und diu kel sîn
wâren beide guldîn,
arme und ahsel wâren gar
unz an die brust nâch wîze var:
daz teil was silberîn erkant.
hin nider dâ diu huf erwant
von den brüsten ze tal,
dâ was ez êrîn über al.
im wârn diu bein stähelîn,
ietweder vuoz was irdîn.
dô sîn dîn herze war genam,
der troum von vorhten von dir kam
und wart dir alsô gar benomn
daz sîn vernunst von dir ist komn.> -
< owê, saelden rîchez kint!
wie reht und wie gewaere sint
dîniu wort! ez ist alsô>
sprach der rîche künec dô,
< sît nû dîn wîslîcher rât
mînen troum errâten hât,
sô sage mir und erscheine
waz er künftec meine!> -
< daz sage ich dir, herre mîn.
im was daz houbet guldîn:
daz bezeichent den gewalt
der nû dir einen ist gezalt,
wan dû mit rîchem werde
die krône treist der erde.
nâch dînem lîbe wirt geleit
dîn küneclîchiu rîcheit
in zwei lant und ouch dîn kraft,
sô teilet sich dîn hêrschaft
in zwein rîchen. diu gelît
her nâch, sô nâch sîner zît
ein ende gît daz leben dîn:
daz sint die arme silberîn.
daz eine lant ist persîâ
und daz ander mêdîâ,
dâ der gewalt sît mangen tac
gemeinlîch in geteilet lac.
dâ daz bild êrîn schein
von der brust unz ûf daz hufbein,
daz ist der kriechen gewalt,
der wirt sô grôz, sô manecvalt
daz er die silberîne kraft
und al der welte hêrschaft
verdrücket mit den kreften sîn:
daz diutet daz ein teil êrîn>
( hie meinde er alexandern an,
wan der tugent rîche man
bejagte sît mit sîner hant
den gewalt übr elliu lant,
als ich ein teil hie hân geseit
des mich der schrift urkünde an treit.)
danîêl sprach< herre mîn,
diu bein wâren stähelîn:
daz diutet roemesch rîche
daz noch gewalteclîche
die welt an sich betwingen sol.
man weiz daz von wârheit wol
daz stahel golt silber êr
wendet gar in sîne kêr
und ez trîbet und snîdet
daz ez ir kraft niht mîdet:
sus snîdet roemesch rîche
al kraft krefteclîche.
daz sint diu stähelînen bein.
dû saehe dar nâch einen stein
âne menschen hende
von eines berges ende
vallen ûf daz bilde dar
daz erz zerdruht alsô gar
daz ez niht mê vürbaz schein.
ûf dem bilde wuohs der stein
zeinem grôzen berge hôch
der sich gein grôzer hoehe zôch:
daz ist daz himelrîche
daz sô gewalteclîche
dar nâch ûf die erde kumt
daz ez die krefte gar zerdrumt,
des kraft niht abeganges hât,
sîn gewalt ân ende stât.
daz ist der stein der âne werc
ûf dem bilde wart ein berc.>
( hier an het er gemeinet krist,
des kraft alsô gewahsen ist
daz er nû krefteclîche
verdruht hât diu rîche
und al die krefte und den gewalt
diu ich hân hie vor gezalt).
dô hiez der künc in beten an
als got, niht als einen man,
er hiez rîlîche machen
mit keiserlîchen sachen
eine sûl, als ich ez las,
diu nâch der gebildet was
von der ich vor hân geseit,
ich meine dise wârheit
dô ich daz rehte maere lie
und durch diz ûz dem phade gie.
diz êrîne rîche
was vil keiserlîche
an alexander dô sîn hant
twanc disiu rîche und elliu lant.
diz ist ouch wol bezeichenlich
dar an daz die liute sich
boesernt alle stunde:
niemen hie vor kunde
wan guot und getriuwe sîn,
dô was diu welt ouch guldîn.
dar nâch diu triuw abe nam
biz daz diu welt anz silber kam.
dar nâch wart si êrîn, -
nû ist si leider stähelîn!
daz stahel ist hert unde starc,
diu welt ist valsch unde karc,
diu guldîne werdekeit
ist mit untriuwen hin geleit,
wan ez ist der boeste tac
der ie biz her an uns gelac
und der boeste - waen ich wol -
der iemer mêre werden sol.
ôwê! wie sol ez ergân
sô wir daz stahel müezen lân
und daz irdensche rîch behabe?
wie wir denne nemen abe
sô diu welt die êre lât
der si noch ein wênec hât!
diz maere und ander wârheit
diu von alexander seit
sô vil gewârhafter sage,
liebet mir von tage ze tage
diu maere und daz getihte
daz ich von im gerihte.
daz vierde buoch ist volle komn
und hât ein ende hie genomn.
welt ir daz vünfte, heb ich an
und spriche sô ich beste kan. v
xerses der künec rîche
hât ouch diz künecrîche,
der mohte in al den jâren sîn
in solhen kreften niht gesîn
daz er in sô kurzen tagn
möhte in solher kraft betagn,
swie sich der hôchgemuote
ie hôhes prîses muote,
daz er sô gâhes und zehant
sô manec lant mit sîner hant
nie betwingen kunde
noch mit keinem sinne kunde
als alexander der maere,
( des wîsent uns diu maere)
unz er mit hôher werdekeit
den namen und den prîs erstreit
daz er hiez mônarchus.
der name bediutet sich alsus:
vürste aller küneg einer,
obe dem deheiner
krône sol bî sînen tagn
nâch im ebenglîche tragn.
der erde mônarchîe was
in babilônje als ich ê las,
von nemrôtes zît mit kraft,
biz daz die grôze hêrschaft
ergreif der künec bêlus,
nâch dem der künec nînus
sîn sun in assîrîâ.
die monarchîe hâten dâ
nâch nîne gewalteclîche
in dem künecrîche
sehs und drîzec künge hêr
tûsent jâr unde mêr
vünver und driu hundert.
dô wart mit kraft gesundert
diu hêrschaft von assîriâ
und was in kaldêâ
bî nâbuchodônosor
der mit kreften truoc enbor
al dirre lande krône
gewalteclîche schône.
dâ was si nâch im, daz ist wâr,
ahtzec und hundert jâr
und wuohs dar nâch mit rîcheit sâ
in mêdjâ und in persîâ,
als danîelis wârheit
dem künge hâte vor geseit.
dô begreif sî cîrus.
nû seit uns diu schrift alsus,
sît daz der edel wîgant
persîam besaz daz lant,
daz sich dar dienstlîche
zinsten elliu rîche.
der welte dritteil asîâ
het der mônarchîâ dâ
urhap und houbet, daz ist wâr,
zweinzec und zwei hundert jâr
biz daz alexanders hant
betwanc daz rîch und daz lant.
die man zwischen cîrô
sach und alexander dô
des selben landes krône tragn,
die wil ich nennen und sagn.
cîrus der êrste was
- als ich an der schrift las -
cambîses der wîgant
sîn sun besaz nâch im daz lant.
zwêne zouberaere
an hôhen listen maere
wâren dar nâch, daz ist wâr,
an dem rîche zwei jâr.
idaspis sun dârîus
( ein künec was geheizen sus)
wart nâch im künec überz lant.
xerses den ich hân genant,
wart künec in dem rîche
nâch im gewalteclîche,
artabânus nâch dem kam.
nâch dem artâxerses nam
beidiu krôn unde lant
mit gewalteclîcher hant,
nâch dem longîmânus,
xerses und sogdîânus,
dârîus qui et nôtus,
dar nâch der rîch aswêrus,
nâch dem ochus, des hant
betwanc egiptum daz lant
mit kraft gewalteclîche,
der selbe künec rîche
hiez ouch artâxerses,
nâch dem des sun arxes.
dârîus nâch dem krône truoc
den bessus sîn vürste sluoc,
den alexander êrste an reit
und sît besaz die rîcheit
diu in an gerbet was biz dar.
alhie hân ich genennet gar
die künege von persîâ
die vor alexander dâ
mit kreften in ir jâren
der erde houbet wâren.
al dise grôzen hêrschaft
diu mit manger sunderkraft
sich hâte krefteclîche
geteilet in diu rîche,
erstreit alexanders hant. -
durch waz ich habe die genant
die dô die rîchsten wâren
vor alexanders jâren?
daz wil ich iu sagen hie:
vor im wart deheiner nie
sô kreftec gar noch lange sît
als er was bî sîner zît.
dâvon bedorft ich des wol
ob ich diz buoch berihten sol,
daz ich besinnet waere baz:
kranke sinne sint sie laz,
den sint von im diu maere
ze lanc, ze starc, ze swaere,
als ich iu wil bewaeren:
ze lanc ist an den maeren
disiu âventiure
ân guoter sinne stiure,
ze starc an dem getihte
wie man sî berihte,
ze swaere: den verdriezen wil
swenne si kumt an daz zil.
des hân ich gar verwegen mich,
und ist daz genuoc tumplich
wan sô manec wîse man
vor mir sich hât genomen an
ze tihtenne diu maere.
dem edelen zäringaere
tihtes durch sîner hulde solt
von herbolzheim her berhtolt,
der hât als ein bescheiden man
gevuoge und wol gesprochen dran
und tet bescheidenlîche erkant
daz er von im geschriben vant.
doch hât er getihtet niht
des diu histôrje von im giht,
daz der zehende möhte wesn
des ich von ime hân gelesn.
ez hât ouch nâch den alten sitn
stumpflîche, niht wol besnitn
ein lampreht getihtet,
von welsch in tiutsch berihtet
und hât ouch niht gar geseit
von im die rehten wârheit.
ein vruot her biterolf der hât
ouch durch sîner vuoge rât
getiht ein neizwaz maere
von dem wîsen wunderaere
als mir ist von im geseit.
dêstwâr, des ist mir niht leit:
ob des sprüche als ebene gânt
als ebene sîniu liet stânt,
sô sol er wol vollevarn
und die wârheit dran bewarn
daz er von im iht anders jehe
wan daz er geschriben sehe:
swâ diu maere spellent sich,
dâ sol er hoeren des bit ich,
und dienez iemer ûf mîn zil!
wan ich in tiutscher zungen wil
ein urhap dirre maere wesn:
als ich die wârheit hân gelesn,
vert ez, als ich hân gedâht,
sît ich hân zesamene brâht
allez daz diu schrift uns seit
mit ungelogener wârheit
endehafter maere
von dem wîsen wunderaere.
ist abr iemen vür mich komn
und hât sich des an genomn
daz er diu maere tihte
nâch der histôrje rihte
als ich sî gelesen hân,
dem wil ich diu maere lân:
hât er verrer und baz
dan ich gesprochen - âne haz
lâze ich im diu maere,
sint sie ganz und gewaere.
habes aber niemen sich
underwunden, sô lât mich
gedienen werder liute gruoz
den ich wil und dienen muoz,
und vernemet von mir hie
wie ez dem wunderaere ergie!
dô er mit küneclîcher kraft
ergreif die grôzen hêrschaft
und er mit kurzwîle aldâ
beliben was in persîâ,
von dannen schiet der wîgant
in partîânen daz lant.
daz was dô kleine, niht ze wît,
nû ist ez bî dirre zît
ein houbet aller rîche
diu nû gewalteclîche
ligent über eufrâten.
daz selbe lant partîânen
gât einhalp an daz rôte mer.
die zîten hâtenz mit ir her
betwungen dô, die ez noch hânt.
zwei wazzer durch daz rîche gânt
boristenes und tânâis.
diu âventiure uns tuot gewis
daz sich eurôpâ
scheide dâ und âsîâ
dise teile beide
mit des wazzers underscheide.
in daz rîche was gesat
hecontâpîlos diu stat,
die bûten krefteclîche
die kriechen in dem rîche.
die ergâben sich dem künge sâ
und ouch die stat. er hâte aldâ
mit vröuden grôze hôchgezît.
dô huop sich manec sunderstrît
von den sînen über al,
sie hâten manger hande schal
dâ von: sie waeren gerne hein,
sie wurden al gelîche enein
daz sie im die widervart
rieten. daz was ungespart,
sie sprâchen al gelîche,
sît er daz künecrîche
betwungen hâte und ouch diu lant
den zins gap sînes vater hant,
daz in des genuocte
und nû den sînen vuocte
und im selben iemer mêre
heime guot und êre
und sie mit ruowen lieze ir tage
vertrîben vroelîch âne klage,
sît sie mit solher arbeit
im hulfen grôzer rîcheit.
dô diu ellenthafte diet
dem künge disen rât geriet,
die wîsesten besanter dar,
er sprach ze der vil wîsen schar
< herren, mîne vriunt, welt ir
wider mînen willen mir
râten, sô tuon ich doch niht
wan daz mir zem besten giht
mîn sin und ouch mîn wîsheit.
ich hân iu doch hie vor geseit
daz ich die welt betwingen wil
unz an der erd endes zil.
swer mir des helfen welle,
der sî mîn geselle
und nim geteilet swaz mîn kraft
betwinge grôzer hêrschaft.
der des niht welle, der sî hie.
ir wizzet wol daz ich nie
deheiner dinge began,
mirn gelunge wol dar an,
daz ist iu allen wol erkant.
des ist manec rîchez lant
unsern kreften undertân
daz wir gewalteclîche hân.
diu hân ich niht eine:
ich mache sie gemeine
als mir eht iu allen!
uns dienent die trîballen,
an den nie mannes hant erstreit
dienestlîche sicherheit,
illîrjâ und bêôtîâ,
trâzîâ und spartâ,
pelôpones daz rîche,
uns dienet eigenlîche
von ellesponte unz an jônas
vil manec lant daz ie vrî was.
êolides die ritterschaft
hât ouch betwungen unser kraft,
cârîâ und lîdîâ.
capadôzîâ und frîgîâ,
zilîzj und sûrîe
und paphlagônîe,
wir hân betwungen pisidas
daz liut ie hôhes muotes was,
panphîlj und persîâ,
armênj und mêdîâ
und die rîchen fênîzen
und partîânen,
daz ist al in unser gwalt.
swaz dârîus der degen balt
hâte und im was undertân,
daz sol mich ouch ze herren hân.
des gebristet mir noch vil
daz ich niemen lâzen wil.
nâbarzânes irkânje hât,
in bessen hêrschaft noch stât
diu grôze rîcheit in baktrâ:
swaz hoeren sol ze persîâ,
daz sol ich von erbe hân.
bessus hât ouch sogdîân
und die massagêten gar,
im dienent ouch der dâchen schar,
die sâgen und die indî
sint im noch mit kreften bî.
des hêrschaft ich swîgen wil:
sîner untriuw ist sô vil
daz ich umb sîn verderben
iemer wolde werben
ê daz ich wold im vertragn
daz er mortlîche hât erslagn
sînen rehten herren.
solde im daz niht werren
und sold ers alsô genesn,
sô möht er vil gerne wesn
valsch und ungetriuwe.
daz mort muoz mir niuwe
iemer sîn bî mînen tagn,
ich richez an dem valschen zagn,
ez koste mich lant und guot,
ich erküele mînen muot.
sold ich in rîchesenden sehn
von dem diz mort ist geschehn,
daz waere schade mit schanden
mit unheil allen landen.>
sus sprach der saelden rîche.
dô sprâchens al gelîche
< swaz dû wilt, daz wellen wir
und helfen dînes willen dir,
sît es rât niht mac gesîn,
wir leisten al den willen dîn.>
des saget in der künec danc
als in sîn hôhiu triuwe twanc.
dô daz geschach, von dannen schiet
alexander mit der diet
diu mit im dar komen was.
crâterus und amintas
hiez er des landes phlegen dâ
mit ir scharn. er liez in sâ
sehs hundert man z orse bereit
mit werlîcher manheit
und vrecher schützen alsô vil.
er hiez sie elliu diu zil
belîben dâ mit dem her
biz sich diu lant sazten ze wer,
unz er diu betwunge.
dô kam der wîse junge
hin dâ man in ircânje vert,
die wege wâren im erwert
von wilde und von gebirge grôz.
dâ vliuzet abe als ez dô vlôz
ein wazzer strîchet durch daz lant
daz zîobêtis ist genant,
daz und der grôze rîdanô
besliezent daz rîche alsô
daz man ez lîhte mohte erwern
allen küngen und ir hern.
nâbarzânes was künec dâ,
der sante sîne boten sâ
dem küneg alexander dô
und enbôt im alsô
daz er durch sîne hulde
vernaeme sîne schulde,
die er an dem künge truoc
von persîâ den er sluoc.
er jach daz er in sîner nôt
den besten rât dem künge bôt.
dô swachet er in sêre
und lieze lîp und êre
an vremder liute triuwe gar
die vremde wâren komen dar,
und dô er wider riete daz,
dô wold er durch sînen haz
in von sîner hulde
vertrîben durch die schulde.
dô waere im und den persen leit
daz er sie zige valscheit
und sie dar waeren âne vâr
mit staeten triuwen manec jâr
getriulîch âne untriuwe komn
diu in ie waer vil unbenomn.
swaz im durch sînen valschen wân
bessus haete getân
durch sîn ungetriuwe site,
dâ waere er unschuldec mite.
dô der brief dem künge kam
und er die botschaft vernam,
er sprach< ich geloube wol
waz ich herumbe gelouben sol.
tuot er wol, daz ist im guot,
und hât er getriuwen muot.
doch hât er niht sô wol getân,
ich well in vür schuldec hân.>
alsus hiez er sîne man
sich rotten balde. er zogte dan
mit sînen rotten über al.
dô kâmens in ein langez tal
daz ist in mânen wîse erkant
sô der uns niuw ist genant,
der horne reichet einez dâ
biz dâ daz lant ze caspîâ
beslozzen in den landen lît.
vrechiu her vil lande wît
stôzent dran dâ nâhe bî,
cercête und môsînî
und die werlîchen câlibes,
die stolzen amâzones
und leukosîrî
der lant ist anderhalp dâ bî.
diu starken lant, daz wîte mer
die berge und manec wildez her
besliezent caspîam daz lant.
als uns diu schrift tuot erkant,
câlibes und môsînî
und leukosîrî
gein alexander vuoren,
in sîn gebot sie swuoren.
sus nâhet alexander sâ
mit sînem her gen capîâ.
dô santen zim ir boten dar
der gevangen juden schar
die vor mangen jâren
aldâ gevangen wâren,
und bâten den getriuwen man
daz er in urloup gaebe dan,
daz sie möhten mit ir scharn
vrîlîche ze lande varn.
wannen die dar waeren komn?
ob ir des iht hât vernomn,
sô wil ich iu ez tuon erkant
als ich ez geschriben vant
nâch endelîcher wârheit
als diu heilege schrift uns seit
und als ez jerônimus
schreip und der wîse jôsephus.
dô got die israhêlschen diet
von egipten geschiet,
und sie daz süeze wunschlant
daz in von gote was benant,
besâzen als er in gehiez
dô er die heiden dannen stiez
und in gap eigenlîche
z erbe diu selben rîche, -
sie kuren rihtaere
und êwarte gewaere
die sie solden lêren,
dô sie begunden mêren
und wahsen krefteclîche
dâ in ir künecrîche
mit gotes helfe unz an die tage,
daz samuêl der wîssage
der gewaere gotes degn
ir mit lêre solde phlegn
und sie durch ir tumben sin
ieschen einen künc an in.
daz was saul, den gap er in
und stilte mit ir tumben sin,
daz joch er in ze tragenne bôt
eigenlîche an strenger nôt,
er lie sie dienstes lernen hie,
des begunden sie ê nie,
wan sie kunden niht vertragn
daz sie dâ vor in ir tagn
ie vrîlîche lebten,
in vrîem muote swebten.
swaz lebelîchez leben hât,
daz mac vertragen guottât
wan eine des menschen lîp,
ez sî man oder wîp,
daz kan noch mac vertragen niht
obe im guotes iht geschiht.
aldô daz selbe ouch in geschach
daz man sie dienest lernen sach
des sie dâ vor niht kunden
und niuwan dô begunden.
saul tete wider got
und wider sîniu gebot
unz er in von der krône treip.
dô si âne künc beleip,
dô wart der wîse dâvît
ze künge erkorn nâch der zît,
dem got tet sîn helfe erkant
unz er mit im überwant
die vervluochten heiden,
die got het gescheiden
in süntlîchen schulden
von sînen süezen hulden.
dâvît der erwelte gots
was ein kemphe sîns gebots
unz in got sîniu tougen
gar ân allez lougen
lie wizzen heimlîche.
nâch im wart daz rîche
dem wîsen salomône.
dô der des rîches krône
hâte in küneclîcher phlege,
er vuor ûf dâvîdes wege
biz daz der tempel was bereit
mit gotlîcher heilekeit.
sît tet er solhe schulde
daz er die gotes hulde
süntlîche enwâge liez.
warumbe in got niht verstiez
und sîn liut liez lîden?
daz tet er durch dâvîden,
daz doch dem künne sît geschach
an dem got die schulde rach.
dô salomôn der künec starp,
sîn sun nâch im die krône erwarp
mit ellenthafter künges hant,
der was rôboam genant.
jerôboam ein wîser man
dâ vor salomône entran,
der was ouch der selben art
von der daz künne erhaben wart,
und vlôch in egiptenlant.
dô der gewaerlîche bevant
daz salomôn der wîse man
erstorben was, er kam her dan
dô vür jerûsalem aldar
und diu zwelf geslehte gar
von abrahâmes sâmen
und bâten rôboâmen,
sît er ir herre waere
daz er ein teil ir swaere
senftert und ir arbeit
die ûf sie haerte geleit
salomôn bî sînen tagn,
sie möhten niht daz joch vertragn
daz er haete ûf sie geleit
mit dienstlîcher arbeit.
dô der künec hôrte ir klage,
gespraeches gerte er drîe tage,
daz gâben sie im sâ zehant.
dô wurden dar vür in gesant
an den sîns vater rât ê stuont,
die tâten als die wîsen tuont
und rieten im den besten rât
getriulîch âne missetât.
sie sprâchen< herre mîn, dû solt
dir dise liute machen holt
mit linden worten süezen.
dû maht vil gerne büezen
mit süezer rede dîner schar,
ob in iht wirret oder war
von dînes vater schulden,
dû maht sin dînen hulden
iemer wol behalten,
wiltû diemüete walten,
dû twingest sie baz dan mit drô.>
den rât die wî sen rieten sô.
die jungen wurden dô besant,
den tet er disen rât erkant.
die sprâchen< der rât ist ein wiht,
dêswâr, dû solt sîn volgen niht.
soldestû die mit vlêhe hân
die dir doch sint undertân,
daz müeste swachen dîne kraft:
in vorht und in meisterschaft
süln sie dir dienende sîn,
als tâten sie dem vater dîn,
des kraft ist gegen dir lücke:
dînes vaters rücke
mohte niht sô grôz gesîn
sô der minste vinger dîn
den dû hâst an dîner hant.
dich versmaehent dîniu lant,
sehent sie dich ze linde:
wis landen und gesinde
vrevellîche herte!
swâ sie dîn vater berte
mit geiseln, dâ soltû die schar
mit scorpîônen slahen gar.
- ein stap ist scorpîô genant
als uns diu wârheit tuot erkant,
dâ sint an gehangen
mit liderînen strangen
grôze knöphe blîjîn.
daz was dô diu groeste pîn
dar an ie man mit arbeit
wart durch zühtegen geleit.> -
dar nâch dô der dritte tac
erschein und sîn zît gelac,
dô wurden aber sâ zehant
diu geslehte dar besant,
sie sprâchen< herre, wes hâstû
dich gegen uns berâten nû?>
dô dûht in daz tumbe guot
als ez ie der tumbe tuot,
und sprach hin zin diu selben wort
diu im die tumben rieten dort.
sie sâhen al ein ander an,
sie sprâchen< uns wil dirre man
mit senfte swaere büezen niht
als er selbe hie vergiht.
durch waz süln wir dienen mê
dem geslehte von jessê
dann andern die des künnes sint?
jâcob hâte zwelf kint
diu wâren al ebenrîch,
an vruht, an edelkeit gelîch.
wes was edeler jûdas
dan der elteste was
ruben der billîcher
gewaltec waere und rîcher
dan der brüeder dehein
der ieglîcher junger schein?>
dô der murmer was getân,
man sach sie von hove gân,
ân urloup sich dannen schiet
von dem küneg al diu diet.
von nander schieden sich dô sâ
der juden zwelf geslehte dâ.
der zehen brüeder künne gar
habeten sich an eine schar
die jerôboâmen
in ze künge nâmen,
der sie vuorte dannen sâ
hin gen samarîâ,
die kurn sie mit rîcher kraft
ze houbetstat ir hêrschaft.
den namen sie dô nâmen
von dem sie alle kâmen,
jsrahêl sie nanten sich.
sie dûhte reht und zimelich
daz in der name würde erkorn,
von dem sie wâren ouch geborn.
jûdas und benjamin
geselleten sich under in.
in jerûsalem beliben die
bî dem gotes tempel hie,
den beleip ze helfe bî
ein teil des künnes von lêvî,
wan die dô bî den zîten
hiezen die lêvîten.
( in unser ê der die verwiset
der daz êvangêljum liset.)
die beliben mit jûdâ
durch daz gotes ampt aldâ
in jerûsalem der houbetstat
dâ der tempel was gesat
sît daz daz israhêlsche diet
mit ê, mit hêrschaft sich geschiet.
die beidenthalp dô wâren
in zwein hundert jâren
und vierzec jâr und sehs tage
und aht mânôde jage
künge, die nenn ich iu hie.
wiez in allen sît ergie,
des waer ze sagenne ze vil,
kurzlîch ich sie nennen wil.
in judêâ truoc vil schône
rôboam die krône,
nâch dem sîn sun abîâ,
dar nâch des sun hiez asâ,
der was reht âne missetât.
der edel wîse jôsaphât
sîn sun nâch im die krône nam,
nâch dem des sun hiez jôram.
dar nâch des sun die krône enphie
der ûz gotes gebote gie,
der was geheizen jôas.
des sun was amâsîas
der worhte ouch grôze missetât.
mathêus dise beide lât
durch ir ungancheit
ungeschriben und ungeseit
und tuot niht von in erkant
dâ er daz künne hât genant
von dem sider wart geborn
diu reine maget ûz erkorn
diu unsern herren gebar
krist keiser aller keiser gar,
und sprichet sus: osias
geborn von jôrâme was,
den sach man nâch im krône tragn.
die truoc sîn sun nâch sînen tagn,
der was jôathan genant.
achas der gotes wîgant
sîn sun nâch im künec was,
nâch dem ezechîas,
des sun enphie nâch im daz lant,
der was manasses genant.
nâch dem wart diu krône
sînem sune amône,
nâch dem des sune jôsîas,
des sun jechônîas
wart nâch dem ze künge erkorn.
dô verhancte gotes zorn
daz nâbuchodônosor
den ich genennet hân hie vor,
zerstôrte gar ir herschaft
und vuorte sie mit überkraft
in babilônje, daz ist wâr,
dâ sie sider sibenzec jâr
gevangen inne wâren, -
die man sît nâch den jâren
sach ir groeste hêrschaft hân,
die wil ich ungenennet lân:
an achas dâ endet sich
darumb ich der rede mich
von in ze sagenn underwant.
alhie hân ich gar genant
die nâch salomône
in judêâ truogen krône,
unz in got ir hêrschaft
brach und ir beste kraft.
nû wil ich die ouch nennen
daz ir sie müget erkennen,
die dô in samarîâ
der isrâhêlen krône dâ
truogen, sît daz sich die schar
der hêrschefte schieden gar.
jerôboam die êrsten truoc
des ich iu hie vor gewuoc,
der gienc ûz al den gotes wegn
der dô hâten dar gephlegn
die gotes erwelten unz an in,
er truoc gar verkêrten sin.
dô der selbe künec starp,
nâdap nâch im die krône erwarp.
nâch dem rîcheseten dâ
baasâ und elâ,
dar nâch die krône truoc zambrî
und nâch dem ambrî.
dar nâch enphie daz rîche
mit kraft gewalteclîche
ein werlich degn hiez achap.
in des zît kam bênâdap
von assîrîâ dem lande
mit mangem wîgande
und reit mit grôzen kreften an
achaben und sîne man,
daz was daz israhêlsche her,
daz tet er gar âne wer.
sîn her sazte sich aldâ
mit kreften vor samarîâ,
daz niemen wider im dô was.
der wîssage êlîas
gebôt dem künge daz er strite
und ûf die gotes vînde rite.
daz geschach. er reit in an
und sluoc im hundert tûsent man.
die andern kûme entrunnen
dô sie die vluht gewunnen.
sît kam der selbe künec dar
mit alsô unzalhafter schar
daz niemen des begunde
daz er sie gahten kunde,
daz was bî jôrâmes zît
der nâch im was der dritte sît,
und saz vor samarîâ
mit solhen kreften daz sich dâ
ze wer gein ime niemen bôt,
er twanc sie mit sô grôzer nôt
daz sie beliben âne wer.
bî dem israhêlschen her
der gotes wîssage was
êlisêus als ich las,
der gap den sînen disen trôst
sie würden von der nôt erlôst,
ob eht sie den gewaeren got
minneten und sîn gebot.
an disen trôst lie sich daz her
sô daz sie die stat mit wer
behielten und aldâ belibn.
doch wurden sie dar an getribn
daz man in der stat ein brôt
umb drîe vierdunge bôt
und man ez vant vil kûme alsô.
in der veste gap man dô,
obe ir mirz geloubet,
eines esels houbet
umb vünfzec phenninge
die mit dem gedinge
wâren loetec silberîn.
dô muosten ouch vergolten sîn
vünf phenninge mit dem magn
den man sach eine tûbe tragn.
dô der künc sô grôzen pîn
sach an den helfaeren sîn,
vil grôze vorht er gevie.
eines tages er sich ergie
gegen der mûre ûf die gewer,
dar abe er kôs der vînde her.
dô kam vil trûreclîche
ein vrouwe jâmers rîche
vür in. sie klagte grôze nôt,
ze sînen vüezen si sich bôt,
si sprach< genâde, herre mîn!
lâ dir durch got geklaget sîn
grôz unreht, daz mir ist getân,
daz ich dir ze klagenne hân.
ich und ein ander wîp, wir zwô
wurden des ze râte alsô
daz wir uns berieten
und unser kint brieten
und mit ein ander aezen,
daz wir ein teil vergaezen
der ungewonlîchen nôt
die uns der leide hunger bôt,
ê daz wir verdürben
und von hunger stürben.
diz geschach. daz tâten wir.
dô âz ich mîn kint mit ir
in jaemerlîchen sorgen.
nû hât si'z ir verborgen
und wil des niht geben mir,
als ich ir tet. daz klage ich dir.>
der künec jaemerlîche sprach,
dô disiu klage alsô geschach
< ôwê mir! wê ich armer man
daz ich ie den lîp gewan!
wes hân ich armer man gebitn!>
er sprach mit klagelîchen sitn
< sît mich der wîssage hât
betrogen und sîn valscher rât,
sô sol er mir von rehte gebn
umb die schulde nû sîn lebn.>
einen kneht sant er dâ hin
und hiez vil balde slahen in.
dô gerou ez in zehant
daz er hâte dô gesant
den boten umbe solich mort
als er geheizen hâte dort.
diu sünde und ouch sîn triuwe
brâhte im mange riuwe,
im was nâch dem boten gâch,
er lief im snelleclîche nâch
daz er diz mort erwante
darumbe er in dar sante.
nû diz gerâten was alsô,
der wîssag was heime dô
und sîne junger der er phlac
mit gotes lêre mangen tac.
ze den sprach er< hie kumt ein man
der hât sich des genomen an
daz er mich slahen sol zehant,
darumbe ist er dâ her gesant.
den lât dâ ûze vor der tür
biz daz der künec kume dâ vür,
sô kan mir gewerren niht
und wirt erwendet diu geschiht.>
hie mite sach man den zuo gân
der diz solde hân getân.
dem wart diu tür verstanden dâ.
der künec selbe kam dô sâ
und sagete von der arbeit
als im was und ich hân geseit.
der wîssag an den künec sach,
vil gezogenlîche er sprach
< herre mîn, lâ dîne klage!
dû sihst morn an dem tage,
ê daz kume disiu zît,
daz man simelmelwes gît
daz ein kembel treit mit nôt,
baz dan man hiute tuot ein brôt.>
undr des künges armen dâ
stuont einer der antwurte sâ
der rede, er sprach< ich weiz vil wol,
waer der himel spîse vol
und viel der danne ûf disen plân,
ez möhte niemer sus ergân
und alsô gaehes geschehn.> -
< nû sol ez dîn ouge sehn
und wirdest doch gebezzert niht,
swie dîn ouge ez an gesiht.>
der künec schiet von dannen sich.
daz waer ungelouplich,
wan daz gote ist niht ze vil,
er ende swaz er enden wil.
alsô des selben was dô nôt.
der sunnen schîn wart schiere rôt.
der zergie. der tac verswein,
diu vinster naht vil trüebe schein.
nû lâgen vor samarîâ
miselsühtec liute dâ,
die twanc ouch des hungers nôt
daz sie vil nâch wâren tôt.
die sprâchen in ir noeten dô
< wie tuon wir alsus daz wir sô
von hunger sterben âne wer?
gên wir in der heiden her
und lîden gerner von in nôt
danne wir sus ligen tôt
mit schanden gar ân êre!>
sie sûmten sich niht mêre,
sie huoben sich vil balde dar.
dô hâten sich die vînde gar
von dan verstoln die naht mit vluht,
sie hâten rîlîche genuht
mit in dar brâht. die liezen sie
an der herberge hie.
daz die siechen vunden dâ.
die labeten sich und kêrten sâ
vil balde wider gegen der stat.
mit den diu wahte was besat,
den sageten sie ze maere
wiez ergangen waere.
diz maere niender dô erwant
ê daz ez der künc bevant.
als erz bevant, er hâte wân
ez waer durch kündekeit getân.
sîne boten santer vür,
die mit wîslîcher kür
im diu maere solden spehen
durch waz diu vluht waer geschehen.
die ranten nâch unz an den tac
daz ir deheiner ruowe phlac,
daz sie nie man gesâhen,
des sie mit wârheit jâhen.
dô dem künge was geseit
wiez ergie, diu wârheit,
er sante sîne boten dar
hin dâ gelegen was diu schar
und hiez, swaz sie dâ vunden,
daz sie daz an den stunden
hin brâhten in die veste.
nû hâten dâ die geste
gelâzen guotes harte vil
daz sie an dem selben zil
hâten brâht dar in daz lant,
harnasch silber golt gewant
spîse, rîche bettewât,
von guote küneclîchen rât.
diz wart vil gar genomen dâ
und in die stat gevüeret sâ.
die inren sêre drungen,
die alten zuo den jungen
hin dâ diu spîse komen was
von der manger sît genas.
in der vröuderîchen schar
was ouch jener komen dar
der ê hâte des gejehn
ez kunde nie mêr geschehn
daz mit wunder dô geschach.
als er die wârheit ersach,
er wart ze tôde erdrungen.
dem was rehte gelungen
wan swaz got wil daz geschiht,
daz ist wâr und anders niht.
diz grôze wunderlîche heil
machte sie sô gar ze geil
daz sie von unmuoze gots
vergâzen und sîns gebots
und machten dô ir abgot
durch des tiuvels gebot.
sie tâten als diu zarten kint,
diu mit zarte ergouchet sint,
sô den ir vater vil gedröut
und sie dar nâch mit zarte vröut,
sô tuont sie nâch vil wirs dan ê.
sô man ie harter und ie mê
verzartet diu ze lieben kint,
sô sie ie wirsers sites sint.
sus wurden sie z unrehte erkant,
dô sie got von der nôt enbant.
diz hân ich hie durch niht geseit
wan ob ir die arbeit
vernemet diu in noch geschiht,
daz ir danne denket niht
< wie tet got sus sîner diet
die er von al der welt ûz schiet?>
wizzet! sie gedienten wol
daz in her nâch geschehen sol
mit sage, als ez nû lange vrist
mit wârheit in geschehen ist.
dô achap der künc vervuor,
daz rîche sînem sune swuor
der hiez ochôzîas,
der ouch alsolhes muotes was
daz er brach daz got gebôt.
der lac dar nâch vil schiere tôt,
er hâte vil kurzlîche
die krône und ouch daz rîche.
dô der verdarp nâch sînen tagn
sach man ob in krône tragn
den bruoder sîn hiez jôram.
die wege die jerôboam
gie mit verkêrtem muote vor,
die trat er nâch ûf sînem spor
und sô vil mê noch vürbaz
daz er gediente gotes haz
sô sêre daz er in verstiez
und in ze tôde slahen hiez.
einer was jêû genant,
der enphienc nâch im daz lant.
dem gebôt der wîssage
daz er alle sîne tage
wuost und erslüege
swer jôrâme trüege
angeborne sippeschaft,
daz er der leben und ir kraft
verdarpt und ir wünne
unz an daz vierde künne.
daz geschach. ez muoste wesn.
er lie deheinen dô genesn
der von dem künne was geborn:
alsus rach der gotes zorn.
jêû der rehteste was
den über sich ze küng ûz laz
diu isrâhêlische diet,
sît daz ir hêrschaft sich geschiet.
der hiez ouch sagen maere
daz im ze muote waere
daz er mit triuwen âne spot
baalen ir gewaeren got
von herzeclîchen sinnen
wold üeben und minnen,
durch gotes minne er alsô louc
unz er sie alle dar getrouc,
die er dô über al sîn lant
in sînem dieneste vant.
die kâmen durch die botschaft dar
und marcten sich. er hiez sie gar
verbrennen. daz was gotes gebot.
er brach ouch daz apgot
und sîniu betehûs dar nidr,
daz liut twanc er ze gote widr
und an den gelouben sîn,
des tet im got vil helfe schîn.
der nâch des selben künges zît
in israhêl die krône sît
truoc mit gewalteclîcher hant,
der was jôachas genant.
der liez ouch ûz sîner phlege
gotes gebot und sîne wege.
dô der von der krône schiet,
dô nam diu israhêlsche diet
einen künc hiez jôas.
der bî den selben zîten was
künc in jerûsalêm erkant,
der was ouch jôas genant.
von den genannen beiden
was gotes gebot gescheiden:
ietweder swâ er möhte,
tet swaz z übele töhte,
daz got niht ungerochen lie:
wan er verhanct über sie
daz sie mit vîentlîchen sitn
ein ander vîntlîch ane ritn.
jôas der künc von judêâ
entweich den israhêlen sâ
gen jerûsalêm mit vlühte hin
und ergap sich sît an in,
dâ von der stat grôz leit geschach.
durch die rincmûr er brach
ze vier orten lücken wît,
die stuonden offen lange zît
daz man in der mâze
al ûf der lantstrâze
durch graben und durch mûre hin
mohte varn ûz und in
unz sie aber wurden sidr
gebûwen und gemachet widr.
dô von israhêl jôas
gescheiden von der krône was
und in samarîâ verdarp,
jerôboam die krône erwarp,
der lebet in den siten gar
alsam sîn êrster vorvar.
der nâch deme künec was,
der hiez zacharîas,
der vuor ouch ûf der selben vart
diu an in komen was von art,
die hielt er unz an sîn drum.
nâch dem wart sellum
künec überz rîche dô,
der lebte unz an sîn ende alsô
daz er ouch wênec ahte nam
waz gotes êren wol gezam
unde sîner süezen ê.
nâch dem wart dô manahê
künc in samarîâ sâ
und nâch dem phâceiâ,
der lebte ouch als die andern ê.
dô wart nâch im phâceê
künec in dem rîche.
dô der gewalteclîche
truoc die selben krône dâ,
dô was der künc in judêâ
achas der vil guote man.
den reit der selbe künec an
von sûrîê râsim.
ein künc gesellete sich zim,
der brâhte küneclîche kraft
wan er phlac grôzer heidenschaft
und was ouch selbe ein heiden.
mit disen küngen beiden
und vremden wîganden
wart achas bestanden.
der streit mit in einen strît,
dô verlôs er an der zît
sînen sun der wart erslagn,
den man sêre muoste klagn,
der hiez zacharîas.
nû diz alsô geschehen was,
achas vuor an den künc râsim
den heiden und ergap sich im.
der sicherte zuo zime dâ
gein phâceê dem künge sâ
und gegen der israhêlschen diet.
dô sich ir unminne geschiet,
dô swein des hoehsten gotes ê
bî dem künge phâceê
und zergie sô sêre
daz ez got niht mêre
an in vertragen wolde.
er rach ez als er solde
und ich iu wil bescheiden.
phûl ein rîcher heiden
ein starker künc von assûr
mangen leiden nâchgebûr
brâhte mit werlîcher kraft
von der wîten heidenschaft
in der israhêlen lant.
sîn her was alsô grôz erkant
daz sich im niemen kunde erwern
noch von sîner kraft genern.
den sante got der guote
den sînen zeiner ruote,
der sie nâch sînem willen
slahen unde villen
solde durch die schulde grôz
der sie ze tuonne niht verdrôz.
sie tâten daz in was verbotn
und dienten valschen apgotn.
daz rach unser herre an in:
phûl der künec vuorte ir hin
drithalp geslehte sâ
gevangen gen assîrîâ
und saztes in ein wîtez lant
daz ist caspîâ genant,
dâ wâren sie besezzen sô,
swie gerne sie ze lande dô
wolden sîn, sie muosten doch
gevangen dâ belîben noch
und zinsen dâ mit ir hant
ir lîp, ir guot und ouch daz lant.
die siben geslehte die noch dâ
beliben in samarîâ,
die bezzerten ir leben niht
als diu wârheit jach und giht,
sie tâten dô als dâ vor ê.
dô starp der künec phâceê.
der dô wart künec überz lant,
der was oseê genant,
der lebet als die andern gar.
ein heiden hiez salmânasar
von assîrîâ dem rîche,
der reit gewalteclîche
der jsrahêlen künec an,
des half im ein gewaltec man
der rîche künec persistas
der in egipten künec was,
die beide helde hôchgemuot
brâhten solhe heres vluot
daz sie daz israhêlsche her
besâzen gar ân alle wer.
diz ist âne liegen wâr.
sie hâten sie gar driu jâr
sô krefteclîchen umbe legn
daz sie niht mohten wer gephlegn.
zu jungest vuorten sie dan
oseên und sîne man
und der siben geslehte her
gar gevangen âne wer
ouch in daz lant ze caspîâ.
ein wazzer ist genant gôzâ,
daz vliuzet durch daz rîche.
daz rîche ist vesteclîche
mit vesten wilden alben
beslozzen allenthalben
und ist sô wît daz ez nie man
an wîte, an lenge ermezzen kan.
diu künne wurden alsô gar
enwec gevüeret mit ir schar
daz man dô über allez lant
niuwan boesiu hiuser vant,
diu wâren gar zerbrochen
und liute vil erstochen.
daz lant was als eine gar
daz man von andern landen dar
liute twanc mit meisterschaft
daz ez wurd aber bûhaft.
der heilige tôbîas
der ein gotes erwelter was,
ouch aldâ gevangen wart
an der selben hinevart
dô daz lant wart gewunnen.
die dô der nôt entrunnen
unde wâren komen hin,
die wuohsen sît abr under in
mit kraft in langen zîten,
von den die samarîten
mit ir geslehte kâmen,
die urhap an im nâmen.
waz sol ich von den sprechen mê?
ich hân von in gesprochen ê
wie sie lebten in ir tagn,
durch waz sold ich ez aber sagn?
alsus zergie der juden kraft.
der zehen geslehte hêrschaft
wuohs manec jâr in caspîâ:
sie sâzen zinslîche dâ
den persen sunder widerstrît
manec jâr unz an die zît
daz sie bevunden maere
daz der wunderaere
alexander der wîgant
haet überwunden diu lant
und vür diu rîche dar was komn.
ouch hâten sie von im vernomn
die êre - als ich iu hân geseit -
die er mit grôzer werdekeit
in jerûsalem den juden tete.
sie santen zim und was ir bete
daz er sie lieze mit ir scharn
vrîlîche ze lande varn,
daz man in niht taete.
der edel degen staete
vrâgte dô der maere
durch waz schulde waere
diz grôze her gevangen dâ.
dô sagte man dem künge sâ
rehte wie ez was geschehn
und als ich iu hân verjehn
daz sie durch des tiuvels spot
verkurn gar den hoehsten got
und sprâchen baal ir gebet,
swaz in got gnâden ie getet.
der künec smierlîche sprach
daz doch niht durch guot geschach
< dêswâr, sît sie den hoehsten got
durch ir untriuwen gebot
hânt verlâzen und verkorn
und sît sie durch sînen zorn
sô lange sint gevangen hie,
sô wil ich baz besliezen sie.
helf er in danne hinnen,
sô mügen sie gewinnen
nâch alsô grôzer schulde
sîne süezen hulde.
er hât gewaltes alsô vil
daz ich dar an niht zwîveln wil,
gewünnen sie die hulde sîn,
er lîhtert wol ir hôhen pîn
und ir wol gediende nôt.>
den sînen dô der künc gebôt
daz sie naemen in ir phlege
ein enge klûse diu die wege
wîste kuntlîche
dar in daz künecrîche.
durch die klûse muost man hin,
gegen dem land ûz und in
varn, niender anderswâ.
den wec wold er vermûren dâ.
als man des werkes dô began
und der ellenthafte man
sach und daz rehte kôs
daz der bû was endelôs
und ez alsô niht töhte
daz manz genden möhte,
schamn er sich begunde
daz er nû sus erwunde
daz er daz werc doch ane vie.
dô liez er sich ûf sîniu knie,
ze gote sprach er sîn gebet,
vil inneclîchen er daz tet,
ob diz waer in dem willen sîn
daz er im taete helfe schîn
und mit gotlîchen dingen
im hulfe vollebringen
durch sîne gotheit daz werc.
dô rihte sich der eine berc
zwelf klâfter an den andern:
durch den rîchen alexandern
got diz grôze wunder tet
und durch sîn diemuotlich gebet.
dâ nzwischen was ein wîtez loch
daz stuont wîten offen noch,
daz hiez ie sâ vermachen
mit krefteclîchen sachen
der edel wîse wîgant.
absichitôn ist genant
ein zêment daz brichet niht.
swâ mite manz versuochen siht,
ez mac niemêr gerîsen:
viur stahel êr noch îsen,
wazzer noch niht des man hât,
des phlasters kraft ze schaden stât.
alsus sint sie behalten
und müezen iemer alten
mit der vancnisse dâ
in der vil wilden caspîâ
unt an die jungesten zît
als uns diu schrift urkünde gît,
sô werdent sie her ûz gelân.
diu welt muoz von in kumber hân
und schaden vil mit arbeit,
als uns der wîssage seit.
von disem wunder sprichet sus
der vil wîse jôsephus
< sît got diz grôze wunder tet
durch eines heidens gebet,
seht waz tuot denne got
durch den der leistet sîn gebot!>
ich waene vil des zeicter dâ.
ich hân gelesen anderswâ
daz diz lant und disiu her
mit einem wazzerlôsen mer
sîn an einer sîten
beslozzen zallen zîten,
daz mer sî al gemeine
sant griez und edel gesteine,
daz gestât niemêre stille,
in einem gewille
willet ez sich zaller zît.
vor den zîten ê noch sît
wart nie ze keinen stunden
der list den liuten vunden
daz man dar über möhte komn,
dar übr ist in diu vluht benomn
und umb sich allenthalben
übr die wilden alben
die sie in allen enden
mit hôhen steinwenden
besliezent vesteclîche dâ
in der unkünden caspîâ.
mit endehafter wârheit
die vancnisse hât geseit
der gewaere jôsephus.
dâ bî seit metôdîus
der rehte und der gewaere
ouch ein ander maere,
der was ze patres in der stat
zeinem rihtaere gesat
ein bischof nâch der kristenheit
der durch krist die martel leit,
der begunde suochen
obe er an den buochen
vunde keiniu maere
der vergezzen waere
und in latîne niht geschribn,
in kriesch und in êbrêisch belibn.
dô vant er nütziu maere
diu der vil gewaere
jerônimus niht tet erkant
und sie ouch lîhte niender vant
und dâ von an im belibn
ungeseit und ungeschribn.
er trift vil kurzlîche
die scheidunge der rîche
und wie sich nâch dem êrsten man
die scheidunge huoben an
und wie diu welt verenden sol,
daz hât sîn maere gendet wol.
swaz der von alexander seit
ungelogener wârheit
daz wil ich iu sagen hie,
nû hoeret wie er ane vie!
ez ist dicke kunt getân
mit ganzer wârheit âne wân
wie got nâch sînem werde
geschuof himel und erde
und wie adâmen got verstiez,
dô er brach daz er in hiez,
durch êven sînes wîbes rât
diu im geriet die missetât.
êvâ nâch drîzec jâren
daz sie ûz getriben wâren,
sun und tohter gewan,
câin und calmanan,
dar nâch abeln den guoten man
und sîne swester dêboran.
dô drîzec und hundert jâr
dar nâch vervuoren, al vür wâr
câin ze tôd abeln sluoc.
êvâ den dritten sun nû truoc,
daz was sêt ein saelec man
dar nâch kinde vil gewan
diu ie kint gebâren.
nâch aht hundert jâren
was daz geslehte von câin
in grôzen sünden under in,
sie leiten gotes lêre hin
und kêrten allen ir sin
an süntlîche missetât
durch des leiden tiuvels rât.
übr drîzec und niun hundert jâr
dô starp adam, daz ist wâr,
câin worhte sünden werc.
sêt huop sich ûf einen berc
ôstert zuo dem paradîs
dô wart in vîentlîche wîs
daz êrste künn gescheiden
undr den bruodern beiden.
efrêm was diu êrste stat
diu ûf die erde ie wart gesat,
die machte câin al dort
dâ er tet daz grôze mort.
ûz dem geslehte von sêt
wart geborn dô jarêt
und wâren tûsent jâr dâ hin.
ûz dem geslehte von câin
kam lâmech und jôbal
und der listwürke tôbal.
lâmech câin sît erschôz.
dô wart daz unbilde grôz
von sünden an den stunden,
die liste wurden vunden
daz man golt êr silber îsen
mit werke kunden wîsen
als man noch kan liste vil.
mûsîca und seitspiel
wart ouch dô vunden, daz ist wâr.
über siben hundert jâr
nâch jarêtes zîten
begunde sünde wîten
und wart groezer vil dan ê.
sie worhten grôzer sünden mê
dann ie geschaeh unze dar,
von gote die vermeinten schar
tâten grôzer sünden vil
die ich nû verswîgen wil.
hie vor was nôê behuot,
der machte gegen der sintvluot
ein arke als im geboten was
dar in er und sîn wîp genas
und sîner drîer süne lîp
und bî den der selber wîp
und ie zwei mit geselleschaft
al der geschaft die gotes kraft
geschuof ûf der erde hie.
dô diu sintvluot ergie
und al diu welt verdorben was
wan daz bî nôê genas,
nôê sîn opher brâhte gote
und diende sînem gebote
mit staeten triuwen âne vâr.
dô wâren aber tûsent jâr
nâch jenen tûsent jâren hin.
die süne begunden under in
bûwen an dem selben zil
veste lant und stete vil
und wuohsen sêr über al
tûsent jâr, daz ist ein zal
und heizet millenârîus,
diu schrift hât ez geheizen sus.
dô zwir diu zal hine gie
und diu dritt ane vie
mit drin hundert jâren
dô diu verendet wâren,
nôê der gotes dienstman
aber einen sun gewan,
der was jônitus genant.
dem gap er êôtham daz lant,
daz lît in orientê.
dô starp der heilege nôê,
des alter gahtet was vür wâr
vür vünfzec und niun hundert jâr.
jônitus vuor in daz lant
daz im was dâ vor benant,
daz lît dâ diu sunne ûf gât.
dem gap got sô wîsen rât
daz er astronomîe vant
und êrste tet die liste erkant.
sêm beleip in âsîâ,
des künne wuohs mit kreften dâ.
câin der sûmde sich niht mê
der wont in mêridîê,
daz ist nâch der buoche sage
dâ diu sunne in mitten tage
ûfreht obe der erde stât.
dâ si des âbends under gât,
biz dar wâren elliu lant
dem einen sune dô benant.
japhêt huop sich schône
hin gen aquilône,
dem wart ouch mit werde
daz vierde teil der erde.
nemrôten jônitus gewan
der babilônj êrst began
dâ zwô und sibenzec zungen
mit vremden wandelungen
von êrste wurden vunden.
an den selben stunden
wart in câmes künne erkorn
ein künec was von im geborn,
der was pontibus genant,
nâch dem pontus daz lant
den selben namen dô gewan.
jônitus der wîse man
bût eine stat in êôthâ,
diu waz geheizen jônitâ.
dô sicherten sich zaller nôt
pontibus und nemrôt.
daz zurnde sêre jônitus,
nemrôte enbôt er sus
daz er die selben sicherheit
lieze, si waere im leit.
durch sîne bete daz geschach.
die dritte zal man enden sach
diu in den zîten dô zergie
dô diu vierd ane vie.
dô huop sich urliuges nôt,
pontibus und nemrôt
riten sêre ein ander an.
nemrôt den sic gewan,
pontibus wart überritn,
krefteclîchen überstritn,
daz êrste urliuge huop sich an
daz lant mit land ie gewan,
dô die hôchgemuoten man
ein ander beide riten an.
dô behabte nemrôt
mit grôzer urliuges nôt
nâch küneclîchem werde
die monarchîe der erde.
dô wart in sîner vruht geborn
nâch im ein künec ûz erkorn,
der hiez cûsiresdes,
des sun hiez eresdes
ein ellenthafter wîgant
der reit mit kraft in câmes lant
und vienc dâ krefteclîche
vier grôze künge rîche,
daz was jôbusêus
und ouch amôrêus
und palestînus
und der gewaltig afrus,
und verwuoste gar ir lant.
der edel degen wît erkant
liez nâch sînem tôde dô
einen sun hiez cusdrô.
câmes süne begunden
gedenken an den stunden
wie manger hande herzeleit
und wie michel arbeit
in haet eresdes getân
sîn vatr, als ich gesprochen hân.
cusdrôn sie wolden rîten an,
driu hundert tûsent man
und zweinzec vuortens in sîn lant.
dô samente der wîgant
gegen dem her sô grôze schar
daz er daz her ersluoc sô gar
daz ir nie deheiner sidr
kaeme von dem strîte widr.
dô huop sich klagelîche
übr elliu künecrîche
angest arbeit und nôt,
vrid und genâde daz was tôt.
in den selben zîten dô
hâtez sich gevuoct alsô
daz samsab von êôthâ
unz an die ûzern indîâ
mit sô grôzen kreften reit
daz er diu lant gar überstreit.
von indîâ kêrt er her widr
und kam in arabje sidr
und in die grôzen sâbaâ.
mit kraft bestuonden in aldâ
der ismahêlen ritterschaft
mit sô grôzer überkraft
daz samsab der wîse man
mit lützel heres kûme entran,
daz ander was im gar erslagn.
nû wil ich kurzlîche sagn,
wer ismahêlen wâren
dâ vor in mangen jâren.
got abrahâme daz gehiez
daz er im als des meres griez
sîn künne wolde mêren gar.
isaâgen sârâ gebar,
jâcoben isaâc gewan,
jâcob der gotes erwelter man
was der êrst urhap
der ismahêl den namen gap,
an den got sider langiu zil
worhte grôzer wunder vil.
die süne von abrahâme sint
komen als gewaeriu kint.
er hâte ein dierne hiez agar,
diu selbe im einen sun gebar
der was geheizen ismahêl.
in der wîs als israhêl
wuohs gegen der gotes ê,
sus wuohs sîn künne: ez wart vil mê.
von dem geslehte wart gog
und daz künne mâgog
und daz gesleht asenaz.
diu künne wuohsen vürbaz
biz drîzec geslehte grôz
von im kam diu niht verdrôz,
sie vrumten manc unbilde.
sie zugen in eine wilde
diu was geheizen sâbaâ.
sie wuohsen krefteclîche dâ,
biz daz sie samsab ane reit
als ich iu hân hie vor geseit,
und sie den al überstritn.
mit kreften sie vür sich ritn
mit sô werlîchen hern
daz ez niemen kunde erwern,
sie twungen diu lant âne wer
dort und her über mer
mit solhen kreften daz ir hant
muosten dienen elliu lant.
diz liut was al gemeine
unmaezec und unreine,
ir leben was unmenschlich,
in vihes wîs sie nerten sich,
ir munt deheine spîse schiet,
dehein dinc man sôt noch briet
wan daz die spîse nôz der man
als er sî möhte komen an.
in was niht ungemeine
noch z ezzenn unreine,
swaz sie vunden, daz was gar
ir spîs und ir lîpnar,
die vogel und die slangen.
dôs in ir getwangen
hâten vil nâch elliu lant,
vier künge kuren sie zehant
der hiez einer ôreb,
der ander was geheizen zeb,
zebeê und salmanâ.
diz selbe her huop sich sâ
ûf die israhêlschen diet.
got die sîne dô beriet
und zeicte in umbe ir triuwe lôn.
ir phlac der guote gêdêôn
der reine gotes dienstman,
die verworhten greif er an
und ersluoc ir âne wer
hundert tûsent in ir her
und vierzec tûsent dirre schar.
die künege gevienc er gar
und hiez sie henken sâ zehant,
die andern vluhen in ir lant
und entrunnen manger nôt
die man in ûf dem wege bôt,
ze lande kam ir wênec widr.
sie mohten niemen twingen sidr,
wan ir gar ze wênec was
und als unmanger dort genas.
diu selbe schar begunde sît
mit kreften wahsen mange zît,
unz alexander wart gesant
ûz durch twingen in diu lant
und er hin zir lande kam,
als er mit wârheit vernam
ir leben, wie daz was getân,
als ich ein teil geprochen hân,
wie sie vor mangen jâren
ûz gevarn wâren
und vil gewalteclîche
twungen elliu rîche
ze dienstlîcher arbeit.
dô er ir unreinekeit
und ir geverte bevant,
er vorhte, kaemens in diu lant,
diu welt würde vermeinet
und von in gunreinet.
in gewan der wîgant
mit grôzen strîten abe ir lant
und hiez dô kint wîp und man
vân und mit im vüeren dan
in ubera aquilônis.
uns tuot diu wârheit gewis,
die berge die ich hân genant,
besliezent dâ daz selbe lant
alsô ein sineweler rinc.
einhalp besliuzet ir getwinc
prômontôrjum bôrêum.
âne klûse und âne drum
sint diu zwei gebirge grôz,
wan er ir klûse gar beslôz
und daz liut behabte dâ
als ê die juden in caspîâ,
mit absichitônes kraft
beslôz er die geselleschaft.
die wahsent dâ und wuohsen sît.
wie sie zer jungesten zît
ûz komen süln, daz kündet sus
der heilege - metôdîus,
als er diu maere erkande
diu im got selbe sande,
dô er durch in gevangen lac
und man sîn in banden phlac:
von gote wart im kunt getân
wie ez her nâch sol ergân
in den jungesten tagn.
ez kunten ouch die wîssagn
mit verdahter wârheit.
nû hât ez kurzlîche geseit
und durnehteclîche hie
metôdîus. nû hoeret wie
im diu gotes wîsheit
ir komen künftec hât geseit.
ismahêl sol aber komn,
als ir ein teil ê hât vernomn,
und sol twingen elliu lant
diu ûf der erde sîn genant
von ôstert dâ diu sunne ûf stât
biz westert dâ si nider gât,
und wirt ir joch vil swaere
und als untragebaere
daz sîn drücken sêre swirt,
ir kunft ein kestegunge wirt
und ein werndiu arbeit.
menschlîch erbarmekeit
ist in widerzaeme,
sie sint got ungenaeme
von diu sint sie verwâzen,
niemen wirt erlâzen
er werde in ir hant gegebn
durch daz süntlîche lebn,
in dem nû aller tegelich
der welte leben boesert sich,
wan wir unsers herren gots
vergezzen und sîns gebots.
darumbe lât diu gotes kraft
uns die vervluochten heidenschaft
villen durch die missetât
die diu kristenheit begât.
sie tuont der reinen kristenheit
als unmenschlîchez leit
daz man sie gerner sol vertragn
danne ie man ze maere sagn.
persîâ daz rîche lant
wirt verwüestet von ir hant,
ez werdent alle die dâ sint,
die gewahsen und diu kint
erslagen und gevangen dâ,
diz geschiht in persîâ.
capadôcîâ alsam geschiht,
daz wirt der nôt erlâzen niht,
die von cilîzje werdent gar
erslagen von der selben schar.
die von sûrîe entrinnent,
daz lant sie gewinnent,
sie vâhent die sie vindent dâ.
criechen wirt und africâ
erslagen und gevangen.
mit zinse wirt enphangen
dienestlîche von ir hant
egiptus daz rîche lant.
sizîlje wirt der nôt erlân,
daz siht man vröude ân angest hân.
ispânje ir swert verderbet:
die ez biz dar hânt gerbet,
die slahent sie und vâhent dâ.
tiutschland und gallîâ
wirt mit urliug an geritn,
ouch werdent rômaer niht vermitn,
die verjagt daz selbe her
in wild inseln in dem mer.
sus twingent ismahêles kint
die under den vier teilen sint
ôstert westert sundert nordert.
swâ ir gewalt hin vordert,
dâ kan in niemen widerstân,
ez wirt in allez undertân,
hie vor mac nie man genesn.
in jerûsalem wirt ir wesn:
dâ wirt von allen landen
gesehen in ir banden
liute vil von al der diet
die got mit namn ie ûz geschiet.
den heiden und der kristenheit
tuont sie manger hande leit.
an nihte sie erwindent,
swazs in den kirchen vindent
golt silber und gesteine,
daz ist in al gemeine
reht und guot, ez nimt diu schar
und veroeset ez vil gar.
die gotes êwart süllen wesn,
der lânt sie nie man genesn,
sie werdent gar von in verbrant
und werfent sie denn al zehant
unbegraben âne phlege
und unberuochet an die wege,
als ez der heilige - dâvît
hât geseit vor manger zît
und ez der salter machet kunt
an< dêus venêrunt>.
sît der zît wirt durch diu lant
niender rehter wec gebant,
ir wec alsus geheizen wirt
< ein wec den angest niht verbirt>.
junc alt arm und rîche
werdent klagelîche
siufzec leidec unvrô,
sie weinent und sprechent sô
< wol in, wol in die vor uns tôt
sint und niht sehent dise nôt!>
diz hât der guote paulus
bewaeret wol, er sprichet sus
< an dem jungesten zil
sô sich der welte erzeigen wil
der verworhten sünden barn,
sô siht man zuht und reht vervarn
und rehtez reht erwinden
von ismahêles kinden
die geiseln süllen al diu kint
diu ûf der erde wonende sint.>
diz hât ouch got gemachet kunt
durch des wîssagen munt
got tet sie künftec sus erkant:
von im wart ismahêl genant
ein wildez tier onager
daz wirt ûz einer wilde her
mit wilden tieren in diu lant
durch verwüesten ûz gesant,
mit disem tiere meinder die
von den ich hân gesprochen hie.
diz liut in wilden siten vert,
sie hânt sich süezer site erwert,
sie koment vîentlîche
den liuten in diu rîche.
sô sie rûment ir lant,
swaz in wîbe wirt erkant
tragende, diu sint verlorn,
daz diu vruht iht werde geborn.
ir gemach sie gar begânt
dâ die gewîhten kirchen stânt,
und ligent dâ bî den wîben.
si lânt ir vihe belîben
bî den altaeren über al,
als ez gewesen sî ein stal.
sô seigent sich diu gotes kint
diu an gote staete sint,
und hertent an daz ende
wol âne missewende.
got sendet niht alsolhez leit
darumbe sîner kristenheit
daz er die rehten tilige mite:
ez geschiht durch solhen site
daz er die wil ûz suochen
die sîn weln geruochen,
als er mit sîner wârheit sprach
< saelec sint die ungemach
und arbeit hie durch mich tragnt:
ich vröu sie her nâch die nû klagnt,
daz himelrîche ich geben wil
den die dâ hertent an daz zil.>
sô sie betwingent elliu lant,
sô legent sie an sich zehant
ze gastunge die beste wât
die iemen vindet oder hât.
sie trîbent manger hande spot,
sie sprechent< nû wâ ist der got
den die kristen betent an,
daz er in niht der êren gan
daz sie sprechen « unser hant
hât betwungen elliu lant »?>
diz wirt ir schal, ir grôzer spot.
sô tuot unser herre got
alse der durch missetât
sîn liebez kint geblûwen hât
und ez danne triutet
und zartlich êre biutet
und sînen zorn büezet,
nâch leide liep im süezet,
und tuot in die helfe schîn
mit der diemüeten güete sîn
und loeset sie mit sîner kraft
von der unrehten heidenschaft.
einen voget er in gît,
der denne bî der selben zît
treit mit gewalte schône
die roemischen krône.
der selbe gotes dienstman
rîtet sie mit kreften an
und verderbet âne wer
in jerûsalem diu selben her.
sô der die verworhten schar
sigelôs gemachet gar,
er nimt in allen den lîp,
man vâhet kint und ir wîp,
die heizet gar der künec sâ
vüeren hin in golgatâ,
dâ got nâch der menscheit
den tôt an dem kriuze leit
und heizet sie gar die dâ sint
verderben man wîp und kint:
undr in geniset menschen niht,
wan daz man verderben siht.
diz tuot got durch die kristenheit
durch die krist die marter leit
und êret sînen namen dran.
der edel künc, der reine man
gât nâch der sigenunft ie sâ
und ophert schône in golgatâ
des rîches küneclîche kraft
und roemische hêrschaft
dem kriuze und ouch die krône.
sô endet dô vil schône
der ellenthafte degen balt
unde roemischer gewalt.
sô nâhet kurzlîche
daz irdensche rîche
daz der babilôn gesach
an dem bilde als ich ê sprach,
als ez was ê mit wârheit
nâbuchodônosor geseit.
denne lebt ein iegelich man
als er mac und geleben kan.
uns seit der gotes wîssage,
nâch ismahêles endetage
ze jerûsalem übr al daz lant
werde dô kein holz verbrant
siben jâr, wan daz die schar
in daz rîche bringent dar
schilte wagen unde sper.
der selben rede ist ein gewer
der heilige - jerêmîas,
der gotes wîssage was.
nâch ir ende in kurzer vrist
wirt geborn der endekrist
von ismahêles künne dân
wie ez deme sol ergân,
wie der wirt jehend, er sî got,
und wie versprechen sül den spot
der guote êlîas und ênoch,
die dar ûf sint behalten noch,
und wie er denne tôt gelît,
von der jungesten zît
wie got an daz gerihte kumt
und elliu dinc ze nihte drumt
und niemen ungelônet lât
daz er umb in gedienet hât,
des ist iu sô vil geseit
von der schrift mit wârheit
daz ich es geswîgen wil.
ich hân iu noch ze sagenne vil
wunderlîcher maere
von dem wîsen wunderaere.
dô der ellenthafte man
in sîne vancnisse gewan
diz liut als ich iu hân gesagt,
sich huop der degen unverzagt
von den gebirgen durch diu lant
diu ich hân hie vor genant.
durch wilde wüeste vuor daz her
in den landen bî dem mer,
an sie stiez ein michel walt
dâ diu genuht was manecvalt.
ephel nüzze und wînber
und vische sô vil vant daz her
und honeges daz in nihtes brast.
maneges grôzen soumes last
vuorte daz her mit in dan.
dô kam ein ellenthafter man
der frâtafernes was genant,
der gap sich und daz selbe lant
dar über er gewaltec was.
in die werlîchen arvas
kêrten dô die geste,
daz was ein werlich veste.
dar kam gein im erîgûus
und der vürste crâterus,
die brâhten frâdâten
und hâten im gerâten
daz er dem künge gap sîn lant.
dô lêch alexanders hant
irkânje daz rîche hin
dem edelen vürsten mânâpin.
artâbâzus der vürste guot
der ie getriuwelîchen muot
dem künge truoc von persîâ,
der kam z alexander sâ
mit einer wünneclîchen schar.
niun süne brâhter dar,
die al ein muoter bî ir truoc,
die wâren schoene, rîch genuoc,
küene, wol gezogen, balt.
vünf und niunzec jâr alt
was der edel rîche degn,
er kunde schoener zühte phlegn.
sîn sun was ouch ilîôn
der durch prîslîchen lôn
in dem êrsten sturme was
gevangen als ich iu ê las.
der vürste hâte grôze schar
von kriechen brâht mit im aldar
die wâren muotes rîche.
dô zogten ritterlîche
die werhaften geste
gen arvas in die veste.
als alexander vernam
daz artâbâzus dô kam,
gegen dem vürsten er reit,
mit ritterlîcher schônheit
die juncherren mit im ritn
schône in hovelîchen sitn.
der künc begunde grüezen
mit schoenen zühten süezen,
dô neic im artâbâzus
der rîche vürste, er sprach alsus
< rîcher künec hêre,
dû müezest iemer mêre
von den goten saelec sîn,
des wünschet dir daz herze mîn!
ez ist nû mîn hoehstiu klage
daz mich diu menige mîner tage
und sô daz alter girret hât
daz ez mich niht schouwen lât
dîne manecvalten tugent
und dîne lobelîchen jugent.
mich behielt der vater dîn
mit vröuden in dem hove sîn,
dâ ich vil schône beleip
dô mich ochus vertreip.
durch daz klag ich den ungewin
dô ich niht solher jugent bin
daz ich mit dienste lône dir
der êren, der philippe mir
mangen tac mit zühten bôt,
dô mich an in vertreip diu nôt.
nû wil ich dir mîniu kint
bevelhen diu hie mit mir sint,
diu lâ dir bevolhen sîn
durch die hoehsten tugent dîn!> -
< diz tuon ich zwâre> sprach er dô
und vollevuorte ez sît alsô
daz er sie al gelîche
machte guotes rîche.
der künec nam der kriechen schar
die der vürste brâhte dar,
er sprach< saget mir âne strît
von wannen ir von kriechen sît?>
dô sagetens im ze maere,
lâzedêmônîaere
haeten sie dar in daz lant
dem künge dârîô gesant,
und dô der den lîp verlür
daz sie dô mit gemeiner kür
an disen vürsten habeten sich.
der künec sprach< nû wîset mich,
wie ist ez ergangen dâ?>
dô sagetens im diu maere sâ
und seiten, dô dêmôkritus
sîn êre saehe wahsen sus,
ez waere im leit und als unwert
daz er durch sich stæche ein swert
von leide. dô er hôrte sagn
daz der persen was erslagn,
daz klaget er vil kleine.
die schar al gemeine
der künec wider sande
rîlîche heim ze lande,
als in der werde vürste bat
der sie dar brâht in die stat.
sehs hundert die beliben sâ
durch des künges bete dâ,
zehen tûsent liez er varn.
dô kêrt er mit sînen scharn
gen ircânje dem lande.
ein liut daz ich ê nande,
die marden von den ich ê sprach,
sîne sicherheit zerbrach
diu dem künge was getân,
der wold ez niht staete lân.
dô santer sîne boten hin
die daz liut her widr an in
betwungen. daz was schier geschehn
als ich die wârheit hoere jehn.
gen ircânje vuor daz her.
dô sazten sich gein im ze wer
die heiden von dem rîche
mit kreften werlîche.
die wälde wâren gegen der schar
vervellet und verslagen gar,
daz muoste ir rotten sûmen.
dô hiez die wege rûmen
der edel degen unverzagt,
swâ sie wâren ê verhagt.
daz sâhen sie, die dô die wege
hâten werlîch in ir phlege,
sie ergâben sich aldâ zehant
und liezen daz her in daz lant
gewalteclîche rîten
und gâben an den zîten
ir gîselschaft dem künge dâ,
die nam er unde bat iesâ
phrâdâten den wîsen degn
im behalten und phlegn.
der phlac er schône als er in bat.
gegen des landes houbetstat
was alexander dô vil gâch,
an dem vünften tage dar nâch
hâten sich dô sîner hant
die liute ergeben und daz lant.
nâbarzânes dem künge entran
dô er daz lant an sich gewan,
er vlôch ze bessen gen bactrâ.
in ircânje hâte aldâ
der künec eine hôchgezît.
dô diu zergie mit vröuden sît,
artâbâzus der vürste wert
het urloubes dô gegert.
den selben hôchgelobten man
schiht er mit rîcher gâbe dan
und habete dô die süne sîn.
die edelen juncherrelîn
rîchte er sît mit sîner hant
und lêch in liut unde lant.
nû stiez an daz rîche
ein lant was vesteclîche
erbûwen und veste erkant,
abîgîê hiez daz lant
daz gebirge und mer beslôz.
ein wazzer durch daz rîche vlôz,
daz hiez termôdontâ.
die des selben landes dâ
phlâgen dô, daz wâren wîp
diu hâten den werlîchsten lîp
den vor den zîten ie man
an werlîcher kraft gewan
und wâren doch sô schoene erkant
daz niemen schoener vrouwen vant,
sô gar nâch wunsche vollekomn.
sie wâren wunschlîch ûz genomn
an prîse und an gelâze,
in wîplîcher mâze
zühtec senfte hôchgemuot,
von missewende wol behuot
biz sie zorse kâmen
und harnasch an sich nâmen:
sô hâte an strîte, an ritterschaft
niemen in gelîche kraft.
amâzones sint sie genant.
vil lîhte ist iu daz wol erkant
wie sie mit her ze trôje ritn
und wie sie mit den kriechen stritn
und mit welher manheit
kamille vor laurente streit,
dô der herzog ênêas
mit kraft aldâ bestanden was,
diz ist iu lîhte wol gesagt.
diu künneginne was ein magt
diu dô was vrouwe überz lant,
tâlistrîâ was si genant.
diu was hövesch unde wîs,
mannes manheit, wîbes prîs
was ir mit ganzer werdekeit
nâch beider prîse wol bereit.
si was nâch wîplîcher tugent
vollekomen in ir jugent,
schoene hövesch hôchgemuot
senfte zühtec wîse guot
in diemuotlîcher güete.
mannes hôchgemüete
truoc si mit werlîcher kraft,
si was starc und werhaft,
vrech nâch den siten als ein man
der ritterschaft wol üeben kan.
diu künegîn gewaltec was
von dem gebirge kaukasas
unz an phâsin daz wazzer grôz
daz zwischen disen rîchen vlôz,
diu zinseten sich gar ir hant.
dô diu vrouwe bevant
daz alexander dô kam,
ir lantvroun si zuozir nam,
sî luste des, möht ez beschehn,
daz si wold alexandern sehn.
si sante ir boten sâ zestunt
die alexander tâten kunt
diu maere von der vrouwen,
si woldin gerne schouwen
obe er wolde. -< jâ, sprach er,
ez ist mir liep, wan ich es ger.>
diz enbôt der wîse man
der künegîn hin wider dan.
der maere was ir herze vrô,
driu hundert vrouwen nam si dô
der besten von ir rîche
und kam vil ritterlîche
mit der wünneclîchen schar
gezoget in daz rîche dar.
dô der wîse wîgant
alexander bevant
daz diu küneginne kam,
die vürsten er zuo zim nam
und zogte gegen ir ûf die vart.
der vrouwen schar enphangen wart
schône und hovelîche.
alexander der rîche
die vrouwen kondewierte,
ir munt sich sâlûierte,
er sach sî gern und si in.
dô vuorter wünneclîche hin
die minneclîchen geste
gegen die guoten veste
diu des landes houbet was,
sie erbeizten vor dem palas.
dô wurden sie enphangen wol
vîl schône als man mit zühten sol
enphâhen liebe geste wert
der man ze lieben gesten gert.
si enphiengen zühteclîche
juncherren zühterîche,
ir ors sie herbergeten sâ.
die sie vür knappen hâten dâ,
der genôzschaft waer mir reht
an reisen dâ ich waere ein kneht
und wolde mînen gewin
geselleclîche teilen in
wan ez wâren al vürwâr
schoene juncvrouwen klâr.
swâ dô bî ein ander
diu vrouwe und alexander
geselleclîche sâzen,
die ritter niht vergâzen,
ir pîne würde mannecvalt
gegen den wîsen vrouwen balt
mit hövschen sunderworten
diu rehte darzuo hôrten.
die vrouwen torsten sich niht schamn
sît sie hâten ritters namn
unde ritterlîche kraft,
sie retten ouch von ritterschaft.
ouch was ez genuoc zimelich
obe sie underretten sich
von wîplîchen minnen:
swer minne wil gewinnen,
wie der nâch minnen dienen sol,
daz stuont in ouch ze redenne wol.
obe ein ritter an der stat
den andern sîner minne bat
und sich in sînen dienest bôt,
der daz verkêrt, dêst âne nôt,
ez mohte beidenthalp wol sîn.
der künec und diu künegîn
hâten gselleclîchiu wort
mit zühten bî ein ander dort.
dô sprach gezogenlîche
der edel künec rîche
< liebiu vrouwe, wîse mich
ein teil des ich vrâge dich!> -
< gerne, lieber herre mîn,
daz tuon ich nâch dem willen dîn.> -
< sô ruoche mich daz wizzen lân
wie dîn leben sî getân.
hât dîn lant iht manne?> -
< niht> -< wie lebet ir danne?> -
< wol> -< wer schirmet iuwer lant?>
< wir.> dô sprach der wîgant
< vrouwe guot, wie mac daz wesn,
wie kan lant âne man genesn?
ich hân gesehen selten wîp
hân sô werlîchen lîp
daz sie künecrîche
beschirmen werlîche
mit ir kraft âne mannes wer
und âne werlîchiu her.> -
< diu hân ich doch>. er sach sî an.
< vrouwe, joch sît ir niht man!> -
< diz ist wâr, wan wir sîn wîp
und hân doch sô werlîchen lîp
daz sich uns niemen kan erwern
mit deheiner slahte hern.> -
< vrouwe mîn, sage mir
und wîse mich, wie werdet ir
geborn âne mannes lîp?
ein lîp ist man unde wîp
von dem daz menschlîche lebn
wirt dem menschen gegebn.
natûre niht dulden kan
daz ein wîp âne man
menschlîche vruht geber.
liebiu vrou, sage mir wer
was des geslehtes urhap
daz iu diz sunderleben gap?>
dô sprach diu zühte rîche
vil gezogenlîche
< herre, daz wil ich dir sagn.
vor uns hie vor in alten tagn
wurden gewalteclîche
von cîtîâ dem rîche
vertriben zwêne herren wîs
die truogen ritterlîchen prîs,
des was ir beider name gewis.
der eine der hiez plînis
der ander skôlôpêtus.
dô gevuoctez sich alsus
daz sie wolden mit ir hant
ie betwingen diu lant
dâ durch sie wolden varen hin.
dô sazten sie sich wider in
und vertriben sie von dan.
sô mangen ellenthaften man
verlôs der selben vürsten her
daz sie vil nâch âne wer
belibn in den landen.
dô wurden sie bestanden,
daz her sô gar verderbet was
daz ir vil wênec genas.
die truogen werlîchen lîp,
sie vuorten kint unde wîp
von lande hin in unser lant,
daz unz nû z erb ist benant.
sus sâzen sie vil lange dâ
bî termôdontâ,
daz sie zallen zîten
swâ sie wolden strîten,
wurden überstriten ie
und daz sie gesigeten nie
und begunden tegelich
an wer, an kreften krenken sich.
ir groesten man, ir besten schar
erslagen wurden alsô gar
daz sich in der vürsten her
niemen bôt in mannes wer
der haete werhaften lîp.
dô berieten sich diu wîp
daz sie verdarpten gar ir man
und sie harnasch leiten an,
sît den gelücke waer verseit
die üeben solden manheit,
und sie verweiset waeren gar
und verwitewet in der schar.
daz leit und der grôze zorn
der den vrouwen was erkorn,
geriet in daz sie tâten
als ez was ê gerâten:
sie sluogen aldâ in dem her
die man des nahtes âne wer,
sie liezen niemen dô genesn
der dar zuo was ûz gelesn
daz er was ein man genant.
harnasch nâmen sie zehant
und vuoren in diu rîche
alsô gewalteclîche
und mit sô werlîchen sitn
daz sie diu lant an sich erstritn
diu mir noch sint undertân.
in kunde niemen widerstân
noch ir kreften sich erwern
und vor i'n sich genern.
dô sie mit gewaltes hant
an sich betwungen disiu lant
sô gar daz sie âne wer
beliben, dô lie sich daz her
wider vil werlîche
dâ unser künecrîche
lît: daz bûten sie zehant.
alsô veste ist unser lant
daz wir al dirre welte ein brôt
niht gebn durch urliuges nôt
ob sie suochten uns mit her.
unser lant ist in dem mer
beslozzen vesteclîche,
in unser künecrîche
deheinen wec niemen hât
wan eine strâze diu drin gât.
diu strâz ist gevestet wol,
vester türne stât si vol.
diz hôchgebirge stôzet dran,
daz ouch nie man erstürmen kan:
ez hât niht mê dan eine
strâze, mê deheine,
und ist diu alsô veste
daz kunden noch die geste
vester nie gesâhen,
des mit wârheit jâhen
alle die ez hânt gesehn,
die müezen mir der volge jehn
gewaerlîche, swaz iemen sagt.
daz gebirge ist sô verhagt
mit hôhen wilden alben
mit wälden allenthalben
al umbe an allen sîten
daz ez nieman erstrîten
mit deheinen listen mac
unz ûf die erde tage ein tac.
daz mer daz uns besliuzet,
umb unser rîche vliuzet,
daz ist alsô wilde erkant
daz niemen dar ûf wirt gesant,
ez ensî denn eteswer,
eintweder dirr oder der
von unsern künecrîchen sî.
niemen vremder wont uns bî
wan der mir ist undertân.
vil grôzen dienest wir hân
von vremden landen verren,
künge und edele herren
dienent uns ûf minne solt
und sint uns dienstlîche holt.
swen undr uns einiu minnet
und in ze vriunde gewinnet,
der muoz staete sîn an ir
mit solher staet als ouch wir
durch wîplîche wîpheit
uns vlîzen ganzer staetekeit.
wie daz wîp sül hoenen
daz die man sol kroenen?
sie hoenet daz uns hoenet
und kroenet daz uns kroenet:
ê mich sîn kroenen hoende
und niht sîn kroenden kroende,
als ez tuo andriu wîp,
ê wolde ich leben unde lîp
geben und verliesen
und in ze vriunt verkiesen.
warumbe? - daz des iht geschehe
daz man unser man iht sehe
uns twingen des sie wellen,
die wir uns gesellen.
sô hân wir unser rîche
bewart sô vesteclîche
daz sie nie man lânt komen drin,
wan wir wellen neben in
haben mit gelîcher kraft
gelîche genôzschaft:
missehagt im an mir niht,
daz selbe ouch im von mir geschiht.
von rehte süllen unser lant
erben wîp, sît wîbes hant
von êrst die selben rîcheit
âne mannes hant erstreit.
die man der uns wil gezemn,
die wir ze manne wellen nemn,
hânt in der ahte wirde vil
dar nâch diu ist, diu den man wil:
si sî arm oder rîch,
dar nâch muoz er ir sîn gelîch.
den selben ist von uns benant
und gegebn ein rîchez lant
daz von uns übr daz mer hin lît.
in dem jâre zeiner zît
komen wir mit grôzer schar
zeiner hôchgezît aldar
durch unsers rehtes gebot.
jupiter unser got
wirt von uns dâ gebetet an.
do hân wir und unser man
drîzec tage die hôchgezît.
alsô denne ir zil gelît,
sô nimt iegelîchiu dâ
ir lieben man. sô hebet sich sâ
kurzwîle und manger hande spil
unde rîcher vröuden vil.
wir und unser vriunde gar
gesten uns mit vlîze dar
gufteclîche enwiderstrît.
der brûtloufte hôchgezît
wert mit vröuden drîzec tage.
in diemuotlîcher sünden klage
sîn wir durch unser ê gebot
die wîle wir durch unsern got
süln die hôchgezît begân,
als ich ê gesprochen hân.
sô wir mit unsern triuten
denne wellen briuten,
sô hân wir alsô grôzen schal
daz in den landen über al
nie man sô rîche koste mê
gesach vor unsern zîten ê.
sô wir denne wellen
von unsern gesellen
ze lande kêren wider hein
und wir werden des enein
daz wir wellen scheiden dan,
ist dan dâ dehein man
der sîn wîp ungerne lât
und sî gerne bî im hât,
der gât an mich und gert von mir
urloubes. daz gibe ich ir
daz si daz jâr aldâ bestê,
ezn sî daz uns ane gê
nôt von urliuges sitn
und wir werden an geritn,
sô muoz er sî sâ zehant
senden heim in unser lant
und ist bî im niht langer.
swelchiu dô wirt swanger,
ist ir alsolhe vruht erkorn
daz von ir wirt ein sun geborn,
den lât sî bî ir, daz ist wâr,
langer niht dan siben jâr
und sendet denn in hin dan
dem vater sîn der in ze man
ziuhet unz an sîne tage.
von den tohtern ich dir sage,
swelch wîp sô saelec bî uns wirt
daz si ein tohterlîn gebirt,
des vröut sich allez unser lant.
der tohter brinnet man zehant
zesewenhalp daz brüstel abe,
daz si dester ringer habe
beidiu swert unde sper,
sô man ir ze strîte ger
sô si gewahset an ir kraft.
wizzest daz unserr ritterschaft
unz an disen tac nie man
deheinen prîs noch an gewan.
sît unser lîp die krefte hât
daz wir in manlîcher getât
ritter heizen unde wîp,
sô sol erzeigen unser lîp
mit bîschaft die wârheit.
zesewenhalp ist unser kleit
gar nâch manlîchen sitn
an uns gemachet und gesnitn
und gât niht verre vür daz knie
als du selbe sihest hie.
sô ist ez gegen der linken hant
vür wîplîchez kleit erkant.
swenne wir mit ganzen scharn
in diu lant durch twingen varn,
sô hân wir alsô grôziu her
daz wir diu lant âne wer
twingen sunder widerstrît.
ein insel nâhe bî uns lît,
dâ wonet inne, daz ist wâr,
hundert tûsent megede klâr,
die sint sô minneclich gevar
daz nie wîbes lîp gebar
als gar wunschlîchiu kint
sô die selben megede sint.
die künnen zallen zîten
sô strîtlîche strîten
daz sich ir niemen kan erwern.
kunde sich ie man genern
vor uns, daz iemen wênec kan,
dem gesigeten sie doch an.
sô wir als ich gesprochen hân,
die hôchgezît wellen begân,
sô gibe ich vil mange hin.
doch lâze ich swinden niht an in
hundert tûsent megde zal,
als vil sî ir über al.
in solher vuor ist erkant
unser leben und unser lant
als ich dir hie hân gesagt,>
sprach diu minneclîchiu magt.
der künec an die vrouwen sach,
vil gezogenlîche er sprach
< diz ist genuoc wunderlich
unde wundert sêre mich.
ist ez als dû hâst geseit?> -
< herre, ez ist ein wârheit!> -
< liebiu vrouwe, nû sag an,
wâ sint danne dîne man,
daz sie niht von mîner hant
hie enphâhent mîniu lant?> -
< swaz wir tuon, daz ist getân.
dû solt uns solher rede erlân
daz wir unser eigen lant
süllen hân von dîner hant,
wan ê wolden wir daz lebn
vliesen und gerner gebn
( daz wizzest reht!) ê daz wir
enphiengen unser lant von dir.
wilt aber dû uns twingen
mit übellîchen dingen,
daz weren wir benamen dir.
geschiht ez danne alsô daz wir
gesign an dir, sô muoz dîn name
dulden iemer wernde schame
und ist dîn hôhiu werdekeit
verdruht unde hin geleit.
ob abr dîn sic an uns geschiht,
sô sprichet niemen anders niht
wan sô « nu seht! dirre man
hât gesigt den vrouwen an! »
herre, dû solt elliu wîp
und dînen tugent rîchen lîp
an uns mit zühten êren
und die rede an uns verkêren
daz wir mügen dich gewern
nâch êren des dû wellest gern!>
der künec sprach< daz sî getân!
der rede wil ich iuch erlân
durch wîplîche werdekeit
sî diu bete iu unverseit.
nû muote, vrouwe mîn, an mich,
swes dû muotest, daz tuon ich.>
sî sprach< lieber herre mîn,
sol ich des gewis sîn?>
der künec sprach< benamen jâ!>
dô sprach diu küneginne sâ
< sô tuo, herre, des ich ger
und darumb ich sî komen her!> -
< gerne, liebiu vrouwe guot!
nû sage mir rehte dînen muot.> -
< herr, über mîniu lant
ist mir nie man erkant
der mir alsô wol gezeme,
daz ich ze man in gerne neme:
ich bin ein maget, niht ein wîp.
ich wil dir lant unde lîp
durch dîne hôhen tugent gebn
und nâch dînem willen lebn.
ich bin sô rîches guotes
sô vollekomenes muotes
daz mir niemen ist erkant
dem ich liut unde lant
sô gerne gaeb alsô dir.
durch daz geschaehe diu saelde mir
daz got mînem lande
einen erben sande
von dîner vruht des werdekeit
würde in hôhem prîse breit.
würd ez ein tohter, mîniu lant
beschirmet alsô wol ir hant
daz ez nie werder vrouwen ê
gewan ze küneginne mê.
herre, ouch wil ich biten dich
daz dû dirre rede mich
bedenkest niht gein valscheit,
daz ich dir habe vür geleit
durch unwîplîchen site
dise bete der ich bite.
an mîne gote ziuhe ich daz
und an niemen vürbaz
wan an mîn selbes êre,
ich hân nû niemen mêre
an den ich daz erziuge
daz ich des niht liuge:
ich hân ân allen den muot
der wîbes êre schaden tuot,
und âne unwîplîche gir
gesprochen disiu wort ze dir
wan daz ich ez hân getân
dar ûf als ich gesprochen hân.>
der künec sprach mit zühten dô
< vrouwe, ich waere ie mêre vrô
der minneclîchen rede dîn,
möht ez mit solher vuoge sîn
daz durch dise unstaetekeit
mîn prîs iht würde hin geleit.
vrouwe, ich spriche sunder haz
daz mich niht dunket daz mir baz
geschehen möhte dan an dir,
wan daz ich nâch mîner gir
hân ein sô herzeliebez wîp
der werdekeit, der zuht, der lîp
an tugenden vollekomen ist
daz ich ir sunder valschen list
niht anders wünschen wolde,
ob ich ir wünschen solde.
an der bin ich gar gewert
alles des mîn herze gert.
sold ich beswaeren die mit dir
und denn beswaeren dich mit ir
sô daz ich von dir schiede mich,
nâch mir in jâmer lieze dich
und ich in seneder swaere
mich senede nâch dir waere,
sô haete ich mich und iuwech zwô
gemachet wunderlîche unvrô.
swer lant und liute phlegen sol
dem gezimet staete wol
und daz er alle sîne wege
unvalschlîcher triuwen phlege.
doch wil ich gerne staete lân
daz ich gein dir gesprochen hân:
swes dû mich betest, daz wil ich
tuon âne widersatz durch dich.
des wil ich gerne staete sîn
gegen dir nâch dem willen dîn.
vrouwe, kêr dû wider hein
und nim des rât und wirde enein
ob ich dir die wârheit
rehte habe vür geleit
und ob ez sî als ich dir sage:
über drîzehen tage
kum in partîânen ze mir!
dâ leist ich nâch dîner gir
allez des dîn herze gert,
des wirdest dû von mir gewert.>
dô sprach diu küneginne
< herre, dîne minne
liebet mir diu werdekeit
die got an dich hât geleit.
nû wil ich tuon des mich dîn rât
sô wîslîch under wîset hât,
und wil baz berâten mich
wes ich aber muote an dich.
nû gip mir urloup, lâ mich varn!> -
< die gote müezen dich bewarn,>
sprach dô der tugent rîche.
dô wârens al gelîche
der künc und alle sîne man
bereit. mit den vrouwen dan
mit geselleclîchen sitn
sie vür die veste schône ritn
unz in daz gebirge hin.
dâ schiet diu ritterschaft von in.
die ellenthaften geste
kêrten gegen der veste,
die vrouwen heim ze lande.
die stolzen wîgande
bereiten sich dô sâ zehant,
der wîse degen wîte erkant
kêrte in partîânen.
diu künegîn rosânen
was noch beliben in persîâ.
die wolde er lâzen ligen dâ
unz er aldâ verrihte
sîn dinc und gar verslihte
mit bessen und den andern.
dô sach man alexandern
in den selben landen tagn
als ir mich ê hôrtet sagn.
dô diz zil ein ende nam,
zuo dem küneg aber kam
talistrîâ diu rîche
mit rîcheit vil groezlîche
in daz selbe rîche dar
mit einer wünneclîchen schar.
die edelen vrouwen vil gemeit
wurden mit rîcher schônheit
mit süezem gruoze enphangen.
dô diz was ergangen,
sie brâhten dar ze lande
dem edelen wîgande
grôzer prîsante vil.
dar nâch in vil kurzem zil
do sie zein ander sâzen,
ir rede sie niht vergâzen
als in dô was ze muote.
diu edel hövesche guote
rette als ir sîn minne riet
die rede als si von dannen schiet.
der wîse degen antwurt ir
der rede nâch ir herzen gir.
ein muot, ein minn, ein gedanc
sie beide dô gelîche twanc:
daz si wart dâ vor erwert
des er solde hân gegert,
( daz liez er durch die triuwe sîn,
als er ê der künegîn
seite und ich iu hân geseit)
des muoster ir nû sîn bereit,
wan eht ie diu minne
twinget alle sinne
und endet swaz si enden wil,
des hân wir urkünde vil
von manger hande buochen:
der ez eht wil suochen,
der list des vil daz wîp noch man
sich der minne erweren kan,
des si sich underwindet
und in ir bant gebindet.
alsô daz selbe auch dô geschach.
dô man den tac verenden sach
und diu naht ane vie,
mit vröude ir beider wille ergie
und was doch tugentlîche.
alexander der rîche
gie des morgens schône
mit einer rîchen krône
gekroenet und diu künegîn
diu liebe vriundinne sîn.
der edel werde reine man
truoc phell unde sâmît an
geparrieret undersnitn,
er gie nâch der persen sitn
gekroenet und wol bekleit
nâch keiserlîcher werdekeit.
von vremden landen in daz lant
was im boten vil gesant
und zinsten vremdiu lant aldâ.
der künec hiez gebieten sâ
daz man daz reht erkande,
swaz er brieve sande
gen asîâ in den gewalt,
dar an wolde der degen balt
daz ingesigel von persîâ
senden, gein eurôpâ
sîn erbinsigel. daz ergie,
daz selbe hiez er künden hie.
sus wâren sie vroelîche
in dem künecrîche
mit vröuden vierzehen tage.
nâch der âventiure sage
diu küneginne mit ir diet
von alexander dannen schiet.
der was ir geliebet sô
daz si des iemer waere vrô
möht er beliben bî ir sîn.
ouch tet er ir den willen schîn
daz sî der edel rîche man
von im liez ungerne dan
an den zîten scheiden.
dô begunde in leiden
daz in dâ vor sinne und muot
liebet und sie dûhte guot,
ir beider herze muoste jehn
sie vröute waer es niht geschehn.
daz sie mit einem sinne
dâ vor hiezen minne,
daz dûhte sie nû gar ein haz:
der jâmer vuocte in beiden daz
sie muosten dô gebâren
als die nâch vröuden wâren
trûrec, als in jâmers nôt
nâch vröuden trûrekeit gebôt.
ich hân gelesen anderswâ
dan alhie daz si aldâ
bewante wol ir arbeit,
diu edel vrouwe vil gemeit
einen wehsel dort erwarp
von dem ir swaere vil verdarp:
si gap ir edelen magetuom
und ir magtuomlîchen ruom
dem wîsen wîgande
und wart ir und ir lande
von im ein tohter, diu mit kraft
sît behabte ir hêrschaft
mit gewalte mangen tac
und angeborner site phlac
mit kiusche in reiner wîpheit,
ouch was ir mannes prîs bereit:
nach angebornen landes sitn
wart des niht von ir vermitn
si waer als sie solde sîn.
talistrîâ diu künegîn
lebte ouch lobelîche sît
in ir lande mange zît
und wuohs an ir in zwei wîs
dirre welte hoehster prîs.
si was kiusche und ellenthaft
und behabte ir beider kraft
sô schône daz ir werdekeit
und ir lop wart alsô breit
daz man dô sider und noch seit
von ir hôhen werdekeit.
dô diu künegîn von dan
geschiet und der vil wîse man
wuohs ouch an lobe, an rîcheit
und im nâch saelden was bereit
allez des er gerte,
des in got gewerte,
dô sazter ein urliuge dâ
mit kraft ûf bessen von bactrâ.
die alten die dâ wâren
begunden dô gebâren
ein teil unvroelîche dâ,
sie sprâchen al gelîche sâ
< noch wolden wir râten daz
und geviele uns allen baz
daz wir widerkêren,
die gote niht unêren,
wan sie von uns den tumben muot
niemer mügen hân vür guot
und die unmâze daz wir
hân nâch unsers herzen gir
daz dritteil der erde
nâch volleclîchem werde
erstriten gar und elliu lant
dar unser zins ie wart gesant,
des uns nû genüeget niht
und man uns vürbaz strîchen siht
gegen der welt ende.
uns tuot daz ellende
vil selten wol. ez tuot uns wê,
wir hân des urliuges mê
engolten an dem muote
dan genozzen an dem guote.
der mich erliez der arbeit,
mich dûhte mîner rîcheit
genuoc, swie wênec ir doch sî,
der mit gemache mich dâ bî
lieze sîn daz ich mîn lebn
an die wâge iht dörfte gebn
sô dick als wir hân getân
und müezen, sol ez vür sich gân.>
daz was ein gemeiner schal
von den alten über al
sô lange unz ez die jungen dâ
begrifen unde retten sâ
und dirre schal begunde gar
wahsen über al die schar
und ez vür alexandern kam.
als er dise rede vernam,
er trôste sie vroelîche
mit manger gâbe rîche
gap er in vil und wânde ir muot
machen senft unde guot.
dâ kêrten sich vil wênec an
alte und junge sîne man:
ze lande stuont ir aller muot,
diu minner ahtens ûf daz guot.
dô gap eht er in rîche habe
und nam sie güetlîche drabe
und liebet in die arbeit.
nû wart im von wârheit
kunt getân daz bessus
haete sich berâten sus
daz er wolde krône tragn.
er hiez den lantherren sagn
er wolde künec sîn genant.
er haete küneclich gewant
an sich geleit und haete sâ
daz rîche lant zîtîâ
und ander künecrîche grôz
bî tânâis dâ der vlôz,
an sich betwungen mit gewalt.
daz saget im ein degen balt,
sârtibarzânes ein helt,
der selbe degen ûzerwelt
ergap sich und sîniu lant
gar in alexanders hant
und enphie her wider dan
diu selben lant, er wart sîn man.
von dannen huop sich dô daz her
gen bactrâ mit rîcher wer
ritterlîche und wol bereit,
sie vuorten solhe rîcheit
von roube der dô was genomn,
daz sie niender mohten komn.
ir wagene, ir soumaere
truogen alsô swaere
daz sie kûme giengen dô
und daz her verirten sô
daz sie ungemache muosten gân.
sus kam daz her ûf einen plân
gevarn mit grôzer arbeit,
sie giengen - daz guot vor in reit,
dem dienten sie und ez in niht
als ez vil dicke noch beschiht.
diz sach der künec unde sprach
< nû sihe ich daz ich nie gesach.
ich sach ie helden hôchgemuot
dienen lant unde guot:
nû dienet ir dem guote
mit lîbe und ouch mit muote
ze sêre, wan ir lât daz guot
rîten. dirre kranke muot
ist âne missewende niht,
daz man iuch gân, ez rîten siht.
ez irret uns. ir hât ze vol,
die swaere man iu ringen sol.>
er hiez von aller der schar
daz guot allez tragen dar
wan harnasch und spîse.
der edel degen wîse
hiez ez brennen sâ zehant.
ouch sant er in sîniu lant
von silber und von golde
vil mangen soum ze solde.
ouch sprach der helt staete
daz erz darumbe taete
< würden wir bestanden
alhie von disen landen,
wir möhten uns gevüegen hern
mit unsern kreften niht erwern>,
sprach der degen hôchgemuot,
< als verirret uns daz guot
und liez uns und unser her
niender sîn bereit ze wer.
ez hiez übel und niht guot
daz uns wer naeme und muot:
bezzr ist muot danne guot
dâ guot êren schaden tuot.
habet niht verzagten muot!
ich lâz iuch niht âne guot.
gebristet iu niht muotes,
ich lâze iu niemer guotes
gebresten unz ich hân daz lebn.
ich wil iu sô vil lande gebn
daz ir vil wênec den muot
dürfet an ein kleinez guot
wenden, daz iuch iender sol
hoehen anders danne wol.>
mit sus getânem trôste
der künc die sîne lôste
von vorhtlîcher swaere gar.
dô geschach der mâzen schar
ein leitlîchez herzesêr.
nîcanor der vürste hêr
parmênîônes sun erstarp,
der dicke hôhen prîs erwarp
als ich iu dicke hân gesagt
wie der degen unverzagt
mangen hôhen prîs erstreit.
daz klagelîche herzeleit
daz her in sorge brâhte dâ.
dô vuor der künc gen bactrâ.
der edel degen philôtas
der nîcanors bruoder was,
dem liez er drithalp tûsent man.
mit grôzem jâmer vuor er dan
und hiez in sînen bruoder dâ
begrabn. er huop sich gen bactrâ.
sîne man im sanden
von sînen naehsten landen
brieve und tâten im daz kunt,
sich haete bessus an der stunt
besament mit vil grôzem her
und haete ritterlîche wer
ûf in und ûf sîniu lant,
daz tâten im die sîne erkant.
ouch hôrte er sagen maere,
sâtibarzânes der waere
gegen im worden triuwelôs,
der in ê ze herren kôs,
und haet ze bessen gesworn.
daz was im leit und alsô zorn
daz er die vart lie gen bactrâ
und an den vürsten kêrte sâ.
mit lîhteclîche varnder maht
zoget er al die naht
ein gebirge ûf dâmit wer
lac des selben vürsten her
den ich iu nû hân genant.
als er sîn komen dô bevant,
er vlôch ze bessen gen bactrâ
mit zwein tûsent mannen sâ.
die sîne dô begunden wern
daz gebirge den hern.
nâher und nâher dar
drungen dô des künges schar.
von dem gebirge ein wazzer vlôz
daz ist ze guoter mâze grôz,
bî dem lac in der wilde
ein michel wît gevilde
dar ûf ein stat hiez artânâ.
die besaz der künec sâ.
crâteren den wîsen degn
hiez er des gesaezes phlegn,
dem liez er driuzehen tûsent man
und jageter mit den andern dan
unz man im sagte maere
daz der vürste waere
entrunnen im ze verre.
dô kêrte der herre
wider an des vürsten man
gegen dem hôchgebirge dan
dâ sie mit grôzer manheit
wârn ze wer gen im bereit.
nû was daz gebirge gar
bewart mit werlîcher schar
und gein den helden unverzagt
verslagen gar und verhagt
mit starken wälden dicken.
in dirre letze stricken
lac diu schar bewart ze wer
und tâten ofte dem her
schaden vil, daz in niht war.
des künges her was von der schar
z entwîchenne vil müelich,
ouch werten sô die inren sich
daz sie niht vürbaz möhten komn.
dô huop sich als ich hân vernomn,
winde vil. der wîse man
hiez der wälde zünden an,
die sô mit kreften brunnen
daz sie vil kûme entrunnen
die dô gen alexanders her
gesetzet hâten sich ze wer.
in ersticte manec man,
vil manger ouch ze tôde bran,
genuoge ervielen sich ouch dâ.
sus wart daz gebirge sâ
gewunnen und daz selbe lant.
crâterus der wîgant
saz noch vor in artânâ
und beit alexanders dâ.
der kam mit vîentlîchen sitn
vür die veste dar geritn
und brâhte ir vil gevangen hie
die er ûf den bergen vie.
dô die von der veste
sâhen komn die geste,
sie vuoren vür den künc zehant
und gâben im die stat, daz lant
mit eiden zinslîche.
der edel muotes rîche
besazte sî. er vuor von dan.
dem ellenthaften werden man
kam dô mit ritterlîcher kraft
von kriechen niuwiu ritterschaft.
vünf hundert ritter wert erkant
brâhte im zôlus in daz lant,
tûsent von illîrje her
sant im sîn vürste antipater,
drîzec und hundert
an manheit ûz gesundert
von tessâlje dem rîche.
ouch brâhte werlîche
philippe ein degen hôchgemuot
drithalp tûsent helde guot
von der rîchen lîdîâ.
driu hundert drangen was ouch dâ,
daz liut ist vrech und werhaft,
der phlac mit werlîcher kraft
der grâve barzentes.
dô bessus und nâbarzânes
sluoc den künc von persîâ,
dô half er in und was ouch dâ.
dem hâten alexanders man
sîn lant vil gar gewunnen an
und hâten in vertriben dâ.
gegen der ûzern indîâ
was er gevlohen die werde diet,
als im sîn vorhte geriet.
vil ofte wart von im gedâht,
würde er alexander brâht,
er müeste lîp unde lebn
umb die untriuwe gebn
und umb des mordes unvuoc
daz er sînen herren sluoc.
des her, die drangen kâmen hie,
der sicherheit der künc enphie
und ir gewaerlîchen eit.
durch sîner gote werdekeit
begie der künec rîche
mit vröuden vroelîche
ein hôchgezît dô ahte tage
nâch der âventiure sage
mit rîcheit und vröute sich
daz im aller tegelich
sîn dinc sô saeleclîche ergie.
philôtas den er dâ vor lie
begraben dort den bruoder sîn,
der kam. mit klage tet er schîn
vil grôzen jâmer den er huop
dô er den bruoder sîn begruop.
schiere kam der niunde tac
der nâch der hôchgezît gelac.
des künges saelde und êre
wuohs ie mêre und mêre
vil werde, und sînes siges kraft
was an sige sigehaft
und an hôhem prîse wît.
die êre mohte er sunder nît
getragen von den sînen niht
als ez vil lîhte noch geschiht
daz einem herren ein man
dicke werdekeit verban
und guotes, dem er niuwan guot
alle sîne tage tuot:
ein ieglich getriuwer man
sînem herren guotes gan:
tuot diz der ungetriuwe niht,
an dem man wênec triuwe siht,
dâ enist niht grôzes wunders mite.
lebt der man nâch sînem site,
daz ist reht und billich,
dâ vlîze ein man des besten sich
und stande sînem herren bî
dar nâch als er getriuwe sî
und als im triuwe sî gegebn.
wie möhte ein herre gelebn
und sô geleiten sînen muot
daz al die sîne dûhte guot?
er mac ouch al gelîche
niht gemachen rîche.
wil abr ein man dan durch daz
tragen sînem herren haz
ob er vil lîht anders tuot
danne in wolde dunken guot
und ob er selten sînen rât
ze sîner heimelîche hât,
dêswâr daz ist missetân.
daz selbe sach man dort ergân.
in des edeln künges schar
was etelîcher komen dar
dem sîn hôhiu werdekeit
und sîn guot was ein herzeleit
und der wând, ob er stürbe,
daz er daz guot erwürbe
und im doch sît vil tiure wart
und ganzlîche vor verspart.
wie daz wart goffenbaeret
und aldâ bewaeret?
daz gevuocte sich alsus.
ein herre hiez dimnus
der was mit alexander dâ.
beide dâ und anderswâ
beleip bî im der selbe man
daz er nie hin zim gewan
schimph noch heimlîche site.
warumbe daz der künec mite?
in dûhte daz er waere
an siten wandelbaere,
unstaete und gar unendehaft,
niht guoter geselleschaft
und ouch niht wol bescheiden,
des muost er im leiden
und bôt im selten werdekeit.
daz was dem selben herren leit
und hâte es dicke grôze klage.
er nam zuo zim an einem tage
einen juncherren guot
dem er allen sînen muot
ie tet mit heimelîche erkant,
der was nicômachus genant,
und bat in eine mit mit gân
dâ man daz betehûs sach stân,
dar vuorte er den juncherren dô,
sie giengen drin. er sprach alsô
< nû gewer einer bete mich
und tuo des ich bite dich!> -
< daz tuon ich gerne.> -< sô solt dû
swern daz ich dich heize nû
daz dû nie manne sagst
und verholen bî dir tragst
daz ich hie wil künden dir,
und gedenke des daz wir
ungescheiden wâren ie,
und tuo durch mich des ich dich hie
gebeten hân und biten wil,
daz diene ich iemer ûf mîn zil!>
der red antwurte dô sus
der juncher nicômachus
< dû solt von mir sîn gewert
alles des dîn bete gert,
daz geloube mir ân eit>. -
< niht! ich wils dîn sicherheit
mit einem eide von dir hân.> -
< daz swer ich hie, daz sî getân!> -
< sô mane ich dînes eides dich,
geselle, dû weist wol daz mich
alexander gêrte nie
und mîn noch künde nie gevie
durch die selben geschiht
daz er mir getrûwet niht:
swaz ich im leides taete,
mîn triuwe belibe staete,
diu waer ungebrochen
würd ez von mir gerochen.
des hân ich guote helfe erkorn,
mir hânt ze helfenne gesworn
aht edele herren über in,
daz ich selpniunde bin,
den er ouch leide hât getân.
die weln alle mir gestân
daz wir über drîe tage
an im rechen unser klage.>
der edel juncherre sprach
dô disiu rede alsus geschach
< nû sage mir, vil lieber man,
wer hât gewîset dich her an?> -
< die den er leide hât getân?> -
< wil abr ir helfe dir gestân?> -
< benamen jâ!> -< wer sint sie?> -
< ich wil dir sie nennen hie.
einer ist dêmêtrîus
und pêkulâus
der sînes lîbes phlegen sol,
der mac uns gehelfen wol,
nîkanor und apôbêtus
und idîoxenus,
jôzêus und arzêpolis.
ich waene wol wir sîn gewis
daz uns helfe amintas
der ie hôhes muotes was.
gedenke wes dû hâst gesworn,
edel degen ûz erkorn,
und hilf uns daz dir iemer mê
unser iegelich gestê!
gedenke daz des künges rât
die sîne gar verrâten hât:
uns und unser mâge
leit er an die wâge
sô wir mit im rîten,
êre und guot erstrîten.
daz hât er und lât uns niht:
z unser aller angesiht
brant er den selben gewin
den wir gewunnen dô durch in.
unser lîp und unser lebn
an die wâge wart gegebn.
nû gedenke an dînen eit
und an dîne staetekeit
und hilf uns durch die tugende dîn
des wir ze râte worden sîn!>
nicômachus antwurte dô
des herren rede, er sprach alsô
< dû solt mich niht strîten an
des ich willen nie gewan,
wan der kriec ist gar verlorn:
ich hân mordes niht gesworn.
swes dû rehtes bitest mich,
des hân ich gesworn durch dich:
vil sêre ich an mir tobte,
swenn ich ein mort gelobte.
sô liep ist mir dehein man
des ich künde noch gewan,
daz ich durch den willen sîn
vergaeze gar der triuwe mîn.> -
< lâ sîn die rede und tuo durch mich
des ich hân gebeten dich.> -
< nein ich!> -< benamen sô soltû
verswîgen dise rede nû.> -
< ich entuon.> -< sô muoz ich gebn
alexander mîn lebn.> -
< waz mac ich des? dû hâst ez wol
verscholt daz er dir lônen sol
des dîn untriuwe hât gegert.>
dô greif mit zorn an daz swert
der ungetriuwe dimnus.
< lâ sîn!> sprach nicômachus
< sô liep dir al dîn êre sî,
dû solt gen mir sîn kamphes vrî,
mit kamphe niemen dich bestât
der noch sîne triuwe hât,
dem bistû niht gebaere.
swie aber des niht waere,
dannoch genise ich wol von dir
daz dû niht möhtest schaden mir
heime, hie noch anderswâ>.
dô schieden sich mit zorne sâ
der ungetriuwe dimnus
und nicômachus
der vil getriuwe reine.
balde niht ze seine
lief er zuo dem bruoder sîn
der was geheizen zêbalîn
und seite im umb die sicherheit
als ich iu nû hân geseit.
zêbalîn der maere erschrac,
wan er ouch hôher triuwen phlac.
er huop sich vil drâte
hin zuo der kemenâte,
dar in der künec rîche
was dô vil heimlîche,
und stuont vil nâhe zuo der tür
und wolde spehen ob her vür
iemen gienge dô zestunt
dem er diu maere taete kunt,
wan ez geschaffen was alsô
daz nie man getorste dô
zuo dem künge hin gegân
swenn er heimlîche wolde hân,
wan der dar zuo geschicket was.
dô gie her ûz philôtas.
als er zêbalînen sach
und sîn grüezen dô geschach,
er vrâgtin waz er taete dâ.
dô seiter im diu maere sâ
und hiez in daz erz an der stunt
alexander taete kunt.
daz lobet im der vürste hie,
zuo dem künge er wider gie.
sie wârn mit schimph under in:
philôtas lie dô slîfen hin
den tac daz er von der geschiht
dem künge nie geseite niht:
daz geschach vil lîhte alsô
daz er sîne vröude dô
mit untrôstlîchen sachen
niht wolde trûrec machen,
durch die selben geschiht
wold ers im lîhter sagen niht.
doch ist diu lîhtsenfte niht guot,
diu lîhte grôzen schaden tuot.
dô diu naht ein ende nam
und der ander morgen kam,
dô huop sich durch die triuwe sîn
der getriuwe zêbalîn
durch vrâgen gegen dem palas
und vrâget ob philôtas
dem künege die sicherheit
iht haete als er in bat, geseit.
dô sprach philôtas< nein ich, niht!
ez ist ein trügelich geschiht.>
zêbalîn der rede erschrac,
daz leit im vil nâhe lac,
er hâte arcwaenec disen man.
ze mêtrône gienc er dan,
alexanders kameraere,
und seite im disiu maere
wie diu rede was geschehn.
dô kam der künc. er liez in sehn
zêbalînen sâ zestunt
der im selbe tete kunt
diu maere von der sicherheit
wie ez was allez ûf geleit
als im sîn bruoder tet erkant.
des hoves marschalc wart besant,
der ellenthafte attarras.
dô der vür sie komen was,
der künec hiez in gâhen,
den morder balde vâhen
und ze hove bringen dar.
diu maere seite er im vil gar
wie er haete ûf in gesworn.
daz was im leit und harte zorn,
er was dem ungetriuwen gram.
des künges knehte er zuo zim nam,
die huoben sich gewâfent dan
dâ der ungetriuwe man
dimnus der valsche lac
unde sîner ruowe phlac.
dô sie wâren underwegn,
alexander der degn
der edel künec rîche
sprach gezogenlîche
< getriuwer degen zêbalîn,
ich sol dir und dem bruoder dîn
iuwer triuwe gelten sô
daz ir sît iemer mêre vrô,
mac eht iuch gevröun daz lebn,
golt silber lêhen gebn.
wie lange ist daz dir wart geseit
umbe dise sicherheit?> -
< an dem tac der gester was> -
< wenn bevant ez philôtas?> -
< zewâre, herre mîn, zehant
als ich disiu maere bevant.> -
< nû sich daz dû iht triegest mich!> -
< zewâre, herre, trüege ich dich
ez ensî ein rehtiu wârheit
als ich dir nû hân geseit,
sô müez ich verteilet sîn
der gote und ouch der hulden dîn!> -
< ist daz wâr?> -< benamen jâ!>
nû was der marschalc komen sâ
der getriuwe attaras
dâ dimnus ze herberg was.
dô der die helde komen sach,
sîn vürgedanc im verjach
der gewaeren maere
daz er vermeldet waere.
sîn herze sich von vröuden schiet,
sîn hôhiu vorht im geriet
daz er des tôdes gerte,
mit sîn selbes swerte
wold er sich selbe hân erslagn.
daz werten sie dem valschen zagn,
vil balde viengen sie dô in
und vuorten in dem künge hin.
der sprach als er wart vür in brâht
< sag an, wes hâtest dû gedâht
dô dû woldest slahen mich?
durch welhe rede dûhte dich
philôtas werder dan ich bin
daz dû woldest mich durch in
slahen und daz sîner hant
nâch mir dienten mîniu lant,
daz doch geschaehe lîhte niht?
nû durch welhe geschiht
was er lieber dir dann ich
daz dû sus woldest morden mich?>
dô kund er gereden niht
als ie dem schuldigen geschiht.
der künec hiez in vüeren hin
und daz mort rechen über in.
daz geschach, dem valschen zagn
wart daz houbet ab geslagn.
philôtas den ich hân genant,
wart vür den künec dô besant.
als in zêbalîn ersach,
vil unvorhtlîche er sprach
< dû hâst an mir garnet wol
daz der künec rihten sol
daz dû mich woldest und mîn lebn
in den tôt hân gegebn.
dû woldest grôze untriuwe ûf mich
gevellet hân, diu sol ûf dich
billîcher komn an dirre vrist
als ez ein teil geschehen ist.
ich bin vil vrô daz ich nû hân
die untriuwe von mir getân
und mit rehter wârheit
ûf dich und ander geleit.
antwürte dû, als ez nû stê
und diu rede dich an gê
und ander die helfaere dîn:
ich wil der rede unschuldec sîn.> -
< dêswâr> sprach der künec dô
< philôtas, ich wânde alsô
daz ich getrûwen solde dir
und dû getriuwer waerest mir
dan ander vürsten die ich hân,
wan dû mir âne valschen wân
ie waere lieber dan ie man
des ich künde noch gewan.>
der vürste sprach< daz sol ouch sîn,
zewâre, lieber herre mîn,
mich dûhten disiu maere
niht alsô gewaere
noch als endehaft daz ich
dâ vor iht solde warnen dich.
ouch dûhte mich diu sicherheit
alsô swach ûf geleit
daz ich mich niht kêrte dran.
lieber herre, saelec man,
lâ mich geniezen dîner tugent
und dîner hôchgelobten jugent
und habe mich an der geschiht
valsch noch arcwaenec niht
wan ich bin âne schulde.
ich sol dîne hulde
sô lîhte niht verlorn hân
wan ich her an niht hân getân
daz ich gegen den hulden dîn
iht sül alsô schuldec sîn
daz ich die sülle hân verlorn.
genâde, herre! dînen zorn
soltû von mir kêren
und dîne tugent êren
wan ich ân alle valscheit
lie disiu maer ungeseit.>
der künec antwurt im alsô
< dêswâr, der rede waere ich vrô
geloubetens die andern dir,
dû haetest schier gerihtet mir.
ich wil dar an gelouben wol
waz ich dran gelouben sol>
sprach der ellenthafte man.
sie schieden von ein ander dan.
crâterus der wîgant
wart zuo dem künge dô besant,
der was dem küneg einer
lieber dan deheiner,
der nîdete daz philôtas
sô heimlich alexander was
und er ie tet swaz er im riet
swenn iegelîcher von im schiet.
ouch wart besant nicômachus
mit des râte dimnus
daz mort und ouch die valscheit
haete gern ûf geleit.
der muoste vor dem vürsten hie
sagen gar wiez ergie.
der ellenthafte crâterus
sprach< waer ez ergangen sus
daz wir waeren dâ gesîn,
dô vor dem antlütze dîn
philôtas dirre sicherheit
dir wart schuldec ê geseit,
ich haete es niht gerâten dir,
sô vil des râtes stüende an mir,
daz dû sô gâhes haetest in
lân gescheiden von dir hin.
er mac wol râten ûf dîn lebn
ob dû die schulde wilt vergebn.
dû solt wol gelouben mir
daz er niht ze liebe dir
diz mort und dise missetât
versweic und verswigen hât.
parmênîôn der vater sîn
ist der hêrschefte dîn
sô gewaltec alle vrist
daz er dar ûf dingend ist
daz nâch dir werden dîniu lant
im und den sünen sîn benant!
wie dû vor den beschirmest dich?
dû bist genesn, daz habe ûf mich!
wir hân mit vîentlîcher kraft
noch sô grôze vîentschaft
daz dû dich wol behüeten solt,
diz râtet dir swer dir ist holt.
herre saelden rîche,
sô dû gewalteclîche
hâst betwungen elliu lant,
sô muost dû ie sâ zehant
ein urliuge mit in hân,
daz wizzest wâr ân allen wân!
wiltû sie dar ûf rîchen,
daz mac nie manne lîchen
ez sî mâc oder man,
swer dir rehter êren gan,
dem missehagt diu tumpheit,
ergât ez als ich hân geseit.>
dô daz crâterus gesprach,
ir iegelîcher dô verjach,
philôtas haete ditze mort
gevrumt mit sînem râte dort.
waer im teiles dran verzign,
sô lange haet ers niht verswign.
sie jâhen, des mortlîchen schadn
haete sich vil wol entladn
der getriuwe zêbalîn
und der ander bruoder sîn.
des râtes kâmens über ein
daz man in vienge und in daz mein
hieze sagn ûf alle die
dar an wurden schuldec ie,
diz wart gelobet an der stat.
der künc den rât verswîgn bat
daz in niemen taete kunt.
sie schieden dô sâ zestunt
von dem selben râte hie.
dô kam diu naht, der tac zergie.
ein wîle nâch ezzenne was,
lêônât und perdikkas,
ephestîôn und crâterus,
cênôs und erîgûus,
die sehs vürsten wîse erkant
der künc besante sâ zehant.
die hiezen die wahtaere sâ
ze harnasche wachen dâ.
dô hiez der künec al die wege
hân mit huote und ouch mit phlege
daz iemen an der selben stunt
parmênîône taete kunt
wie sîn sun philôtas
des mâles an gesprochen was,
der dô was in mêdîâ.
in des künges dienste dâ
hât er mit vîentlîcher kraft
werlîche ritterschaft.
der stolze helt attarras
mit drin hundert knappen was
die er hâte an sich genomn,
gewâfent vür den künec komn.
mit den wart er sâ zehant
nâch philôtâ gesant
dâ er ze herbergen was.
dô besaz attarras
daz hûs daz er iht kaeme hin,
zuo dem vürsten dranc er in
und nam in ûf aldâ er lac
unde sînes slâfes phlac,
gevangen vuort er dô dan
ze hove den ellenthaften man.
der vrâgete der maere
wes er schuldec waere,
sie sprâchen< wir enwizzen niht
wes der künec ûf dich giht.>
dô hiez an dem andern tage
nâch der âventiure sage
der künec alle sîne schar
ze strîte sich bereiten gar.
die sîne wâfenten sich sâ,
der was siben tûsent dâ,
die andern wâren in diu lant
durch twingen hin und her gesant.
dô wart groz gemenge
von michelem gedrenge
daz dâ vor dem künge was.
verborgen wart philôtas
daz im niht geschaehe
sô in daz povel saehe,
wan ez hât manec man daz lebn
von povels ruofe gegebn:
swie gevüege schulde er hât,
daz povel in niht reden lât:
der in ze rede lieze komn,
im würde niht der lîp genomn.
die selben vorhte und disen haz
alexander dort entsaz,
auch vorht er daz etewer
eintweder dirr oder der
spraeche alsô durch sînen muot
< dêswâr, daz vâhen ist niht guot,
daz man die vürsten vâhen sol
das zimt anders danne wol,
und durch rede legn in bant!>
diz began der wîgant
versehen als ein wîse man
der guot und übel betrahten kan.
der umb daz mort ertoetet was
den hiez man ûf den palas
tragen alsô tôten dar.
offenlîche vor der schar
seite der künec an daz ort
wie diu untriuw und daz mort
gerâten was mit sicherheit
als ich iu hân hie vor geseit.
er sprach< ir herren mîne man,
schouwet und sehet an
wie ich iu allen sî erslagn!
waz sol ich mêre dâ von sagn
wan daz mich die valschen zagn
in ir muote hânt erslagn?
deich lebe, daz ist âne ir danc.
dêswâr mîn leben waere kranc
wan daz des hoehsten gotes rât
mich vor in beschirmet hât.
ouch wizzet sicherlîche
daz ich die iemer rîche
von der râte mir daz lebn
diu gotes helfe hât gegebn.
ich hân nû gelernet wol
daz ich den iemer danken sol
der triuwe sunder valschen list
an mir ganz beliben ist.
ôwê, waz hâte ich in getân
die mich erslagen wolden hân
und mich âne widerstrît
ie vleiz ir willen mîne zît!>
dô der künec daz gesprach
ein solch jâmer dô geschach
daz sie weinden über al
sô sêre daz des jamers schal
undervuor des künges wort.
noch hâte er niht unz an daz ort
gesprochen daz er wolde
und aldâ sprechen solde.
nû geswigen sie durch daz,
dô sprach der künec vürbaz
< ir herren, ich hân wol gesehn
daz ich muoz von schulden jehn
daz iu mîn leit mit triuwen swirt,
iuwer jâmer groezer wirt
von unbilde, swenne ich die
vor iu hân genennet hie
von den ûf mich diu sicherheit
komen ist und ûf geleit:
die sint als ahtbaere
daz mir ist iemer swaere
ob ich iht anders danne wol
ie manne von in sagen sol,
doch muoz ich ir untriuwe sagn.
wie möhte ich untriuwe vertragn
an den al mîn êre stât?
die hânt gevrumet disen rât:
parmênîôn der alte
der ie mit gewalte
hâte mînes vater lant
und den ich mit mîner hant
aldâ her gerîchet hân,
der hât disen rât getân
und sîn sun philôtas
der mir ie der liebste was.
wâ von mir daz sî erkant?
dô sich philôtas underwant
mînes râtes und mîn
und ich im tet volge schîn
swes er geriet, - dô riet er sâ
daz mir bî den zîten dâ
gezaeme wol dêmêtrîus
unde pêkulâus
und dirre dimnus der hie lît,
daz sie mîn phlaegen zaller zît.
disem einem was ich gram,
jene zwêne ich an mich nam
und bevalch ir triuwen mich
als er mir riet. - an den hân ich
diz mort allez vunden.>
dô saget an den stunden
mêtrôn der kameraere
zêbalînes maere.
nicômachus begunde ouch sagn
wie in daz mort was an getragn.
zêbalîn der dritte was
der seite wie philôtas
bevant diu maere sâ zehant
dô sie wurden im bekant,
und wie er daz verdagte.
der deheiner sagte
philôten an der maere
daz er unschuldec waere.
< nû merket> sprach der künec dô,
< sî disiu rede bewaeret sô
daz ich habe die wârheit
ûf die vürsten hie geseit,
sô sült ir wizzen al vür wâr
daz ich ez rede ân allen vâr.
nicômachus und zêbalîn
müezen mir unschuldec sîn:
die hânt unschuldiget sich wol,
des ich von wârheit jehen sol.
philôtas mîner lande gert,
den hâte ich ie sô liep, sô wert
dâz er waenet nâch mir sîn
künec in den landen mîn,
er gert vil groezer werdekeit
dan im müge sîn bereit.
sîn vater ist in mêdîâ,
der hât gewalteclîche dâ
von mir grôze ritterschaft
und alsô werlîche kraft
daz er des wol geswüere,
swie balde ich vervüere,
er haete sô gar swaz ich hân.
daz ist gein mir ir beider wân.
nû hân ich der hêrschaft mîn
naeher erben dan sie sîn,
doch mohte in werden wol von mir
vil mîner lande nâch ir gir
ob sies mit triuwen wolden gern.
ich kunde sie noch êren wern,
êren und guotes,
waern sie staetes muotes.
nû wil ich iuch lâzen sehn
ein wortzeichen muoz iu jehn
des ein teil von wârheit
daz ich ûf sie hân geseit.
dirre brief der wart gesant
von parmênîônes hant
sînen sünen, dâ stêt an
« lieben süne mîn! ich man
iuch daz ir iuweren gerinc
dar an kêrt daz iuwer dinc
nâch ganzem nutze vür sich gê,
daz iuwer! dar nâch niemens mê!
stât ie dar an iu selben bî
swie ez umb die andern sî!
ez sî herre odr lantman,
des sült ir niemen sehen an
ir enwerbet darumb alle zît
des ir bedurfende sît! » -
waer der brief vollekomn
als ir in hât hie vernomn,
sô waer ir dinc geworben sô
daz ich es spâte würde vrô.
philôtas wart niht genant
dô nicômachus bevant
daz mort und die sicherheit:
daz er dô niht wart geseit
schuldec an der geschiht,
deste vrîer ist er niht:
sie wâren einvaltec
und er alsô gewaltec
daz er von vorhten ungeseit
beleip an der sicherheit:
dimnus sîn vorhte entsaz
und versweic in durch daz.
ich wil iuch mêre wizzen lân
waz mir philôtas hât getân.
dô der vürste amintas
niht in mînen hulden was
und er und sîne mâge
mir leiten mange lâge,
dô leiste er im geselleschaft
mit geselleclîcher kraft
vürbaz dan er taete sît.
attalus was mir widerstrît,
dem gap er ân den willen mîn
ûf mînen lîp die swester sîn
und zêch er mich durch sînen spot
daz ich wolde wesen got
und mensch iht mêre.
sus hât er ûf mîn êre
mange grôzen valscheit
erdâht und ûf mich geleit.
diz druhte ich im ze guote
nidr in mînen muote.
nû sint diu wort zen werken komn
als ir hât ein teil vernomn.
nû, lieben vriunt, an wen sol ich
mîn leben lâzen unde mich?
an einen der diz hât getân,
hât ich mîn êre gar gelân
und mînen lîp und al mîn heil
und mînes hers daz beste teil.
medîâ mîn rîchstez lant
stât in sînes vater hant.
daz ich niht vürhten wolde
noch nie gevürhten solde,
daz ist mir nû ze vorhten komn
als ir seht und hât vernomn.
war sol ich mich ziehen,
ze weme sol ich vliehen
wan an die den ich wol
getrûw und getrûwen sol?
ich mac erweren niht, welt ir
brechen iuwer triuwe an mir,
sô ich al mîn êre hân
und mînen lîp an iuch verlân.
diz hân ich geseit durch daz
sich iegelîcher deste baz
künne von wârheit verstân
deich niht durch muotwillen hân
gesprochen dise herren an.
ich wil iuch, herren mîne man,
dise schulde rihten lân
und sie hie lân ze rehte stân.
der mir unschuldec wirt geseit,
daz dem geschaehe, ez waer mir leit.
swer ouch wirt schuldec vunden mir,
mîn gerihte ich niht verbir
als unser reht her komen ist.>
dô wart an der selben vrist
philôtas ûf den hof besant,
der was versmit in starkiu bant.
dô daz volc in komen sach,
ir iegelich zuo dem andern sprach
< nû seht, wer philôtas
nû sî odr wer er hie vor was!
niuwan gester vor dem tage
dô was er vrô, nû hât er klage:
nû sol man grôze swaere sehn
diu sînen vater ist beschehn.
wie ist verdorben ector
sîn sun und nicânor
der ein edel vürste was!
wie stât nû philôtas
sîn sun ein vürste rîche
leider jaemerlîche!
hindr im ist manec valscheit
ûf in und sîniu kint geseit.
benamn ob sie ouch schuldec sint
ez sî vater oder kint,
sie süln von schulden umbe daz
von al der welte dulden haz,
wan swâ der ist getriuwe niht,
an dem man triuwen sich versiht,
des untriuwe ist zwivalt.
untriuwe sol niht werden alt.
sîn sie ouch dran schuldec niht,
sô waer niht wol, geschaehe in iht.>
diz retten al gelîche
arme und dar zuo rîche
mit gemeinen worten dâ.
zênôs der vürste sprach dô sâ
< hât philôtas diz getân
sô wil ich im des niht gestân
ez sül im gân an den lîp,
swie sîn swester sî mîn wîp.
swer mînem herren nimt daz lebn
der hât uns in den tôt gegebn.> -
< ja> sprach der künec< daz lâz ich
nû vil schiere hoeren dich>. -
< daz sol er zehant arnen hie!>
einen stein er gevie
und wolde ûf in geworfen hân.
alexander sprach< lâ stân!
man sol im âne schulde niht
tuon ê man in schuldec siht
und in des mordes überseit
mit des gerihtes wârheit.
waz obe er solhe rede hât
daz er unschuldec hie gestât?
daz ziuhe ich an den hoehsten got
mit rehten triuwen âne spot,
mac er unschuldec werden hie
daz mir geschach sô liebe nie
wil er alhie ze rehte stân
daz wir ze lantrehte hân.
philôtâ, nû wîse mich!
wiltû lân rihten über dich
nâch der mâzen rehte?> -
< vürsten ritter knehte
ist manger hie der mich ân nôt
gît niht gern in den tôt
daz er ûf mich iht spreche
dâ mite er sîn reht breche.
reht ich gerne dulden wil.
hie ist vremder liute vil,
den mâzedônje daz lant
und sîn reht ist unbekant:
der reht und der mâzen reht
ist mir allez ebensleht
und wil gevolgec gerne sîn,
tuostû mir reht gerihte schîn.
reht wil ich versprechen niht:
ich vröu mich swâ mir reht geschiht>.
der künec sprach< nû sehen an
arm und rîche mîne man,
unde merket dâ bî
ob diz iht arcwaenec sî
ob dirre herre der hie stât,
des landes reht versprochen hât
von dem er bürtec ist erkant,
und suochet reht umb ander lant.
sol er des unschuldec wesn,
er mac des mordes wol genesn,
ich enweiz wiez darumb ist.
antwürt er an dirre vrist
der rede als ez in ane gê,
ich wil nû niht sprechen mê.
vâhet balde, dêst mîn ger,
jene und bringet sie ouch her,
die ouch sicherlinge sîn
des mordes ûf daz leben mîn!>
daz geschach dô sâ zehant,
man leite sie in starkiu bant.
der ellenhafte philôtas
der alsus an gesprochen was,
antwurt offenlîche dô
des küneges rede, er sprach alsô
< ir herren die genôzen mîn
die von art ouch vürsten sîn,
und swer die sîn die hie stânt
und vernunst mit witzen hânt,
lât iu allen des gezemn
daz ir geruochet mich vernemn!
iegelich geleben mac
daz er vil lîhte noch den tac
an im selben gesiht
daz im ouch alsô geschiht
alse mir nû ist beschehn:
ir sült iuch deste baz besehn
daz iemen ûf mich spreche
dâ mit er sîn reht breche,
und lât sô liep in niemen sîn
daz ir ûf die êre mîn
sagt durch haz deheine lüge
diu her nâch iu geschaden müge,
ob ich durch nît waer verlogn.
wirt durch mich iuwer reht gebogn,
daz müezet ir nâch mînen tagn
alsô krumbez iemer tragn,
nâch schulden, nâch unschulden
der herren willen dulden.
sol ein man umbe daz
obe ein herre sînen haz
an in leit und sînen zorn,
an gerihte sîn verlorn?
lieben vriunt, daz müget ir
ungerne künne hie an mir.
ich wil mit willen dulden
reht nâch mînen schulden,
die hoeret durch den groesten got
und durch des reches gebot!
süezer worte und rede vil
kan ein man der sprechen wil
dem andern an sîn êre,
mit kranker witze lêre
mac ein herre sînen man
mit gewalte sprechen an.
gedenkt er waz im wol behage
und wie er daz ûf in gesage,
diu rede schiere vollevert
dâ sî gewalte niemen wert:
sô muoz er sîn ein wîse man
der wol ze nôt antwürten kan
dâ im gewalt und wîsheit
überkraft an witzen treit.
mîn got ist sô gewaere
deich in ze rihtaere
wil an disen schulden hân.
nû merket waz ich habe getân!
daz ich habe die sicherheit
mit mînem rât ûf geleit,
des hât der künec mich gezign.
dô wart ich aber gar verswign
zem êrsten dô diu sicherheit
wart nicômachô geseit.
dêswâr sô mochte ouch zêbalîn
niht wizzen mê der schulde mîn
wan daz er sagete diu wort
diu er vernomen hâte dort.
dô ich vür mînen herren kam
und er die unschulde vernam,
er lie mich an der getât
unschuldec. nû hât valscher rât
duch nît verrâten mich und in
daz ich im in schulden bin.
ob ich nû schulde haete
mit helfe und mit geraete,
sô waer daz wunderlich genuoc
daz ich in niht ze tôde sluoc
und ich sîn dô dicke phlac
dô er einec bî mir lac,
und ich im werte ein ganzez her
sô er lac slâfend âne wer.
was dimnus sô gewaltec mîn
daz ich mit der helfe sîn
in disem hove solde lebn,
sô möht ich mich wol begebn
der êren die ich ie gewann:
er waer vil gerne mîn man
gesîn, des lougen ich nû niht,
haete ich im gelihen iht.
solde ich sîn des sicherlinc,
dêswâr, daz waer ein armez dinc
und ist muotwille swer ez seit,
wan ez ist ein unwârheit.
ouch hât der künic ûf mich gejehen
daz im sî leit von mir geschehn.
er giht, dô amintas
âne sîne hulde was,
daz ich sîn helfaere
dô bî den zîten waere.
dô weiz er wol daz des niht ist,
wan ich vleiz mich alle vrist
wie ich des gedaeht
deich in ze hulden braehte,
und was im heimlich durch daz
und nie durch des künges haz
unz ich im sîne hulde erwarp
und sîn zorn gein im verdarp.
er hât ouch gejehen sus,
dô der vürst attalus
ûz sînen hulden muoste sîn,
dô gaebe ich im die swester mîn:
diu was dâ vor ê sîn wîp,
daz ziuhe ich an sîn selbes lîp.
dem half ich ouch ze hulden:
von ungedienten schulden
truoc er ouch des künges haz.
in der unminne ich stille saz
unz alexander ginret wart
daz er mit lügelîcher art
ûz sînen hulden was getribn.
er giht, ein brief waer uns geschribn
mir und dem lieben man
mînem bruoder, dâ stüend an
daz wir unsern gerinc
niht kêrten wan an unser dinc.
daz ist uns allen wol erkant
daz wie des selben sîn gemant:
mîn herre daz niht zürnen sol
tuon ich ouch mînem dinge wol
ob im daz ze schaden niht
und ze leide geschiht.
der mich triuwelôs durch daz,
der treit mit âne schulde haz.
der künec hât vür missetât
an mir groezlîche daz mîn rât
im geriet daz dimnus
waere und dêmêtrîus
bî im. dâ enwess ich niht an
deheinen valsch des ie man
begunde. hânt die missetân.
solde ich dar an schulde hân.
daz waer ein angestlich geschiht.
ich wesse ir untriuwe niht.
sie wizzen wol daz ich ez nie
geriet noch untriuwe begie.
swaz dann uns von im geschiht,
ich und mîn vater hân enwiht
mînem herren getân,
er welle uns danne engelten lân
daz wir im entwichen nie
swenne ez an en ernest gie,
und daz mîn bruoder ector
und ouch nîancor
in sînem dienste ligent tôt
in daz wir beide mange nôt
bî im in angestlîchen sitn
lîden unde hân erlitn.
süln wir des engelten?
daz geschiht doch selten
von getriuwes herren hant!
der künec giht, sîniu lant
well ich im gerbn und giht dâ bî
daz ich widerwertec sî
der rehte diu sîn rîche hât.
ob iemen ein dinc widerstât
und doch dar nâch jâmer treit
wie mac daz wesen? swer daz seit
der hât gar gesceiden
mit einem von in beiden
die wârheit, wan es mac niht sîn.
als tuot uns der herre mîn.
ob ich im schuldec sî erkant,
sô überrede mich hie zehant
unde lâze mich daz lebn
ze buoze vor den vürsten gebn.
mich wundert warumb er daz spar,
ich bite in daz er vollevar
âne muotwillen an mir:
tuo mir reht, daz ist mîn gir!
sî daz ein unwârheit
daz ich habe alhie geseit,
sô wil ich aber schuldec wesn
und des tôdes ungenesn.
mac eines wortes mich dar an
überreden dehein man,
ich wil in banden gerne sîn
unz ich al die rede mîn
mit mînem gote erziuge
daz ich ein wort niht liuge.
wirde ich schuldec dô geseit,
sô wil ich gerne sîn bereit
daz ich nâch rehten schulden
gerihtes ban wil dulden:
ist des niht, ich sol ledec wesn
und gerihtes sîn genesn.>
dô disiu rede alsus geschach,
ein herre stuont ûf und sprach
< man sol unschulde hân vür guot.
swer übel âne schulde tuot
dâ man sol gerihte hân,
dêswâr daz ist niht wol getân:
durch muot willen niemen sol
die vürsten velschen, daz stêt wol.>
dô sprach philôtas< des muot ich
rehtes übergenüeget mich.>
alexander hiez den degn
vüeren hin und sîn wol phlegn
gevangen unz er an daz ort
vollevuorte siniu wort
und ziugte sîne wârheit
als er ê haet ûf geleit
und vor gerihte sich vermaz.
ouch hiez der künec allez daz
er mit im brâht in daz lant,
ze hove antwürten sâ zehant
und ziehen in sînen gewalt
bôlônen einen degen balt
unz er die schulde trüege
odr sich der schulde entslüege
mit sîner gote wârheit
als ez sîn munt haet ûf geleit.
dô der selbe tac zergie
und diu naht ane vie,
den vürsten leite man zehant
gebunden in sterker bant
danne er dâ vor laege,
man hiez daz man sîn phlaege
vîentlîcher dô dann ê
und im mit banden taete wê
durch die arcwaenec getât.
dô besante sînen rât
der künec alexander dar
die liebsten von sîner schar.
er sprach< ir herren, mîne man
und mîne vriunt! nû râtet an
wie ich werbe und wie ich tuo!
hie hoeret wîslich vuoge zuo:
lâz ich den vürsten genesn,
sô vürht ich verkrenket wesn
von sînem vater und von im.
ob abr ich im daz lebn nim,
dâ entsitze ich niemen an
wan mîne vriunt und mîne man
daz sie mirz z unêren
nâch missewende kêren.>
sie sprâchen al< er sol daz lebn
umbe dise schulde gen,
und loese dû von vorhten dich,
daz enist niht unbillich!>
ephestîôn der wîse spach
dô der rât alsô geschach
< herre, wiltû volgen mir
sô riete ich vil ungerne dir
daz dû nemest im daz lebn,
wan im urloup sî gegebn
und stêt wol dîner hulde,
mac er sîn unschulde
bewaeren als er hât gejehn,
herre mîn, daz lâz geschehn.
nim ouch hie von dîner schar
swen dû wilt und sende in dar
und heiz im sagn dû wellest niht
sîn geriht an der geschiht,
dû wellest in vür schuldec hân,
daz müeze im an sîn leben gân.
des heize in innen bringen
mit sô gewaeren dingen
daz er waene in sîner nôt
er müeze lîden den tôt.
als er danne sich versiht
daz er genesen müge niht,
sô vergiht er sâ zehant
und tuot sîne schulde erkant
unde nennet alle die
dar an wurden schuldec ie.
ob abr er unschuldec ist,
sô vervâet dehein list
daz im sô grôzes iht geschehe
daz er schulden verjehe.
wizzest, hât er diz getân,
sô muoz er groezer helfe hân
danne wir noch wizzen hie.
maht dû wol bevinden die,
des soltû gerne vlîzec sîn,
daz râte ich, lieber herre mîn.>
der rât geviel dem künge wol
als man den wîsen volgen sol.
zênôs was dô hin gesant
und ephestîôn zehant
und sagten im diu maere,
sie sprâchen< uns ist swaere
daz wir dir nû müezen sagn
daz wir gerner verdagn
wolden danne dir tuon kunt.>
dô sprach philôtas sâ zestunt
< ich hoere wol, ich hân verlorn
den lîp durch des künges zorn.>
sie sprâchen< ja! daz muoz eht sîn.
sô sage uns al die schulde dîn
und die mit dir sint dran gewesn,
wan dû maht doch nicht genesn.> -
< dêswâr ich hân mit wârheit
mîne schulde gar geseit
wol hiute z iuwer angesiht.> -
< des wil der künec gelouben niht.> -
< was mac ich des?> -< dâ soltû jehn
alles wie ez sî geschehn,
und sage wer dir stüende bî
und wer des râtes schuldec sî.
sô lât dich mîn herre lebn
und wil die schulde dir vergebn.
tuost dû des niht, dû bist tôt.
nû hilf dir selben von der nôt
unde lougen uns hie niht
dîner schulde und der geschiht!>
philôtas antwurte dô
der vürsten rede, er sprach alsô
< daz ist genuoc wunderlich
daz ir welt überreden mich
daz ich untriuwen hie verjehe,
daz man mich mordes schuldec sehe.
waenet ir und wolde ich hân
alexander iht getân,
mit untriuwe, ez waer geschehn.
man muoz mich getriuwe sehn
sterben oder nû genesn,
sît ich getriuwe bin gewesn.
sol abr ich hie verderben,
sô wil ich alsô sterben
daz ich gen alexander nie
dehein untriuwe begie
mit worten noch mit râte
deweder vruo noch spâte.
mir riet ouch niemen niht ûf in
wan ich alles arges bin
gen im unschuldec, daz weiz wol
mîn got an den ich ziugen sol
daz ich nie muot gen im gewan
dâ ich mîner triuwen an
vergaeze und mîner êren.
welt ir mich nû lêren
daz ich mich neme untriuwen an
als ein ungetriuwer man
den man in valsche leben siht,
dêst âne nôt, ich volge es niht.
sol ich den lîp verloren hân
umb iuwern haz, daz muoz ergân!>
dô hiezen sie den vürsten sâ
mit slegen und mit viure dâ
twingen daz er jaehe
von wem der rât geschaehe
und obe er schuldec waere.
swie manger hande swaere
und swie kumberlîchez leit
im mit noeten wart bereit,
er bôt eht sîn lougen
offenlîche und tougen
seit er deheiniu maere
wan daz e'r unschuldec waere.
ie harter und ie harter
erdâhten sie vil marter
die sie an in leiten:
in al den arbeiten
der sie gedenken kunden,
wart er nie schuldec vunden.
er bat sie dicke in sîner nôt
daz sie taeten im den tôt
vür die grôzen arbeit
die sie in hâten an geleit.
dô die diu maer vernâmen
die mit im dar ê kâmen,
daz man dem vürsten rîche
tet sô lasterlîche,
sie vorhten durch des künges zorn
al gelîche sîn verlorn
sîne mâge und sîne man,
die nôt vlôch iegelîcher dan
an diu gebirge her und dar.
dô wart in des künges schar
ein grôz murmer über al.
dô der künec disen schal
vernam, er hiez in allen sagn,
dô man in wolde hân erslagn,
swer dâ waer unschuldec an
herr oder dienstman,
dem taete er ungerne leit.
des gap er in sicherheit
mit vride und mit geleite dô.
sie kêrten widr und wâren vrô
daz in niemen leides niht
wolde tuon umb die geschiht.
des morgens dô diu naht zergie
und der tac ane vie,
die vürsten giengen beide dâ
zuo dem künge und seiten sâ
daz sie dort haeten anders niht
mit deheiner vergiht
ervarn wan daz philôtas
mit bet überwunden was
daz er verjehen haete alsus:
dannoch dô dârîus
lebet unde mit im streit
und an dem êrsten strîte erleit
schumphentiure und dannen vlôch,
dô enkaeme hegelôch
niht der dô kîun besaz,
und riete sînem vater daz
er alexandern slüege
und danne krône trüege
über elliu disiu lant
diu in alexanders hant
stüenden bî den selben tagn.
dô würde hegelôch erslagn
und ouch der künec dârîus
und waere daz erwendet sus.
wie daz solde sîn geschehn,
des kund er in niht verjehn
wan siez vor im verhaelen
und im die schulde staelen.
dô der künec daz vernam
und im daz selbe maere kam,
dô wart aber sâ zehant
philôtas aldar besant,
der muost offenlîche gar
diu maere sagn vor al der schar.
der künec sprach< nû hoeren an
wie mange wîs mich mîne man
hânt verrâten mîne zît
durch anders niht wan durch nît.>
aldâ wart dêmêtrîus
und alle die dimnus
hâte schuldec genant,
gar versteinet sâ zehant
wan der vürste amintas.
philôtas ouch aldâ genas
wan sie bewârten beide sidr
unschuld und erwurben widr
daz man sie niuwan guotes
zêch und getriuwes muotes,
und wâren noch gevangen dâ.
dô wurden vür gevüeret sâ
sîmam und amintas
und polemôn der eine was
der bruoder sîn der entran
dô der künc sô sêr began
mit sînen hoehsten mannen
zürnen, er vlôch dannen.
der selbe juncherre ouch was
gevangen brâht als ich ez las.
amintas der wîse man
wart ouch dô gesprochen an
daz er waer genennet dort,
do daz mortlîche mort
und diu unrehte sicherheit
würd ûf den künec ûf geleit.
dem künge enbôt diu muoter sîn
olimpîas diu künegîn
daz er vor disen vürsten sich
huote, daz waer wîslich
wan sie im haz unde nît
mit valsche trüegen alle zît.
die brieve las man vor der schar,
sie wâren niuwelîche dar
von mâzedônje gesat.
dô sprach der edel wîgant
< amintas, nû hoere wie
dich die brieve an sprechent hie
die mir mîn muoter sande
von mînem eigenlande.>
er sprach< herre ich hoere wol
daz ich der rede antwürten sol
ze mînem teile als ez nû stât
und diu rede mich ane gât.
ir herren al gelîche,
vernemet minneclîche
daz mîne und iuwer aller wort!
herre künc, wir hân bekort
bî dir angest und nôt,
uns sint die liebsten vil nâch tôt.
werder degen, nu hân wir
enphangen solhen lôn von dir,
dar ûf dir noch dienten ie
die dir zer nôt gewichen nie:
ûf nôt und michel arbeit
was dir ie von uns bereit
triuwe und dienstlîcher muot.
swar nâch der man sîn arbeit tuot,
wirt im dar nâch gelônet wol,
vür guot er daz enphâhen sol.
als ist ez unz ergangen
wir hân von dir enphangen
unwert und vorhtlîchez leit,
nôt angest arbeit,
daz was ie unsers herzen gir
daz wir dar nâch dienten dir.
doch tuot der selbe lôn niht wol,
der in ze lône enphâhen sol
den mac sîn wol verdriezen:
des wir solden geniezen
des müezen wir engelten.
wir hân geruowet selten,
sît wir von lande vuoren
und dîne helfe swuoren.
dienstlîchiu arbeit
solde guot und werdekeit
dem man ze lône bringen,
dar nâch sach ich ie ringen:
nû ist daz vil unzimelich
sol der man arbeiten sich,
nâch arbeit nôt ze lône hân,
diz ist sêre missetân.
herre künec, obe ein man
dem andern niht guotes gan
und etlîche valscheit
durch sînen haz ûf in geseit,
sold er darumbe schuldec sîn?
wie zimet daz den tugenden dîn?
lieber herre guoter,
ob ich gein dîner muoter
umb unschulde verleidet bin,
daz ist ein angestlich gewin
sol ich zehant durch jenes haz
gegen dir schuldec sîn vür daz.
lieber herre mîn, unz wir
getriuweclîche dienen dir
âne valsch mit triuwen
staeten unde niuwen,
sô sag uns niht triuwelôs!
swer sîne triuwe nie verkôs,
dem ist ein herzeclîchez leit
der in zîhet valscheit.
wilt dû genuogen volgen
daz dû wilt sîn erbolgen
den sie vil lîhte vîent sint,
waeren wir dan dîniu kint
alle die man bî dir siht,
dû möhtest uns getrûwen niht.
herre, dû solt sîn gemant
wie dû mich santest in diu lant
daz ich dir mit niuwer kraft
braehte niuwe ritterschaft,
dô brâht ich dir mangen helt
an manheit gar ûz erwelt
der dir waer iemer unerkant.
gorgîas der wîgant,
hêgâtêus und gorgatân
sint durch mich dir untertân,
sehs hundert ritter die brâht ich
in vremdiu rîche her durch dich
von dînem eigenlande
und sehs tûsent sarjande
und entweich dir noch nie
swâ dich kumber ane gie.
ist daz untriuwe, daz tet ich,
des wil ich offenlîche mich
vor al den criechen rüemen
und des mich selben blüemen
daz ich ander valscheit nie
mit untriuwen gen dir begie.
swie geriht ist genant
swaz iemen zuo gerihte vant
daz wil ich allez dulden,
daz ich mit disen schulden
unschuldec bin und nie gewan
den muot der schulde haete dran
mit worten noch mit râte
deweder vruo noch spâte
noch mit deheinen dingen,
daz wil ich hie vür bringen
nâch der vürsten lêre
durch mîn selbes êre.>
dô diz amintas gesprach,
ir iegelîcher dô verjach
herre ritter oder knecht
sîn rede waer guot und ûfreht
und ez waere ir aller wort
daz er gesprochen haete dort.
hie mite die zuo giengen,
die polemônen viengen
den bruoder sîn, dô er entran.
die brâhten in her wider dan
gevangen vür den künec dô.
sie sprâchen al gelîche alsô
er waere arcwaenec daz er vlôch,
dô mans an daz gerihte zôch
die man des mordes ane sprach.
als in sîn bruoder komen sach,
er sprach< unsinnec toerscher man!
wer wîste dich von êrst dar an
daz dû vlühe? waz hâstû
getân uns und dem künge nû?
dîn vluht hât grôzen mein ûf dich
geleit und schulde vil ûf mich
daz dû verteilet müezest sîn.
wem lieze dû die brüeder dîn?
woldest machen dû daz wir
schuldec würden gar mit dir?
dîn untriulich zageheit
hât von unschulden uns geleit
in arcwaenec schulde
an alexanders hulde.>
polemôn der wîse degn
kunde guoter site phlegn,
er was in blüejender jugent
ein kint, ein man in ganzer tugent
vor missewende wol behuot.
der junge reine degen guot
enthielt sich schôn unde sprach,
dô er den bruoder zürnen sach
< bruoder, daz dû strâfest mich
daz hân ich vil wol umbe dich
verscholt mit dirr ungeschiht.
ouch bin ich sô schuldec niht
sô ungevuoge ich hân getân:
ich wil iuch alle wizzen lân
wâ von und wâ mîn vluht geschach.
dô ich mîne mâge sach
vâhen und die brüeder mîn,
dô wolde ich des gewis sîn
man wolde niemen lân genesn
der unsers künnes solde wesn,
und wesse niht umbe waz
wir dolten alsô grôzen haz.
dô sach ich vliehen liute vil,
mit den vlôch ich. der schulde ich wil
schuldec hie mich selben jehn.
swaz darumbe sül geschehn
herre künec, daz sol ich
dulden, daz ist billich.
ich sol in den schulden sîn:
die unschuldigen brüeder mîn
süln niht entgelten ob ich hân
wandelbaeres iht getân.>
dô sprâchens al gelîche
< herre künec rîche,
dû solt in dînen hulden lân
die vürsten. sie hânt niht getân
dâ von sie dîner hulde enbern
ze rehte. des solt dû gewern
al die dîne die hie sîn:
dû solt die grôzen vürsten dîn
umb ein urkünde geschiht
in grôze schulde legen niht.
êr uns der bete durch die tugent
dîner hôchgelobten jugent
und habe die edeln herren wîs
durch dînen küneclîchen prîs
unschuldec und durch alle die
mit dir hie sint!> ûf ir knie
vielens al gelîche sâ
die der künec hâte aldâ.
vil schône er sprach< daz sî getân,
ich wil sie vür unschuldec hân
ân geriht und ân eit
und wil sie mit wârheit
unschuldec hân an der getât.
der aber mich verrâten hât
der muoz mir in den schulden sîn
sît daz er ûf daz leben mîn
alsô mangen valschen rât
gerâten und gevrumet hât.>
sîmam und amintas
polemôn und philôtas
wurden ledec sâ zehant.
man lôst ab in al diu bant
dâ sie versmidet wâren in.
sie giengen vür den künec hin.
der liez sie haben hulde
und hâte vür unschulde
des er ûf sie ze schulden jach.
dô diu suone dâ geschach,
der künec gie besunder dan
und sante nâch einem sînem man
der was ein wîser wîgant
der selbe hiez polîdâmant.
er sprach< ich wil dich wizzen lân
durch waz ich dich besendet hân.
mir ist an disen stunden
des lîbes schuldec vunden
parmênîôn des valscher rât
mir den lîp verrâten hât.
an dem wil ich rechen mich
und wil verschulden umbe dich
daz dû varst gen mêdîâ
und dû mînen vürsten dâ
antwürtest disen brief von mir.
darumbe wil ich hân von dir
ze gîsel beide brüeder dîn
daz ich gewis müge sîn
daz dû mirs iht abe gêst,
mir sunder wanc vürder stêst.
bite des clêandern
von mir und die andern
daz sie vristen daz niht mê,
sie tuon als hie geschriben stê!
wizzest rehte, swie ez niht
nâch dem willen mîn geschiht
daz ez wirt lîht undervarn,
sô mac niemen dô bewarn
dîne brüeder müezen gebn
beide lîp unde lebn
und dû swâ ich gevâhe dich!
daz soltû hân gewis ûf mich,
ûf mîn êre und ûf mîn lebn.
ich wil dir zuo gesellen gebn
zwên ellenthafte helde wîs
die hânt ouch ritterlîchen prîs,
die von arabîâ hie sint.
der beider wîp und ir kint
wil ich ouch ze gîsel hân
unz ez werde dort getân.>
die wurden beide dar gesant,
den wart diu selbe rede erkant
und muosten ez geloben dâ.
dô sant er gen mêdîâ
die brieve bî den helden drin
clêander und den vürsten hin
und hiez er die gîsel sâ
behalten ûf gewisheit dâ.
nû was ein ebenhiuzec nît
mit grôzem hazze lange zît
undr alexanders ritterschaft.
die vürsten die dô mit ir kraft
in mêdîâ dâ sâzen,
vil ebenhiuze mâzen
mit vîntschaft gegen ein ander
parmênjôn und clêander
sitalces und agatôn.
nû hâte parmênîôn
sô grôze wer, sô mangen man
daz sie in nie getorsten an
grîfen offenlîche,
ouch was der künec rîche
sô vorhtlich ir meister ie
daz sie unzuht begiengen nie
und truogen heimelîche gar
swaz in zein ander ie gewar
als uns diu wârheit tuot erkant.
die boten kâmen in daz lant
nâch der âventiure sage
an dem einliften tage
und antwurten die brieve dâ
des rîchen künges vürsten sâ.
dô man die brieve dâ gelas,
swaz in der reise vürsten was
den parmênîônes tôt
alexanders brief gebôt,
die sâhen al ein ander an,
sie sprâchen< seht wie dirre man
sich und uns verrâten hât
und sîn ungetriuwer rât!
des sol er niemer komen hin.
nû seht wie wir begrîfen in!
wol hie nâhen lît ein walt,
dar in durch sîne tagalt
der vürste rîtet tegelich
durch baneken. sô er baneket sich,
dâ süln wir in gewinnen.
er mac dâ niht entrinnen.
gewarnet süln wir komen dar:
würd er der botschaft gewar
er sazte sich gein uns ze wer,
er hât sô vil vriunt in dem her
daz er mînem herren
möhte wol gewerren:
daz süln wir vil wol bewarn
unde mit im undervarn
als ez uns an dirre vrist
geboten und geheizen ist.
ouch gedenket des daz er
in sînem muote was ie der
uns haete gerne vertribn.
swie daz ist an im belibn,
daz liez er durch die geschiht
er möhtes vollebringen niht.>
dô der ander morgen schein
und die vürsten über ein
des râtes kâmen under in,
ûf des herren ungewin
gâhten sie vil balde
gewâfent gegen dem walde
und lâgen aldâ unde bitn
unz daz zuo zin kam geritn
der edel vürste rîche.
er reit unwerlîche
wan er dâ nie man entsaz.
dô twelten sie niht vürbaz
sie kâmen dar ûf in gerant.
clêander der wîgant
gâhte vor dem andern her
und stach aldâ durch in ein sper,
dar nâch zucte er schiere swert
und ersluog den degen wert.
die mit parmênîône dâ
wâren, die entrunnen sâ,
sie wâren unbereit ze wer.
dô sie kâmen in daz her
und sie dô begunden sagn
daz der vürste waere erslagn,
daz klagten klagelîche
arm und dar zuo rîche
und gâhten gegen dem walde dar
mit manger wol bereiter schar
und wolden dô gerochen hân
swaz im ze leide was getân.
dô daz clêander bevant,
der ellenthafte wîgant
huop sich gein in vil balde
ûf daz velt gegen dem walde
und vrâgte sie der maere
waz in beschehen waere.
< dâ lît parmênîôn erslagn!
daz wirt niemer iu vertragn>. -
< nû werbet staeteclîche>
sprach dô der vürste rîche
< ich lâze iuch ein wortzeichen sehn
daz hie niht anders ist geschehn
wan daz alexanders hiez>.
den brief er sie dô schouwen liez,
dâ was vil gar geschriben an
wie der künec sîne man
haet ûf den vürsten gemant
und wie gewaerlîch er bevant
daz er haet im sîn lebn
verrâten und hin gegebn
und wie er sie daz rechen bat.
der vürste sprach< an der stat
hân ich den mein errochen,
daz grôze mort zerbrochen.
swer sich des wil nemen an
der muoz mit dem selben man
des grôzen mordes scholdec wesn
und mac ich doch vil wol genesn>.
dô dise rede vernâmen
die dar ûf dar kâmen
daz sie den vürsten raechen dô,
die sprâchen al gelîche alsô
< swie leid uns nû sî geschehn,
sît wir rehte hân gesehn
daz er dem künge hât getân,
sô müezen wir ez scheiden lân.
swie ez anders waere,
daz waere uns iemer swaere>.
sus gâhten sie vil balde
von dannen gegen dem walde
dâ der tôte vürste lac,
des tôt daz her vil hôhe wac.
man sluoc im das houbet abe,
daz ander teil truoc man ze grabe
als ez gebôt clêander.
dem küneg alexander
wart daz houbet dô gesant.
alsus verdarp der wîgant
und liez vriunt unde man
und swer sîn künd ie gewan
nâch im in klagelîcher nôt.
man klagte sêre sînen tôt
durch die vil hôhen werdekeit
diu an sîn lop ie was geleit.
parmênîôn der vürste wîs
truoc gemeinlîchen prîs.
man jach im des, er waere
wîs und unwandelbaere
milte küene tugenthaft,
er haete sô werlîche kraft
daz alexander selten ie
grôziu dinc ân in begie.
daz im vil ofte geschach
dâ man in prîs erstrîten sach.
er hâte wîsheit und rât.
der êrste an rât und an getât,
sîn herze er dâ von nie geschiet
als er die getât geriet,
er waere ouch ie der êrste dran
der râtes und getât began.
er was arm, er was ouch rîch,
sîn muot den beiden was gelîch,
den armen heimelîche guot,
den rîchen rîch und hôchgemuot.
die hôchgelobten mannes site
die im alsô wonten mite,
liezen in belîben niht
als uns diu âventiure giht,
in rehter lobes strâze.
mit überwegender mâze
pînd er sich krefteclîche
ûf alexanders rîche
und habete mit wîslîcher kraft
an sich dar ûf die ritterschaft
offenlîche und tougen.
sît wart ez âne lougen,
wan er der gastunge phlac
diu sich gen alexander wac,
und wold im gelîchen sich
swie daz waere unmügelich.
dô mohte er niht gerîchen,
durch daz muost er entwîchen.
der ellenthafte vürste wîs
was von alter worden grîs
und nâch dem alter wol gestalt.
er was sibenzec jâr alt.
sîn hôch stîgende werdekeit
wuohs und was an prîse breit.
daz twanc in daz er wolde
hôher danne er solde
hoehen und mâzen sich.
daz druhte in. - daz was billich:
der sit und der vürsten nît
die truoc zaller zît,
liez in niht ze hôhe swebn:
unmâze vlôs im daz lebn
diu sît und dâ vor selten ie
lang in unmâze vür sich gie.
alsus geschach dem vürsten wert.
swer noch übermâze gert,
den sol man undermâze wern:
man sol gevüeger vuoge gern.
ez ist niht guot und gar ze vil,
swer sich dem gelîchen wil
dem er sich niht gelîchen sol.
geschiht dem anders danne wol,
daz sol man in der mâze klagn.
diz schuof den vürsten ouch erslagn
den ich iu hân alhie genant.
dô alexander bevant
allez wie ez komen was,
ein vürste hiez lêônidas
ein vil hôchgemuoter degn,
den hiez er der rotten phlegn
der parmênîôn ê phlac
ritterlîche mangen tac,
und sante bî im brieve dar
daz sich parmênîônes schar
schiede von den andern.
ouch hiez er clêandern
daz er und alle sîne man
sich von jenen schieden dan,
daz dehein unminne
mit vîentlîchem sinne
sich durch den zorn hüebe dâ.
daz geschach. sich schieden sâ
die herren von ein ander,
einhalp was clêander
und anderhalp lêônidas
der jener rotten vürste was.
sus vuocte sich nâch saelden ie
swaz alexander ane gie
daz er dâ von mit saelden schiet.
sîn witze alsô ze saelden riet
daz er nie nihtes began,
im gelunge wol dar an:
sîn hôher prîs, sîn saelde was
staet als ein herter adamas.
diu glesîn saeld in ie vlôch,
diu staete saelde in nâch ir zôch
eht ûf und ûf hin ûf daz rat
unz er sô hôhe wart gesat
und alsô verr ûz genomn
daz niemen zuo zim mohte komn.
diz werte gar unz an den tac
daz sînes lîbes zil gelac,
daz im niht arges nie gewar,
er überwunde ez ie vil gar
mit saelden saeleclîche.
des was er saelden rîche
und ist uns noch sîn getât
diu im vil lobes erworben hât,
an lobe süeze und lobelich.
daz vünfte buoch hie endet sich
und ist rehte vollekomn
als ich die wârheit hân vernomn
des sehsten ich mit saelden hie
beginnen wil. nû hoeret wie!
an saelden stât
diu beste kunst,
swaz iemen kan,
von saelden gât
der welte gunst,
dem got des gan
daz er sî hât,
ob der begunst
des ie gewan
daz er ir rât
mit der vernunst
dâ wendet an,
wie er bejage
der welte prîs
in sîner zît
und sô betage
daz er daz rîs
daz saelde gît,
ze rehte trage
und ir âmîs
werd âne strît
daz man daz sage -
in swelhe wîs
sîn saelde wît
gewurzet sî -
von der geschiht
die er getuot:
swem saelde ist bî,
den hilfet iht
sîn reiner muot.
ist er ir vrî,
so'st gar ein wiht swaz er durch guot
je getet ze guote
mit lîbe und ouch mit guote.
saelde und êre
wilde sint -
des hân wir harte vil gesehn, -
ir gunst, ir lêre
lât ir kint
selten sich sô staete spehn:
sie tuont sêre
ir ougen blint,
sô sie in staete solden jehn,
ir zuokêre
ist als ein wint,
sie künnen dicke vürder schehn,
sô man sie haben solde
staet an ir hôhen solde.
der wîse meister gotfrit sanc,
daz glesîn gelücke
des veste sî broede und kranc
ez breche in kleiniu stücke
swenn ez schîn allerbeste.
gelücke gê bald an und abe
und sî vil selten veste.
vil lîhter danne manz behabe,
lâze ez sich uns vinden
und sî sîn gunst vil selten lanc,
ez kan vil gâhes swinden.
ouch sprach meister vrîdanc,
gelücke enwelle zuo dem man,
sô hilfet niht swaz er kan.
doch darumbe sol ein man
nâch saelden werben swâ er kan,
wan des harte vil geschiht,
swar nâch man den man werben siht,
daz im daz lîht aller meist
wirt nâch rehter volleist.
ûf die gedinge wil ouch ich
vürbaz mit dem getihte mich
und ûf genâde arbeiten
und disiu maere breiten,
obe ein tugent rîcher lîp,
ez sî man oder wîp,
iht hoere dran daz im behage,
daz er mir gunne mîne tage
güetlîchen âne haz
saelde und êren deste baz. -
vinde er sînes willen niht
( daz vil lîhte geschiht)
sô lâze er durch sîn êre
daz er mirz niht verkêre
und lâze mînen lôn daz wesn,
obe erz iender hoere lesn
und erz niht gerne hoere,
daz er durch daz niht stoere
diu maere dem dem wil gezemn
daz er geruoche sie vernemn:
er gê dâ von, swer niht sî
mit willen disen maeren bî,
und lâze sie die hoeren sagn,
den sie mit willen wol behagen!
nû scheident abr die liute sich,
ir site sind vil mislich:
einer hoeret gerne
wie dietrîch von berne
mit kraft in vremden landen streit,
von artûses hövescheit
wil ouch einer hoeren sagn,
einer von den liehten tagn,
einer wil von minnen,
einer von wîsen sinnen,
von gote ouch einer hoeren wil.
den site hât ouch liute vil
daz in ist allez sagn ein wiht,
der in von ribaldîe niht
seit, daz ist genuoger site.
hie scheident sich die liute mite.
den allen mac ich niht gesagn
diu maere gar diu in behagn,
beide disem, dem und deme.
swer gerne daz von mir verneme
wie alexander gelanc,
wie er elliu rîche twanc
und waz er wunders begie,
dem wil ich ez sagen hie. -
dô der ellenhafte degn
parmênîôn was tôt gelegn,
alexander der wîgant
besazte wîslîche diu lant
diu er betwanc mit sîner wer.
in evergêtas vuor daz her
und twelte vünf tage aldâ.
dô kâmen deme künge sâ
von den sînen maere
daz sie grôze swaere
ein teil mit vîentlîchen sitn
von sîner vîend einem litn,
daz was sâtibarzânes.
ich han iuch ê bescheiden des
wie er in sîner helfe swuor
und dar nâch ze bessen vuor.
der hâte sîne ritterschaft
bestanden mit werlîcher kraft.
erîgûus und artâbâzus
carânus und andrônîcus
die sîner lande phlâgen,
diu naehest ime lâgen,
dise vier vürsten gar
bestuont mit kreften und ir schar
der selbe degen wît erkant.
als alexander daz bevant,
er sante in werlîchiu her
ze helfe dar und ouch ze wer,
sehs hundert helde hôchgemuot
mit hôher wer vil wol behuot
und sehs tûsent sarjande
vrecher wîgande.
sehzec tage twanc sîn hant
der starken evergêten lant
und gap in z herzogen dâ
einen helt von persîâ,
der was genant amênîdas
der sînes swehers schrîber was.
in der arâcôsien lant
vuor alexander dô zehant.
dâ was parmênîônes schar
diu ê mit im was komen dar,
der nû phlac lêônidas.
zwei hundert junchern dâ was.
sehs tûsent kriechen wol behuot
brâhte der herr alsô guot
die hâten mit werlîcher hant
vor im betwungen daz lant,
die gâben im daz rîche
mit kraft gewalteclîche.
der selben schar nam er sich an.
mênône gap der wîse man
vier tûsent sarjande sâ,
den liez er z herzogen dâ.
er liez im z ors sehs tûsent man.
in ein lant kêrter dan,
dar inne ein liut ist wonhaft
daz hât vil werlîcher kraft,
ein wildez volc ist ez erkant.
sie sint pârâmedes genant.
ir wilde ist ûz gescheiden
verre von andern heiden.
wie daz lant sî gestalt?
nordert ist ez alsô kalt
daz ez deheine vruht gebirt
wan diu von kelte gar erwirt.
man siht ez westerhalben gân
an daz lant ze bactrîân.
zwischen den zwein teilen dâ
stôzet dar an indîâ.
daz kalte lant hât hiuser niht
wan daz mans in der erde siht
den winter belîben
mit kinden und mit wîben.
in tuot diu hitz alsô wê,
kumt si drin, als uns der snê.
ob sie hiuser wolden hân,
diu möhten niht von snê gestân:
dâ von, wan in des niht verzign,
müezens in der erde lign
gar unwünneclîche.
dô der künec rîche
kam dar in daz selbe lant,
swaz nôt und arbeit ist genant,
daz muost alexanders her
allez dulden âne wer,
vrost, müede und unrât,
als uns diu schrift bewîset hât.
vür die selben kelte dar
muoste varn des künges schar.
sie wâren vil nâch gar ervrorn
wan daz der degen wol geborn
die schar hiez vür sich trîben,
mit ruowen niht belîben.
in muote sêre ir arbeit,
eteswenne er vor in reit,
nû nâch, eteswenne enmitn
ie mit helflîchen sitn.
sîn rât, sîn hohiu wîsheit,
sîn unruowe und arbeit
und sîn manlîcher sin
half in von den noeten hin.
sie waeren anders alle tôt
und liten sus vil mange nôt
biz daz sie kâmen dâ daz lant
ein wênec wermer was erkant,
dâ die stolzen helde junc
vunden der wilden liute tunc
als der rouch sie wîste dar.
dô daz wilde liut die schar
sach gewâfent, ez erschrac
sô sêre daz dô manger lac
tôt odr unversunnen.
genuoge ir ouch entrunnen
unz in der künec vride bôt.
dô sie sâhen daz ir nôt
verendet was und in niht war,
sie brâhten dem künge dar
prîsante und spîse vil dem her.
sie gâbenz lant âne wer.
der künc besazte sâ zehant
nâch ir bete aldâ daz lant.
alexander kêrte dan
von dem lande und sîne man
an daz gebirge caucasas,
das strecket sich - als ich ez las -
mit sô langem striche dâ
daz asîâ und africâ
mit sînem joche scheident sich.
einhalp an des gebirges strich
stôzet caspîâ daz lant.
daz gebirge nimt zehant
den underscheit und strecket in
die lenge unz an zilîzje hin.
araxes unde cîtîâ
zilnt ir underscheide dâ.
dar an stôzet taurimunt
( der tuot die sundermarke kunt)
des strich in capadôzje ûf stât
und nidr unz in armênje gât.
swaz wazzer gât durch elliu lant
diu in âsjâ sint erkant,
diu gânt von den gebirgen gar
in vier mer mit namen dar,
inz rôte mer, in daz von pont,
in daz dâ bî ircânje wont
und in daz mer von caspîâ, -
diu springent ûf den bergen dâ.
dar an lît manec wîtez lant
des name uns ist vil unbekant.
daz her vuor sibenzehen tage
nâch der âventiure sage
durch des gebirges enge wege.
die ez hâten in ir phlege,
die vuoren an den künec hin
und ergâben sich an in
mit einem muot über al.
sie vunden manec süezes tal
daz in den gebirgen lac.
dô der ahtzehende tac
erschein, dô kam daz her zehant
dâ an die berge manec lant
wol erbûwen und guot
stiez mit vesten wol behuot.
sie vunden an der selben zît
einen stein veste und wît,
der was sinewel und grôz,
gebirg er und lant beslôz.
drûf bûweten die geste
ein werlîche veste,
diu sît gewalteclîche
behabte dâ diu rîche:
< der - berg - alexandrîe>
hiez sî der wandels vrîe.
an die stôzet bactrîân
als ich ez gelesen hân,
dâ bessus dô krône truoc
der sînen rehten herren sluoc.
der vürste erschrac, dô er vernam
daz alexander dô kam
und sô gewalteclîche
verbûwet sîniu rîche,
sîne gote er an der stat
mit opher ir genâden bat
daz sie im hulfen deste baz.
dar nâch dô er ze tische saz
mit sînen lieben vriunden gar
die im ze helfe kâmen dar,
von wîne groezer was ir kraft
danne von ir ritterschaft,
ouch vorhten sie der kriechen her
und daz sô kleine was ir wer.
der wortspaehe bessus
begunde schallen, er sprach sus
< waz wil mir alexander an
gewinnen und sîne man,
daz er ûf mich gâhet sô?
dêswâr des wirt er niht ze vrô.
mir kumt in vil kurzem zil
schiere grôzer helfe vil,
die sâgen und die dâchen
die mich noch nie versprâchen
sie stüenden mir mit helfe bî.
sô tuont ouch die corasmî,
die inden und die zîten,
die sint ûf von den sîten
an die ahseln lenger gar
dan iemen in der kriechen schar.
die sint mir all undertân.
ich wil varn in sogdîân,
daz ist ein wol beslozzen lant.
oxus ist uns ein slozbant
daz umbe daz lant vliuzet,
gebirge uns ouch besliuzet
mit vesten zallen sîten.
aldâ wil ich bîten
der helfe diu mir komen sol.>
der rât geviel in allen wol
und rieten ez ouch alle gar.
dô truoc man aber trinken dar,
wîn môraz lûtertranc
siropel mete daz sie twanc
mit schalle mangerhande drô:
wie möhte sîn genesen dô
alexander und sîn her?
diu wirtschaft machte in âne wer!
des selben ouch noch vil geschiht
daz man den wîs von wîne siht,
manhaft und rîche,
dem ein tumber ist gelîche,
sô im der hôhe muot zergât
den er von dem wîne hât.
nû saz obe dem tische dâ
cobares von medîâ
daz was ein werder degen wîs
der hâte an kunst vil hôhen prîs
und an meisterlîcher kraft,
er was getriuwe und ellenthaft.
der sprach< ir herren alle,
ir sît in grôzem schalle.
nû volgen mir! ich râte daz
iemen hie durch sînen haz
sî ze redenn alsô gâch
daz er rede, des er dar nâch
den kriechen lougen müeze.
manec rede ist süeze
diu lîhte ein sûrez ende nimt:
übermuot niht wol gezimt
dem der niht mac rîchen.
man sol wol gelîchen
die rüemesaer den giezen
die man hoert lûte diezen:
sus tuont die rüemesaere
die rüemlîcher maere
mit schalle zallen zîten phlegent
und sich ze hôhe an prîse wegent.
diu grôzen wazzer stille stânt
diu vil kraft âne diezen hânt.
alsô tuot ein iegelich degn
der kan guoter zühte phlegn.
herre, dû solt - daz rât ich -
des vil wol berâten dich
wie dû dich dem künge erwerst
und dich vor sîner kraft generst.
die wege die dû varn wilt,
die sint ouch im vor gezilt.
dû maht im niht die strâze erwern,
wil er sie varn mit sînen hern.
tuo als die noch hânt getân
die in wolden ie bestân,
und gip dich und dîniu lant
gar in alexanders hant,
wan dû dich niemer im erwerst,
in swelhez lant dû hine verst:
ez mac von sînen listen
niemen sich gevristen,
dem er gehaz und vîent ist,
dem vrumt deweder kraft noch list,
er müeze von im sîn verlorn.>
diu rede was dem vürsten zorn
daz er in maz gein im sô kranc,
von dem tische er ûf spranc
und wolde in gerne erslagen hân
der in haete dô verlân.
in behabeten sîne man.
cobares heimlîche entran,
in alexanders her er vuor,
sîne helfe er im dô swuor
und seite im al diu maere
wie ez ergangen waere
und wie er dar zuo zim entran.
alexander dô gewan
an sich den wîsen wîgant
und lêch im liut unde lant.
dô diz geschehen was alsus,
ze wer hâte bessus
aht tûsent man bereit
mit werlîcher manheit,
die versâhen sich des wol,
als man des waegsten denken sol,
daz alexander niemer dar
getorste varn mit sîner schar
und daz er ê gen indîâ
vüere dan in bactrâ,
wan in des künecrîches phlege
giengen sô müelîche wege.
von der selben geschiht
wolden sie des waenen niht
daz man ir iht bedorfte hie.
mit dem willen wolden sie
gedienen wol des vürsten solt,
daz er in gaebe und waere holt.
als was ir wân unz an die stunt
daz in wart von wârheit kunt
daz die mâzen kâmen.
dô sie ir kunft vernâmen,
sie vluhen von ir herren sâ,
werlôs liezen sie in dâ.
der liez ouch sîne veste varn,
er moht ir niht wol bewarn,
und huop er sich in sogdîân
und die im wolden dô gestân.
diu schif hiez er verbrennen gar,
diu in getragen hâten dar,
und hiez verslahen al die wege
und swaz im brücken und stege
vunden wart dar in daz lant,
diu hiez er brechen sâ zehant.
uns seit diu wârheit der schrift,
alexandrîe sîne stift
liez alexander wol behuot
mit siben tûsent helden guot.
gen bactrîân in daz lant
huop sich der edel wîgant.
dô vluhen die lantliut âne wer
und verburgen vor dem her
under d'erd alsô gar
spîse und korn daz diu schar
lange dô al übr daz lant
deheiner slahte spîse vant.
sô wê wart in von hunger dâ
daz sie stiezen sêsemâ
und mit dem saffe nerten sich.
diu lîpnar was vil armeclich,
doch gap man es einen kruoc
( des zeinem soume was genuoc)
sô man in bôt vil ringe,
umb zwei hundert phenninge,
und honeges alsô vil
umb driu hundert an dem zil.
vier hundert phenninge galt
sô vil, als ich hân gezalt,
wînes, obe in iemen vant
ze koufenn über al daz lant.
sie âzen lange wîle
visch ûz dem tîle
daz was ein bach der aldâ ran.
der künec und alle sîne man
arm und rîche in al der schar
hâten keine lîpnar
wan als ich iu hân geseit.
dirre selben armekeit
dem her ouch schiere gebrast:
dô hiez der ellenthafte gast
die soumer slahn. die âzen sie
dô jeniu spîse in abe gie.
nû wil ich iuch wizzen lân
wie daz lant ze bactrîân
geschaffen ist und wie ez lît,
als uns diu schrift urkünde gît.
einhalp ist ez ein wîtez lant
von manger vruht vil süeze erkant,
dem gebristet nihtes niht
des man ze rîcher süeze giht
und daz ie man ze wunsche weiz.
einhalp ist ez alsô heiz
daz nie man von hitze dâ
mac belîben. anderswâ
gen pont mac lebendes niht genesn
noch lebend in dem lande wesn:
daz kumt von starken winden grôz
der sûs sô grôz ist und ir dôz
daz sie daz teil des landes
sô vol vüllent sandes
daz die berg und diu tal
werdent eben über al.
swer den wec wil in daz lant,
deheiniu strâze ist dem erkant
wan daz er nâch den sternen
den wec dar in muoz lernen
als die marner ûf dem mer,
derhalp lît ez wol ze wer.
des selben landes houbetstat
undr ein gebirg ist gesat,
daz ist pârâpanîs genant,
oboctrus vliuzet durch daz lant.
dô dâ bî alexander lac,
mit grôzer wer der er phlac,
dô wurden im zwei maere
geseit diu im vil swaere
wâren und unmâzen leit.
an im haete ir sicherheit
pêloponêsus zerbrochen,
ouch haete in gar versprochen
lacônje daz rîche lant,
diu dâ vor dienten sîner hant
vridelîche und âne wer,
und nû kêrten gegen dem her.
ouch horte er an den zîten
sagen daz die zîten
übr den grôzen tânâim
sich wolden setzen wider im
und bessen ze helfe komn.
ouch hât er aldâ vernomn
daz sîne helfaere
liten grôze swaere
artâbâzus und erîgûus
carânus und andrônîcus.
daz tet sâtibarzânes.
der ungetriuw nârbazânes
was under diu gelegen tôt,
von disem liten sie vil nôt.
der künec was der maere unvrô.
wie daz urliuge dô
gescheiden würde, daz sag ich
als diu wârheit wîset mich.
die ellenthaften ariî
stuonden dô dem vürsten bî,
die brâhten manlîche wer
hin gein alexanders her.
dô sie mit vîentlîchen sitn
ûf ein ander vil geritn
mit roube und ouch mit brande,
die werden wîgande
striten an derselben zît
mit ein ander einen strît
dâ manec degen ûz erkorn
muoste hân den lîp verlorn.
swer werlîche vlôs den lîp,
sie machten riuwec manec wîp
der ir vlust gap wernde klage.
nû vuocte sich an einem tage
daz man sie mit gescharten scharn
sach gen ein ander zogende varn
ûf einen wünneclîchen plân.
man sach sie helm ze houbte hân
und hielten gegen ein ander.
die mit alexander
ûf dem velde wâren,
der vîentlich gebâren
was gegen den andern ritterlich.
ouch kunden wol die andern sich
gebâren als sie solden
dô sie strîten wolden,
und iezuo sprengen an die schar
und ûf ein ander hurten dar.
sâtibarzânes dô reit
mit manlîcher manheit
vür sîne schar und wincte sâ
den sînen daz sie hielten dâ.
diz geschach. der wîgant
sînen helm er abe bant
und stapfete gegen dem her.
vridelîche und âne wer
gerte er von in vrides hie
und gap in vride: den nâmen sie.
beidenthalben daz geschach.
der heiden herzog dô sprach
< ir herren, alexanders man,
ir hât iuch des genomen an
daz ir welt vertrîben mich
obe ir müget: daz wer ich,
wan ich noch vergolten hân
swaz mir leides hât getân,
des ist geschehen harte vil.
ein spil ich iu teilen wil:
iuwer sint wol viere hie
die noch an wer verzagten nie,
der wil ich einen hie bestân,
die andern süllen vride hân
ze beiden sîten in dem her.
ich wil mit ritterlîcher wer
ûf disem velde ersterben
odr wernden prîs erwerben,
dar ûf wil ich mich veilen.
ich wilz iu noch baz teilen
denne ich habe alhie getân:
ich wil helm ze houbte lân
alhie vor dem kemphen mîn,
und wil ich blôzes houbtes sîn.
daz nemt ir gerne, sît ir wîs.
ir seht wol, mîn hâr ist grîs:
er mac mich deste gerner vil
bestân der mit mir strîten wil.>
erîgus antwurte dô
des vürsten rede, er sprach alsô
< herre, des dû hâst gegert,
des soltû schiere sîn gewert.
dû hâst ez mir geteilet wol:
ich bin der mit dir strîten sol.
swie dû mich nû wilt bestân,
daz selbe reht wil ich hân:
wilt dû blôz, sô wil ouch ich,
wiltû aber wâfnen dich,
daz soltû vinden gar an mir.
swie dû wilt sô volge ich dir
und anders niht, als ich dir sage.
swer des andern prîs bejage,
dem sol iesâ sîn benant
sîn prîs, sîn guot, sîn liut, sîn lant.>
der heiden sprach< des bin ich vrô.>
bestaetet wart der vride dô
beidenthalben von in zwein,
sie wurden beide des enein
daz sie nâch ritterlîchen sitn
gewâfent mit ein ander stritn
und in vîentlîcher ger
vuorten vîentlîchiu sper,
wan ez den stolzen helden balt
niht anders dan daz leben galt
dar zuo saeld êre und guot.
die beiden helde hôchgemuot
ir orse durch baneken ritn
ûf den plân mit solhen sitn
als sie versuochen wolden
wie sie dâ varen solden.
dô die stolzen helde wîs
sich durch ritterlîchen prîs
ûf die tjost bereiten dâ,
sie triben gegn ein ander sâ
diu ors vaste mit den sporn.
die wîsen vürsten hôchgeborn
begunden sunder wenken
diu sper gegen ander senken,
diu sunder fâlieren gar
wurden hurteclîche dar
getriben von ietweders hant.
erîgûus der wîgant
wart gestochen an der stunt
daz er von der tjoste wunt
in die linken ahsel wart.
nâch ritters ritterlîcher art
er die selben wunde rach,
sînen kamphgenôz er stach
neben der vinteilen in
daz man durch die kel hin
die trunzen bluotec ragen sach,
ietweders sper aldâ zerbrach.
ûf die hähsen in den sant
kâmen diu ors von ir hant.
widr ûf sie gesprungen,
mit nîde ein ander drungen
die ellenthaften vürsten wert,
sie zuhten beide sâ diu swert
diu sie bî in vuorten dâ.
sie sluogen ûf ein ander sâ
mit zorne vîentlîche,
man sach die vürsten rîche
ein ander haz mit zorne tragn
swie der eine waere erslagn,
er phlac sô manlîcher wer
mit sô gâhem lîbes her
daz er dem andern mange nôt
mit vîentlîchen slegen bôt.
ir kraft ungelîche schein,
dem einen wuohs, dem andern swein
muot sterke, dar zuo maht.
der eine in müeden kreften vaht,
der ander in des tôdes nôt,
wan dem nâhete der tôt.
sîn kraft begunde touben,
der tôt begunde in rouben
muotes sinne krefte gar,
er wart bleich und tôtvar
von âmaht. er wolde dan.
erîgûus der werde man
den helt sô sêre erschalte
daz er in tôten valte
von dem ors ûf den sant.
erîgûus der wîgant
ze sâtibarzânes sich bôt,
daz er saehe ob er waer tôt.
daz wart im kunt, er vant den man
tôten lign. dô kerter an
und iesch als ê was ûf geleit,
von sînen rotten sicherheit.
sie sprâchen< lieber herre mîn,
daz tuon wir gerne, daz sol sîn.
dû solt von uns sîn gewert
alles des dîn herze gert.
lîp guot hêrschaft lant,
swaz ê diende sîner hant,
daz sol dich nû ze herren hân,
dir iemer wesen undertân.>
der rede was der vürste vrô.
dem küng enbôt er sî aldô,
der vröute sich noch mêre
dan dem geschach diu êre.
jener vürste was begrabn.
gen bactrâ hâten sich erhabn
die vürsten mit werlîchen sitn,
die im diz guot, die êre erstritn
und die vil hôhen werdekeit.
nû dem künge wart geseit
ir kunft, er wart von herzen vrô,
vil vroelîche enphienc ers dô
und lêch erîgûô daz lant
daz im erstreit sîn werdiu hant.
der alte artâbâzus was dâ,
deme lêch der künec sâ
mit krône küneclîche
bactrîân daz rîche.
den zwein machter undertân
daz rîche lant ze spartân.
bessus entrunnen was
in sogdîân als ich ez las,
und wânde sich enthalten dâ.
der künc bereite sich dô sâ
mit sîner ellenthafter wer.
dô machete sich ûf daz her
und vuor gein der muntânje
in die wilden sûsitânje.
dâ tet in durst und hitze wê
und sô wê daz in dâ vor ê
nie wirser ûf al der vart
von deheinen noeten wart.
sie wâren brâht in grôze unmaht,
wan daz mit küele sie diu naht
mit senften touwen brâhte widr.
dô sie sich hâten lâzen nidr,
die naht was in wol biz vruo
daz der tac in nâhte zuo
und diu hitze wuohs als ê,
dô wart in abr von hitze wê.
die stolzen helde wîse
an trinkenn und an spîse
grôzen zadel dolten,
swaz trinkennes sie holten,
vûl wazzer öl und wîn,
daz muoste in allez süeze sîn
und alsô guotez dunken
daz sie es sô vil getrunken
daz sies behaben mohten niht,
als ez dicke noch geschiht,
und denne lâgen dâ vür tôt.
dô der künec sach die nôt,
er wart sorgen rîche
und trûrte herzeclîche.
dô er alsô angesthaft
was umb sîne ritterschaft,
dô bâten in des sîne man
daz er mit dem her von dan
vüer ûz dem wilden lande,
wan in dem dürren sande
niemen dehein wazzer vant.
dô was sîn marschalc vür gesant
daz er herberge vienge sâ,
swaz in beste dûhte dâ.
der hâte herberge genomn
an ein wazzer was er komn,
daz was oxus genant
und gât vür sogdîân daz lant.
zwêne die mit im aldar
vuoren in der selben schar
die hâten an den stunden
vrischez wazzer vunden
und zwei barel gevüllet wol
daz sie beide wâren vol
und strichen mite gegen dem her.
wol bereit ze mannes wer
sâhens alexandern dar
rîten verre vor der schar.
der vrâgte sie der maere sâ
und waz sie bî in trüegen dâ.
dô seitens im diu maere
wâ der marschalc waere
und daz sie trüegen brunnen.
< wâ hât ir den gewunnen?>
sie sprâchen< lieber herre,
deist in der mâze verre
daz dû ze naht und dîne schar
komt ze herbergen dar.> -
< wem hât ir daz wazzer brâht?> -
< herre mîn, wir hâns gedâht
zwein unsern kinden
ob wir sie lebende vinden,
diu diute mit manlîchen sitn
mit dir gewâfent sint geritn
und gebens ouch mit willen dir
ob dû wilt>. -< sô gebt ouch mir!>
der bete was ir wille snel.
dô nam der eine daz barel
und ein köphel daz er truoc
von maser schoene und guot genuoc,
daz vüllet er und bôt ez im,
er sprach< herre mîn, nû nim
und trinc! tuo dirz alsô wol
sô unser muot dirs gunnen sol,
sô weiz ich rehte daz dir niht
leides nû hie von geschiht.>
dô der edel wîgant
genam daz trinken in die hant,
swie er von durst ungemach
lite, zühteclîche er sprach
< ich wil iu benamen sagn,
ich mac niemer mê vertragn
daz ich ez trink eine.
sô ist ez ouch sô kleine
daz ich ez mac geteilen niht
den die man ouch mit kumber siht:
durch daz wil ich erwinden.
bringet iuwern kinden
den brunnen, ir hât mir sô wol
getân daz ich iu lônen sol
iemer mê des muotes
als êren und guotes.> -
< herre, trinc! wir hân sîn vil!>
er sprach< benamen, ich enwil.
îlet helfen in von nôt!>
sie tâten als er in gebôt
und gâhten an den stunden
dâ sie ir süne vunden
und hulfen in von durstes nôt,
sie waeren anders schiere tôt.
sus vuor daz her vür sich den tac.
ein hôher berc vor in lac
dar übr diu lantstrâze gie.
die niht gevolgen mohten, die
hiez der künc belîben sâ
ûf dem selben berge dâ.
den die krefte tohten
daz sie gevolgen mohten
die hiez er mit im gâhen.
alsus begunde er nâhen
dâ oxus daz wazzer grôz
durch daz selbe rîche vlôz,
dâ herberg im gevangen was.
der marschalc attarras
hât an den selben stunden
in dem lande vunden
sô vil spîse daz die schar
genuoc hâten spîse gar,
diu ir generte mangen sît.
daz was vil bî umb vesperzît,
daz der âbent nâhte.
der rîche degen gâhte
in dem her vür und widr
und hiez dâ sie sich liezen nidr
daz man in schüefe guot gemach
mit rîcher spîse. daz geschach.
der edel tugent rîche man
vuorte noch den harnasch an
als er geriten was den tac.
deheiner ruowe er nie gephlac
ê daz er der unmügenden schar
ûf den berc besante aldar
spîse wazzers wînes vil,
sô vil daz sie in kurzem zil
kâmen wider an ir maht.
den tac was er unz an die naht
daz er nie nihtes enbeiz,
deheiner ruow er sich vleiz
sînem lîbe - als ich ez las -
ê daz vil gar geschicket was
sîn wahte und sînes hers gemach.
dô man den tac verenden sach,
dô was sîn ezzen êrst bereit,
er âz. nâch sîner arbeit
slief er mit ruowe unz an den tac.
an der herberge dâ er lac,
wold er den tac dô stille
lign. daz was sîn wille.
zuo zim gesamenten sich gar
an die herberge sîne schar
und liezen sich dâ bî im nidr
biz sie ze kreften kâmen widr
und des ouch vergâzen gar
ob in dâ vor iht arges war,
daz waz ûzerhalp ir klage.
dar nâch an dem andern tage
was des hers ein teil gesant
den phlûm ze berge ûf in daz lant.
dâ vundens âne huote
gewinnes vil an guote
und grôzer schiffe ein michel teil
verborgen, des sie wurden geil.
diz brâhten sie dem künge dô,
der was ir kunft von herzen vrô,
diu schif ervröuten im den muot
noch vürbaz dan daz grôze guot,
wan sie vil liute mohten tragn.
innewendec sehs tagn
was daz her gar überkomn,
als ich die wârheit hân vernomn,
in daz lant ze sûsîân.
dâ wart im schier undertân
guot liute und ouch daz lant
antwurte sich im sâ zehant.
dô bessus diu maer vernam
daz alexander dô kam
und daz in sô kurzen tagn
was sâtibarzânes erslagn
und daz des edeln künges schar
was komen übr daz wazzer dar
und daz im dô undertân
was daz lant ze sûsîân,
der maere er alsô sêre erschrac
daz er deheiner vröuden phlac
wan als ein gar verdorben man,
der nie hôhen muot gewan
und lîhte ist schuldec etewes,
eintweder diss oder des
daz mit untriuwen ist geschehn,
und sich lât ungerne sehn
dâ man gedenket der getât,
die sîn valsch begangen hât.
untriuwe ist âne triuwe niht
in eine wîs: swaz man ir siht
dienen daz ist niht verlorn.
swer ir ze dienest ist geborn,
dem lônt si willeclîche,
si ist lônes alsô rîche
daz si wol iegelîchem man
nâch sînem borge gelten kan.
swer ir willen gerne tuot
und ir treit getriuwen muot,
dem lônt si mit ir selber ie.
daz reht gebrach si noch nie,
als ez ein alt gesprochen wort
bewaeret hât, daz sprichet dort
< untriuwe manecvalt
diu mac niemer werden alt,
sol si aber werden alt,
si ist zuo dem tôde gezalt.>
als selbe ouch dô geschach.
bessen der sîne triuwe brach
an sînem rehten herren,
dem woldez êrst nû werren.
wie? - nû hoeret rehte wie
er der untriuwen lôn enphie!
ein sîn vriunt was bî im dô,
der zweier liebe was alsô
daz sie gar in ir jâren
vil ungescheiden wâren
triuwen und muotes,
lîbes und guotes,
der was spitâmenes genant.
dô der von wârheit bevant
daz alexander komen was,
in sîn gemüete er ofte las
wie er gedienet etewaz
alexander umbe daz
er im genaedec waere.
er dâhte< im ist unmaere
untriuw und hazzet die:
nû wart dehein untriuwe nie
groezer her an dise vrist
dan der bessus schuldec ist.
gevâhe ich den, ich gibe in ime,
sô weiz ich wol daz ich nime
solhen lôn den er mir gît,
daz ich alle mîne zît
mit saelden iemer mêre
hân beide guot und êre>.
in den selben zîten dô
spitâmenes daz mort alsô
ze rechenne gedâhte,
als er sît volbrâhte,
dô enwesser wen er solde hân
an den er sich getorste lân
wan zwêne den er sâ zestunt
tet den selben willen kunt.
der hiez einer catênes
der ander dâtaphernes.
die sprâchen dô< nû helfen wir
mit willeclîchem muote dir
alsô guot hergesellen,
wan daz wir niht wellen
brechen unser triuwe kraft
durch nie mans geselleschaft.>
er sprach< darumbe lât iu sagn:
an dem ungetriuwen zagn
niemen untriuwe begât,
wan er deheine triuwe hât.
ir sült wol gelouben daz
ich durch deheiner slahte haz
niemer diz getaete,
waer er getriuwe und staete.>
ir ahte lobeten im dô
ze helfenne. des was er vrô.
sie sprâchen< nû soltû uns jehn,
wie mac mit vuoge diz geschehn?> -
< daz kan ich gevüegen wol,
swie ez sich wol gevüegen sol
und gevuoclîche ergân.
ich rîte mit im ûf den plân,
ich wil iuch dô verleiden,
ich sage im von iu beiden
daz ir in welt vâhen,
sô heizt er denne gâhen
und besendet iuch zehant.
sô sült ir sehse sîn gemant
daz iu des sî mit triuwen gâch
daz ir in balde strîchet nâch
mit allen die hie mit iu sîn
und mit mir in der reise mîn
gewâfent wol. des lât ir niht!
als er iuch zwêne gesiht,
sô heizet er iuch vâhen,
sô sült ir nâch uns gâhen
und ist iu ein gevüegez wort,
( wan ir iuwer mâge dort
die iu sint von herzen liep,
vüeren seht als einen diep)
ob ir den von ir noeten hin
helfet: alsô sül wir in
vâhen und twingen
und alexander bringen.
sô rîchet er uns iemer
und verlât uns niemer>.
daz lobten sie mit eiden sâ
gelîch in einem muote dâ.
dô der ander morgen schein,
dô wart spitâmenes enein
daz er mit dem vürsten reit
ze velde, als ez was ûf geleit,
und saget im daz catênes
und ouch dâtaphernes
ûf in haeten dô gesworn.
dô begreif in solher zorn
daz er sîn selbes gar vergaz,
nâch in sant er durch sînen haz.
dô die sehse vernâmen
daz nâch in boten kâmen,
sie wâfenten sich sâ zehant
daz ez nie man bevant,
und vuorten eine grôze schar
vil wol bereit nâch in aldar.
jene wârn gevangen,
ez was rehte ergangen
als er sie dâ vor lêrte:
dô er wider kêrte
gegen der stat, dô kâmen sie
mit grimmeclîchem muote hie
und vrâgeten der maere
waz diser rede waere.
dô sagte man in âne wân
als ich hie gesaget hân.
sie sprâchen< daz mac niht geschehn,
sül wir unser mâge sehn
alsô gevangen vüeren hin
ûf des tôdes ungewin,
sô müezen sie uns lâzen
hie ûf dirre strâzen
odr sie ligen von uns tôt!>
...