DBE.txt

ein man sprach wider sin wip:
< du bist mir liep als der lip.
zeware, wærestu mir
so reht holt als ich dir,
daz næme ich fur der chriechen golt
du mohtest mir nimmer so holt
werden, als ich dir bin.
mir ist daz herce und der sin
so sere an dich geslagen,
daz ich dirz nimmer chan gesagen.>
si sprach:< daz la werden schin!
ich tet durch den willen din,
swes du mich ie gebæte,
und bin daran iemer stæte.>
< tu ein dinch, des ich dich bit!
des war, da wirbestu mit,
sin si wenic oder vil,
daz ich iemer allez daz tun wil,
des du gesinnest ane mich,
und wil des inne bringen dich,
daz du noch lieber bist mir
tousentstunt denne ich dir.>
er sprach:< nu sage, waz ist daz?
daz tun ich michel fur baz,
denne du sin iemer gegerst,
dar umbe, daz du mich gwerst,
daz du also sere minnest mich
mit triwen, als ich minne dich.>
si sprach:< da geloube mir,
min trut, swaz ich gesage dir!
ez muot ein igelich wip
und get ir reht anden lip,
swaz si geseit ir man,
daz er des niht gelouben chan.
uns entut chein dinch so we.>
er sprach:< enist des niht me,
des du mich bitest?> si sprach:< nein.>
er sprach:< daz wære ein mort und mein,
wære ich dir niht des bereit.
ich wil dir swern einen eit,
wan du mir so wol behagest,
swaz so du mir gesagest,
daz ich daz allez gelouben wil,
sin si wenich ode vil,
so du mich minnest als ich dich,
daz du nimmer betriugest mich.>
als er der rede vol fur
und er ir den eit geswur,
zehant gedaht si daran:
< wie versuche ich, ob min man
gelouben welle, daz ich im sage?>
ez was an einem mitten tage.
si sprach:< geselle, iz ist naht,
ich han uns zezzen maht.
wir suln ezzen und slaffen gan.>
er sprach:< wie hastu so getan?
ez ist noch choume mitter tach.>
< daz ich din îe so wol gephlach,>
sprach daz wip,< daz ist mir leit.
nu hore ich des die warheit,
daz der manne triwe boes ist,
sit du mein eide worden bist
inso churzer wile wider mich.
ich wolde und han versucht dich,
ob din triwe und dein eit
heten deheine stæticheit.
nu sihe ich und hore wol,
daz ich dich iemer haben sol
fur ein triweloeses vaz.
waz hete dir geworn daz,
do ich dir seit, iz wære naht,
hetestu dich warhaft gemaht
und hetest gesprochen: « ez ist war »?
ich han mer denne ein halp iar
noch baz gehandelt dinen lip,
denne ie noch dehein wip
ir manne getæte.
nu ist diu triwe unstæte.
des scheidet sich diu freuntschaft nu.
ich sach ez als wol als du,
daz ez chume mitte tach ist,
wan daz ichz tet durch den list,
daz ich dich damit erfur.>
vil sere si bi ir libe swur,
ern engwnne ir hulde nimmer me.
diu dro tet im also we,
daz er vil chume genas,
wan im daz wip so liep was.
daz wort er trourechlichen sprach:
< owe, daz ez mir ie geschach!
daz mueze got erbarmen!
des was mir werlt armen
vergezen, sam mir min lip.>
do chniet er nider fur daz wip.
er sprach:< liebiu vrowe suzze,
gunne mir, daz ich iz buzze
und daz ich iz nimmer mer getu!
ich wil dir geloben dar zu,
geschehe ez mir iht me,
daz ez iemer ungesunt ste.>
si sprach:< so wil ichz varn lan.
du solt daz vil gwis han,
ez muot mich nu so sere,
getust duz iemer mere,
so ist diu friuntschaft da hin,
und chumst nimmer me, da ih bin.>
do was er vro, daz dei den zorn
so schire hete verchorn.
dar nach wol in zwelf tagen,
do begunde si im aber sagen
ein glogen mære umbe daz,
daz si in wolde versuchen baz.
si duhte an disem mære,
daz si sin meister wære.
des wart si stolz und balt.
si macht ein vol bat - de was chalt -
und sprach:< giench in! iz ist warm.>
nu was er des mutes so arm,
daz er da wider niht ensprach,
wan er sich des versach,
daz er ir hulde verlur.
swie sere in in dem bade frur,
er sprach doch:< ez ist warm gnuch.>
wan er daz so wol vertruch,
des wart ir herce vreuden vol.
sit erbote si imz zwir als wol,
sam si da vor ê tæte,
und beleip dar an so stæte,
daz si in ir mahte so holt.
hete si gesprochen:< diu erde ist golt,>
er hete gesprochen:< iz ist war.>
daz tet si aber ein halp iar.
nu was ein phaffe in der stat,
der si des libes diche bat,
swenne ers gefugen chunde.
daz treip er unz an die stunde,
daz si in minnen began.
eines tages sach si ir man
von im uz ir stadel gan.
er sprach:< daz ist missetan,
daz du dem phaffen so heimlich bist.>
si sprach:< du liugest, wizze christ!
daz ich dir so holt bin,
daz muot aber dinen sin.
ez wart nie wip, geloube mir,
ir manne holder danne ich dir.
wil du des gelouben niht
und sprichest du da wider iht,
ich tun dir solhen zorn schin,
daz wir gescheiden iemer sin.
swaz ich gespriche und began,
wil du daz niht furgut han,
daz solt du balde sagen mir,
so wil ich scheiden von dir.>
er sprach:< iz ist allez gut,
swaz din reiner lip getut.
diniu wort, diu sint elliu war;
und soldestu leben tousent iar,
ich gezihe dich nimmer nihtes me.>
do tet si im aber baz denne ê.
si botez im wol und den noch baz.
so lange bezzert si daz,
unz si in dar zu brahte,
daz er ze allen ziten dahte:
< ich han daz allerbeste wip,
diu ie gewan wibes lip.>
do wart ez so geschaffen,
daz si den selben phaffen
so sere minnen began,
daz ir erleidet der rehte man.
daz tet si schin, ich sag iu wie:
eines tages von aker gie,
do begunde si in an sehen.
si sprach:< waz ist dir geschehen?
daz ich min leben ie gwan!>
< waz meinestu, libe?> sprach der man.
si sprach:< da bistu garwe
tot an diner varwe.
dir wil des todes smerze
iezu gen an din herze.
dane ist leider niht wider.
ginch an din bette und lege dich nider!
we mir! du wil sterben.
la mich dirn phaffen erwerben,
daz er dir die sele bewar!>
do braht si den phaffen dar
und hiez in sprechen sin bihte.
des erbat si in vil lihte:
er wolt an allen dingen
ir willen vol bringen.
des twanc in zweier hande not:
daz si imz so wol bot
und ouch, daz nie dehein man
ein wip so rehte liep gwan.
do si sin bihte vernamen
und er gotes lichnamen
zu dem tode genam,
und der phaffe danne quam,
do gap si im an sine hant
ein chercen - deu was schon enbrant -
und tet im diu ougen zuo.
si sprach:< lieber man, nu tuo
sam die ouch sint in dirre not,
wan, lieber man, du bist tot!
dune solt dich nimmer me geregen.>
si begunde in uf die bar legen.
do braht si vil schir dar;
do chomen ir geburen gar.
die naht si im wahte,
unz sich der tach uf mahte.
zu der chirchen man in truch.
do roufte si sich und sluch.
si gie im weinunde mit
und hete chlæglich sit.
die sele messe man im sanch;
die wart iedoch niht zelanch.
dar narch truc man in zegrabe.
si chomen sin beide gern abe,
daz wip und ouch der phaffe.
danne och wande der affe,
si versuhte in aber also
und wolde dar nach in machen vro.
dar wold er vil gwis han.
so lange het er den wan,
unz man in in daz grab hup
und in vil balde begrup.
do ez im an die rehten not gie,
do rief er an alle die,
die umbe daz grap warn.
er begunde so gebarn,
als den da dwinget der tot.
der phaffe in allen gebot,
daz si den segen fur sich tæten
und got vil tiur bæten,
daz er den tievel da vertribe,
daz er iht lenger belibe
bi dem armen lichnamen.
< daz werde war! amen,>
sprach da man und wip.
also verloser sinen lip.
swaz er gerief und gechrei,
so sprachen doch disiu zwei,
diu da westen diu mære,
daz ez der tievel wære,
und liezen in niht uz graben.
den schaden muse er des habn,
daz er satzte ein tumbez wip
zemeister uber sinen lip.