DES2.txt

ein konkavelit
czu eyner schüssel man sal nemen ein pfunt mandels
vnd sol mit win die milch uß stossen
vnd kirsen ein pfund vnd sla die durch ein syp
vnd thu die kirsen in die milch vnd nym ein virdung ryßes
den sal man stossen zcu mele vnd thu das in die milch
vnd nym den ein reyn smalcz oder speck
vnd smelcze das in eyner pfanne vnd thu darzcu ein halbe marck wises zuckes
vnd versalcz es nicht vnd gibes hin von eyner hirczleber
eyn hirczleber sal man braten uff eynem roste
die man lange behalten wil
vnd sol die dünne snyden zcu schiben vnd nym eynen reynen honigsam
den sw de
vnd nym denn ingeber galgan vnd negellein
die stoß vnter einander
vnd wirff sie darein
vnd nym denn ein faß oder ein schaff darein du es wilt thun
vnd wasch es gar reyn
vnd geuß es darein ein geschicht honigs
vnd leg denn ein schicht lebern
vnd also ein schicht uff die andern
vnd leg es faste uff ein ander
vnd setze das hin eyn plamensir
eynen plamensir
ßo sol man nemen tzygen milch
vnd mache mandels ein halp pfunt
eynen virdung ryses den stoß zcu mele
vnd thu das in die milch kalt
vnd nym eynes hunes brust die sal man zeysen
vnd sal die hacken darein
vnd sol es dar innen siden
vnd gibs im gennug vnd thu es her abe von dem fwer
vnd nym gestossen vyol vnd wirff den darein
vnd eynen virdung zuckers thu man dar ein
vnd gibs hin
alßo mag man auch in der fasten machen eynen plamenser von eym hechte hüner von krichen
man sal hünre braten
vnd nym sweines fleisch gesoten vnd gehackt vntereinander
vnd nym eynen virdung rosen darzcu
vnd nym ingwer
vnd pfeffer
vnd nym win oder essig
vnd zucker oder honig
vnd sewde darzcu sammen
vnd versalcz es nicht
vnd gibs hin von eynem ryß von krichen
dyß heyst ein ryß von krichen
du salt ryß nemen
vnd sewde es in eynem brunne wasser zcu halben wege
szo geuß das wasser abe
vnd sewde es denn in eynem reynen smalcz
vnd geuß das smalcz denn her abe
vnd eynen zucker thu dar uff
vnd versalcz es nicht
vnd gibs hin heydenisch kuchen
man sal nemen eynen teyck
vnd sol den dünne braten
vnd nym ein gesoten fleisch vnd speck
gehackt
vnd oppfel
vnd pfeffer
vnd eyer darein
vnd back das
vnd gibs hin hirn gebraten
diß ist ein cluge spise nym ein hyrn mel öppfel
vnd eyer
vnd menge das mit würczen
vnd strich es an eynen spiß
vnd brat es schöne
vnd gibs hin
das heisset ein hirn gebraten
das selbe thut man eyner lungen die da gesoten ist diß sint haselhüner
haselhünre von frisental mach also man sal nemen reyneuan
peterlin vnd salbey vnter ein ander
vnd ein wenig brotes geriben darzcu
vnd wurcze
vnd eyer
vnd ryb das mit win
vnd süde das wol vnter einander
vnd gibs hin ein gefüllet ferhelin
ein gebraten gefüllet ferhelin mach also
nym ein ferhelin das dryer wochen alt sy
vnd brüe das küle
vnd czühe im das hare alles abe
vnd zcu snyd die hut nicht so sal man im vmb den rans die hut lassen
vnd löse beyde gepein vnd fleisch abe
vnd alles das es in dem libe hat an die kloen die es nyden an den fussen hat
vnd nym des fleischs das daruß geczogen ist wol als czwey eyer
vnd seude es vil noch gare
vnd nym dann das
vnd speck
vnd hack es vnter einander vnd thu rowe eyer darzcu
vnd eynen snyten brots vnd peterlin krut
vnd salcz es zcu massen
vnd fülle damit das ferhelin nicht alczuuol
vnd forne den munt vnd legs sanffte in eynen kessel
laß es erwallen das die hute ich zcu breche
so nym es denn
vnd leg es uff eynen hülczen rost
vnd brate es sanffte
als es denn wol geröst sy
ßo nym ein bret vnd leg es daruff in ein schüssel
mache uff das bret vir stecklin
vnd cleyde das pret mit eynem blöt von eyernn
vnd secz das fercklin dar uff
cleide es auch mit eynem blot
vnd laß im die oren vnd den rüßel heruß geen ein cluge spise von pflumen
man sal nemen krichen als sy czytig sint
vnd thu die in eynen erin hafen
vnd guß daruff win oder wasser das sie wol zcu keynen
vnd laß sie syden
vnd zcu stoß sie denn das die keren nicht zcu brechen vnd slahe die durch ein syp
vnd thu eynen snyten schönes brots darzcu
vnd win oder wasser
vnd güß es zcu dem muß mit trucken gestossene krute
alßo macht du auch wol machen kirschen muß oder spiling muß ein spise von biren
nym gebraten biren
vnd sawer öppfel vnd hack sie kleyn
vnd thu darczu pfeffer
vnd enis
vnd röe eyer snyt tzwo dunne schiben von schönem brot
fülle diz da czwischen nicht follen eyns fingers dick
mach ein dünnes blat von eyernn
vnd kere das eynis dar innen vm vnd back es mit buttern in eyner pfanne biß das es rot werde eyn gut spise von hünern
eyn gebraten hun zcu liede cleine
nym weisses brot
mache eynen dünnen eyerteick saffran
vnd pfeffer stos
vnd thu das zcu samme
vnd menge es wol in eynem faß
vnd nym eynen mörser mit frischem smalcze
vnd stoß diß allzcumal
vnd ebenes oben mit eyner kellen
vnd deck es mit eyner schüsseln
vnd kere den mörser dick vm gein dem fewer
das es gleich heyß habe
vnd weich bleibe als er hart werde ßo seyge denn abe das smalcz
vnd schüt das hun in ein schüssel vnd gib es hin eyn gut fülle
wiltu machen ein spise
besnyde biren schone
vnd spalt die in virteil
vnd leg sie in eynen hafen
vnd bedeck den hafen
vnd becleibe is mit teyge
das der bradem icht uß müge denne bestürcze den hafen mit eyner wyten stürczen vnd lege darümb glüende kolen
vnd laß es langsam backenn szo nym denn die byren heruß
vnd thu reynes honig dar zcu
als vil
als der piren ist
vnd sewde es mit einander das es dick werde
vnd gibs hin alßo macht du auch von öppfel vnd von kütten machen aber man sal pfeffers genug darzcu thun ein gefülten kuchen
czu gefülten kuchen nym des dobriz vnd zcu slahe den mit eyern
vnd thu darzcu ein wenig brotes oder gestossenne vische
oder das dicke von eyner mandel milch hiuon mag man machen mit gutem krute kuchen oder was man wil von gemüße
von pasteden
wilt du machen pasteden von vischen so
schuope die vische vnd zuohe in abe die hut swenne sie erwallen
vnd hau sie zuo cleinen stücken. hacke peterlin vnd salbey
dor in vnd tuo dar zuo pfeffer vnd yngeber zimemin vnd saffran.
temper ez allez mit wine vnd mache einen duennen derben teyc vnd
tuo die vische dor in vnd guiz den win. dor vf vnd
decke ez mit eyme duennen teyge vnd mache daz vmme vnd vm. gazt
vnd brich oben ein loch dor in vnd lege da fuer ein cluesterlin
von teyge vnd laz es backen.
also mac man auch huenre machen auch
fleisch oder wiltprete oder ele oder voegele. ein gericht von lebern man sal nemen ein lebern
vnd herte eyer
die sol man stossen in eynem mörser
vnd das sal man mengen mit lutterm trangk oder mit wine oder essig
vnd sal es malen in eyner senffmüle
vnd nym czwiboln die soltu syden mit smalcze oder mit öle
das sal man gyssen über fisch oder vber wilprecht
nach dirre wise magstu vil anders dinges machen gefülte hechte
gefulte hechte sal man also machen
man nem gefüge hechte
vnd schuppe die
vnd löß in abe den darm zcu den oren uß
nym vische welcherley sy sein
vnd swde sie vnd thu die greth da von
stoß sie in eynem mörser hack darzcu salbey pfeffer kümel
vnd saffran gestossen
salcz sie zcu massen da mit fulle man die hechte
vnd sprenge sie vsßen mit salcz
back in uff eynem hulczin rost
vnd brat in gar schön also maht du in auch machen mit eyernn frisch ele
nim frische ele
vnd wasche in abe den sleym
mit kalter aschen löse im abe die hüt by dem heübte
vnd czüche die nyder biß an den czagel
hack salbey
vnd pertersilgen vnd thu darzcu gestossen ingwer pfeffer enys
vnd salcz zcu massen wirff uff die ele
vnd czühe die hut wider über
besprenge die ele ussen mit salcze
vnd brat sie gar uff eynem hülczin rost
vnd gib sie hin ein spise von eynem lachse nim einen lachse
vnd schabe im abe die schuppen
spalde in vnd sneit in an stücke
hacke peterlin salbey
nym gestossen ingwer
pfeffer
enys
salcz zcu massen
mach eynen derben teyck nach der grosse der stücke
vnd wirff das krut uff die stucke
vnd bewircke sie mit dem teyge
kanstu sie gestempfen in ein forme das thu also magstu machen hechte forhelen brasmen
vnd back itlichs besundern in synem teige ist es aber ein fleisch tag
ßo magstu machen hünre
rephünre tuben vnd fasand als ob geschriben stet hastu die forme
vnd backe sie in smalcz
oder sewd sie in den obgeschriben formen
nym von den hünren die brüste
vnd ander gut fleisch
ßo wirt die kunst dester besser
vnd versalcz nicht von stockfische nim eynen stockfische der nicht garstig sy
thu im die hut abe
weich in in kaltem wasser ein nacht
vnd nym in dann heruß
vnd drucke in in essig also das er blibe gancz
binde in uff czwu schinen
vnd leg in uff eynen hülzin rost
strich das füer darvnter allenthalben das er erwarme
laß in wol belauffen mit buttern darnach mach eynen schönen teyg mit weissem melbe
vnd mit eyernn
darzcu thu gestossen pfeffer
oder ingeber
vnd ein wenig saffrans
salcz zcu massen
sprenges uff den visch
als der visch gar heyß sy
szo slahe den teygk daruff mit eynem swancke riche faste kolen darunter
das es rot werde
also thu das ee du in abe nemest
vnd betreüffen wirst mit buttern
vnd gib in hin ein gut spise nim gesoten swinsdarm vnd den magen
snyd die gesoten darm in vier teyl die lenge
vnd die cleynen darnach
vnd snyde die gefüge als die rymen
vnd den magen snyde auch smal
vnd snit denn beide magen vnd darm ytweders über twerhes so du kleynst wilt
nym petersilien poley vnd myntzen salbey gesoten eyer herte
vnd schon brot kümels allermeist vnd ein wenig pfeffers
vnd ein ey zcu der schüsseln idesmal mit essige
vnd mit gutem sode
alßo das es nicht zcu swer werde
vnd güß es uff die kaldiment
vnd thu smalcz darzcu laß es erwarmen vncz es dick werde
gibs hin vnd versalcz es nicht eyn gut spise
nim dry gesotene smale swins derme
nym darzcu smalczes von flemen
das thu die weil es vngesoten ist
als lang
vnd groß als die darm sint bind das zcu samne slahe zcwey eyer darzcu vnd nym ein wenig schönes brotes
vnd pfeffer vnd salcz zcu maße in dem condimente
erwelle die derme
vnd fülle sie mit dem condiment
vnd stecke sie in eynen grossen darm
vnd verbinde beyde den ynnern
vnd vssern darme an beden enden besundern teyl das condiment glich in die derme
süt sie gar vnd gib sie hin heiß von morchen
nim von der brust von eynem hun
vnd hack die klein vnd stoß sie in eynem mörser
vnd thu darzcu ein wenig melbes
vnd grobes brotes
pfeffer oder ingeber salcz zcu massen
ein ey oder czwey
nach der menge
röste das wol zcu sammen
snyt czwei klüppelin eyns fingers lang als ein ellen schafft fornen slecht sinwel
vnd nym des gesoten als groß als ein morche
walckes sinwel in der hant vnd füge es vmb den spiß
als ein morch
vnd czwenge es vssene
das es krusp sÿ leg es in eynen pfannen
laß es siden mit dem stecken
vnd die weil das siede
ßo bewircke den andern stecken
vnd als du den eynen uß nymest
ßo leg den andern ein
vnd mach ir als vil du wilt
wanne sie gar sint gesoten
ßo nym sie uß
rür ein gehacktes muß mit buttern das fülle in die morchen
vnd steck sie wider an den spiß mach sie heiß
vnd betrauff sie mit buttern vnd gib sie hin also magstu auch machen morchen von hechten
vnd von andern vischen daz ist auch guot.
nim mandelkern mache daz in siedeme wazzer
stoz sie vnd twinge sie durch ein tuoch oder mal sie nim schoen
herte brot snit die obersten rinden abe schone vnd duenne snit
dar nach schiben so du duennest muegest daz beginne vnder der
oebersten rinden ieglich schibe sol sin sinewel vuege der
schiben viere zvo sammene vnd snit sie smal als einen riemen vnd
snit sie den twerhes veber so du kleines maht halt
die mandelmich veber daz fiuer laz sie warm werden wirf daz
brot dar in daz sie dicke werde halt sie veber daz viuer laz sie
sieden vnd gibez in die schuezzeln vnde strauwe ein zucker dar
vf daz heizzet caleus vnd gibz hin. also mache auch ander milich
ob tu totern dor zvo tuon wilt. eyn gebraten milch
wiltu machen ein gebraten milch
ßo nym die da nicht feystes zcu sy kommen
vnd die gelebt sy
den hafen zcuslahe das sie sanffte heruß gleite
uff ein büttel tuch
dar ein bewint sye
vnd beswer sie sanffte von erste
vnd darnach baß
laß sie ligen von dem morgen biß hin zcu abent
ßo snyt sie dünne
vnd spiß sie
besprenge sie mit salcz
vnd leg sie uff eynen hülczen rost
vnd laß sie wol rösten
vnd wirff ein wenig pfeffers daruff
vnd betreuff sie mit buttern oder mit smalcz ob es fleischetag sy vnd gib sie hin eyn gut fülle stoß ein gans an eynen spiß
vnd süt das gekroß
nym vir eyer gesoten herte
vnd nym darzcu ein brosen schönes brotes
vnd kümel darzcu vnd ein wenig pfeffers vnd saffrans
vnd nym dry gesoten hunes lebern stoß zcu sammen mit essig
vnd mit hüner sode zcu massen sawer
vnd schele czwiboln vnd snyde sie dünne
vnd thu sie denne in eynen hafen
vnd thu darzcu smalcz oder wasßer vnd laß sie syden
das sie weich werden
vnd nym denn swer öppfel snyt die kern heruß als die czwiboln gar sint gesoten wirff die öppfel darzcu
das es weich bleibe
vnd thu dann das obgeschriben gestossen mit den öppfeln
vnd czwiboln alles in ein pfanne
vnd als die ganß gebraten ist szo zu liede sie
vnd leg sie in ein schon fas
vnd geuß das condiment darüber vnd gibs hin eyn gute getrahte
nym gebraten biren
vnd rohe sawer öppfel
vnd nym vnterwachsen fleisch gesoten
vnd nym pfeffer vnd saffran das stoß zcu samen
vnd mach es weich mit roen eyernn szo mache ein plat von eyern
vnd zcuteyl die fulle daruff
das glich werde
szo wynt das blat zcu sammene vnd mach es naß von eyer teyge
vnd leg es in sydenes smalcz
vnd back es hart szo steck do durch eynen spiß vnd leges zcu dem fewer
vnd beslahes eins mit eyern
vnd eyns mit smalcz alßo lange biß das es singe vnd rot werde
vnd gibs hin eyn gut fülle
nym lampreden
vnd snyt sy an sechs stück
das mittel stücke
mache mynner dann die andern stück
bespreng sie mit salcze
vnd leg sie uff eynen hüczen rost
brat sie gar nym das mittelst stücke
ßo es gar ist gebraten
stoß es in eynem mörser
vnd thu darzcu ein swarcze rinden brotes die weich in essig
vnd thu darzcu gestossen galgan pfeffer vnd ingwer kümel
vnd muschat blumen vnd negellein
wiltu es aber lang behalten
ßo machs scharff mit essige vnd thu ein wenig honigs darvnter vnd süde es vnd leg die lampreden kalt darein nach dir wise magstu machen gebraten newen awgen
oder was du wilt eyn speyß von iungen hünern
diß heyssen königs hüner nim iunge gebratenne hüner hawe die an kleyne stücke
nym frisch eyer vnd zcu slahe die
vnd thu darunter gestossen ingewer vnd ein wenig enyß wol gemenigt
geuß das in eynen schönen mörser der heyß sy
vnd bestreich da mit die gebraten huner
vnd thu sie in den morser
vnd thu auch darzcu saffran
vnd salcz zcu massen
vnd thu den mörser wider zcu dem fewer
vnd laß sie backen gleich heyß mit eyn wenig smalczs
vnd gib sie gancz hin das heyssen königs hünre ein gut lebern nym ein rindes lebern die nicht steynecht sy
vnd snyt die an fünff stück
vnd leg sie uff eynen rost vnd brat sie
vnd als sie sich gesawert hat
ßo wasch sie in eynem warmen wasser oder sode
vnd leg sie wider uff den rost
vnd laß sie gar braten
vnd nym sie denne her abe
vnd laß sie kalt werden
vnd besnyt sie schöne
vnd nym denn ein halp stück
vnd stoß es in eynem mörser mit eyner rynden geröstes brotes
thu pfeffer darzcu vnd ingeber
das es scharff werde
vnd nym ein wenig enys vnd male das mit essig vnd mit honigsam
vnd erwelle es biß es dicke werde
vnd laß es kalt bleiben
vnd leg darein die lebern als vil du wilt
vnd zcu der hochzciit gibs für hirsß lebern
vnd des wildes swines lebern mach auch also
vnd nach dirr meynung erdencke auch andere spise eyn gut spise nim hunre die brat nicht follen gar
entliede sie zcu stücken
vnd laß sie syden in smalcz vnd wasser
vnd nym ein rinden brotes vnd ingeber
vnd ein wenig pfeffers
vnd enys das male mit essige vnd mit demselbigen sodichin
vnd nym vir gebraten küten
vnd das condiment thu zcu den hunern laß es wol da mit sieden
das es werde eben dicke
hastu nicht küten
ßo nym gebraten biren
vnd mach es da mit
vnd gibs hin eyn spise von bonen
sewde grüne bonen biß das sie weich werden
szo nym denn schön brot
vnd ein wenig pfeffers
dristund als vil kumels mit essige
vnd mit bire
male das zcu sammen vnd thu dar zcu saffran
vnd seige ab das sode
vnd geuß daruff das gemacht
vnd salcz es zcu massen
vnd laß es erwallen in dem condiment
vnd gibs hin ein condiment von knoblauch reyb knoblauch mit salcz
die haubt schele schön
vnd menge sechs eyer dar zcu
on das wisse
vnd nym essig vnd nym eyn wenig wassers darzcu
vnd machs nicht zcu sawer
vnd laß das erwallen
das es dick bleibe
da mit mag man auch machen gebraten hüner
morchen
oder swammen oder was du wilt agrest nim wintrübel
vnd stoß sawer öppfel
diß thu zcu sammen
menge es mit win
vnd drücke es uß
diße sals ist gut zcu scheffin braten vnd zcu hünern
vnd zcu fischen aber ein condiment
nim aschlauch vnd schelin vnd reyb in mit salcze vnd menge in mit win oder mit essig
vnd druckes vß
dise salbe ist gut zcu rinderm braten ein salse
das sammen drucke es
fur ein gute ein
das zcu sammen
vnd druck es uß
das es grün var werde das heyst auch agram von eynem hechte
nim eynen frischen hechte
vnd löß abe die hawt
als gancz
vnd sewde in gar
vnd löße uß die gret
vnd nym krut vnd stoß das mit dem vische
vnd thu dar zcu rowe eyer vnd saffran
vnd fulle die hute des hechtes vnd röst in eyn wenig
vnd gib in hin von elen gefüllet
nim frische ele züch in ab die hute vnd snid ab das heubt laß sie gar syden vnd thu her uß die grete
stoß eyer kraüt vnd schön brot
vnd mit dem ale
hacke salbey darzcu
fülle die hut vnd brat in
vnd füge das haubt zcu dem ale
cleide in mit eynem dünnen teyge
vnd ein blat von eyern
vnd röst in wol vnd gib in hin von stockfischen
nim eynen stockfisch der nicht dürr sy
vnd thu im die haüt abe
weich in in kaldem wasser ein nacht
drücke in in essig das er gancz blibe
bind in die lenge uff zcwen schynen
vnd leg in uff eynen hulczin rost
mach in warm
vnd betrewff in mit buttern
mache eynen teyck von mele vnd von eyern
dar zcu thu gestossen pfeffer
vnd saffran
vnd salcz zcu massen
als der fisch gar heyß sy ßo slahe den teygk daruff mit eynem swancke
riche fast fewer darunter
vnd laß in werden rot
ee du in von dem fewer nymest
betrauff in mit buttern faste
vnd gib in hin ein fülle
nim mandelkern mach in schön in sidem wasser
vnd wirff sie in kalt wasser
liß die garsten uß
vnd stoß die besten in eyne mörser
als sie veist begynnen zcu werden
ßo sprenge daruff ein kalt wasser
vnd stoß die faste
vnd menge sie mit kaldem wasser eben dicke
vnd ring sie durch ein schön tuch
vnd thu die hülsen wider in den mörser
stoß sie mer
vnd ringe sie gancz uß
vnd die milch schüt in ein pfann vnd halt sie vber das fewer
vnd thu darzcu ein eyer schalen vol wynes vnd rüres wol
vncz das es geside
nym ein schön bütteltuch
vnd legs uff rein stro
vnd guß daruff die milch
biß das sie wol vbersige
was denn uff dem tuch blibe
da von mache einen kese
wiltu buttern dar uß machen
ßo laß ein wenig saffrans do mit erwallen
vnd gibs hin
als buttern oder kese ein getrachte heyst laxis
nim hüner lebern
vnd magen
snyt abe das herte
das gute snyt dünne
mache es gar in smalcz
zcu slahe eyer
vnd thu darzcu pfeffer
vnd kümel
salcz zcu massen mach eynne pfann heyß
vnd veits als man eynen kuchen wölle backen
vnd schüt die eyer darein
vnd rür das alles zcu sammen
das es alles bleibe weich
ßo nym abe die pfann
mach in schön mit eyner schynen
haldes wider über das fewer vnd maches veist
vnd thu das muß gancz in die pfann drücke wol
das es gancz bleibe an eynem stücke
vnd laß es backen
vnd wenn es gar sy gebacken
ßo gibs hin das heist laxis alßo machstu auch machen iunge hünre lampfleisch ßo mans clein sneyt von einer iungen gense nim ein iunge ganß die nicht alt sy
nym uß das kröß
snyt abe die flügele
vnd die diech
steck sie in eynen irdenen hafen der enge sy gewß wasser daruff
das sie betuchte
secz sie uff eynen drefuß
der vnden offen sy
bedecke den hafen
das der bradem icht uß gee
sewde das kröß sunder
vnd salcz die ganß
vnd sewde die ganß in dem sode
biß sie vilnach trucken sy
vnd gar sy gesoten
ßo nym denn süße milch
vnd sechs tottern
vnd tzwey haubt knoblauchs
die groß sint
vnd schele die schöne
vnd stoß die mit ein wenig salczes
vnd menge das mit der milch
vnd mit den tottern
vnd thu auch saffran darzcu
vnd geuß das condiment uff die ganß las sie erwallen vnd gib sie hin eyn cluge spise
wiltu ein cluge spise machen
slahe eynen dünnen teygk von eyern
vnd von schönem melbe
mach das dicke
nym schön brot ryb das
schele sawer öppfel
scharb sie gröber denn speck uff hünre
die menge darzcu
nym eynen löffel
vnd fülle den teyck
vnd teyl es gleich
vnd brat den in smalcz oder in buttern ab es nicht fleisch tag ist
vnd gibs hin ein gut gebackens krepflin
ryb keß menge den mit eyern
vnd scharbe gesoten speck darzcu
mach eynen schönen derben teygk
vnd fülle
denn keß vnd eyer darin
vnd mache kreppflin vnd backe sie in butternn oder in smalcz
vnd gib sie warm hin aber ein gut gericht
nim gesoten erbeiß
vnd slahe sie durch ein sip
slahe als vil eyer darzcu als der erbeys sy
vnd sudes in buttern nicht allzcufeist
laß sie külen
sneyd sie an mürsel
vnd steck sie an eynen spiß brat sie wol
vnd beslahe sie mit eyern vnd mit krawte
vnd gib sie hin ein gericht von eynem hechte
nim einen frischen hechte
vnd loß im abe die hute
vnd swde in gar schön
vnd ließ uß die grete vnd nym die krawt vnd stoß das mit dem fische thu darzcu rohe eyer
vnd saffran
vnd fülle die hute des hechtes wider vnd das hawpt das röst ein wenig vnd gibs hin ein condimente
mal kümel
vnd enys mit pfeffer
vnd mit essige vnd mit honige
vnd machs gel mit saffran
vnd thu darzcu senff in disem condimente machtu sulcze petersilien piren vnd clein kumpost oder ruben was du wilt ein gut salse
nim win vnd honigsam
secze das uff das fewer
vnd laß es siden
vnd thu darzcu gestossen ingeber
mer denn pfeffers
stoß knoblauch doch nicht allzcuuil
vnd machs starck
vnd rür es mit eyner schinen laß es siden biß das es brinnen begynne
diß sal man essen in kaldem wether
vnd heyst swalbenberges salsen von gebraten
man sal ein hun braten
vnd röste ein vmsnyten von eyner semelen
vnd backe diß rot in smalcze
vnd snyt pissen
als zcu eynem brote müß
zcu liede das hun clein
vnd brat sechs piren mach ein condiment von win
vnd von honige
do ryt dein würcze ein pfeffer
vnd anys vnd mach ein plat von fünff eyernn
slach sie in die pfannen
vnd leg denn iens dar in sünderlichen
vnd leg denne das blat zcu samne
vnd deck ein schüssel daruff
vnd kere denn die pfannen vm
snyt oben durch das blat
vnd geuß das condiment darein
vnd begeuß das blat nicht
diß heyssen hünre von ruckawe vnd gibs hin des selben
man sal ein hun braten mit speck gefüllet
vnd snyt denn acht snyten arm ritter
vnd back die in smalcz nicht zcu trüge
vnd schele sawer öppfel
vnd snyt die breyt an schyeben das die kern uß fallen
back sie ein wenig in smalcz szo mach ein groß blat von eyern
das die pfanne alle begreiffe
vnd thu darzcu würcze
ßo leg die ersten geschicht von öppfeln
darnach die arm ritter
darnach das hün das sol clein gelidet sein
thu uff glich geschicht ein wenig würcze
vnd mach ein condiment von win vnd von honige
vnd wurczes nicht alzcu heyß szo lege das blat zcu samne
vnd stürcze ein schüssel daruff
vnd kere die pfann vm
snyt oben ein fenster dar ein
vnd geuß das condiment darein
vnd gibs hin
das heyssen hünre von krichen
der ein gut köcherey machen will
der hack petersilien vnd salbey gleich vil
vnd brate sy in buttern
vnd tufftele eyer weich
vnd menge das zcu sammen
vnd ryb kes vnd brot dar in
vnd mach ein blat von eyern
vnd geuß buttern dar vnter vnd schüte diß daruff
gib im fewer
vnd laß es backen
diß sint russige kuchen ein muß von fischen eyn gebacken muß von fischen
darzcu saltu nemen eynen persich gebeysset in essig
vnd wirff den in milch
die do sy gemachet von mandeln
vnd mit ryß mel
wol gemenget
vnd ein wenig smalczes oder buttern daran gethan
vnd da mit erwellet das ist gar gut
vnd versalczes nicht fladen
eynen fladen gemacht von fischen weyße welherley sie sint
hecht oder perschiche geworffenn in ein dick mandel milch wol gemenget mit ryß mele
vnd eynen appfel darein würfellecht gesnyten
vnd ein wenig smalczes darein gethan
vnd ein wenig würcz gebreytet uff ein blat von teyge gemacht
vnd schuß das in eynen ofen
vnd laß in backen fladen
wiltu machen eynen fladen von fasten gerete szo nym vische
vnd back sie in smalcz
vnd geuß darüber ein dick mandelmilch wol gemenget mit ryß mele
vnd thu ein wenig smalczs daran
vnd menges wol mit würtzen
vnd lege das uff ein blat von teyge
vnd laß backen inn eynem ofen
vnd versalczs nicht krappfen
wiltu machen ein fasten krappfen
von hecht darinen nym ein gute mandelmilch
vnd thu als vil oppfel als der visch ist
vnd snyde die darunter
vnd menges mit ein wenig riß mel das ist gut zcu gefülten krapfen krappfen
wiltu aber ein fast krappfen machen
ßo nym nüß
vnd stoß sie in eynen mörser
vnd nym öppfele als vil
vnd sneid die darein würfflecht
vnd menge sie würczen welherley sie sind
vnd fülle das in die krappfen
vnd leg sie in ein pfann
vnd laß sie backen mit buttern oder ole krappfen
wiltu aber einen vasten krappfen machen von nüssen mit ganczen kern
vnd nym als vil oppfel darunter
vnd snyd die würffellecht
als der kern ist
vnd roste sie wol mit ein wenig honigs
vnd menges mit würczen
vnd thu es uff die bleter
die do gemacht syn zcu krappfen
vnd laß sie backen
vnd versalczs nicht ein gemüse ein fasten muß
nym bersige
vnd dicke mandel milch darunter
vnd sudes wol in der mandel milch
vnd thu denn zucker daruff
das muß sol heyssen von iherusalem
vnd man ysset es kalt oder warm heydenisch erbeyß
nym mandelkeren
vnd stoß die gar clein
vnd menge sie mit drittel als vil honiges
vnd thu darunter gute würcze ßo man sie am besten hat
dise kost isset man kalt oder warm ein müß von lauche
nym weyssen lauch
vnd hack in klein
vnd menge in wol mit guter mandel milch
vnd mit ryß mele vnd wol gesoten
vnd versalczs nicht
aber ein fasten muß gemachet mit mandel milch
vnd wol gemenget mit mandel milch
vnd wol gemenget mit reyß mel
vnd das swde wol vnd versalczs nicht ein colrys
mache von eyern dünne bleter
vnd sneyt die klein
vnd wirff die in süsße milche
vnd nym semel brot
vnd snyt das werffelecht darein
vnd menge es mit eyer tottern vnd süde es wol
vnd thu smalcz daruff
vnd versalcz nicht ein colrys
aber ein colrys nym eyer
vnd zcu slahe die mit semel mel vnd zcu slahe das
dunne kuchen geworffen in ein milch vnd wol gerürt
biß es gesiede
vnd menge es aber mit eyer tottern
vnd thu ein smalcz dar in
vnd gibs hin ein colrys
aber ein colrys
nym dünne kuchen gebacken von eyern vnd snyt die würffelecht
vnd snyt als vil semel brotes darzcu würfflecht
vnd thu es in ein milch
vnd nym eynen appfel
vnd snyt den würfflecht dar in
vnd rür es wol mit eyer tottern
vnd laß es siden wol vnd gibs hin eyn kütenmüß
wiltu machen ein küten muß szo nym kütten wie vil du wilt
vnd süde die gar schöne
vnd nym denne eynen mörser
vnd stoß sie dar innen clein
vnd slahe sie durch ein tuch
vnd nym eyer totter darzcu
vnd sw des do mit vnd thu zucker daruff
vnd versalczs nicht oppfelmuß
nym schön öppfel
schele die
vnd snyd die in ein kalt wasser
vnd süde sie in eynem hafen
vnd menge sie mit win
vnd mit smalcz
vnd zcu slahe rohe eyer gar wol vnd thu das darein
vnd versalcz nicht caleus
nym mandelkern vnd guß sydenes wasser daran
vnd czeüh die schalen herabe
stoß sie vnd twing sie durch ein tuch
oder mal sie
nym schön hertt brot
vnd snyt die öbersten rynden abe schöne dünne
snyt darnach schyben ßo du dünnest magst das begynne
vnder der öbirsten rynden iglich schibe sal sin sinwel
füge der schiben vir zcu sammen vnd snyt sie smal
als eynen rymen
vnd snyt sie denn twerhes über ßo du kleinst magst
halt die mandel milch vber das fwer
laß sie warm werden
wirff das brot dar ein das sie dick werde
halt sie über das fewer
vnd laß sie syden
vnd gibs in die schüssel
vnd strewe zucker daruff
das heyß caleus alßo mach auch andere milch ob du tottern darzcu thun wilt