DGK.txt

ditz ist ein schoene mere genuck wie ein ritter entnomen kleider truck.
ein ritter der het michel gut
und dabi also schwachen mut
daz er entnomeneu kleider truck.
er hete kleider genuck,
dinen wolt er an sich legen niht.
do ergienge ein so getan geschiht
daz er den spot dar umb enpfienc
der im nach an sin ere gienc.
er leit an sich entnomen gewant
und reit da er mangen ritter vant.
die machten vreude und spil
und guter kurzewile vil,
sie waren hoveliche vro.
ze jungest chom iz also
daz sie zerren begunden
swaz si an ein ander funden.
da waz der ritter allez mit
und half in zerren nach ir sit,
der ie gewant hete entnomen.
dar warn ouh dar mit im chomen
der gewant man an im zarte:
die müete daz vil harte
daz sie ir kleider zerren sahen.
da begonde im zu gahen
ein ritter zorniklich und sprach:
< sit ich euch dunke so swach
daz ir mir lat zerren min gewant,
weizgot, ir lazet mirz zehant.
ir habet wider mich getan.
swaz ich her nach gewandes han,
daz wil ich vor euch vrien:
lat mir die sukenien.>
do er dem die sukenien lie,
ein ander ritter dar gie
und zoch im ouch den rock ab.
er sprach:< swaz ich gewandes hab,
des gebitte mich nimmer mere.
mich müete daz harte sere
daz mir min rock gezerret ist.
euch sint nach dirre selben vrist
min cleider immer vremde.>
< lat mir bruch und hemde>,
sprach der dritte,< daz ist min.
wes solt ich nu so nerrisch sin
daz ich euh daz mine lieze?
swie harte ez euh bedrieze,
ir lat mir hemde und bruch!>
iz wer hose oder schuch,
sie namenz allez widere.
si wurfen in dar nidere
und machten in mit alle bloz.
swie in des dienstes bedroz,
er musten ie doch liden,
sine woltens niht vermiden.
die ritter lieffen alle dar
und namen siner note war
und vragten was im were.
do sagte man in daz mere
daz er vremde cleider vûrte
und die sinen ninder rurte;
des pflag er alle sine tage.
< so lazze wirs ane klage>,
begundens allesamt jehen,
< swaz im hie leides ist geschen.>
sust wart er zu uneren
und muste dannen cheren
unwerder danne er e was.
swie koum er vor der not genas,
daz must er lazen ane zorn.
sust het er beidenthalp verlorn:
er waz unwerder danne e,
man lehe im ouch niht kleider mê.
dem ritter tut geliche
ein edel vrowe riche
die got vor mangem wibe
an sinnen und an libe
mit tugenden hat gekroenet
und in allen wis geschoenet,
und ir git guter sinne vil,
der si doch niht geniezen wil.
als ir der besten einer gert,
der wol ir minne were wert,
so kert siz zu ungewinne
und lezzet alle ir sinne
und alle ir wisheit under wegen
und wil ot vremder sinne pflegen.
sie nimt in niht in ir mut
wan als die andern dunket gût,
vor den siz niht verhelen wil.
ir si wenich oder vil,
swaz die wellent, daz geschiht.
die minnet mit ir herzen niht.
si wil treuten und minnen
mit ander leute sinnen.
swer ir minne kan bejagen,
der sols ir nimmer danch gesagen,
sit siz an ir herze tut
und an ir liebe und an ir mut
und volget vremder libe mit.
die hat des ritters sit
der kleider hette genuck
und allez vremde kleider truck.
als im zu jungest geschach,
do man im die kleider abe brach
und er in schanden wart gesehen,
recht also muz ouch ir geschen
so si an ir selber sinne stet
und ir an den vremden misse get,
mit der ougen si gesach,
mit der munde si sprach,
mit der oren si vernam,
der hute si zu hute nam,
dem mute si da nach vur,
der libe ir libe hulde swur.
si entnam da willen und gunst,
sam tat si wisheit und kunst:
swen ir daz allez ab get,
wie eren bloz sie denne stet
sam der ritter von dem gewande!
noch grozer wirt ir schande
swenne si zu uneren wirt
und aller werdikeit verirt.
waz sol ein vrowe mere
swenne si wirt ane ere?
so sol man sich ir getrosten:
sie ist boeser danne die bosten.