021 Betts G - Bear Encounter - Text.txt

{Number = 021}
{Type = Text}
{Title =  Bear Encounter}
{Author = Asx̱ʼaak / George Betts}
{Clan = Kaagwaantaan}
{Source = Naish 1966:138–152}
{Transcriber = Constance Naish; Gillian Story}
{Orthography = RP}
{Dialect = Northern – Coastal – Angoon}
{Note = Line numbers are from the text collection version.}
{Page = 139}
1	Yées ḵáax̱ x̱at sateeyíxʼ áyú yaakw yíxʼ yéi jix̱ané;
2	asg̱eiwú yéi daax̱ané.
3	Áwé Ḵáacht áwé haa wduwax̱ách.
4	Tléil át yawugoowún asg̱eiwú;
5	át has nadux̱áchjin tugboat-ch.
{Page = 140}
6	Áwé wáa nanée sáwé tle yéi ḵuyaawaḵaa
7	«kʼé alʼóon nax̱too.aadí».
8	Áwé tle ldakát áwé alʼóon kei aawa.át.
9	Chʼa yá shayadaa át wutuwa.aadi yé áwé áxʼ g̱uwakaan wutuwajáḵ.
10	Tle éeḵde g̱unyéi x̱waayáa.
{Page = 141}
11	Chʼu yaa nx̱wayéini áwé sháchk káa daak x̱wadiyáa.
12	Tléiḵw áwé áa yagéi áwé; kx̱ashx̱á.
13	Tle yá sháchk káa daak x̱wadayaayí áwé Déilkʼi ax̱ keekánnáx̱ daak uwagút.
14	Tle áwé óonaa áwé yát awdlishát yá ax̱ niyaadé.
{Page = 142}
15	«Wáa sákwshé at nanée!» yóo ax̱ tuwatee.
16	«Wáa sáhé ḵuwanóok yóo…?»
17	Tle yéi x̱at yawsiḵaa
18	«Tleyéi yan hán!».
19	Chʼu tle «Tleyéi yan hán;
20	Tléil g̱unyéi eegútx̱iḵ.»
21	Tle ax̱ x̱ánde áwé g̱unyéi uwagút.
{Page = 143}
22	Chʼa du yáwu wé óonaa; tlákw at yaawayék.
23	Ax̱ x̱ánde yaa gagóot áwé tle yéi yaawaḵaa
24	«Ax̱ waaḵ ásgíwé chʼa g̱óot yéide wudig̱áat.»
25	Chʼu tle yéi «I ítde áwé x̱wsiteen xóots gúgu».
{Page = 144}
26	Chʼu tle yóo yawuḵaayí een áwé ax̱ díx̱ʼde ax̱wdlig̱een.
27	«Daa sáwé áx̱ kaawayaa – wé xóots?»
28	Chʼu tle du eedé yaa anx̱walg̱íni een áwé ax̱ yáx̱ wudigoot.
29	Chʼu tle kei ndagúdi een áwé Shnawtaan, Déilkʼix̱ siteeyi át, wudli.óon.
{Page = 145}
30	A lidíx̱ʼ áwé aawa.ún wé xóots.
31	Tle kei uwa.íxʼ wé xóots;
32	át sh kawdlixeet.
{Page = 146}
33	Éexʼ tle tléil ash wujaaḵ.
34	Chʼa g̱asgéet áwé déix̱ aanáx̱ hat aa jiwdi.át tsu haa eedé.
35	Tíxʼ een áwé yaa nx̱ayáan.
36	Ḵútx̱ kax̱waadúxʼ.
37	Kax̱akélʼx̱ áwé tléil yoo wux̱adláḵwk.
{Page = 147}
38	Wáa nanée sáwé at x̱waaxásh.
39	At únt, Déilkʼi ḵu.aa at únt.
40	Áwé át woosh kawdlixeet wé xóots ḵu.aa.
41	Wáa nanée sáwé yéi x̱at yawsiḵaa
42	«De tléixʼ áyá ax̱ jeewú yá atkaté.
{Page = 148}
43	G̱unyéi isheex dé;
44	chʼa wa.é sh káx̱ at gag̱idatée.
45	Tsu haa x̱einínáx̱ has wu.aadí tléil wáa sá utí;
46	chʼa tléixʼ ḵu.aa yá ax̱ jeewú á.»
47	«X̱át tsú tsu tléixʼ ax̱ jeewú á yá atkaté.»
48	Áwé tle g̱unyéi haa loowagúḵ.
{Page = 149}
49	Ax̱ shuká chʼas ax̱ x̱ʼéix̱ kei nashíx Déilkʼi.
50	Áwé yá ḵútlʼkw áayi kaanáx̱ áwé kei wujikʼén.
51	Áwé a ḵínx̱ wudzigeet.
52	Chʼu tle du keey kinaadé kawdziyeeḵ yá ḵútlʼkw.
53	Ax̱ tundatáani yéi yatee du x̱ánxʼ ayaḵasheex.
{Page = 150}
54	Chʼu yéi ax̱ tundatáani yatee «tléikʼ».
55	Áwé du x̱áni ayax̱wjixíx.
56	Du x̱áni ayax̱ashéex áwé aadáx̱ kei x̱waax̱útʼ.
57	Aag̱áawé tsu g̱unyéi haa loowagúḵ.
58	Yú xóots ḵu.aa aadé s yayikduwa.áx̱ch.
{Page = 151}
59	Yeiḵ too.áat áwé atkaté tsu yéi kawtusinee.
60	Haa een áa ḵux̱ wuduwa.át.
61	Áa ḵux̱ tuda.áat áwé chʼu násʼk yateeyi aa, chʼu násʼgináx̱ has woonaa.
62	Haa ítx̱ yaa s na.ádin chʼa yá dei káxʼ ḵu.aa áwé s woonaa.
{Page = 152}
63	Yéi áwé koogéi yá xóots daat át.