029 Nyman E - History of the Taku Yanyeidí - Original.txt

{Number = 029}
{Type = Original}
{Title = Tʼàkhú Yanyèdí Dàt Shkałnìk / The History of the Taku Yanyèdí}
{Author = Seidayaa / Elizabeth Nyman}
{Clan = Yanyeidí; Ḵaach.ádi yádi}
{Source = Nyman & Leer 1993: 10–34}
{Translator =  Weihá / Jeff Leer}
{Orthography = YNL}
{Dialect = Northern - Inland - Atlin}
{Page = 10}
1	Sítʼ áwé yú.á tle yû Tʼàkhú wât anaxh yan kawu.âyin—
2	Tlêł yisatìn gé wê Tʼàkhú wât?
3	{Tlêkʼ.}
4	Tle yû áwé anaxh yan kawu.âyin yú.á.
5	Tle yû shà
6	tle yû áxh kasixát
7	tle wé sítʼ áxʼ yê tîyi yé tle yû.
8	Tlêł wuduskú
9	tsu wé nânaxh.á â yê khutìyí
10	kha tsu wé îxnaxh.á.
{Comment = Break in text, line 11 appears to be skipped.}
12	A áwé wé khâxʼw shàn dáxhináxh has yatì.
13	Wê nânaxh.á à Kaxhtûk yû áwé duwasâkw.
14	Á áwé yìdát wê lodge át da.â.
15	Tle khúnáxh áwé a shagûn áwé i ìn kakkhwanîk.
16	Yá Tʼàkhú Khwân áwé hít áwé has ałyêxh yú.á.
17	Yâ a tuwâtxh Yanyèdí yû hà wduwasayi át hás,
18	á áwé a shagûn áwé.
19	Á áwé wé khâ shàn khúnáxh khà shâde háni yá uhân hás áwé,
20	Ghùch áwé,
21	hú áwé xhʼawduwawûsʼ,
22	du kèłkʼi hás kha du kîkʼ hás,
23	“Dà sáyá hítxh gaxhtułayêxh?”
24	yê áwé dàyadukhá yú.á.
25	“Ha wâ sáyá yatì,
26	wâ sáyá,
27	yán xhâwé wêt yan uwa.â,”
28	yê áwé xhʼáyákhá yú.á,
29	“á áwé hítxh gaxhtułayêxh.”
30	Á áwé tle a kâ khà łuyàwagúkh,
31	yâ xhútʼà tín dusʼûw xhá.
32	Wê yán tle kaduxhútʼkw, kaduxhútʼkw yîs khâxʼw.
33	[A tûnáxh áwé khuyawùł yú.á wé sítʼ.
34	A áwé tle] wé îxnaxh.á à áwé,
35	dà sáyá áyá.áxhch.
{Page = 12}
36	Xháchu
37	a dàdé ásíwé gàw wuduwatàn,
38	wê xhútʼà shâdáxh wuduwałʼîxʼi.
39	Tle dè chʼa yê tlêxʼ has du jì yê yatìyi xhútʼà áwé
40	a dàdé áwé [tuwdudzitì].
41	Àdé áwé khà sé duwa.áxhch,
42	tle wê sítʼ tûnáxh áwé dàk is.áxhch tle.
43	“Wâ sákwshêgé,
44	khà sé yáxh áyá khuxhà.áxhch,”
45	yê áwé xhʼáyákhá wê khâ,
46	wé îxnaxh.á à—
47	Nàda.êyà yû duwasâkw hú khu.a,
48	wê îxnaxh.át à à.
49	Á áwé, wé tlêxʼ à tsú, [wé Kaxhtûkxʼ yê yatìyi à],
50	wé a tʼâxʼ ghanúkch
51	wé sitʼàdé nàdàyi yé.
52	Wâ a dà yù tukdatân sáwé,
53	“Kʼe yan kakhasanùgú,”
54	yû áwé tuwatì yú.á.
55	Á áwé tle xhʼatuxh.ayîghi
56	yû dusâgun chʼâkw.
57	Yá dzískʼw,
58	tle yât naduxáshch,
59	[a ítnáxh à a ghatsdàdùgú áwé,]
60	khà xhʼùs wâ sa kułigê a yáxh,
61	kha yá dikînaxh.á,
62	á áwé yá khà xîsʼ yan shukùtànch.
63	Tle yû yatìyi yé,
64	tle khà xhʼètákw â kahèxh,
65	tle yât khu.a tle udukhâych dûx tin.
66	[Kʼûx łʼìdí áwé khênàxh udułyèxhjín.]
67	Tle yûtʼát kʼûxhʼ tin áwé tle ndukʼûxhʼch,
68	tléł hîn anaxh yaxh kùdà.
69	Á áwé àn át ana.átch yú.á
70	wé sîw tú.
71	Á áwé chʼas a dà yù tuwatánk.
72	De kayàní yê yà nanìn.
73	Tle wê chʼâłʼ áwé àwasʼúw,
74	tle adàkàwasʼéłʼ tle yû.
75	Àghâ áwé tsá wé xhʼatuxh.ayîghi
76	tle a dàt akawsi.áxhw tle yû,
77	tle kʼadên.
{Page = 14}
78	Tle wé Tʼàkhu àdé nàdàyi yêde áwé ajìwanákh tle,
79	tle a tayìt áwé włihàsh tle.
80	Dà sáwé tsû,
81	awsitìn wê Nàda.êyà.
82	“Chʼa ghuna.át áyá anaxh hàt wułihásh.
83	Yàkw yíde yì ługúkh,”
84	wé du kèłkʼi hás áwé yê s áyáwsikhà.
85	Tlâkw áwé a kàdé aduxhâ tle,
86	wuduwashât tle.
87	Ha wê Nàda.êyà wakhshiyìt dutî áwé,
88	“Á ásíyá khuyatì wê sítʼ tliyànaxh.á,”
89	yê yàwakhà.
90	Àghâ áwé tle du gùxhú,
91	kha hú, wê Nàda.êyà,
92	tle dà sákwshé yàkwxh wududliyéxh.
93	Tle wé sitʼ kanaxh áwé tle awsixâtʼ wé gùxh, tle yû.
94	Dà sáyá tsû yá nânaxh.á gwâwé chʼu tle â yáxh yatì,
95	yankát áwé uwadâ.
96	Wé Kaxhtûk,
97	Kaxhtûk,
98	wé khâ shàn khu.a áwé
99	Xûts yû dusâgun,
100	Xûts.
101	Dà sáwé-chʼa tlákw gíwé khùtîsʼ,
102	chʼa tlakw khùtîsʼ.
103	Dà sáwé yû dikînaxh.á.
104	“Kʼe a yáxh anayiłghìn.
105	Chʼa ghuna.át áyú,
106	chʼa dà sáyá,
107	chʼu chʼâkʼ,
108	chʼu yêł gwâwégé áxh yà ndakhín.
109	Tléł khu.a áyú a yáxh axh tuwâ utí,”
110	yû áwé xhʼáyákhá.
111	Tle yânáxh tle áwé awsixâtʼ wé yàkw tle.
112	“Tle łingit áyá a yáxh yatì,”
113	yû áwé khuxhʼáyákhá yú.á.
114	Tle wê Tʼàwákh Êxhʼi yû duwasâgu yé
115	tle wê áxʼ tle hîni ìkh has atân áwé,
116	tle has atʼîk tle.
117	Chʼa wê xhútʼà dàdé áwé,
118	gàw wuduwatàn.
119	Dà sáyá tsú łingit gwâwé.
{Page = 16}
120	Àghâ áwé Nàda.êyà áwé yê yàwakhà,
121	“Tlâxhwayè,”
122	tle wê tlêxʼ à tsú tle “Tlâxhwayè.”
123	“Hello,” yû áwé has xhʼáyákha.
124	Àghâ awê,
125	wé Nàda.êyà tle
126	du ìn kadunîk wé xhútʼà,
127	tle dè chʼa yá tlêxʼ khà jì yê yatìyi at áyá
128	shâdáxh wùłʼîxʼ.
129	Xhútʼà áwé wé yàkw yít [ał.ât].
130	Wé sítʼ àn ghadusʼûw yís áwé,
131	yàkw yît ał.ât.
132	A áwé tle shàwât gùxh du jìt kawduwakhâ,
133	wé Nàda.êyà khu.a.
134	Heʼ, xʼûłʼ yáxh at yatì.
135	Wé łingît tlêł wuduskú wé îxnaxh.á [â yê khutìyí].
136	Àghâ áwé yú.á,
137	wé shàwât gùxh du jìt kadukhâ,
138	tle xʼùn sdágâwé khà xháni uwaxhî.
139	A dà áwé yù has xhʼałi.âtk wê Xûts kha wé Nàda.êyà,
140	wâ sáyá kghwatî.
141	Tlêl xhâyá àdé sîtʼ tayìnáxh yù khùnaxhłihashgi yé [yàkw tín].
142	Àghâ áwé tle Nàda.êyà,
143	tsu chʼa uhân hás áwé Ghùch áwé,
144	tle yê yàwakhà,
145	“A dà áyá yù tuxhàtánk.
146	Á yê kkhwasanî.
147	Tléł sítʼ â yê kghwatì.”
148	Chʼa yèsú chʼuł yêl du.àxhjí ayû,
149	wê shàwát gùxh du jìt kawduwakhâ wé xhútʼà dasêxʼ.
150	Yàkw yít dus.â.
151	Wé khîsʼ kát dàk has du ìn wułihásh,
152	tle tsu anaxh kè gaxhdusxâtʼ wé yàkw.
153	Àghâ áwé wé khâ,
154	khâ gùxh du jìxʼ [yê yatì].
155	Tle kàxh asèwałʼîxʼ wê Nàda.êyà khu.a,
156	tłe wê sítʼ kanaxh awsixâtʼ tłe yû
157	wê kàxh asèwałʼîxʼi à.
158	Ách áwé Yakwdèyí yû duwasâkw
{Page = 18}
159	wé sitʼ kanaxh awusxâtʼi yîyich.
160	Chʼu yìdádidé yê tuwasâkw Yakwdèyí.
161	Áwé yânáxh tle,
162	tle wê Yakwdèyínáxh,
163	de wé shé tle yanaxh kàwaxât
164	wé gùxh shèyí.
165	Tle yatʼàyi hîn ûsh â yaxh kawdudzixâ
166	tle yê áwé
167	tle shadaghátch,
168	tle shadaghátch wé sítʼ tle.
169	Àghâ áwé wé Tʼàkhú,
170	wé Tʼàkhú Khwân Sítʼi
171	yû áwé tùsâgu,
172	tle wé dâghi dàkh uwałʼíxʼ tle,
173	tle chʼa àxh shadaxhêch yàdáchûn tle,
174	chʼu tle anaxh áwé tle yû,
175	tle wùch xhùt yaxhdagùwu yís áwé.
176	Ách áyá tle chʼu Juneau-dáxh à khu.ù
177	chʼa yâ dâkh káxʼ yê à yatì,
178	Teslin,
179	kha yât, kha wé Atlin.
180	Á yê has du ìn kaxhanîk,
181	ha wê dlèt khâxh has satìyích khu.a áwé
182	tlêł has du dà yà khushùsgé.
183	Áyá yá boundary line chʼa yê wùch ghunayâ hà włi.ât,
184	yû áwé s du ìn kaxhanîk.
185	Àghà áwé yú.á
186	yan wududliyéxh wé hít,
187	wé Yán Hít.
188	“[Hàw,] ha wâ sáyá a kàxh khugaxhdusâ?”
189	yû dàyadukhá wé Xûts.
190	Ha Xûts kha Łtàdutìn
191	yû áwé dusâgun wé khâ.
192	Àghâ áwé yú.á tle yê yàwakhà,
193	“Wâ hà naxhdusâgut sáyá,
194	Yán Hít xhâwé yê yatì.”
195	Ách áyá Yanyèdí áyá uhân,
196	Yanyèdí.
197	Ách áyá Yanyèdí, wé khâxʼw,
198	uhân khu.a áwé Yanyèdishâ.
199	Á áwé chʼù yìdádidé áxh axhałghin nìch
200	wé shà tle yû dikî áwê.
201	Tle yû áxh káyáxát,
202	wé sítʼ áxh kaxádi yé,
203	yê áwé axh ìn kadunìgín.
{Page = 20}
204	Adáxh áwé—
205	wé tlagù hídi àxh dukêłʼ
206	chʼu ghuna.à a ìtí dułyéxh.
207	Á áwé axh àt áwé—
208	Chʼâkw tlêł nèłxʼ yát du.èxhín.
209	Chashhít
210	khà ít yû nàłiyê
211	áwé áxʼ tʼakwanêyi du.èxh.
212	Áwé wé yîs à Yán Hít â yà ndułyéxhi áwé
213	wê axh àt â khuwdzitì.
214	Yá Yán Hít áxh dusxatʼxʼi yé
215	tle dè yáxh yatì tle,
216	A yàxh áwé â khuwdzitì
217	yan dułyêxh wé hít
218	de yánde yà nanìní áwé
219	Tlêxʼ dís áwé
220	tlêł át yù ùgútgun chʼâkw,
221	wê tʼakwanêyi wdu.ùwú.
222	Adáxh áwé wé yìwân hás,
223	shàtkʼâtskʼu áwé khuwdzitì.
224	Du tlâ tin nèł a.ât,
225	tlêxʼ dís shunaxîx áwé
226	â nèł wududzinúk wê Yán Hít.
227	“Ha wâ sáyá gaxhdusâ?”
228	yê áwé dàyadukhá wê yîs à Łtàdutìn—
229	wé chʼâgu àyí de wùnà.
230	Àghâ áwé yê yàwakhà,
231	“Ha wâ naxhdusâgut sáwé
232	Dèyaxhshâ yû xʼwán yisá,
233	wê Yán Hít Dèyí yàxh
234	â khuwustìyích áwé.”
235	Yanyèdí Yátxʼi áwé.
236	Áwé wa.é tsú Yanyèdí Yátxʼi áwé,
237	khà yâ łikhʼêyi át áwé.
238	Tle yú Queen gúshé tsú du yádi
239	khúnáxh yê áwé yì xhʼałitsìn,
240	Yanyèdí Yátxʼixh yì satìyí
241	Kʼe wé axh sáni du sàyí i yát àwatî,
{Page = 22}
242	Wèhá.
243	Tlaxh xʼêghà dikîxʼ áwé yê iyatì,
244	chʼa łdakát yá Yanyèdí Yátxʼi
245	yá Tʼàkhú kàxh áwé.
246	Ách áwé axh tuwâ sigû yisatìní
247	yá i shagûn,
248	àdé yû kawdiyayi yé.
249	Tle chʼa wâ yikuwâtʼ sá [khuxhastìyí]—
250	tsu chʼu tlêł chʼa tlèxh áyá khùxhastí,
251	tsu i ìtikhâch áwé kghwatîw.
252	A yíxh ûsh kè iyawduwaxhâ [wé Tʼàkhú]
253	kha yâ łdakát át xʼúxʼ kàdé yà kakghishaxît.
254	Àghâ áwé
255	chʼu wé uhân i tlâ chʼu ł yisikuwu à—
256	chʼa łdakat gaghisakû ya Tʼàkhûdáxh
257	wâ sáyú ikawdayâyi.
258	Àghâ xʼúxʼ kâ yê kghì.ù tle khúnáxh
259	yì xhʼałatsìní áwé—
260	uhânch yê tuwasâkw,
261	wé Łingítxh hà satìyí.
262	Chʼa łdakát wé Yanyèdí Yátxʼi,
263	á áwé xhʼałitsìni át áwé yê yatì.
264	Tlêł chʼa àdùch sá i yàdé jiguxhsagù,
265	àdé sh gùní khudatîyin chʼâkw.
266	Chʼa yû diyínde i ît xhʼawdutàní,
267	á áwé sh tûxh áwé dusnîgun.
268	Á yê áwé iyatì.
269	Kʼe wê axh sáni,
270	xhʼałitsìni sà áwé yê yatì
271	wé Wèhá,
272	i jìt àwatî.
273	Yá Yanyèdí Yátxʼixh isatìyí
274	dikîxʼ áwé yê iyatì,
275	i sàyí tlaxh khúnáxh [xhʼałitsìn].
276	Á áwé yê dàyaxhakhá wé shàwát.
277	Kʼe yû Queen àdé,
278	kha yû King George àdé du yâ áyáduwanêyi yé,
279	tlêł àdé chʼa àdûch sá chʼa wâ sá has wùnaxhsikhàyi yé,
280	tle khúnáxh yê áwé yatì wê Yanyèdí Yátxʼi,
{Page = 24}
281	kha wê Yanyèdí,
282	yá Tʼàkhú kàxh áwé.
283	Á ách áwé axh tuwâ sigû yisatìí
284	wé àxh i shagûn khuwdzitìyi yé,
285	yâ uhân hà tûnáxh.
286	Áyá tlaxh xʼêghà áyá łidzî
287	áyá yìdadi khâwu ùn yù xhʼaduł.átgi.
288	Áyá chʼâkw áyá àghâ,
289	chʼuł dlèt khâ khùghastìjí
290	àghâ áwé
291	wùch yâ áyádunêyin.
292	Hàw, Yêł áwé wa.é,
293	axh sáni sàyíxh isitì.
294	Xhát áwé Ghùch yê xhat yatì.
295	Yê daxh kàwahayi khâ áwé
296	wùch yàghâ tułanùgún.
297	Àghâ áwé wé hà yátxʼi khúnáxh
298	dàtuwtusinîgu à hà sàyí,
299	hà łîłkʼw, hà tlâkʼw,
300	hà kâk.
301	Yê áwé yâtʼà sà áwé,
302	xhʼadudlitsìni sà áwé,
303	wùch yàghâ has ditì
304	has du jìxh áyá tùtì.
305	Yakʼê wé axh sáni àdé du sàyí i jit àwatiyi yé,
306	tlêł tsu tlêxʼ wâ sá utí gúshé.
307	Itʼs good,
308	wé Wèhá yû iwdusàyí.
309	Tlaxh xʼêghà áwé yà khusgêyin
310	wé axh sáni,
311	wé Wèhá.
312	Xhwasakûwun tle kʼadên.
313	Áyá yìdát chʼu khunâ
314	tsu Ghùch áyá xhát
315	ha wé khâ tsú Ghùch,
316	chʼa àn áwé chʼu tle wùch xhánxh khà łudagùkh.
317	Adáxh áwé yù at kùtìk ghanígún áwé
318	tle yê xhat yanduskhêch,
319	“Yá axh àyí axh yádi tsú du yâ sà sá.”
320	Ha wâ sáyú kkhwasâkw?
321	Yá du îsh Ghùch,
322	yá du tlâ tsú Ghùch,
323	wé shàtkʼátskʼu tsú Ghùch.
324	Ha wâ sáyú kkhwasâkw?
325	Khû digêkh, see?
326	Á áyá axh tugêdexh sitì,
{Page = 26}
327	kha yá yìdát àdé yà at kundayen yé.
328	Chʼâkw wâ sá à wunìyí—
329	tle chʼu shàtkʼatskʼuxh xhat satìyídáxh
330	xhwasakûwun—
331	yá khà ìtí dà sá,
332	kʼe axh dà.át sʼêłʼi yât,
333	chʼa wâ sá ûsh xhat wùnì,
334	tle kagaxhduchâk áwé,
335	chʼa axh dakhêsʼi,
336	dà sá tle yê.
337	Tlêxʼ tâkw shuwuxìxí áwé dàk gaxhduł.ât,
338	dàkhw.à sá Ghùchxh sitìyi à,
339	“I tlâkʼw ádi, i tlâ ádi,”
340	yû khà jixhùxh à kduł.atch tle yû.
341	A kàdé áwé kandughîxʼch,
342	“Yá du kakhʼanâxháni,
343	du kanîxhʼi yis.át áwé yâxʼ,”
344	tle tlêxʼ tle yû.
345	Áyá yìdát tléł yê at utí,
346	khushtuyáxh tle khûxʼ [chʼa àdû sá wâ sá wunìyí].
347	Á áyá khà ìn ûsh àdé yì.àdí áwé,
348	Tʼàkhú yíde,
349	tle yan shuwutàní áwé,
350	tle axh xhʼêdáxh kakghishaxît.
351	Tlêł axh tuwâ ushgú
352	yá axh yátxʼi ghèghí—
353	a xhù.à de kèjín jinkàt tâkw kha kèjínxh daxh sitì—
354	tlêł axh tuwâ ushgú khut has awughîxʼi
355	yá àdé khutùstîyi yé.
356	Ách áyá chʼa xhâch tsú át axhwdishî
357	hà ìn tlêxʼ dís iwuyèxhí,
358	if you got any chance.
359	Chʼâkw chʼu tle wé àghâ
360	wé Nàda.êyà kaxhłanik yé,
361	khudzitìyi át áwé â yê tîyin yú.á,
362	wé Tʼàkhú wát.
363	Á áwé wùch tugêt has xhʼawdli.át.
364	[Chʼâkw] tlêł khwasatínch
365	wé Wasʼasʼê.
366	Tlêł yisakú á tsú gúshé?
367	Chʼu tle wé Kèshixjixʼà kìkâ áwé yê yatì.
368	Tle yû shà tle yû yatì,
369	tle yû a yáxh yàwashiyi yé yáxh yatì,
370	[Wasʼasʼê yû duwasâkw].
{Page = 28}
371	Á áwé wé Kaxhtûk nânaxh.á à,
372	áwé wùch kâ khà łuyawdigúkh,
373	wé khudzitìyi át,
374	tle has khuwdudlihà.
375	Á áwé kàxh asèwałʼîxʼ wêt tle,
376	tle yá a shàyí tle wé Tʼàkhú kanaxh diyâde kè àwaghíxʼ.
377	Kʼe yât ûsh tle yû,
378	yû yindatân áwé,
379	wé du shàyí.
380	Yá du kasán khu.a tle yá khà xhikshá tle,
381	tle às tle yû â yù kawsi.â,
382	asyâtxʼi.
383	Yât, kàxh sawduwałʼîxʼi yé,
384	yá du łèkachûxhʼu yínáxh áwé wé hîn nàdà tle yû.
385	Áyá tle yá a têxhʼi khu.a áwé tle àxh kè [àwaxhútʼ],
386	tle wé Tʼàkhú yít àwaghíxʼ.
387	Tlêł ułgé wé xʼâtʼ,
388	gwáł chʼa yâ room chʼa yê gugênkʼ a yânáxh kułigê,
389	tle yû áyá káyáxát tle,
390	chʼas chùkanyâtxʼi áwé a kâ wsi.à.
391	“Tʼàkhú Têxhʼi yís áyá,”
392	yê áwé yàwakhà,
393	wé Wasʼasʼê.
394	Hú khu.a áwé tle wê
395	áxʼ yê yatìyi yé, wé Wasʼasʼê
396	tle àdé yê wdzigìt tle.
397	Á áwé wê axh wû yê hà dàyakhâyin,
398	tle chʼu yîs yadákʼwxh satìyídáxh áwé yú.á
399	du ìn kadunîk chʼu shugu datî,
400	Wâ sáyú tléł àxh yù ułháshk
401	wé Tʼàkhú Têxhʼi?
402	Tle chʼu yìdádidé gíwé â yê yatì.
403	Itʼs been a long time tlêł khwasatínch.
404	Chʼu tle wé Tʼàkhú tle a dagiygé áwé tle áwu.
405	Wê Wasʼasʼê khu.a áwé
406	tle wé áxʼ yê yatìyi yé,
407	kêtladi kʼwatʼi kaxh áwé át ana.átjin chʼâkw yú.á.
408	Á áyú du ìn kaxhanîk wé dlèt shàwát,
409	yê shákdêwé hà dujîyin,
410	chʼu tle chʼas xhât kâxʼ khutudzitì,
411	kha dlìy kâxʼ.
412	Tlêkʼ.
413	Łdakât yêde áwé yà kdusxúkch.
414	Wé tʼá, khà yâ łikhʼêyi át áwé wé tʼá yú.á,
415	dusxùgún,
{Page = 30}
416	a yuwàxhʼîshi,
417	a kùwú,
418	a shàyí,
419	a díxhʼi.
420	Khúnáxh a xhʼîshi khu.a áwé tle káxh dułxʼâsʼin.
421	Tâkw yìn áwé,
422	dàkhw.à sá
423	wâ yatìyi yêxʼ sá a shàyí kadułkéłxh,
424	dustâych.
425	Ha dà sáyá êłʼxh has awułyèxhín.
426	Ha tle chʼu chʼâkw khu.a shákdê tlêł wuduskûwun êłʼ.
427	Àghâ áyá axh wûch axh ìn kanik yé khu.a áwé,
428	yê sh kałnìgín,
429	wé Kèshixjixʼà jighè áwé yú.á anaxh yan yakw.ùkhùxhch,
430	tle wé té khʼwátl tle gán a dàt du.àkch.
431	Yê áwé daxh kudigê,
432	yê kwdiyâtʼ
433	wê a síxwti yê kwditlâ.
434	Át yandułkitʼch
435	yú.á.
436	Tle wé dèkî tle yû,
437	wé yaxhʼâkdáxh áwé yê dàduné.
438	Wé êłʼ hîn tle shàdułtsʼîtʼch wé té khʼwátl tle.
439	Tle yû a dàdé ùdu.àkch tle,
440	uł.úkch, uł.úkch.
441	Kàxwâ a kàdé yà kagaxhlakuxun.
442	Chʼu tle a kát kawułkùxú áwé
443	dàk wùdułkîtʼch yú.á,
444	ghas.âtʼi yís.
445	Wé shâ khu.a áwé dzískʼu kułûxʼsháni
446	yaxh has awùs.úxch tle,
447	daxh udusxúkch tle kdułkʼwâtʼ tle yû.
448	Maybe a pound of salt, maybe more,
449	all depends on how much salt.
450	A ká tle yê kunaskákch
451	wé té khʼwâtl tle.
452	Àghâ áwé tle a kàxh tle kaduxâsʼ wus.âtʼi,
453	tle wé at kułûxʼsháni tûde tle,
454	tle yaxh yà sháyákdułhíkch wé êłʼ xùk.
455	Yê áwé has awuskûwun.
456	Hàw, ya tlêkhw, wé xákwłʼi áwé kdusxùk,
457	kha gàwákh,
458	tínx wé sʼìk ìxhí xhù,
{Page = 32}
459	dà sa wùch ghunayâde tlêkhw.
460	Wé xákwłʼi chʼu tle
461	tle yû áwé yú.á—
462	axh tlâch áwé axh ìn kanìgín
463	tle yâtʼát yáxh kuskàk.
464	Tle yû áwé tle a tayìxh shìy dułyèxhch
465	tle khûk yáxh tle yû.
466	Wudustàyí,
467	tle kawutʼîxʼi áwé
468	tle yû a kàdé kduchâk tle,
469	tle yû łàkhʼasgi yáxh [kadustʼâk] tle yû,
470	tle daxh dusxùk tle wé gàwákh kha wé xákwłʼi.
471	Tâkw yìn áwé kadułkéłxh.
472	A xhùshûgayi áwé wé gàwákh
473	yê dàduné wé atxhá ítde.
474	Wé sh kadułnìgí—
475	àghâ khu.a sʼé tape khà jì yê yatì—
476	sh kałnìk shû aghakhîch.
477	Á wé yîs khâxʼwch áwé yê dànê nìch wé xákwłʼi,
478	yá xákwłʼi ghaduxhà yís.
479	“Chʼa yâxʼ xhʼaynákh wé sh kałnìk,”
480	yá xákwłʼi duxhâ nìch yú.á.
481	Hàw, yá xhât yan ghadusxúgún áwé
482	shà kàdé yâde ana.átjin wé Atlin.
483	Tsáłk áwé yê dàduné,
484	kha sʼàxh, tawê, jánwu, watsíx.
485	Łixhêdli khâ áwé dzískʼw ajákhxh.
486	Tle dusxùk,
487	tle łdakát yan wudusxùgú áwé
488	[wùch shukàdé duyâ nìch.]
489	Wé old village Tatlenxʼixhù yû duwasâkw, Tatlenxʼixhù.
490	Áyá dà sáyá,
491	tawê dlìyí, sʼàxh dlìyí, tsáłgi dlìyí,
492	yê wùch xhʼâxh áyá dus.ìyín chʼâkw.
493	Yê áyá has hà uwajî,
494	chʼu tle chʼas tlêxʼ yatìyi át kâxʼ áyá khutùstîyin.
495	[Tlêkʼ,] tle wùch ghunayâde.
496	Axh chànch áyá axh wakhkâxʼ yê wsinì.
497	Heʼ, jánwu ìkh kawtuwajéł,
498	wé Tʼàkhú yík.
499	Yá a chíghayi yû áwé duwasâkw,
500	yèsú yaxh daxh ayawłihíts,
501	chʼu tle wé gishù xâsʼi yaxh daghàtì.
502	Hîn tâdáxh daxh awłixásʼ tle,
503	tle wé a shàyí tsú.
504	Àghâ tsá sùkh gwêł tû akàwachák tle.
505	“Yû ênà kàdé nastí,”
506	yê xhat dàyakhá.
507	Khúnáxh áyá yìdát yá January yát áwé a káxh xhat xhʼèwawûsʼ,
508	“Hàt à ła.á wé at chíghayi,
509	kha wé a shàyí.”
510	Chʼa khʼwátl ká akàwachák,
511	awsitâ tle.
512	Hîn yáxh î áwé—
513	Itʼs quite a change from other things, eh?
514	Ha yê áwé khutùstîyin,
515	yê áwé dàyaxhakhá.
516	Łidzî khu.a áwé
517	wé tlêł a yáxh akùshxìdí xhâ.